சென்னையில், இந்த இடத்தை நான் பார்த்ததே இல்லை என்று எந்த இடத்தை சொல்லுவீர்கள்?

 

பானுமதி வெங்கடேஸ்வரன்: 

தனித்தன்மை மற்றும் காபி அடிப்பதை பற்றிய என்னுடைய சென்ற வார கேள்வியின் தொடர்ச்சி: ஆண்களைப் போல பெண்கள் இப்படி மற்றவர்களின் பாணியை பின்பற்றுவது போல தெரியவில்லையே?  பெண்களுக்கு ஒரிஜினாலிட்டி அதிகமா?

# நல்லது கெட்டது சரி தப்பு என்று வரும்போது ஆண் பெண் என்று வித்தியாசம் மனிதர்களுக்குள்ளே இருப்பதாகத் தெரியவில்லை.

என்றாலும் ஒரு சில செயல்களை ஆண்கள் செய்ய மாட்டார்கள் ஒரு சில செயல்களை பெண்கள் செய்ய மாட்டார்கள் என்பதும் உண்மைதான்.  1950 களில் ஒரு பெண் சைக்கிள் விடுவதை நான் அதிசயத்தோடு பார்த்திருக்கிறேன்.   ஆந்திராவில் பெண்கள் சுருட்டு பிடிப்பார்கள் என்று கேட்டு ஆச்சரியப்பட்டு இருக்கிறேன். பெண்கள் மது அருந்த மாட்டார்கள் என்று திடமாக நம்பி இருக்கிறேன். இதெல்லாம் பொய்யாக போய்க்கொண்டிருக்கிறது என்பது மிகவும் சோகமான செய்தி.‌ 

ஒரிஜினாலிட்டி என்று வரும் போது அது ஆண் பெண் என்ற வித்தியாசம் பார்த்து வருவதில்லை என்பது என் எண்ணம்.

இப்போதைக்கு திரைப்பட இயக்கம்,  சிறந்த எழுத்தாளுமை  போன்ற பலவற்றிலும் பெண்களின் எண்ணிக்கை மிகச் சொற்பமாக இருக்கிறது.  ஆனால் இது இப்படியே இருந்து விடும் என்று நிச்சயமாக சொல்வதற்கில்லை.‌

& ஹா..  ஹா..  ஹா...  இந்தக் கேள்வியே எதையோ வலியுறுத்த விரும்புவது போலிருக்கிறதே....!

= = = = = = = = = =

எங்கள் கேள்விகள் : 

1) பழைய தமிழ் சினிமா பாடல்களில், இன்றும் கூட உங்களைக் கவர்ந்த பாடல்கள் என்னென்ன? ஏன்? 

2) இந்த பிரபல ஹோட்டலின் எந்த ஊர் கிளையிலும் நான் இதுவரை எதுவும் சாப்பிட்டதில்லை என்று எந்த ஹோட்டலை சொல்லுவீர்கள்? 

3) சென்னையில், இந்த இடத்தை நான் பார்த்ததே இல்லை என்று எந்த இடத்தை சொல்லுவீர்கள்? 

4) இந்தியாவில் நீங்கள் மிகவும் விரும்பிப் பார்த்த சுற்றுலா தளம் அல்லது முக்கிய இடம் எது? 

5) இந்தியாவில் நீங்க பார்க்க விரும்பி, ஆனால் இதுவரை பார்க்காத இடம் எது? 

= = = = = = = = = = = = =

படமும், பதமும் 

பானுமதி வெங்கடேஸ்வரன் : 

கனடாவில் யாராவது இறந்து விட்டால், இறந்தவர் உடலை வீட்டிற்கு கொண்டு வர அனுமதி கிடையாதாம். இடுகாட்டில் புதைக்கவோ,எரிக்கவோ ஸ்லாட்  கிடைக்கும் வரை(தோடா!) அந்த உடலை வைப்பதற்கும் பிரத்யேக விடுதிகள் உண்டு. அவற்றில் ஒன்றுதான் படத்தில் இருப்பது. 

அப்படிப்பட்ட விடுதிகளை பராமரிப்பவர்கள் ஏதோ ஒரு நாள் உறவினர்களும், நண்பர்களும் வந்து இறுதி மரியாதை செய்ய ஏற்பாடு செய்வார்களாம். அப்போது அவரவர் மத நம்பிக்கையின்படி உடை அணிவித்து, திருநீரோ, திருமண்ணோ இட்டுத் தருவார்களாம்.

மரணித்த எல்லா உடல்களுமே எம்பாம்பிங் செய்யப்படுவது கட்டாயமாம்.

- - - - - - - - - - - -

நெல்லைத்தமிழன் : 

பஹ்ரைன் என்பது ஒரு தீவு என்று உங்களுக்குத் தெரிந்திருக்கும். அது கத்தார் நாட்டிலிருந்து வெகு அருகில் உள்ளது (20 நிமிட விமானப் பயணம்).  பஹ்ரைனில் பல இடங்களில் இருக்கும் கடல், ஏரி மாதிரித்தான் தோற்றமளிக்கும். அலைகளே இருக்காது. கடலிலும் சட்னு நடந்தே ரொம்ப தூரம் போய்விட முடியும். பயமும் கிடையாது. அரசு இதனால் பல இடங்களில் கடலின் போக்கை சிறிது மாற்றி, பல நிலங்களை மீட்டெடுத்திருக்கிறார்கள்.  நான் அந்த தேசத்துக்குச் சென்ற காலம் 1995. சுமார் 22 வருடங்கள் அங்கு இருந்தேன். அப்போது பல இடங்களை மீட்டெடுத்ததை நான் பார்த்திருக்கிறேன்.

உண்மையில் பஹ்ரைன் என்பது பல்வேறு தீவுகளை உள்ளடக்கிய தேசம். காலப்போக்கில் இந்த நில மீட்டெடுப்புகளினால் பல தீவுகள் ஒன்று சேர்ந்துவிட்டன. பல தீவுகளுக்கும் பலப் பல இடங்களில் பாலங்கள் போட்டு, எல்லாவற்றையும் சுலபமாக இணைத்திருக்கிறார்கள்.

அதற்காக கடற்கரை இல்லை என்று நினைத்துவிடாதீர்கள். நிறைய மணலுடன் கூடிய பெரிய கடற்கரைகள் அங்கு உண்டு. நம்ம மெரீனா போல இல்லாமல், மனுஷன் நிம்மதியாக நடக்கவோ இல்லை உட்கார்ந்திருக்கவோ முடியும். 

அப்படீன்னா கடல்ல குளிப்பதில் பயமே இருக்காதா? கடலின் நீர் அதன் போக்கை மாற்றிக்கொண்டிருக்கும் (ஒரு நாளில்). அதனால் சட் என்று தண்ணீர் மட்டம் உயர ஆரம்பிக்கும், அதுபோல நீரின் வேகமும் அதிகமாகும். நாங்கள் அப்படி ஒரு கடற்பகுதியில் 100 மீட்டருக்கும் அதிகமான தொலைவில் இடுப்புக்குக் ஒரு அடி கீழே வரை இருக்கும் கடல் நீரில் விளையாடிக்கொண்டிருந்தோம் (கூடைப்பந்து). சட் என்று எனக்கு தண்ணீர் உயரம் அதிகமாவதும் வேகமாவதும் தெரிந்தது. பந்து என்னைத் தாண்டி விழுந்ததைப் பற்றிக் கவலைப்படாமல் எல்லோரையும் எச்சரிக்கை செய்து கரையேறிவிட்டோம்.  இந்தப் படத்தில் எச்சரிக்கை போர்ட் வைத்திருப்பது தெரிகிறதா?

= = = = = = = = = = = = =

KGG பக்கம் : 

மருந்துகள், மாத்திரைகள் . 

நான் சாதாரணமாக சிறிய உடல் உபாதைகளுக்கு ஹாஸ்பிடல், டாக்டர் மருந்து மாத்திரை என்றெல்லாம் போவது இல்லை. 

'ஜலதோஷத்துக்கு சாப்பாடு போடு; ஜுரத்திற்கு பட்டினி போடு' என்று ஒரு பொன்மொழி (?) உண்டு. 

அதாவது ஜலதோஷம் வந்தால் சூடாக உணவு, சூடான பானங்கள் என்று சாப்பிடவேண்டும். நிறைய ஓய்வு எடுத்துக்கொள்ள வேண்டும். 

ஜுரம் வந்தால், லங்கணம் பரம ஔஷதம் என்று பட்டினி போட்டு, சரி செய்துகொள்ள வேண்டுமாம்! 

அப்போ ஜலதோஷம், மூக்கு அடைப்பு, மார்ச்சளி ஜுரம் எல்லாம் ஒன்றாக வந்தால் என்ன செய்வது? அதுதான் ஆச்சு எனக்கு! இரண்டு வாரங்களுக்கு முன்பு, இவை யாவும் ஒன்றாக வந்து சேர்ந்தது! 

Dolo 650 க்கு அடங்கவில்லை. விட்டுவிட்டு ஜுரம். மார்ச்சளியால் wheezing நிலை. கர் கர் என்று மூச்சுவிடும் நிலை. பையன் என்னுடைய நிலை தெரிய வந்ததும், உடனடியாக கிளம்பு ஹாஸ்பிடல் - போவோம் என்று அழைத்துக்கொண்டு சென்றான். 

அருகில் உள்ள மனிப்பால் ஹாஸ்பிடல் சென்று, டாக்டரைப் பார்த்து, 5 நாட்களுக்கு அவர் எழுதிக்கொடுத்த மருந்து மாத்திரைகளை (அவரும் மற்ற மருந்துகளோடு Dolo 650 எழுதிக் கொடுத்தார் என்பது வேறு விஷயம்.) வாங்கி, சாப்பிட்டு, ஒருவாறாக உடல் நலம் தேறி வருகிறேன். 

ஆனால், இன்னமும் சுவாச தொந்தரவு, ஜீரண மண்டல அச்சுறுத்தல்கள் கொஞ்சம் தொடர்கின்றன. நடந்தால் மூச்சு வாங்குகிறது. கொஞ்சம் நடை, கொஞ்சம் ஓய்வு என்று தினமும் சமாளித்து வருகின்றேன். 

என்னுடைய அனுபவத்தில், நம் மூலம்  டாக்டருக்கு மற்றும் மருந்து மாத்திரைகளுக்கு கொஞ்சம் செலவழிக்க வேண்டும் என்று இருந்தால், அந்த அளவுக்கு செலவு செய்யும் வரை, வியாதிகள் தொடரும். குறிப்பிட்ட அளவு செலவு செய்தவுடன், எல்லா வியாதிகளும் சொல்லாமல் கொள்ளாமல் ஓடி மறையும்! 

பார்ப்போம் இந்த சீசனில் எனக்கு என்ன செலவு எழுதி வைக்கப்பட்டுள்ளது என்று! 

நோயற்ற வாழ்வே குறைவற்ற செல்வம். 

= = = = = = = = = = = =