ஏட்டுச் சுரைக்காய்!

 

சென்ற வாரமும் எங்களை யாரும் கேள்விகள் கேட்கவில்லை. 

எனவே இதோ எங்கள் கேள்விகள்: 

1) உங்களுக்கு மிகவும் பிடித்த பழைய சினிமா பாடல் எது? புதிய சினிமா பாடல் எது?

2) யாரையாவது காரணமே இல்லாமல் வெறுப்பவர்கள், ஏன் அப்படிச் செய்கிறார்கள்? 

3) 'ஆஹா - இதற்குத்தான் இவ்வளவு நாளும் காத்திருந்தேன்' என்று நீங்கள் சமீபத்தில் நினைத்தது எதைப்பற்றி ? 

4) நெருங்கிய சொந்தம் அல்லாத - உங்களுக்குப் பிடித்த தூரத்து உறவினர் யார்? ஏன்? 

= = = = = = = = = = =

KGG பக்கம் : 

ஏட்டுச் சுரைக்காய்! 

பாலிடெக்னிக் படித்த காலத்தில், 'இந்த பாடத்தினால் என்ன உபயோகம்?' என்று நான் நினைத்த ஒரு பாடம், Machine drawing & design  பாடம். ஆனா பாருங்க - 1973 முதல், 2006 வரை நான் பார்த்த வேலை முற்றிலும் drawing & design மட்டுமே! 

பாலிடெக்னிக் படிக்கும்போது டிராயிங் பாடத்தில் சொல்லிக்கொடுக்கப்பட்டவை எல்லாமே வேலை பார்த்த அலுவலகத்தில் தலை கீழாக மாற்றிக்கொள்ளவேண்டியதாக ஆனது! 

டிராயிங் வகுப்பில், 2 H பென்சில் H பென்சில் மட்டுமே பயன்படுத்த வேண்டும். 

அசோக் லேலண்ட் டிராயிங் ஆபீஸில் சேர்ந்த முதல் நாள் நான் அப்படி ஒரு tracing ஷீட்டில் வரைந்த படத்தைப் பார்த்த மேலதிகாரி பயங்கரமாக சிரித்தார். "இப்படி எல்லாம் பாலிடெக்னிக்ல சொல்லிக்கொடுத்தகாப்போல இங்கே வரைந்தால், இதிலிருந்து புளூ பிரிண்ட் எடுக்க இயலாது. வகுப்பில் கற்றுக்கொண்டதை எல்லாம் மறந்துவிடு. இங்கே வரையும்போது எவ்வளவு திக்கா டார்க்கா வரைய முடியுமோ அந்த அளவுக்கு திக்கா டார்க்கா வரையணும். அப்போதான் புளூ பிரிண்ட் சரியா வரும் " என்றார். 

வகுப்பில் படித்த சமயம், ஒரு போல்ட் படம் வரைவதற்கு ஒரு மணி நேரம் ஆகும். போல்ட் ஹெட் thickness முதல் எல்லாவற்றிற்கும் விகித கணக்கு உண்டு. 

ஆனால், ஆபீஸில் ஒரு போல்ட் படம் வரைய ஐந்தே விநாடிகள்தான்! படம் வரைவதை விட முக்கியம் படத்தில் உள்ள பாகத்தின் அளவுகளை சரியாகக் குறிப்பிடுவது மட்டுமே! Bolt போன்ற சில standard பாகங்களுக்கு, "Unspecified dimensions to conform to BIS 1367" என்று ஒரு வரியில் சொல்லிவிட்டு அடுத்த வேலையைப் பார்க்கப் போய்விடலாம்! 

கல்லூரிக் கல்வி பாடத்தில்  படிக்கும் பாடங்களுக்கும், நடைமுறை வேலைக்கும் நிறைய வித்தியாசங்கள் இருக்கும். சில சமயங்களில் அது முற்றிலும் வேறாகக் கூட இருக்கும். 

ஏட்டுச் சுரைக்காய் கறிக்கு உதவாதுதானே! 

அப்பாதுரை பக்கம் :  

முத(லை)லாளிகள்

வரலாறு எழுதப்படத் தொடங்கிய நாள் முதல் இன்றுவரை உலகின் மிகப்பெரிய செல்வந்தராகக் கருதப்படுபவர் ஆப்பிரிக்க மாலி தேச அரசராக இருந்த மன்ஸா மூஸா என்பவர்.  உலக வரலாற்றுத் தொடக்கம் ஒப்பாதென்றால், சென்ற ஆயிரம் ஆண்டுகளின் செலவந்தர் கணக்கெடுப்பில் மூஸாவை அடிச்சுக்க ஆளில்லேனு நிச்சயம் சொல்லலாம்.  

மூஸாவைப் பற்றிய நிறைய சுவாரசியமான விவரங்கள் நேஷனல் ஜியோக்ரேபிக் போன்ற தளங்களில் கொட்டிக் கிடக்கின்றன. உதாரணத்துக்கு: மன்னர் மூஸா மெக்கா பயணம் சென்ற போது எகிப்தில் தங்கினார். தன் உடன்பயணிகள், படை(?)க்கு செலவு செய்யவும், பொதுவாக எகிப்தில் தங்கிச் செலவழிக்கவும், தானம் செய்யவும் மன்னர் மூஸா  செலவழித்த தங்கம் காரணமாக எகிப்தில் தங்க விலை சீரழிந்து பனிரெண்டு ஆண்டுகளுக்கு நகைக் கடைகளெல்லாம் மூடி, பிரியாணி விற்கத் தொடங்கினவாம். எனவே பிரியாணி  உதயமானது மூஸாவின் எகிப்து பயணத்தில் தான் என்பதறிக.  (பனிரெண்டு வருஷம் நாடு முழுக்க நகைக்கடைல போணியாவலியா?!!)

கொலம்பஸுக்கு நூற்றுக்கணக்கான வருடங்களுக்கு முன்னரே மூஸா அமெரிக்கா வந்து போனதாகச் செவ்விந்தியர் குறிப்புகளில் சொல்லப்பட்டிருக்கிறது. டிம்பக்டு நகரம் கட்டியவர் இவர்தான்.  இந்த மன்னரிடம் இத்தனை செல்வம் சேர எத்தனை குடம் வியர்வை (குருதி?) சிந்தின என்ற தோராயக் கணக்கு விவரமும் கிடைக்கிறது. (வேண்டாமே?)

மூஸாவுக்குப் பின் நிறைய மகரங்கள், அதாவது முதலைகள். 

சமீப ஐநூறு ஆண்டுகளில் ராகபெல்லர், கார்னகி, மோர்கன், வேன்டர்பில்ட், ஜேம்ஸ் ஹில், கூல்ட், ஆஸ்டர்,  ஸ்டேன்பர்ட், டாடா, பிர்லா என்று அமெரிக்க ஐரோப்பிய இந்திய செல்வந்தர்கள் சம்பாதித்த மற்றும் வாழ்ந்த விதம் பற்றி பீடர் டர்சின் என்பவர் ஆராய்ச்சி (!!) செய்து புத்தகம் எழுதியிருக்கிறார் (ஐயா.. டர்சின், உங்க end times புக்குல விகிபீடியா விவரம் எல்லாம் அப்படியே வருதே? இதுக்கு அம்பது டாலரா? இன்னாபாது, யாரு முதலை?).

ஆன்ரூ கார்னகி ஸ்காட்லந்தில் ஒரு தையல் கடையில் பாபின் நூல் சுற்றித்தரும் வேலையில் தொடங்கி உழைத்து உலகின் மிகப்பெரிய கரி, இரும்பு மற்றும் பல உலோக ஆலைகளின் முதலாளியானவர்.  வீட்டில் குடும்பத்தாரோடு வளர்ப்புப் பிராணிகளை உட்கார வைத்து சேர்ந்து சாப்பிடும் வழக்கம் பார்த்திருக்கிறோம். கார்னகி விருந்தாளிகள் வரும்போது மட்டும் வீட்டு நாய்களை வரவழைத்து உடன் உட்கார்ந்து சாப்பிடுவாராம். ஏதோ செய்தியாம். 

உலகின் மாபெரும் எண்ணை பெட்ரோல் பெருச்சாளி ஹி முதலாளி யாரென்றால் ராகபெல்லர்.  படிக்க வசதியில்லாமல் குடும்பப் பசி காரணமாக மூன்று டாலர் தினக்கூலிக்கு வேலை செய்யத் தொடங்கி முன்னேறி மெத்தப்படித்து முதலாளியானவர். பின்னாளில் உலக நாடுகளின் பொருளாதாரத் தலையெழுத்தை தன் நிறுவனங்களின் தலையெழுத்தோடு இணைத்து எழுதுமளவு வளர்ந்தார். க்லியோபாட்ரா போல் பசும்பாலில் உடலூறிக் குளிக்கும் பழக்கம் உண்டாம். ஆரோக்கிய வெறியர். உடன் வேலை பார்ப்பவர்கள் இத்தனை எடைதான் இருக்கவேண்டும் என்று நிபந்தனை இடுவாராம். உலக எண்ணை முதலாளிகளில் செக்கிழுத்த நம் செம்மல் பற்றியும் விவரம் இருக்குது.  

கப்பல் ரயில் ஓட்டி முதலாளியானவர் வான்டர்பில்ட். நம்ம ஊர் கப்பலோட்டிய தமிழன் பத்தியும் சில விவரங்கள்.  கிழக்கிந்திய கம்பெனி அவரிடம் நிறைய அறிவுரை கேட்டார்களாம் எப்படி சென்னையிலும் கல்கத்தாவிலும் சரக்கு சுமந்த கப்பல் படகுகளைக் கொண்டு வரவேண்டுமென்று.  கடைசியில் சரக்கு என்னடாவென்றால் வெடிகுண்டு துப்பாக்கிகள்! இந்தியாவில் நன்கு ஊன்றியதும் கப்பலாவது கிப்பலாவது என்று எல்லாவற்றையும் பிடுங்கிக் கொண்டு.. பாவம் கப்பலோட்டிய தமிழர். 

ஹென்ரி போர்ட், உலகின் முதல் கார் முதலை.  அதாவது முதலாளி. கார் வடிவம், தொழிற்சாலை எல்லாம் தயாரானதும் இவரிடம் எந்த கலரில் கார் தயாரிப்பது என்று கேட்டார்களாம்.  "எந்த கலரில் வேண்டுமானாலும் தயாரிக்கலாம், கறுப்பாக இருக்கும் வரையில்" என்றாராம்.  தான் சொன்னது எதுவும் சட்டமாகவில்லை என்றால் இவருக்குக் கோபம் வருமாம். கவர்னரையோ அமெரிக்க அதிபரையோ சர்வ சாதாரணமாக அழைத்து ரெண்டு அறை விடுவாராம். சொல்லறை.

போர்ட் ராகபெல்லர் கார்னகி ஸ்டேன்பர்ட் மற்றும் அனைத்துப் பெருஞ்செல்வந்தர்களும் அமெரிக்க ஐரோப்பிய ஆப்பிரிக்க அரசாங்கங்களின் குடுமிகளைக் கையில் வைத்திருந்தவர்கள். இவர்களுக்கு ஆதரவாக அமெரிக்கா, இங்கிலாந்து, ஜெர்மனி போன்ற நாடுகள், பிற நாடுகளைக் கைப்பற்றியோ ஊடுருவியோ இவர்களின் வியாபாரத்துக்கு அடிகோலின.  நம்மூர் டாடா பிர்லாக்கள்,  மேற்கத்திய முதலாளிகளின் வழியைப் பின்பற்றி பிரிடிஷ் மற்றும் சுதந்திர இந்திய அரசுகளைத் தங்கள் வியாபார வளர்ச்சிக்குப் பயன்படுத்தினார்கள். முதல் இரண்டு ஐந்தாண்டுத் திட்டங்களில் டாடா பிர்லாக்கள் எத்தனை கோடி சுரண்டினார்கள் என்பதைப் படிக்கையில் ஆச்சரியமாக இருக்கிறது (நேரு! யம்மாடி, இவரு இன்னா ஆளுனு தோணுதே।).  ஒரு முறை கலைஞர் கேட்டது நினைவுக்கு வருகிறது: "தொழிலதிபர்கள் என்றால் டாடா பிர்லா தானா? மாறனுக்கு என்ன குறை? மாற்றானுக்குக் கிடைத்த சலுகைகள் நம்  மாறனுக்குக் கிடைத்தால் அதன் பெயர் ஊழலா?" ம்ம்ம்.. அர்த்தமுள்ள கேள்வி தான் கலைஞரே.

அடுத்து, சமீப ஐம்பது ஆண்டுகளில் மிகப்பெருஞ்செல்வந்தரானவர்கள் பற்றித் திரும்புகிறது புத்தகம். 

பில் கேட்ஸ், கோர்டன் மூர், ஆன்ரூ க்ரோவ், ஸ்டீவ் ஜாப்ஸ், லேரி எலிசன், மார்க் ஸகர்பர்க், இலான் மஸ்க், முகேஷ் அம்பானி என்று பட்டியல் நீளுகிறது.  கணினி, இணையம் மற்றும் டிஜிடல் உலகில் இவர்கள் சம்பாதித்த வேகம் பிரமிக்க வைக்கிறது.  சென்ற ஐம்பது வருடங்களில் இவர்கள் சேர்த்த செல்வம் முந்தைய நானூறு வருடங்களில் கார்னகி வகையினர் சேர்த்ததற்கு இணையாம்!

அதே கணக்கில், முந்தைய தொழிலதிபர்கள் நாட்டுக்கும் மக்களுக்கும் உதவும் வகையில் நிறுவிய அறக்கட்டளைகளின் கொடை, கணினிக்குப் பிந்தைய செல்வந்தர்களின் ஈகையைவிட பல மடங்கு அதிகம்.  அதைப்பற்றி புதிய தொழிலதிபர்கள் கவலைப்படவில்லை.  ஆளாளுக்கு தீவு வாங்குவதில் மும்முரமாக இருக்கிறார்கள்.

முந்தைய தலைமுறைத் தொழிலதிபர்கள் போலவே இவர்களும் அரசாங்கங்களைக் கைக்குள் போட்டுக் கொண்டிருப்பது அதீத ஒற்றுமை என்றாலும் வியப்பொன்றுமில்லை.  வெளியே பாச்சா காட்டினாலும் அமெரிக்கா இங்கிலாந்து  போன்ற நாடுகள், மெடா கூகில் டெஸ்லா அமெசான் நிறுவனங்களின் பிடிகளில் சிக்கியிருப்பது உண்மை. சைனா உடையுமென்றால் கூகில் மெடா நிறுவனங்கள் காரணமாகும் என்ற அச்சம் சீன அரசிடம் பரவலாக உண்டாம். இந்த வாய்ப்பை மேற்கத்திய  நாடுகளின் உளவு நிறுவனங்கள் வரவேற்று நிறைய டிஜிடல் ஊடுருவல்கள் செய்கின்றன.  உலகப்போர் என்று வந்தால் மெடா கூகில் டெஸ்லா தொழிலதிபர்கள் அதன் பின்னணியில் இருப்பார்கள் என்றும் பண்டிதர்கள் சொல்கிறார்கள். உதாரணத்துக்கு சமீபத்தில் பொலிவியா நாட்டின் மோராலிஸ் அரசாங்கத்தை தூக்கியெறிந்தது அமெரிக்க அரசாங்கமே என்று செய்தி வந்ததும் டெஸ்லா முதலாளி மஸ்க் இப்படி ட்வீட் செய்தார்: "நாங்கள் எந்த அரசாங்கத்தையும் தூக்கியெறிவோம். என்ன செய்வீர்கள்?".  ஒருவர்  கூட மஸ்கைத் தட்டிக் கேட்கவில்லை என்பது இன்னும் ஆச்சரியம். (பொலிவியாவில் புதிய அரசாங்கம் மஸ்க் நிறுவனத்துக்கு லிதியம் சுரண்ட பத்து ஆண்டுகளுக்கு முழு அனுமதி வழங்கியது இங்கே முக்கியம்).

மெடா மன்னர், அதாங்க ஸ்கர்பர்க், அவரு தன்னை அசல் மன்னர்னே நினைச்சுக்குறாரு. அவருடைய சிகையலங்காரம், ரோமானியப் பேரரசர் அகஸ்டஸ் சீசரைப் போலவே இருக்கும்.  பெண்ணுக்கு ஆகஸ்ட் என்று பெயர் வைத்துள்ளார். அலுவலக மீடிங்குகளை முடிக்கும் பொழுது அகஸ்டஸ் சீசர் போல் கைகளை உயர்த்தி "ஆதிக்கம்" (domination) என்று அறையதிரக் கூவுவாராம்.  பொழுது போகாத நேரத்தில் இலான் மஸ்குடன் பொதுவில் குத்துச் சண்டை போட அறைகூவுகிறார். தன் சொந்தத்தீவில் சீசருக்கு ஹி ஸகர்பர்குக்கு அரண்மனை கட்டியாகி வருகிறது. அதற்காக அண்டை நாட்டிலிருந்து ஆயிரக்கணக்கில் கூலியாட்களும் (சொந்தத் தீவு, கேட்பாரில்லை) நூற்றுக்கணக்கில் யானைகளும் குதிரைகளும் பறவைகளும் இறக்குமதி ஆகிறது. அமெரிக்க அரசாங்கத்துக்கும் மக்களுக்கும் மூக்கு இருக்கிறது, விரல் இருக்கிறது... 

நம்ம ஊர் அம்பானி குறைந்துவிடுவாரா என்ன?  அண்ணன் தம்பி அடிதடி செய்தி குறைந்து அவர்களின் அரசியல் தனிவாழ்வு ஆடம்பரங்கள் மீறல்கள் பற்றி நிறைய செய்திகள்(நாம யாரு குறை சொல்ல?).  அவருடைய வீட்டுச் செலவு மட்டும் ஒரு நாளைக்கு 67 லட்சமாம்.  அவர் குடிக்கும் டீக்கோப்பையின் விலை மூன்று லட்ச ரூபாயாம்! இந்தியாவின் முக்கிய தேசிய கட்சிகள் இரண்டும் (?) இவரைக் கேட்டு தான் பட்ஜெட் தயாரிக்கின்றனவாம். (நாம என்னவோ நிம்மியம்மானு நெனச்சுட்டு இருக்கோம்).

ஒன்று தெளிவாகிறது. அன்றைக்கும் சரி இன்றைக்கும் சரி முதலாளிகள் அரசாங்க உதவியுடன் மிக வேகமாக வளர, சாதாரண மக்கள் மிக அதிக தியாகங்கள் புரிய வேண்டிய நிலை மாறவேயில்லை. முதலாளிகளின் செல்வமும் வசதியும் வாழ்முறையும் நெறியும்  நம் தினசரி வாழ்க்கை நெறிகளின் மிகப் பெரிய முரண். 

கேள்விக்குறி போல் முதுகு வளைந்து உழைப்பது எதற்காக என்ற கேள்விக்கு விடை கிடைத்தது போல் உணர்கிறேன்.

= = = = = = =