நான் பயணம் செய்த இடங்கள் :: குருவாயூர் யானை கொட்டாரம் :: நெல்லைத்தமிழன்

 

நான் பயணம் செய்த இடங்கள்

நெல்லைத்தமிழன் 

(மார்ச்-2023) குருவாயூர் யானை கொட்டாரம் – பகுதி 3 / 3 

வருடத்திற்கு ஒரு முறை குருவாயூர் கோவில் முன்பு (கிழக்கு வீதியில்) யானையோட்டம் என்று ஒன்று நடைபெறுகிறது. அது எப்படி இருக்கும் என்று என்னால் ஊகிக்க முடியவில்லை. என் பெண் இந்த யானையோட்டத்தைப் பார்க்கணும் என்று நினைத்தாள். அதற்காகவே இரயில் டிக்கெட் புக் பண்ணியிருந்தாள். ஆனால் அவள் வரும் சந்தர்ப்பம் அமையவில்லை.

நானும், தட தடவென யானைகள் எப்படி ஓடிக்கொண்டு வரும், அதை எப்படி ஒழுங்குபடுத்துவார்கள் என்று யோசித்தேன்.

14ம் நூற்றாண்டில் சமோரின்கள் (கிறித்துவ மதத்தைத் தழுவிய நாயர்கள்) கோழிக்கோடை ஆண்டனர். அப்போது குருவாயூர் கோவிலுக்கு என்று யானைகள் கிடையாது. அதனால் அரசனின் கொட்டடியிலிருந்து யானையை அனுப்பும் வழக்கம் இருந்ததாம். ஒரு சமயம் அரசன், யானைகளை அனுப்பவில்லையாம். வருடாந்திர உற்சவம் குருவாயூர் கோவிலில் நடக்கும் அன்று, தாமாகவே ஆண் யானைகள் சமோரின் அரசனின் கொட்ட டியிலிருந்து குருவாயூர் கோவிலை நோக்கி ஓட ஆரம்பித்ததாம். இதனை நினைவுகூறும் விதமாக இந்த யானையோட்ட த்தை வருடத்தில் ஒரு நாள் கொடியேற்றத்தின்போது நடத்துகிறார்கள். அந்த பத்து நாட்கள் உற்சவத்தில், ஓட்டத்தில் வெற்றிபெற்ற யானை, குருவாயூரப்பனின் திருவுருவைச் சுமந்துகொண்டு சீவேலி எனப்படும் நிகழ்வில் பங்கேற்கும்.

கோவிலிலிருந்து மணிகளை எடுத்துக்கொண்டு யானைகள் அணிவகுத்திருக்கும் இடத்தை நோக்கிப் பலர் ஓடுகின்றனர் (யானைக்குக் கட்டுவதற்கா என்று தெரியவில்லை). சிறிது நேரத்தில் முன்னே ஒரு வாகனம் பாதுகாப்புக்காக வர ஆரம்பிக்க பின்னே யானைகளின் ஓட்டம் ஆரம்பிக்கிறது.

அதனைத் தொடர்ந்து கோவில் நோக்கிச் செல்லும் மக்கள் வெள்ளம். ஓட்டப் பந்தயத்தில் முதலாவதாக வந்த யானைக்கு கோப்பை பரிசாகக் கொடுத்திருப்பார்கள். ஒருவேளை கீழே நின்றுகொண்டிருந்தால் கோவிலில் நடந்தது என்ன என்று பார்த்திருக்கலாம். 

மார்ச் 1ம் தேதி, திருவித்துவக்கோட்டிலிருந்து திருநாவாய் என்ற ஸ்தலத்திற்கு டெம்போ வண்டியில் சென்றுகொண்டிருந்தோம். வழியில் 2 கிமீ தூரத்திற்கு கிட்ட த்தட்ட பத்து யானைகளின் ஊர்வலம். திரையிசைப் பாடல்கள் செண்டை மேளம் என நெருக்கமான மக்கள் கூட்த்துடன் கூடிய ஊர்வலம். இது அந்தப் பகுதி பள்ளிவாசலுக்காக நடத்தப்படுவது என்று சொன்னார்கள்.  யானை ஊர்வலம் என்பது கேரளத்தவர்களிடையே ஒன்றிவிட்ட நிகழ்வாம். அந்தச் சப்தம் மிக மிக அதீதமாக இருந்தது. (ஒரு கிமீ தூரத்திற்கு… ஒவ்வொரு யானைக்கும் வெவ்வேறு பேண்ட் வாத்தியக்காரர்கள்)  எனக்கெல்லாம் கொஞ்சம் சப்தம் ஜாஸ்தி இருந்தாலே ப்ரெஷர் ஏறிடும். யானைகள்லாம் என்ன பாடுபட்டதோ?

நவம்பர் 2022ல் ஒரே நாளில் மூன்று ரங்கநாதர்களைச் சேவிக்க நினைத்து முதல் நாள் இரவு ஸ்ரீரங்கபட்டினம் சென்று தங்கினோம். மறுநாள் காலை காவேரி துலா ஸ்நானம் முடித்துவிட்டு,  ஸ்ரீரங்கபட்டினம் ரங்கநாதர், மத்தியரங்கம் ரங்கநாதர் சேவித்துவிட்டு, சாம்ராஜ்நகர், தாளவாடி வழியாக சத்தியமங்கலம் நோக்கி காட்டுப்பகுதியில் காரில் சென்றோம். அப்போது வழியில் காட்டில் பார்த்த ஒற்றை ஆண் யானை. அது தானே தன் உணவைத் தேடிக்கொள்ளவேண்டும், காத்துக்கொள்ளவேண்டும், உயிர்வாழ வேண்டும், இனப்பெருக்கம் செய்யவேண்டும். இதுதானே இயற்கையின் நியதி.

என்னுடன் இருந்தவர்கள் ரொம்பவே பயந்தார்கள். கண்ணாடியைக் கீழிறக்கவேண்டாம் என்று கேட்டுக்கொண்டார்கள். ஆனால், நான், பயமொன்றுமில்லை என்று சொல்லிச் சில படங்களை எடுத்தேன். இந்த மாதிரி வாய்ப்பு இனிக் கிடைக்குமா? என்ன சொல்றீங்க?

இந்த இயற்கை நியதியை மீறி, கோவில்களில் யானைகளை வளர்ப்பதும் பராமரிப்பதும், வீடுகளில் யானை வளர்ப்பதும் சரியான செயலாக இருக்குமா? யோசிக்க வைக்கும் கேள்வி.

 

 

 = = = = = = = = =