புதன், கேள்வி பதில் --- கேள்வி பிறந்தது என்று?

 

சேட்டைக்காரன் என்று அழைக்கப்படும் திரு வேணுகோபால் பற்றி நீங்கள் அறிவீர்கள். நகைச்சுவையாக எழுதுவதில் வல்லவர். ஆழமான சிந்தனைகளுக்கு சொந்தக்காரர். அவருடைய கதை ஒன்றை சமீபத்தில் 'நான் படிச்ச கதை' பகுதியில் JKC பகிர்ந்திருந்தார். இன்று நம் நண்பர்கள் சிலரின் கேள்விகளுக்கு சேட்டைக்காரன் வேணு ஜி பதில் அளித்திருக்கிறார்.

நெல்லைத்தமிழன் 

கேள்வி 1. நகைச்சுவைக் கதைகள் எழுதுவதால் எழுத்தாளருக்கு மன அழுத்தம் குறைகிறதா இல்லை படிக்கும் வாசகர்களுக்கா?

வேணுஜி பதில் : எழுதுவது என்பதே நேரத்தை வேறொரு சங்கதியில் செலவிடுவது; ஆகவே கவனம் திசைதிரும்புவது இயல்பு. நகைச்சுவை எழுதும்போது, இது முதலில் நமக்கு கிச்சுக்கிச்சு மூட்டுமா என்று யோசித்து எழுதுவதால் கண்டிப்பாக கொஞ்சம் மன அழுத்தம் குறையும் என்பது என் அனுபவம். வாசகர்களுக்கு மன அழுத்தம் குறையுமா என்றால், எப்போதோ ‘வாஷிங்டனில் திருமணம்’ வாசித்து வாய்விட்டுச் சிரித்து மனம் லேசான அனுபவத்தில், வாசகர்களுக்கும் குறையலாம் என்றே நினைக்கிறேன்.

கேள்வி 2: இந்த genre ல்தான் கதை எழுதுவது, அதில்தான் பிரபலமாவது என்று எது எழுத்தாளர்களைத் தீர்மானிக்க வைக்கிறது? ஒரு நகைச்சுவை எழுத்தாளரால் சீரியஸ் கதைகள் சமூக வரலாற்றுக் கதைகள் நகைச்சுவையில்லாமல் எழுத முடியுமா?

வேணுஜி பதில் : மிக்க நன்றி – எழுத்தாளர்கள் குறித்த கேள்வியை என்னிடம் கேட்டதற்கு! சேட்டைக்காரன் என்ற பெயரில் வலைப்பதிவில் தலைகுப்புற விழுவதற்கு முன்பு நான் கூகிள் குழுமங்களில் பெரும்பாலும் சினிமா, கிரிக்கெட், அரசியல், கொஞ்சம் பொருளாதாரம் என்று பெரிய பிஸ்தா மாதிரி வலம்வந்து கொண்டிருந்தேன். நான் வலைப்பதிவுக்கு வந்த காலகட்டம் ஈழப்பிரச்சினையால் பெரும்பாலான பதிவர்கள் தாக்கத்துக்கு ஆளாகியிருந்தார்கள். சமையல் குறிப்பு, ஆன்மீகம், கவிதை என்பதையெல்லாம் விட்டுப்பார்த்தால், நகைச்சுவைக்குத்தான் பற்றாக்குறையாக இருந்தது. ஆகவே, அதையும் ஒரு வழியாக்கி விடலாமென்ற நல்லெண்ணம் காரணமாகத்தான் நகைச்சுவையின் மென்னியைப் பிடித்துத் திருகினேன். ஆனால், கூகிள் குழுமங்களில் நிறைய சீரியஸ் சிறுகதைகள் எழுதியிருக்கிறேன். ‘கருத்தம்மாவும் வெள்ளைச்சாமியும்’ என்று நான் எழுதிய ஒரு தொடர்கதையை வாசகர்கள் ‘ நல்லதங்காள்’ கதைக்கு நிகராகக் கொண்டாடினார்கள்.

வரலாற்றுக்கதை எழுத நிறைய வாசிக்க வேண்டும். பெரும்பாலான பதிவர்களுக்கு என் லட்சணம் தெரியும். புகாரி ஓட்டலுக்கும் புளியோதரைக்கும் எவ்வளவு தொடர்போ அவ்வளவு தொடர்புதான் எனக்கும் வாசிப்பு அனுபவத்துக்கும். ஆகையால், அந்த வகை என்னிடமிருந்து தெய்வாதீனமாகத் தப்பித்தது.

சுஜாதா வரலாற்று நாவல் எழுதியதையும் சாண்டில்யன் சமூக நாவல் எழுதியதையும் நீங்கள் அறிந்திருப்பீர்கள். திறமையோடு வாசிப்பு அனுபவமும் பொறுமையும் இருப்பவர்கள் சாதித்திருக்கிறார்கள்.  

இன்னொரு கேள்வி 3.  நான் சில பல காணொளிகளை (அந்த அந்த நடிகர்கள் சொல்வது) பிற்பாடு கண்டு, இவ்வளவு படித்தவர்களா, இவ்வளவு புத்திசாலிகளா என்று அதிசயித்திருக்கிறேன், சாதாரண நகைச்சுவை நடிகர்களை. (பெஞ்சமின் - வெற்றிக்கொடி கட்டு,  குமரிமுத்து...) ஹீரோ என்றால் எல்லாம் தெரிந்தவர்களாகவும், நகைச்சுவை நடிகர்கள் என்றால் அவர்களுக்கு ஒன்றும் தெரியாது, வெறும் காமெடியன் என்று எண்ணுவது போல,  சரித்திரக் கதையாசிரியர்கள் எல்லாம் தெரிந்தவர்கள், சமூக நாவல்கள் எழுதுபவர்கள் சிறந்த நாவலாசிரியர்கள் என்ற ஒரு எண்ணம் இருப்பதுபோல, நகைச்சுவை எழுத்தாளர்களைப் பற்றி நல்ல பிம்பம் இருக்கிறதா? 

வேணுஜி பதில் : வலைப்பதிவில் நான் இருந்த காலத்தில் தப்பித்தவறி எப்போதாவது சினிமா பார்த்துவிட்டு விமர்சனம் எழுதினால், ‘உனக்கு எதற்கு இந்த வெட்டிவேலை?’ என்று பின்னூட்டத்திலேயே போட்ட சினிமாஜீவிகள் இருந்தார்கள். வெகு சில வலைப்பதிவர்களைத் தவிர்த்துவிட்டுப் பார்த்தால், நிறைய பேருக்கு ‘இவன் கோமாளிதானே?’ என்ற அலட்சியம் இருந்தது சத்தியம். ஆனால், அந்த பிம்பத்தை ஒரளவு என்னால் உடைக்க முடிந்தது. காரணம், சேட்டைக்காரனுக்கு முந்தைய வேணுகோபாலன் ரொம்ப இல்லாவிட்டாலும் ஓரளவு புத்திசாலித்தனமாக எழுதி வந்தவன் ஆவான்.

 கேள்வி  4 :  உங்களை impress செய்து, அதுபோல நகைச்சுவைக் கதைகள் அல்லது நகைச்சுவையாக எழுதவேண்டும் என்ற தூண்டுதலை உண்டாக்கியவர் யார்?  

வேணுஜி பதில் : எழுத்தாளர்களில் அமரர் சாவி அவர்களின் ‘வாஷிங்டனில் திருமணம்’ தான் நான் முழுமையாக வாசித்த ஒரே நாவலாக இருக்கும்; ஆகவே அவர் ஒரு தூண்டுதலாக இருந்திருக்கலாம். மிகவும் தாக்கத்தை ஏற்படுத்தியவர் சித்ராலயா கோபு; அவர் வசனம் எழுதிய படங்களும் எனக்குள் உறங்கிக் கொண்டிருந்த நகைச்சுவை என்ற சுண்டெலியை எழுப்பி பெருச்சாளியாக்கி உலாத்த விட்டது என்றால் மிகையாய் இராது.

 

கேள்வி 5 : . பொதுவா நகைச்சுவை கதைகள்னாலே இன்னொருவரைக் குறை கூறி அதன் மூலமாக நகைச்சுவையைக் கொண்டுவருவார்கள். எது சிறந்த நகைச்சுவை என்று நீங்கள் நினைக்கிறீர்கள்?

வேணுஜி பதில் :  இன்னொருவரைக் குறை கூறாமல் எந்த ஒரு படைப்பும் எழுதுவது நடக்காத காரியம். குடும்பக்கதை எழுதினாலும் ஒரு மாமியாரை வில்லியாக்கத்தான் வேண்டும். மர்மக்கதை எழுதினால் எவனோ ஒருவன் கொலை செய்திருக்க வேண்டும். பேய் இல்லையென்றால் பி.டி.சாமி என்ன செய்திருப்பார்? சினிமாவில் கூட கவுண்டமணி செந்திலை எப்போதும் கலாய்த்தும் உதைத்தும் கொண்டிராவிட்டாலோ, வடிவேலு அடிவாங்கா விட்டாலோ யார் சிரித்திருக்கப் போகிறார்கள்? விவேக் காமெடி முழுக்க முழுக்க பிறரை குறை சொல்லுகிற காமெடிதான் – சொல்லப்போனால்! நல்ல நகைச்சுவை என்பது ஒரு சாதி, மதம், இனம் போன்ற மிக நாசூக்கான விஷயங்களைத் தொட்டு சம்பந்தப்பட்டவர்களை முகம் சுளிக்கவோ, ஆத்திரப்படவோ இடமளிக்காமல், சிரித்து அலட்சியம் செய்து போகும்படியாக இருந்தால் போதும்.

.

*******************************

கீதா ரெங்கன்  

கேள்வி 1. இந்து கல்லூரில ரொம்ப சேட்டை பண்ணீங்களா வேணு ஜி? அதனால உங்க ஃப்ரென்ட்ஸ் வைச்ச பெயரா!!?

வேணுஜி பதில் : சேட்டையெல்லாம் கிடையாது. எனது கல்லூரி நாட்களின்போது கன்னியாகுமரி மாவட்டம் வரலாறு காணாத ஒரு கொந்தளிப்பை சந்தித்ததால், தேர்ந்தெடுக்க வேண்டிய பாதை வேறாக ஆகி விட்டது. மற்றபடி நாலு முழ வேட்டி, ரப்பர் செருப்புடன் கல்லூரிக்குப் போகிற அம்மாஞ்சிகளுக்குக் கிடைக்கிற பிற பட்டங்கள் அனைத்தும் கிடைக்கப்பெற்றேன்.

கேள்வி 2. நீங்க வீட்டுல எலியா புலியா? (நகைச்சுவையில் பெண்களை (மனைவிகளை) கலாய்க்கறவங்க வீட்டில ரொம்ப பயப்படுவாங்கான்னு கேட்டிருக்கேன் ஆதான்!!)

வேணுஜி பதில் : கண்டிப்பாக கிட்டாமணி, பாலாமணி கதையில் வருகிற மாதிரி இல்லை. அடிப்படையில் நான் ஒரு ஆணாதிக்கவாதியாக இருந்ததுண்டு. பரஸ்பரப் புரிதல்தான் சம்சாரமும் சாப்பாடும் சுவையாக இருக்க உதவும் என்பதைக் கண்டுபிடிக்க பத்து வருஷம் ஆனது. வாழ்க்கையில் உருப்படியாக ஏதாவது சாதித்ததுண்டு என்றால் கணவன் – மனைவி உறவில் எப்போது சிக்ஸர் அடிப்பது, எப்போது டிஃபென்ஸ் ஆடுவது என்ற கலையை ஓரளவு கற்றதே ஆகும்.  

கேள்வி3. கல்லூரியில் நீங்க செய்த புகழ்பெற்ற சேட்டை?

வேணுஜி பதில் : ‘வானவில்’ என்று நாங்கள் நடத்திய கையெழுத்துப் பத்திரிகையில், எங்களது கல்லூரி முதல்வர் உயர்திரு. எல்.சி.தாணு அவர்களைக் கார்ட்டூனாக வரைந்ததுதான்.  

கேள்வி 4. உங்க எழுத்திற்கு ஆதர்ச எழுத்தாளர்?

வேணுஜி பதில் : அப்படி யாருமில்லை. அக்ரஹாரத்தில் பிறந்து வளர்ந்ததால், மாமிகள், பாட்டிகள், தாத்தாக்களின் குசும்பைக் கேட்டுக் கேட்டு நாடி, நரம்பு, தசை, ரத்தம் எல்லாம் இப்படியாகி விட்டது.

கேள்வி 5 : வேணு ஜி, நீங்கள்  எழுதத் தொடங்கியது எப்போது? குறிப்பாக நகைச்சுவை.

வேணுஜி பதில் : எழுதத்தொடங்கியது கல்லூரி காலத்திலேயே! ‘வானவில்’ என்று ஒரு கையெழுத்துப் பத்திரிகை; பிறகு தஞ்சையிலிருந்து வந்த இன்னொரு நண்பர் நடத்திய ‘விசிறி’ என்ற கையெழுத்துப் பத்திரிகை. என்னை கவனிக்கத் தொடங்கியது ‘அன்புடன்’, ‘பண்புடன்’ கூகிள் குழுமங்கள்தான். 2003 முதல் நிறைய எழுதினேன். சினிமா, கிரிக்கெட், பொருளாதாரம் மற்றும் சில சிறுகதைகள்கூட! ஆனால், சினிமாப் பாடல்களின் மெட்டுக்களில் நான் எழுதிய நக்கல் பாடல்கள்தான் என்னை குழுமங்களில் பிரபலமாக்கின.

 

கேள்வி 6 :  பத்திரிகையில் உங்கள் எழுத்து வந்திருக்கிறதா?

வேணுஜி பதில் : ஆம்! நான் எழுதிய சில நக்கல் பாடல்கள் ஜூனியர் விகடன் பத்திரிகையில் வெளியாகின. நகைச்சுவைக் கதைகள் சில அருமைத் தம்பி பாலகணேஷ் புண்ணியத்தில் ‘பாக்யா’ பத்திரிகையில் வெளியாகின. பாக்யாவிலேயே பணிபுரிந்த காலத்தில் ஒவ்வொரு வாரமும் ஏதாவது எழுத வேண்டுமென்று திரு.கே.பாக்யராஜ் அன்புக்கட்டளையிடுவார். அப்புறம், ஒரு கட்டத்தில் பாக்யாவில் நான் கேலிச்சித்திரங்கள் கூட வரைந்திருக்கிறேனாக்கும்.

 

கேள்வி 7 :  ப்ளாக் காமெடி பிடிக்குமா?

வேணுஜி பதில் : மிகவும் பிடிக்கும். சிவாஜி – பானுமதி நடித்த ‘அறிவாளி’ படம் கூட அவ்வகையைச் சேர்ந்ததுதான். தற்போது அந்த வகையில் நெல்சன் கலக்குகிறார். பிடித்திருக்கிறது.

 

கேள்வி 8 : படங்களில், உருவ கேலி செய்து காமெடி செய்வதும், கொஞ்சம் அப்படியும் இப்படியுமாகச் செய்யும் காமெடி பற்றி உங்கள் கருத்தென்ன?

வேணுஜி பதில் : எல்லாமே ஆரம்பம் முதலே இருந்து வருவதுதான். நாகேஷ் நடித்த பல படங்களில் அப்படியும் இப்படியுமான காமெடிகள் இருந்ததுண்டு. சுருளிராஜன் அதை அடுத்த கட்டத்துக்கு எடுத்துச்சென்றார். தேங்காய் சீனிவாசன், வெ.ஆ.மூர்த்தி பற்றிச் சொல்லவே வேண்டாம். வெகுஜன ரசனை குறித்து விசனப்படுவது தவிர்த்து வேறொன்றும் சொல்வதற்கில்லை.

&&&&&&&&&&&&&&&&&&&&&&&&&&&&&&&&&&&&&&&

 

கீதா சாம்பவசிவம்  :

கேள்வி  :  நகைச்சுவை என்னும் பெயரில் மனிதரை மனிதர் உருவத்தைப் பழித்துக் கேலி செய்வது அதுக்கு எல்லோரும் கை தட்டி ஆரவாரம் செய்வதும் என்னால் ஏற்க முடியவில்லை. எப்போவுமே நாகேஷ், தங்கவேலு, சந்திரபாபு போன்ற நடிகர்களின் உயர்ந்த ரக நகைச்சுவையன்றி மற்றதில் சிரிப்பும் வருவதில்லை. அதுக்கு என்ன காரணம் சொல்லலாம்? எனக்கு ரசிக்கத் தெரியலையா?

 

வேணுஜி பதில் :  உருவக்கேலி ஏற்க முடியாததுதான். உதாரணத்துக்கு, ஒரு படத்தில் கவுண்டமணியும் செந்திலும் வடிவேலு தங்கையைப் போட்டி போட்டுக் கொண்டு பெண்பார்க்கப்போய், அந்தப் பெண் குரூபியாக இருப்பதும், இன்னொரு படத்தில் ஸ்ரீதேவி படத்தைக் காட்டி கறுப்பான ஒரு பெண்ணைக் கவுண்டமணிக்குத் திருமணம் செய்து வைப்பதும் அப்பட்டமான நிறவெறி! ஆனால், ஏ.வி.எம் மாதிரி பாரம்பரியம் மிக்க ஒரு நிறுவனம் தயாரிக்கும் படத்திலே, ரஜினி மாதிரி ஒரு நடிகர் இருந்தும், கதாநாயகன் கறுப்பு என்று கதாநாயகி சொல்வதையெல்லாம் அனுமதிக்கிறார்கள் என்றால், சென்சார் விதிகளில் நகைச்சுவை குறித்து சரிவர விதிமுறைகள் இல்லையென்றுதான் பொருள். ஹிந்திப்படங்களில் தமிழர்கள் என்றாலே குடுமி வைத்துக்கொண்டு, வேஷ்டி, அங்கவஸ்திரம் அணிந்துகொண்டு, விபூதி பூசிக்கொண்டு வருவது, நம் தமிழ்ப்படங்களில் மலையாளிகளை, ஆண் என்றால் கொண்டையோடும், பெண்கள் என்றால் முண்டோடும் வரவழைத்து கிச்சுக்கிச்சு மூட்டுவதும்கூட ஒரு விதமான இனவெறிதான். இந்த மாதிரி காமெடியை நாகேஷ்கூட சில படங்களில் பண்ணியிருக்கிறார். என்னைப் பொறுத்தமட்டில் இவை மட்டுமல்ல; ஒரு படத்தில் ஒரு பெண்ணுக்கு ஐந்து கணவர்கள் போட்டிபோட்டுக்கொண்டு போலீஸ் ஸ்டேஷன் வருவதும், ஆறாவதாக இன்னொருவன் வந்து கூட்டிக்கொண்டு போவதும்கூட அப்பட்டமான மட்டமான நகைச்சுவைதான். பெண்ணியப்போராளிகள் எங்கு போனார்கள் என்பது புரியவில்லை. ஆனால், இந்த OTT யுகத்தில் எல்லாக் கண்றாவிகளையும் டிராயிங் ரூமில் குப்பை மாதிரி கொட்ட ஆரம்பித்த நிலையில், அடிப்படையிலேயே வக்ரம் பெருகியிருப்பதுதான் பட்டவர்த்தனமாகத் தெரிகிறது. அது காமெடியிலும் பிரதிபலிக்கிறது. போகிற போக்கில் ‘கலி முத்திருச்சு’ என்று பெருமூச்சு விடுவதைத் தவிர நம்மால் ஆகக்கூடியது எதுவும் இராதோ என்ற பயம் இல்லாமல் இல்லை. 

========================================================

தமிழில் கேள்வி பதில்கள் தொடங்கியது...  

தமிழ்ப் பத்திரிகைத்துறையில் முதன் முதலில் கேள்வி பதில்கள் தொடங்கியது குண்டூசி பத்திரிகையில்.   குண்டூசி பத்திரிகையும் இரண்டு காலம் உண்டு என்று நினைக்கிறேன்.  முதல் குண்டூசி கோபாலன் என்பவரை ஆசிரியராகக் கொண்டது.  அதில் கர்னாடக இசைப்பாடகர் V V  சடகோபன் அவர்களும் சிலகாலம்  பணிபுரிந்தார்.  குண்டூசி பதில்கள் என்றால் குத்தலாக இருக்குமோ என்று வாசகர் ஒருவர் கேட்டிருந்த கேள்விக்கும் கோபாலன் சுவாரஸ்யமாகவும் சாமர்தியமாகவும் பதில் அளித்திருந்தார்.  இதுபற்றி நான் 2020 ல் முகநூலில் பகிர்ந்திருந்தேன்.

துக்ளக் கேள்வி பதில், அரசு பதில்கள், கல்கண்டு தமிழ்வாணன் கேள்வி பதில்கள்...

இவை யாவற்றுக்கும் முன்னோடி யார் தெரியுமா?

தமிழ்ப் பத்திரிகை வரலாற்றில் கேள்வி-பதில் பகுதியை முதன்முதலில் கொண்டு வந்தவர் 'குண்டூசி' என்கிற சினிமாப் பத்திரிகை நடத்திய திரு கோபாலன். வருடம் 1935.

அவருக்கு அதற்கு இன்ஸ்பிரேஷனாக இருந்தது இந்திய அளவில் ஆங்கிலத்தில் வெளியாகிக் கொண்டிருந்த ஃபிலிம் இந்தியா" என்கிற பத்திரிகை என்றாலும் அதன் ஆசிரியர் வாசகர்களுக்கு அளித்த பதில்களில் இருந்த ஆணவத்தை எடுத்து விட்டு "குண்டூசி பதில்கள்" என்று குத்தல் கலந்த பாணியில் பதிலளித்தார் கோபாலன். அப்போது அவர் ஸில்வர் ஸ்க்ரீன் என்கிற தமிழ் / ஆங்கில சினிமாப் பத்திரிகையில் பணிபுரிந்து கொண்டிருந்தார்.

அதற்கு புனைப்பெயர் தேடிக் கொண்டிருந்தபோது அந்த இதழின் ஆசிரியர் பொறுப்பில் இருந்த வி வி சடகோபன்தான் குண்டூசி பெயரை முன்மொழிந்திருக்கிறார்.

குண்டூசி குத்தும், குதறாது. தாள்களை ஒன்று சேர்த்து வைக்கும் நல்ல செயலைத்தான் செய்யும். குத்தல் என்று சொல்வதைவிட கிண்டல் என்று சொல்லலாம்.

ஒரு உதாரண கேள்வி பதில் :

தற்காலம் உள்ள நிலையில் குடும்ப ஸ்த்ரீகள் சினிமாவுக்கு வரலாமா? என்று கேட்ட ஒரு வாசகருக்கு திரு கோபாலின் பதிலாக வந்த கேள்வி : "தற்காலம் சினிமா உள்ள நிலையில் அல்லது குடும்பப் பெண்கள் உள்ள நிலையிலா?"

பின்னாட்களில் குண்டூசி என்கிற பெயரிலேயே பத்திரிகையும் தொடங்கி வெற்றிகரமாக நடத்தினார் திரு கோபாலன்.

அப்புறம் இந்த கேள்வி பதில் பகுதி பயங்கர பிரபலமாகி எல்லாப் பத்திரிகைகளும் தொடங்கின.

கொசுறுத் தகவல், மஞ்சரி ஆசிரியர் திரு தி ஜ ரவும், எழுத்து பத்திரிகை ஆசிரியர் திரு சி சு செல்லப்பாவும் போபாலுடன் (ஜெயபாரதி) பத்திரிகையில் பணிபுரிந்திருக்கிறார்கள்.

தகவல் எடுக்கப்பட்டது திரு வாமனன் எழுதிய புத்தகத்திலிருந்து.

நடுவில் குண்டூசி நின்று போனது என்று நினைக்கிறேன். 40 களில் மறுபடி பி எஸ் ராமையா மறுபடி தொடங்கினார். அதிலிருந்து சில கேள்வி பதில்கள்.

மேலே உள்ள குண்டூசி கேள்வி பதில்கள் பகுதியில் உள்ள கேள்விகளிலிருந்து உங்களுக்கு பிடித்தமான, அல்லது நீங்கள் பதில் சொல்லக்கூடிய சில கேள்விகளைத் தேர்ந்தெடுத்து, அதற்கு உங்கள் பதிலை எழுதி எனக்கு வரும் திங்கட்கிழமைக்குள் அனுப்புங்கள். அடுத்த பதன் அன்று அவை வெளியாகும். படங்கள் மேலே க்ளிக் செய்தால் படங்கள் தனியாக திறக்கும். பெரிது படுத்திப் பார்க்கலாம், படிக்கலாம்.

குண்டூசி நினைவில் இன்னொன்று!

=============================================================================================================================================================

-------------------------------------------------------------------------------------------------------------------------------------------------------------------------------

இன்னும் என்ன பார்க்கறீங்க....   முடிச்சாச்சு இந்த வார புதன் கிழமை...

ஏதோ எங்களால முடிஞ்சது......

அடுத்த வாரம் KGG வந்துடுவாரா?  நார்மல்சி திரும்பிடுமா?

இல்ல...   அடுத்த வாரமும் இவனே ஒப்பேத்துவானா?  கேள்வி கேட்டவங்க வேற வெயிட் பண்ணிக்கிட்டிருக்காங்க...

ம்ம்ம்..  இன்னும் 7 நாள் இருக்கு...

எதையாவது ஒண்ணு போட்டுடலாம்!

லெட் அஸ் வெயிட் அண்ட் வாட்ச்..