"திங்க"க்கிழமை : வடையா... இது வடையா... ஒரு நாடகமன்றோ நடக்குது...

 நாவு திறக்குமாம் வாழ்வு சிறக்குமாம் வடையும் போண்டாவும் வரும் நேரத்து என்று சங்க காலத்தில் ஒரு புலவர் பாடி வைத்தார். 

ஆனால் என்ன கஷ்டம் என்றால் எழுதி வைத்த ஓலையிலேயே, முக்கு கடையில்  வாங்கிய வடையைப் பிழிந்து எண்ணெய் எடுத்து விட்டதால்,   பாடல் எண்ணெய் பெற்று ஓடல் ஆகி,  இலக்கியத்தில் இடம்பெறும் வாய்ப்பை எண்ணெய்ப் பிசுக்கில் இழந்தது. 

டிஸம்பர் மாதம் நான்காம் தேதி.  திங்கட்கிழமை.  ஆம்,  அதுவும் ஒரு திங்கற கிழமை.  வெளியிலோ விடாத மழை.   ஜன்னலைத் திறந்தால் காற்று 'உய்ங்' என்று வீசுகிறது.

பார்க்க தொலைகாட்சி இல்லை.  பொழுது போக்க கணினி இல்லை.  சோலாரின் உதவியால் போடமுடியும்.  ஆனால் சிக்கனத்துக்காக போடவில்லை!  அதே சோலார் உதவியுடன் Full charge ல் வைத்திருந்தும் மொபைலிலோ டவர் இல்லை.  எனவே அதனாலும் பொழுதுபோக்கும் உபயோகம் இல்லை.

செவிக்கும் உணவில்லை.  கண்களுக்கும் வேலை இல்லை.  சோம்பேறி பொழுதுகள்...  அடுத்து என்ன...  நீங்களே சொல்லுங்கள்.  பாஸிடம் 'கடலை மாவு இருக்கிறதா?'  என்று உசாவினேன்.  'இல்லை'யென்று பாங்குடனே பகர்ந்தார் பாஸ்.  'சரி 'ஆச்சி ரெடிமேட் பஜ்ஜி மிக்ஸா'வது வாங்கி வைத்திருக்கிறாரா?' என்று வினவினேன். 'எல்லாத்துக்கும் நான்தான் போகணும்..  எதுவும் வாங்கி வைக்க மாட்டீங்க..  இப்போ வக்கணையா கேட்பீங்க'  என்று சினத்துடனே பதில் வந்தது.

சற்றுநேரம் மௌனம்.  என் கையில் நரசிம்மாவின் தேவரகஸ்யம் இருந்தது.  கண்கள் கதையின் வரிகளை மேய்ந்தாலும் நாக்கு என்னவோ வடையின் மீதே கவனமாக இருந்தது.  இருங்கள் இதை கவிதை வடிவமாக்குவோம்..

கண்கள் 

கதையின் வரிகளை 

மேய்ந்தாலும் 

நாக்குக்கு  என்னவோ 

வடையின் மீதே 

கவனம்  க இருந்தது

ஜன்னல் வழியே வெளியே வெறித்தேன்.  வானம் சட்டென மின்னல் வெட்டியது.  சட்டென மூளையிலும் ஒரு மின்னல் அடித்தது.  சில நாட்களுக்கு முன்னர் பார்த்த ரீல்ஸ் குறிப்பு ஒன்று நினைவுக்கு வந்தது.  பாஸ் பக்கம் திரும்பினேன்.

"உருளைக்கிழங்கு இருக்கிறதா?"

"இருக்கு..  இப்போ பொடிமாஸ் செய்யணுமா, ரோஸ்ட் செய்யணுமா?"

"அரிசி மாவு இருக்கா?"

"இருக்கு.."  குழப்பத்துடன் பாஸ்,

"வெங்காயம், கொத்துமல்லி, பச்சை மிளகாய் இருக்குல்ல?"

"ம்ம்ம்..."

அவ்வளவுதாங்க..  ரீல்ஸில் பார்த்ததைச் சொன்னேன்.  கொஞ்ச நேரத்தில் ரெடி செய்து விட்டார்.  

உருளைக் கிழங்கை நன்றாக ஏகப்பட்ட விசில் வைத்து வேக வைத்து எடுத்துக் கொண்டார்.  (நான் சொன்னபடி..  நான் சொன்னது ரீல்ஸில் பார்த்தபடி)

தோலை உரித்து நன்றாக கட்டி இல்லாமல் மசித்துக் கொண்டார்.  (நான் சொன்னபடி..  நான் சொன்னது ரீல்ஸில் பார்த்தபடி)

அதில் பொடியாக நறுக்கிய வெங்காயம் இரண்டு, இரண்டு பச்சை மிளகாய், பொடியாய் நறுக்கிய கொத்துமல்லி, மிளகு, உப்பு தேவையான அளவு  போட்டு நன்றாகப் பிசைந்து வைத்தார்.   (நான் சொன்னபடி..  நான் சொன்னது ரீல்ஸில் பார்த்தபடி)

ஐம்பது கிராம் அரிசி மாவு எடுத்து பிசைந்து வைத்த மாவில் கலந்து மறுபடி நன்றாய்ப் பிசைந்து வைத்தார்.   (நான் சொன்னபடி..  நான் சொன்னது ரீல்ஸில் பார்த்தபடி)

ஸோ சிம்பிள்ங்க...   ஸோ ஈஸிங்க...

இப்போது பிசைந்து வைத்த மாவை கொஞ்சம் கையில் எடுத்து உருட்டி, உள்ளங்கையில் தட்டி, நடுவில் துளை போட்டு எண்ணெயில் பொறித்து எடுத்தார்.  (நான் சொன்னபடி..  நான் சொன்னது ரீல்ஸில் பார்த்தபடி)

ஸோ சிம்பிள்ங்க...   ஸோ ஈஸிங்க...

அழகழகான வடைகள் தாயார்..  சே...  தயார்.  மேலே மொறுமொறு என்றும், உள்ளே மெதுவாகவும் என்ன அழகான மெதுவடைகள்..  

புயல் காரணமாக மின்சாரம் இல்லை.  மின்சாரமின்மை காரணமாக மிக்ஸி இயக்க முடியவில்லை.  மிக்ஸி இயக்க முடியாததால் சட்னி எதுவும் தயார் செய்ய முடியவில்லை.  

அதனால் என்ன..  சுவையான சூடான, மொறுமொறு வடைகள் தயார்.  சாப்பிட்டு மகிழ்ந்தேன்.  மகன்கள் டயட்டில் இருந்ததால் குரங்கு அப்பம் பங்கு பிரிக்கும் கதை ஏதுமின்றி மெஜாரிட்டியில் திளைத்தேன்!