"திங்க"க்கிழமை : வழுதுணங்காய் வதக்கல்.. வறுவல்… பொரியல்...மெழுகு புரட்டி. - JKC ரெஸிப்பி

 [ ஸ்ரீராமின் முன்குறிப்பு : "ஹய்யா... இன்னிக்கி எனக்கு லீவு...  ஜாலி.. ஜாலி..." ]

                                       வழுதுணங்காய் வதக்கல்.. வறுவல்…

பொரியல்...மெழுகு புரட்டி.

வழுதுணங்காய்– தெரியாத பெயர் – தெரிந்த காய். கீழே படத்தைப் பாருங்க. 

வழுதுணங்காய் என்பது ஒரு வகை கத்தரிக்காய். ஔவையார் பாடிய ஒரு பாடலில் இது குறிப்பிடப்படுகிறது. இந்த பாடல், "வரகரிசிச் சோறும் வழுதுணங்காய் வாட்டும்" என்று தொடங்குகிறது.

வரகரிசிச் சோறும் வழுதுணங்காய் வாட்டும்

முரமுரென வேபுளித்த மோரும் - திறமுடனே

புல்வேளுர்ப் பூதன் புரிந்துவிருந் திட்டான்ஈ(து)

எல்லா வுலகும் பெறும்.

இது பசியுடன் வந்த அவ்வையாருக்கு பூதன் அளித்த விருந்தாகும். இதில் வழுதுணங்காய் (கத்தரிக்காய்) எண்ணெய் சேர்த்து வதக்கப்பட்டிருந்தது.

மத்திய கேரளத்தில் ஒரு நாலம்பல க்ஷேத்ராடனம் என்று கர்கிடக (ஆடி மாதம்) மாதத்தில் ஒரே நாள் பயணமாக . திருப்பிரயார் ராமர் கோயில், இரிஞ்சாலக்குடா கூடல்மாணிக்கம் பரதர் கோயில், மூழிக்குளம் லக்ஷ்மணன் கோயில்,  பாயம்மல் சத்ருக்கனன் கோயில் என்று நான்கு கோயில்களுக்குச் சென்று வழிபடுவர். அதில் இரண்டாவதாக கூறப்பட்ட பரதன் கோயில் தமிழ் மன்னர்களுடன் தொடர்புடையது. சேர மன்னர் குலசேகர பெருமாள் பல நிவந்தங்கள் ஏற்படுத்தி ஆதரித்தமைக்குச் சான்றாகக் கல்வெட்டுகள் உள்ளன. இந்தக்கோயிலில் வழிபாடாக வழுதுணங்காய் நெய்வேத்தியம் செய்யப்படுகிறது. நெய்வேத்தியத்திற்கு வழுதுணங்காய் திருத்தும் புகைப்படம் கீழே.    

இதுவும் வருடத்தில் ஒரு முறை செய்யப்படும் முக்குடி நெய்வேத்தியமும் வயிறு சம்பந்தமான உபாதைகளுக்கு மருந்தாகக் கருதப்படுகிறது.

சரி நம்முடைய வதக்கல் செய்முறை பார்ப்போம்.

வேண்டிய பொருட்கள்:

வழுதுணங்காய்  ஒன்று

வெங்காயம் சின்னது 4.

சில்லி பிளேக்ஸ் கொஞ்சம்

உப்பு தேவையான அளவு.

வாசனைக்கு விரும்பினால் பூண்டு 2 பல் சேர்க்கலாம். சுவை கூட தேங்காய் துருவல் சேர்க்கலாம். 

எல்லாவற்றையும் எடுத்துக்கொண்டு உட்கார்ந்தபோது பாஸ் ‘நான் செய்கிறேன், நீங்க கம்ப்யூட்டரை நோண்டுங்க’  என்று வெளியாக்கினார். அதனால் நறுக்கிய காய் படம் எடுக்க முடியவில்லை.

வழுதுணங்காயை 5x1x 0.5 cm பரிமாணத்தில் அவியலுக்கு நறுக்குவது போல் நறுக்கிக் கொள்ளவும். வெங்காயத்தை சிறு துண்டுகளாக்கிக் கொள்ளவும். 

ஒரு பாண் அல்லது வாணலியில் கொஞ்சம் எண்ணெய் விட்டு வெங்காயத்தை சேர்த்து வதக்கவும். வெங்காயம் வதங்கியவுடன் கழுவி எடுத்த வழுதுணங்காயை போட்டு சிறிது நேரம் வதக்கவும். வற்றல் மிளகாய் பொடித்து (flakes) தூவி உப்பு, கொஞ்சம் தண்ணீர் தெளித்து வேகவிடவும்.

பாஸுக்கு தக்காளி, கறிவேப்பிலை, கொத்தமல்லி, பூண்டு என்பவை இல்லாமல் சமையல் செய்ய வராது,  தக்காளி ஒன்றை நறுக்கி சேர்த்திருக்கிறார்.

கத்தரிக்காய்கள் ஒரு தனி டைப். உருண்டை, நீளம், கலர், வரி, முள், சுவை என்று வடிவத்திலும் குணத்திலும், சுவையிலும் மாறுபடும் சுமார் 20 வகைகளைப் பார்க்க முடியும்.

கூடுதல் வகைகளை பின்வரும் லிங்கில் காணலாம்.

https://knowledge.desikheti.com/12-popular-brinjal-types-in-india/

பச்சை நிறத்தில் நீளமாக இருக்கும் கத்தரிக்காயையே வழுதுணங்காய் என்று கேரள மக்கள் கூறுவர். திருநெல்வேலி அல்வா போல் வழுக்கும் texture தான் வழுதுணங்காயின் சிறப்பு.