"திங்க"க்கிழமை : கதிர் பாயசம் - துரை செல்வராஜூ ரெஸிப்பி

 முற்றாத சோளக் கதிர்  - 2

பசும்பால் 500 ml

ரவா 2 tbsp

நாட்டுச் சர்க்கரை 50 gr

முந்திரிப் பருப்பு 10

பசு நெய் 1 tbsp

முற்றாத சோளக் கதிரை உதிர்த்து முத்துக்களை எடுத்து அலசி விட்டு  சோளத்தின் அளவு ஒரு கோப்பை எனில் இரண்டரை கோப்பை பசும் பால் சேர்த்து அரைக்கவும்..

ரவாவை நெய்யில் வறுத்து எடுத்துக் கொள்ளவும்.

தனியாக 150 ml பசும் பாலை 100 ml  தண்ணீருடன் காய்ச்சவும். கொதித்து வரும் போது  வறுத்து வைத்திருக்கும் ரவாவை சேர்த்து கிளறி விடவும்..  

சற்றே வெந்ததும் அரைத்த சோளப் பாலைச் சேர்த்து சில நிமிடங்கள் கொதிக்க விடவும். அதனுடன் 10 முந்திரியையும் உடைத்துப் போட்டு 50 கிராம் நாட்டுச் சர்க்கரை, நெய் சேர்த்துக் கிளறி விடவும்.. 

இறுகி வந்தது என்றால் மேலும்  பால் தளர்த்திக் சேர்த்து கொள்ளவும்.. 

தணலைக் குறைத்து இறக்கி வைக்கவும். வேண்டுமெனில் சிறிது குங்குமப்பூ சேர்த்துக் கொள்ளலாம்..

பால் சர்க்கரை வேண்டாம் என்றால் அதே அளவு தண்ணீர் சேர்த்து கல் உப்பிட்டுக் காய்ச்சிக் கொள்ளலாம்..

மஞ்சள் சோளத்தில் உள்ள நிறமிச்சத்து, பார்வைத் திறனை அதிகரிப்பது மட்டுமன்றி, தேகத்திற்கு பொலிவையும் கொடுக்கிறது.  ஊட்டச் சத்து குறைபாடு உள்ளவர்களுக்கு அவசியமானது  சோளம்..

ரசாயனங்கள் கூடிய பாப் கார்னை தவிர்த்து விட்டு சோளத்தை மணலில் வறுத்துப் பொரியாக்கிக் குழந்தைகளுக்குக் கொடுக்கலாம்.. 

 

மடல் நீக்கப்பட்ட சோளக் கதிரை சிறிது கல் உப்பு போட்டு - அவித்துத் தின்றதும் 

தணலில் கதிரை சுட்டுத் தின்றதும் அவ்வளவு எளிதில் மறந்திருக்க மாட்டீர்கள்!..

***