அக்கம் பக்கம் யாரும் இல்லா பூலோகம் கிடைத்தால் ..

 

சென்ற வாரம் எங்களை யாரும் கேள்வி எதுவும் கேட்கவில்லை. எனவே நாங்கள் சில சிம்பிள் கேள்விகள் கேட்கிறோம். 

1) இதில் எது உங்களுக்கு மிகவும் பிடித்த விஷயம் ? ஏன்? 

a ) வெயில் காலத்தில் நடுவே மழை 

b ) மழை காலத்தில் நடுவே வெயில். 

2) இவற்றிலும் உங்களுக்குப் பிடித்தது & ஏன் : - 

a) வெயில் காலத்தில், A/C போட்டுக்கொண்டு, மின்விசிறியையும் உச்ச வேகத்தில் சுழலவிட்டு, நிம்மதியாகத் தூங்குவது. 

b) குளிர் காலத்தில் ஸ்வெட்டர் + மஃப்ளர் எல்லாம் அணிந்து, கனமான கம்பளியையும், தலையோடு காலாகப் போர்த்திக்கொண்டு தூங்குவது. 

3) யாருமே இல்லாத ஒரு தீவில் ஒரு வார காலம் நீங்கள் மட்டும் சென்று தங்கவேண்டும் என்று ஒரு சுற்றுலா கம்பெனி ஒரு போட்டி வைக்கிறார்கள். சரியான நேரத்தில் உங்களுக்குத் தேவையான உணவு மட்டும் ஹெலிகாப்டரில் கொண்டு வந்து பரிமாறி பிறகு சென்றுவிடுவார்கள். தங்குவதற்கு பாதுகாப்பான அறை எல்லாம் உண்டு. ஆனால், இன்டர்நெட், டீ வி எல்லாம் கிடையாது. ( கிட்டத்தட்ட - 'அக்கம்பக்கம் யாரும் இல்லா பூலோகம் வேண்டும்' - என்று திரிஷா கேட்ட 'வரம்' என்று வைத்துக்கொள்ளுங்கள் - ஆனால் இங்கே அஜீத் கூட இருக்கமாட்டார்! ) உங்களோடு நீங்கள் எடுத்துச் செல்ல, உடைகள் தவிர்த்து இரண்டு கிலோகிராம்  பொருட்கள் மட்டுமே அனுமதி. கேள்வி என்ன என்றால், நீங்க தேர்ந்தெடுக்கும் அந்த இரண்டு கிலோ பொருட்கள் என்னென்ன? 

= = = = = = = 

KGG பக்கம் : 

மூன்றாம் வகுப்பு படித்த சமயத்தில் நிகழ்ந்த சில விஷயங்கள் ஞாபகத்திற்கு வருகிறது. 

என் பக்கத்தில் உட்கார்ந்த பையனின் பெயர் கோவிந்தராஜு. வகுப்பில் யாராவது திருப்பதி / பழனி / அல்லது ஊர் மாரியம்மன் கோவில் வேண்டுதலுக்காக மொட்டை அடித்துக்கொண்டு வந்தார்கள் என்றால் இவனுக்கு ஏக குஷி வந்துவிடும். 

அப்போதெல்லாம் வகுப்புக்கு வருகின்ற பையன்கள் - தலை மொட்டையாக இருப்பதைக் காட்ட சங்கோஜப்பட்டுக்கொண்டு தலையில் தொப்பி அணிந்து வருவார்கள். 

கோவிந்தாராஜு மொட்டைப் பையனுக்கு அருகே சென்று சட்டென்று மொ. பை  தொப்பியை உருவி தன் தலையில் வைத்துக்கொண்டு, " இஸ் ஷிஷ் டிஷ் வாஷ் கிரேஷ் .. " என்று வாய்க்கு வந்தபடி பேத்தல் செய்வான். ( அந்தக் காலத்தில் ஐந்தாம் வகுப்பு வரை ஆங்கிலம் கிடையாது. ஆங்கிலம் alphabets கற்றுக்கொண்டது எல்லாம் ஐந்தாம் வகுப்பிலிருந்துதான் ) பிறகு, அந்தத் தொப்பியை மொ பை தலையில் திரும்ப அணிவிப்பான். இதிலே அவனுக்கு அலாதி சந்தோஷம். 

அப்பா ஆடிட்டராக வேலை பார்த்த ஜெ மு சாமி ஜவுளிக் கடையில் புடவை / வேட்டிகளுக்கு விலை எழுதி உள்ளே வைக்கப்படும் சிறு அட்டைகள் - அதில் ஒரு பக்கம் பிள்ளையார் படமும் அதற்குக் கீழே விலை விவரம் எழுத கொஞ்சம் இடமும் இருக்கும். மற்ற பக்கத்தில், கடை பெயர், விலாசம். அந்த அட்டைகள் சிலவற்றை, அப்பா மதுரைக்கு ஆடிட் சென்றபோது (சில புடவை / வேட்டிகளுக்கு விலை தவறாகக் குறிக்கப்பட்டிருந்ததால்) - அந்த batch விலை அட்டைகள் எல்லாவற்றையும் அங்கிருந்து கொண்டுவந்து வீட்டில் வைத்திருந்தார். 

நான் அந்த அட்டைகளில் ஒரு பத்து எண்ணிக்கை எடுத்து, என்னுடைய புத்தகப் பையில் வைத்திருந்தேன். 

பக்கத்துப் பையன்கள், " இது எதுக்குடா ?" என்று கேட்டதும் எனக்கு சூப்பர் யோசனை ஒன்று உதித்தது. 

" என்னை யாராவது அடித்தீர்கள் என்றால், அடிக்கும் பையனின் பேரை இந்த அட்டையில் எழுதி, அதைக் கொண்டுபோய் என் அப்பாவிடம் கொடுத்துவிடுவேன். அவர் வந்து ஹெட் மாஸ்டரிடம் சொல்லி, ஹெட் மாஸ்டர் வந்து, என்னை அடித்த பையனை பிரம்பால் விளாசிவிடுவார் " என்றேன்.

அன்றிலிருந்து எனக்கு தனி மரியாதை. வகுப்பில் யார், யாரோடு சண்டை போட்டாலும் என் பக்கம் யாரும் வரமாட்டார்கள். 

ஒரு சமயம் நான் பாடப் புத்தகத்தை பையிலிருந்து வெளியே எடுக்கும்போது, அந்த விலை அட்டை ஒன்று தரையில் விழுந்தது. அதைக் கையில் எடுத்துப் பார்த்த கோவிந்தாராஜு, " ச் சே - இவரைப் பார்த்தாலே எனக்குப் பிடிக்காது " என்றான் அதில் இருந்த பிள்ளையாரைப் பார்த்து. 

எனக்கு ஆச்சரியமாகப் போய்விட்டது.  " பிள்ளையாரைப் பிடிக்காதா! ஏன்? " என்று கேட்டேன். 

" என்னுடைய பாட்டி சொன்னாங்க - எனக்கு ஒரு அண்ணன் இருந்தான், அவன் ஒரு வருடம் பிள்ளையார் பூஜைக்கு மறுநாள் - பிள்ளையாரை கிணற்றில் போடும்போது, அதனுடன் சேர்ந்து அவனும் விழுந்து செத்துப் போயிட்டான். அப்போதிலிருந்து நாங்க பிள்ளையார் சதுர்த்தி கொண்டாடுவதில்லை அதனால் எங்களுக்கு பிள்ளையாரைப் பிடிக்காது " என்றான். 

வீட்டிற்கு வந்ததும் அம்மாவிடம் இந்த அரிய தகவலை சொன்னேன். அம்மா சொன்னார் : " அப்படி எதுவும் இருக்காது. அவர்கள் எல்லோரும் ஈ வெ ரா வின் கட்சியை சேர்ந்தவர்களாக  இருப்பார்கள். சின்னப் பையனுக்கு கடவுள் மறுப்புக் கொள்கையை பற்றிச் சொன்னால் ஒன்றும் புரியாது என்பதற்காக இப்படி கதை சொல்லியிருப்பார்கள்". அம்மா சொன்னது சரிதான் என்று வேறு ஒரு சந்தர்ப்பத்தில் தெரிந்துகொண்டேன். ஆறாம் வகுப்புப் படித்தபோது வேறு ஒரு பையனும் இதே கதையை (பிள்ளையார், அண்ணன், கிணறு,  கதை ) சொன்னதால்! 

தமிழ்ப் பாடப் புத்தகத்தில், அப்போது ஒவ்வொரு பாடத்தின் கடைசியிலும் கேள்விகள், அருஞ்சொற்பொருள், எதிர்ப்பதம் என்று சில பயிற்சிகள் கொடுத்திருப்பார்கள். கேள்விகளுக்கு பாடத்திலிருந்து பதிலை சுலபமாகக் கண்டுபிடித்துவிடுவேன். அருஞ்சொற்பொருள் - படித்து தெரிந்துகொள்வேன். ஆனால் - இந்த எதிர்ப்பதம் என்ற விஷயம் அப்போது எனக்கு பெரும் குழப்பம். கருப்பு என்பதற்கு எதிர்ப்பதம் சிவப்பா அல்லது வெளுப்பா, அப்பாவுக்கு எது (ஏது ?) எதிர்ப்பதம் - என்றெல்லாம் குழப்பமாக இருக்கும். 

இந்தக் குழப்பத்தைத் தீர்க்க என்னுடைய அக்கா ஒரு பிட் பேப்பரில், " பதம் X எதிர்ப்பதம்" என்று வரிசையாக இருபது எழுதி என்னிடம் கொடுத்திருந்தார். அது பரீட்சையில் காப்பி அடிப்பதற்கு அல்ல - நேரம் கிடைக்கும்போதெல்லாம் அவற்றைப் படித்து நெட்டுரு போட்டுக்கொள்ள வேண்டும் என்பதற்காக. 

இப்படி இருக்கையில் ஒருநாள் .. 

( தொடரும் ) 

= = = = =  

அப்பாதுரை பக்கம். அடுத்த வாரம். 

= = = = = = =

மின்நிலா இதழின் கடைசி பக்கம் : 

முன்னேற 365 என்னும் தலைப்பில் எங்கள் Blog ஆசிரியர் குழு  

ஏப்ரல் 19, 2023 முதல் ஒவ்வொரு நாளும் மின்நிலா புத்தகங்கள் வாட்ஸ்அப் குழு

மற்றும்

மின்நிலா facebook குழு இரண்டிலும் ஒவ்வொரு நாளும்

உங்கள் முன்னேற்றத்திற்கான எளிய யோசனைகள் சொல்லத் தொடங்கியுள்ளோம்.

இது ஒரு வருடத்திற்குத் தொடர்ந்து வரும்.

வாழ்க்கையில் முன்னேற ஆசை + ஆர்வம் உள்ளவர்கள் இந்தக் குழுக்களில் இணைந்து நாங்கள் சொல்லும் எளிய யோசனைகளை நடைமுறைப்படுத்துங்கள்.

WhatsApp group link : https://chat.whatsapp.com/BmH70yzWRzTEuXW0Xeh1wh

Facebook page link : (1) மின்நிலா | Facebook

இணையுங்கள்; பயன்பெறுங்கள் !