நான் பயணம் செய்த இடங்கள் :: குருவாயூர் யானை கொட்டாரம் :: நெல்லைத்தமிழன்

 

 

நியூஸ் ரூம்

ஆமாம்..  எங்கே போச்சாம்?

நல்ல செய்திங்க....

நல்ல செய்திக்கு ஆதாரம்...

================================================================================================================

நான் பயணம் செய்த இடங்கள்

நெல்லைத்தமிழன் 

(மார்ச்-2023) குருவாயூர் யானை கொட்டாரம் – பகுதி 1 / 3 

சமீபத்தில் குருவாயூர் சென்றிருந்தேன். என் மனைவியின் உறவினர்களில் சிலர், குருவாயூர் கோவிலில் நாராயணீயம் முழுவதும் பாராயணம் செய்யப்போவதாகத் தெரிவித்திருந்தனர். அதனையொட்டி, மூன்று நாலு நாட்கள் குருவாயூரில் தங்கி, சுற்றியுள்ள கோவில்களையும் காணலாம் என்பது பயணத் திட்டம். குருவாயூர் கோவில் அருகிலேயே ஒரு லாட்ஜில், குளிர்சாதன வசதி இல்லாத அறைகள் 5, 4 நாட்களுக்கு book செய்தோம். கடைசி நேரத்தில் என் மனைவி வராததால், நான் மட்டும் அவர்களுடன் சென்றிருந்தேன். அந்தப் பயணம் பற்றிய பதிவல்ல இது.

அந்தச் சமயத்தில் ஒரு நாள் மதியம் சாப்பாட்டுக்குப் பிறகு, சிறிது ஓய்வு எடுத்துக்கொண்டு, யானைக் கொட்டாரம் பார்க்கலாம் என்று திட்டமிட்டிருந்தோம்.  அதற்குப் பதிலாக மதியம் 2 ½ மணிக்குக் கிளம்பி, தன்வந்திரி கோவில், திருவித்துவக்கோடு மற்றும் திருநாவாய் திருத்தலங்களைச் சேவிக்கச் சென்றுவிட்டோம். மறுநாள் அதிகாலை 4 மணிக்குக் கிளம்பி, இராமர், பரதர், லக்ஷ்மணர் மற்றும் சத்ருக்னர் கோவில்களைத் தரிசிக்கச் சென்றோம். மறுநாள் ஏகாதசி. அன்று மாலை நாங்கள் குருவாயூரைவிட்டுக் கிளம்புவதால்,  நான்கு கோவில்களைத் தரிசித்துவிட்டு மதியச் சாப்பாட்டை முடித்துக்கொண்டு, 3 ½ மணி வாக்கில் யானைக்கொட்டாரத்திற்குச் சென்றோம். அதைப் பார்த்து முடிந்ததும், குருவாயூரில் இருக்கும் திருவேங்கடநாதன் கோவிலுக்கும் பிறகு பார்த்தசாரதி கோவிலுக்கும் சென்றுவிட்டுத் திரும்பினோம்.

அஹோபில யாத்திரை கொஞ்சம் நெடுந்தொடராக இருப்பதால், அயர்வைப் போக்கும் விதமாக, அந்தத் தொடரின் பாதியில் இரு வாரங்களுக்கு வேறு ஏதேனும் டாபிக்கில் படங்களுடன் கூடிய பதிவு அனுப்பலாம் என்று தோன்றியது. இதற்கு முன்பு பயணம் செய்த வெளிநாடுகளில் எடுத்த படங்களைப் பகிரலாமா என்று தோன்றியது. எதைப் பகிரலாம் என்று யோசித்துக்கொண்டிருந்த போது, தற்போது சென்ற குருவாயூர் பயணத்தில் கண்ட, யானைக் கொட்டாரத்தைப் பற்றியே பதிவாக எழுதிவிடலாம் என்று நினைத்து எழுதுகிறேன்.

குருவாயூர் கோவிலில் யானைகள் உண்டு. தினமும் சீவேலி எனப்படும், குருவாயூரப்பனை முதுகில் தாங்கி, கருவறையின் வெளிப்பகுதியில் (அதற்கும் வெளிப்பகுதி, அதாவது த்வஜஸ்தம்பம் இருக்கும் பகுதி) நான்கு யானைகள் ஊர்வலம் வரும் நிகழ்வு நடக்கும். குருவாயூரப்பனின் திருவுருவத்தை முதலில் வரும் ஒற்றை யானைதான் தூக்கிச் செல்லும்.  சில நாட்களில் சீவேலி நிகழ்வு ஒன்றுக்கு மேற்பட்ட முறை இது நடக்கும். பக்தர்களும் கோவிலுக்கு யானையை நேர்ந்துகொண்டு வாங்கிக்கொடுப்பதும் வழக்கம். அப்படிச் சேர்ந்த யானைகளைப் பாதுகாக்க, அங்கு முன்பிருந்த சிற்றரசரின் (புன்னத்தூர்) பத்துக்கும் மேற்பட்ட ஏக்கர் நிலத்தில், யானைக் கொட்ட டி ஒன்றை அமைத்திருக்கிறார்கள். அதில்தான் 40-60 யானைகள் இருக்கின்றன. ஓரளவு காட்டுச் சூழலுடன் அமைந்திருக்கும் இடம் அது.  யானைகளைப் பாதுகாக்கும் பாகன்கள் தங்குவதற்கான இடங்களும், தினமும் யானையைப் பராமரிக்கும் சூழலையும் கொண்டுள்ளது அந்த கொட்டாரம் என்று அழைக்கப்படும் இடம்.

வருடத்திற்கு ஒரு முறை, குருவாயூர் கோவிலுக்கு முன்பான நெடும் பாதையில் (300 மீட்டர் இருக்கலாம்), யானைகளுக்கான ஓட்டப்பந்தயம் நடத்தப்பட்டு, வெற்றி பெற்ற யானைக்கு அடுத்த ஒரு வருடம் குருவாயூரப்பனின் திருவுருவை விழாக்களிலும் கோயில் திருச்சுற்றிலும் சுமந்துகொண்டு செல்லும் கௌரவம் கொடுக்கப்படும். இது பற்றி பின்பு எழுதுகிறேன்.

(இந்தப் படம் இணையத்திலிருந்து. ஓட்டப்பந்தயத்திற்காக யானைகள் தயாராக தங்கள் தங்கள் மாவுத்தனுடன் இருக்கின்றன இதைத் தொடர்ந்த படங்கள் கடைசியில் வரும்)

 யானைக் கொட்டாரம் (யானைகள் பராமரிப்புக்கான தோட்டம்) குருவாயூர் கோவிலிலிருந்து சுமார் 3 கிமீ தூரத்தில் உள்ளது. பொதுவாக கேரளாவில் ஆட்டோ ஓட்டுநர்கள் அல்லது மற்ற உடலுழைப்புத் தொழில் செய்பவர்கள், கொஞ்சம் அதிகமாக charge செய்கின்றனர். ஆனால் இந்த மாதிரி கட்டணம் ஒரே மாதிரி இருக்கும். நம் ஊர்போல, பேரம் பேசுவது, ஏய்ப்பது, நடுவில் தகராறு செய்வது என்ற பேராசை அவர்களிடம் பொதுவாக இல்லை. நாங்கள் தங்கியிருந்த இடம், கோவிலிலிருந்து 100 மீட்டர் தொலைவில் உள்ள லாட்ஜில். அங்கிருந்த ஆட்டோ ஸ்டாண்டிலிருந்து யானைக் கொட்டாரத்திற்கு 80 ரூபாய் ஆட்டோ சார்ஜ்.  கொட்டாரத்திற்கு நுழைவுக்கட்டணம் 20 ரூபாய்.  உள்ளே 50-60 யானைகள் இருந்தாலும், பல பாதைகள் அடைக்கப்பட்டிருக்கும். இதன் காரணம் பல யானைகளை பார்வையாளர்கள் பார்க்கமுடியாதபடி இருக்கும். அதன் தற்போதைய நிலை-மஸ்த் எனப்படும் பருவம், உடல் நிலை, பாகன்கள் அதற்கான பயிற்சி கொடுத்துக்கொண்டிருப்பது என்று பல்வேறு காரணங்கள் உண்டு.

ஒவ்வொரு யானையும் சங்கிலியால் கட்டப்பட்டிருக்கின்றன. அங்கிருக்கும் இலை தழைகளை கஷ்டமில்லாமல் உண்ண முடியும். இருந்தாலும் பாதுகாப்புக்காக அவற்றைக் கட்டியிருக்கின்றனர்.

யானை லத்திக் குவியல். பல இடங்களில் இருந்தது.  யானைதான், வனங்களில் மரங்கள் பெருகுவதற்கான அடிப்படைக் காரணம் என்று உங்களுக்குத் தெரியுமா? அதன் லத்தி மூலமாக செரிக்காத விதைகள் காட்டின் பல்வேறு இடங்களில் பரவுகின்றன.

பல யானைகளை பாகன்கள் உடலைச் சுத்தமாக்கி, அழுக்கைப் போக்கிக் குளித்துவிடுகிறார்கள். பார்க்க ரொம்பவே ஆச்சர்யம். தங்கள் சொந்தக் குழந்தைகளைப் போல பாகன்கள் யானைகளைப் பார்த்துக்கொள்வது மனதை நெகிழ்த்தியது.

எங்கு பார்த்தாலும் மரங்கள் அடர்ந்து இருப்பதால், காட்டுச் சூழ்நிலை இருக்கிறது. இருந்தாலும் ஒவ்வொரு யானையும் கட்டப்பட்டிருக்கின்றன.

ஒவ்வொரு யானையின் அருகிலும் தண்ணீர்த் தொட்டி. அதனால் தண்ணீர் மற்றும் உணவுப் பிரச்சனை இங்குள்ள யானைகளுக்கு இல்லை.  நுழைவாயிலைத் தாண்டியதும், யானைக்கு நாம் பணம் கட்டி பழம் போன்றவற்றை வாங்கிக்கொடுக்க நிலையம் போன்று ஒன்று வைத்திருந்தார்கள். நான் போன சமயத்தில் அங்கு எதுவும் இல்லை.

யானையின் பாதங்களில் விரல்கள் கிடையாது. யானையின் கால் நகங்களை(?) நல்ல ஒரு இரும்பு ஆயுதத்தால் சுத்தம் செய்தனர். எவ்வளவு கவனிப்பு, நாட்டில் வளர்க்கும் யானைக்குத் தேவையாக இருக்கிறது என்று நினைத்துக்கொண்டேன்.

ஒவ்வொரு யானைக்கும் பெயர் உண்டு. படங்களைப் பார்க்கும்போது நமக்கு ஆண் யானை, பெண் யானை என்று மட்டுமே அடையாளப்படுத்தத் தெரியும். ஆனால் அங்கிருக்கும் பாகன்கள், பார்த்த மாத்திரத்திலேயே இது தேவசேனா….. என்றெல்லாம் பெயர்களை அடுக்குகிறார்கள்.

நமக்கும் நல்ல உணவு வகைகளை அருகிலேயே வைத்து, சங்கிலியால் கட்டிப் போட்டிருந்தால், அந்த வாழ்வு ருசிக்குமா? யானையின் மனதில் அந்தத் துயரம் படிந்து கிடக்காதா? இதெல்லாம் மனதை அழுத்துவதால்தான், ஒரு சில நேரங்களில் யானை ருத்ரதாண்டவம் ஆடிவிடுகிறதோ?

நிறைய யானைகள், ஒவ்வொன்றும் குறிப்பிட்ட இடைவெளியில்.  குளிக்கும் யானையைத் தொட்டுப் பார்த்தேன். அதனுடன் புகைப்படங்களும் எடுத்துக்கொண்டேன்.  யானைக்கு பாகனைத் தவிர பிறர் தன்னைத் தொடுவது பிடிக்காதாம்.

பாக்கு மரங்களின் இலைபோன்றதைத்தான் ஒவ்வொரு யானை முன்பும் ஏராளமாக வைத்திருந்தார்கள். அந்த இட த்தில் வாழை மரங்கள், பலா மரங்கள் போன்ற பலவும் இருந்தன. ஒருவேளை யானை, அவைகளைத் தங்களுக்கு எப்போது தருவார்கள் என்று நினைத்துக்கொண்டிருக்குமோ? கேழ்வரகால் செய்யப்பட்ட உணவும் பழங்களும் இவைகளுக்கு அளிக்கப்படுமாம்.

ஒரு சில யானைகளைத் தவிர பலவும் திறந்தவெளியில் மரங்களுக்கிடையேதான் நின்றுகொண்டிருந்தன. மழை பெய்தால் அவைகள் எங்கே தங்கும்? காட்டு யானைகள் போல, மரங்களுக்கிடையே மழைகளுக்கிடையில்தான் அவற்றின் வாழ்வா?

எல்லா யானைகளும் கிட்த்தட்ட ஒன்றுபோலத்தானே இருக்கின்றன என்று எனக்குத் தோன்றும். (பிலிப்பினோஸ், ஜப்பானீஸ் பெண்கள் எல்லோரும் ஒரே மாதிரி இருப்பது போல). இருந்தாலும் ஒவ்வொன்றையும் நாம் கண்காணிக்க ஆரம்பித்தால் அவற்றின் வித்தியாசம் தெரியும்.

திகட்டுமளவு யானைகள் படங்கள் இந்த வாரத்தை ஆக்கிரமித்துவிட்டதோ? அடுத்த வாரம் சந்திப்போம்.