சிறுகதை : பாக்யலக்ஷ்மி - துரை செல்வராஜூ

 பாக்யலக்ஷ்மி

துரை செல்வராஜூ

*** *** *** *** ***

தீபாவளிப் பொழுதின் களேபரங்களும் வெடிச் சத்தங்களும் சற்றே ஓய்ந்திருந்தன..

முந்தானையால் முகத்தைத் துடைத்துக் கொண்ட வரலக்ஷ்மி அறைக்குள் மெல்ல நுழைந்து ,  " என்னங்க!.." - என்றாள்..

காதருகில் மெல்லிய கிசுகிசுப்பை உணர்ந்ததும் சங்கர மூர்த்திக்கு விழிப்பு..

" தூங்கிட்டீங்களா... "

'  அங்கே பிள்ளைகள்.. ' என்பதைப் போல் சங்கர மூர்த்தி - விழி காட்ட ,

" அவங்க ராத்திரி எல்லாம் ஆடிட்டு இப்போ நல்லா தூங்கறாங்க.. " 

-  கணவனின் கையைப் பற்றி கண்களில் ஒற்றியபடி  மார்பில் சாய்ந்து கொண்டாள் வரலக்ஷ்மி..

"  இந்த வருசம் தீபாவளி நல்லபடியா கொண்டாடியாச்சு..

பொழுதுக்கும் மளிகக் கடையில கூட்டுபுள்ளி போட்டு போட்டு நெஞ்சுக்கு மஞ்சளும் நெத்திக்கு  குங்குமமும் கொடுக்கிற என் சாமி - நோய் நொடியில்லாம நீங்க நல்லாருக்கணும்.. உங்களால நாங்களும் நல்லாருக்கணும்!.. " 

மெல்லிய புன்னகை இருவர் முகத்திலும்..

" இருபது வயசுல பார்த்த மாதிரியே இருக்கு!.. "

" இப்படிப் பேசிப் பேசியே எதிர்ப் பேச்சு இல்லாம பண்ணிடறீங்க.. "

" உள்ளதத் தானே சொல்றேன்.. "

" நானும் உள்ளத்தைத் தானே சொல்றேன்.. "

சங்கரமூர்த்தி வாய் விட்டுச் சிரிக்க - விரல் கொண்டு இதழ் மூடினாள் வரலக்ஷ்மி..

" சரி.. மத்யானத்துக்கு என்ன செய்றதா உத்தேசம்?.. "

" அது என்னமோ காய்கறி கலவை சாதமாமே.. பட்டை கிராம்பு முந்திரி மசாலா வதக்கி நெறய நெய்யும் தேங்காய்ப் பாலும் விட்டு சரிக்கு சரியா சோறாக்கறது...  அன்னிக்கு ரேடியோவுல சொன்னாங்களாம்..  இன்னிக்கு அது செய்யப் போறேன்.. "

" உனக்கு யார் இதைச் சொன்னது?.. "

" மகேஸ் தான் கேட்டுட்டு சொன்னாள்...  அவளுக்கு இதெல்லாம் ரொம்ப இஷ்டமா இருக்கு.. "

" புகுந்த இடத்த நல்லா பார்த்துக்குவாள்.. ன்னு சொல்றே!.."

" உங்க பொண்ணு இல்லையா.. அவகிட்ட அன்பும் அக்கறையும் பரிபூரணமா நெறஞ்சிருக்கு..."

" நல்லாத் தான் பேசறே லக்ஷ்மி.. " 

" இப்போதைக்கு தவலை தண்ணி அடுப்புல வெச்சிருக்கேன்.. மறுபடியும் ரெண்டு சொம்பு ஊத்திக்கிட்டு சமைக்கணும்.. "

"  அதெல்லாம் இன்னைக்கு கணக்கு இல்லை.. "

" அந்தக் கணக்கு புதுசா கல்யாணம் கட்டிக்கிட்டவங்களுக்குத் தான்!..  "

" நீ சொல்லிட்டா மீற முடியுமா!.. " நெற்றி முகட்டில் முத்து ஒன்று கிடைக்க -  வரலக்ஷ்மியின் விரல்கள் மருதாணிச் சிவப்புடன்  சங்கரனின் நெற்றியில் இழைந்து கொண்டிருந்தன..

" ஒன்னு சொல்ல மறந்துட்டேங்க... "

" என்னது!.. "

" அன்னிக்கு  ஹெட்மாஸ்டர் பானுமதியம்மாவை மார்க்கெட்ல பார்த்தேன்.. "

" என்ன சேதியாம்?.. "

" எல்லாரையும் விசாரிச்சாங்க...  மகேசை ஸ்கூலுக்கு அனுப்பலையே ன்னு ரொம்ப வருத்தம் அவங்களுக்கு.. "

" ம்.. "

" தலைக்கு தண்ணி ஊத்திட்டு  ஸ்கூலுக்கு அனுப்பி இருக்கலாம்.. ரெண்டரை வருசம் ஆச்சி.. நல்லா படிக்கிற பொண்ணு.. இந்த மாதிரி பாதியில  நிறுத்திட்டீங்களே.. ந்னு வருத்தப்பட்டாங்க... "

அமைதியாக  இருந்தார் சங்கரன்..

".. இப்பவும் ஒன்னும் கெட்டுப் போகலை.. பணம் கட்டி ஒரு பரிட்சை எழுதிட்டு  மேல படிக்கலாம்.. எஸ்ஸெல்சி முடிக்கட்டும்.. ன்னு சொன்னாங்க.."

" அப்படியா!.. படிச்சுட்டு மேல என்ன செய்றதாம்?.. "

" அதான்  படிச்ச பொண்களுக்கு எல்லாம்  இப்போ சர்க்கார் ல வேலை தர்றாங்களாமே!.. " வரலக்ஷ்மியிடம் வியப்பு

" படிச்ச பொண்ணு சர்க்கார் வேலை பார்க்கிற பொண்ணு ந்னா அவளுக்கு பார்க்கிற மாப்பிள்ளையும் அந்த மாதிரியே இருக்கணும்.. வயக்காட்டு மாப்பிள்ளை சரிப்படுமா?.. "

" அவளுக்குன்னு ஒருத்தன்  பொறந்து இருப்பான்..  பகவான் தான் எழுதி வெச்சிருப்பானே.. "

" சடங்கான பொண்ணைக் கட்டிக் காப்பாத்தி நல்லவனா ஒருத்தன் கையில ஒப்படைக்கிறது தான் லட்சணம்.. ன்னு சொல்லியிருக்காங்க!.. "

" லட்சணத்தோட லட்சணம் படிப்பும் ஒன்னு.. ன்னு நாம படிக்க வைப்போம்.. எனக்கு என்னமோ மகேசு மறுபடியும் படிக்கட்டும்ன்னு தோணுது.. "

" ஊரு உறவு.. என்ன சொல்லுமோன்னு இருக்கு லக்ஷ்மி.. "

" வாயில வந்ததெல்லாம் சொல்லுந்தான்.. அதுக்கெல்லாம் கவலப்பட்டா முடியுமா..  ரெண்டு நாள் ல அடங்கிடும்.. ஒன்னோட ஒன்னு ன்னு எல்லாம் கிளம்பிடும்.. "

" மகேஸ் மனசுல என்ன இருக்கோ?.. "

" மகேஸ் கற்பூரம் மாதிரி.. பானுமதியம்மா சொன்னது சரி ன்னு  என் மனசுக்குப் படுது.. இருந்தாலும் எல்லாமே உங்க இஷ்டந்தான்..  "

சங்கர மூர்த்தியின் சிந்தனை நெற்றியில் தெரிந்தது..

" புள்ளைங்க எல்லாமே படிப்புல கெட்டி.. சரஸ் வெள்ளந்தியா இருந்தாலும் அவ போக்கு தனி..  நாலு வரிய ஒரு தரம் படிச்சிட்டா அப்படியே புடிச்சிக்கிறா... "

" நீ தானே பக்கத்துல இருந்து எல்லாம் பார்த்துக்கறே!.. "

" பெரியவனும் சின்னவனும் ஒருத்தனோட ஒருத்தன் போட்டி போட்டுக்கிட்டு கணக்கு போடுறானுங்க.. இந்த வீட்ல நான் ஒருத்தி தான் மக்கு.. மட சாம்பிராணி.."

" மட சாம்பிராணியா.. நீயா!.. " சங்கரமூர்த்தியிடம் வியப்பு..

 

" பெரியவன் விரல் விட்டு எண்றதுக்குள்ள சின்னவன் கூட்டுப் புள்ளிய சொல்லிடறான்.. அப்பாவுக்கு தப்பாத பிள்ளை.. விதை ஒன்னு போட சுரை ஒன்னா முளைக்கும்!?.. "

நாக்கைக் கடித்துக் கொண்ட வரலக்ஷ்மியின் கண்களில் புன்னகை ததும்பியது..

" என்ன ஒன்னு.. ஏதோ பயந்த கோளாறு மாதிரி  நாலு நாளா சின்னவன் தூக்கத்துல உளர்றான்.. "

" சொல்லவேயில்ல நீ.. "

 நானும் சாதாரணமாத் தான் நெனச்சேன்.. ஸ்கூல் பக்கத்துல புளியந் தோப்பு சரியில்ல ன்னு பேசிக்கிட்டாங்க.. ஏதோ பயந்திருப்பான் போல இருக்கு.. முனீஸ்வரன் கோயிலுக்குப் போய் முடிகயிறு மந்திரிச்சுப்

போட்டுட்டு வரணும்.. "

" அங்க தான் தை மாசம் பஞ்சாயத்து யூனியன்ல வாசக சாலை கட்டப் போறாங்களே.. சேட்டை மூட்டை எல்லாம் ஓடிப் போய்டும்.. "

" சேட்டை மூட்டை எல்லாம் எப்படியாவது போய்த் தொலையட்டும்!.. "

" சரி.. ஒரு நல்ல நாள்ல பானுமதியம்மாவைப் பார்த்து என்ன ஏதுன்னு நல்லா விசாரிச்சுட்டு வா... பணம் கட்டிடுவோம்.. எதுக்கும் மகேஸ் கிட்டயும் ஒரு வார்த்தை கேட்டுக்க லக்ஷ்மி.. "

" மகேசைக் கேட்கிறதா!.. மறுபடியும் படிக்கிறியா.. ன்னு கேட்டதும் அவளுக்கு றெக்கையே முளைச்சிடும்!.. "

மகேஸ் மீண்டும் படிக்க இருப்பதில் வரலக்ஷ்மிக்குச் சிறகுகள் முளைத்தே விட்டன..

வரலக்ஷ்மியின் கண்களில் பரவசம்.. சங்கரனின் கன்னங்கள் ஈரமாகின.. 

கூந்தலில் இருந்த செவ்வந்திப் பூக்கள் சிரித்துக் கொண்டன..

***