"திங்க"க்கிழமை : பழ (நேந்திரன் பழம்) இடியாப்பம் - கீதா ரெங்கன் ரெஸிப்பி

  

பழ (நேந்திரன் பழம்) இடியாப்பம்

 

தலைப்பைப் பார்த்ததும், ஐயையே பழ இடியாப்பமா என்று ஓடிப் போக நினைப்பவர்கள், தூர நின்று எட்டிப் பார்ப்பவர்கள் எல்லாரும் நீங்க செய்யறீங்களோ இல்லையோ பதிவை மட்டும் பார்த்துவிட்டுப் போங்களேன்! சும்மா வாசிப்பதில் என்ன குறையப் போகுது இல்லையா?!! சொல்லுங்க!!

கேரளம் மற்றும் கன்னியாகுமரில பிரபலமான ஓர் உணவு. 

எடுத்துக் கொள்ளும் அரிசி மாவிற்கு ஏற்ப பழங்களின் எண்ணிக்கை. எனவே உங்களுக்குத் தேவையான அரிசி மாவைக் கப்பில் அளந்து கொண்டு - ஒரு கப் மாவு என்றால் பழத்தின் சைசைப் பொருத்து 1 அல்லது 1 1/2.

நான் 1 1/2 கப் மாவு எடுத்துக் கொண்டதற்கு 2 பெரிய பழங்கள் எடுத்துக் கொண்டேன். மாவும் பழமும் சம அளவிலும் எடுத்துக்கலாம். நான் எடுத்துக் கொண்ட அளவிற்கு 3/4 கப் துருவிய தேங்காய். ஏலக்காய்ப் பொடி 1/2 ஸ்பூன். சுக்குப் பொடி 1 ஸ்பூன். 2 ஸ்பூன் நெய்.

பழங்களை ஆவியில் வேக வைத்துக் கொண்டு மிக்ஸியில் நன்றாக அரைத்துக் கொள்ளவும். மசிந்திருக்க வேண்டும். இதில் தண்ணீர் சேர்க்கத் தேவை இருக்காது. வேண்டியிருந்தால் ரொம்பக் கொஞ்சமாக விட்டுக்கலாம் ஆனால் என் செய்முறையில் நான் இதில் தண்ணீர் சேர்க்கமாட்டேன்.

இடியாப்ப மாவு வைத்திருந்தீங்கனா வறுத்துக் கொள்ள வேண்டாம். இல்லை என்றால் அரிசி மாவை கொஞ்சம் வறுத்துக் கொள்ள வேண்டும். சிவக்க வறுக்கத் தேவையில்லை. இந்த மாவில் ஒரு சிட்டிகை உப்பு போட்டுக் கலந்து வைச்சுக்கோங்க.

சாதாரணமாக ஒரு கப் மாவிற்கு ஒரு கப் தண்ணீர் கொதிக்க வைத்துக் கலப்போம். ஆனால், இங்கு பழமும் சேர்க்கப் போவதால் தண்ணீர் எடுத்துக் கொண்டு கொஞ்சம் கொஞ்சமாக விட்டுக் கலந்து கொள்ளலாம்.

முதலில் மாவில் ஏலக்காய்ப் பொடி, சுக்குப் பொடி எல்லாம் கலந்துவிட்டு பழத்தைப் போட்டு நல்லா கலந்துக்கோங்க. பழமே போதுமாக இருந்தால் அப்படியே விட்டுவிடலாம்.

வெண்ணை காய்ச்சி நெய்யாக்கிய பாத்திரத்திலேயே தண்ணீரைக் கொதிக்க வைத்துக் கொண்டேன்.

2 ஸ்பூன் நெய் மேலே ஊற்றி...

இப்படி நன்றாகக் கலந்து உருட்டி 

இல்லைனா ஒரு 1/4 - 1/2 கப் தண்ணீரை நன்றாகக் கொதிக்க வைத்து அப்படியே கொட்டி விடாமல், கொஞ்சம் கொஞ்சமாக விட்டு நன்றாகக் கலந்து, ரெண்டு ஸ்பூன் நெய்யும் சேர்த்து பந்து போன்று உருட்டிக் கொண்டுவிடலாம். 

எந்த நாழியில், இடியாப்ப அச்சில் பிழிந்தாலும் கடைசியில் கொஞ்சம் மாவு பிழிய முடியாமல் குழலில் இருக்கும் இல்லையா அதை  உருட்டி தேங்காயோடு பிரட்டி இடியாப்பத்தோடு வேக வைத்து விடுவதுண்டு. பழக் கொழுக்கட்டை !!! இதுவும் கேரளத்தில் பிரபலம்தான். அப்படி மீந்த மாவை உருட்டி வேக வைத்த கொழுக்கட்டை ஒன்று தட்டின் நடுவில்

அதன் பின் இட்லி தட்டு அல்லது இடியாப்பத் தட்டில் கொஞ்சம் நெய்யோ தேங்காய் எண்ணையோ தடவிக் கொண்டு கொஞ்சம் தேங்காய் தூவிக்கோங்க, இந்தக் கலவையை இடியாப்ப அச்சில் போட்டுப் பிழிந்து இடையிலும் கொஞ்சம் தேங்காய் தூவிக் கொண்டு பிழிந்து விட வேண்டியதுதான். நான் இப்ப இடியாப்பம்/சேவை பிழியும் மெஷின் வைத்திருப்பதால் அதில் பிழிந்தேன். குக்கர், அல்லது இட்லி கொப்பரை எது உங்களுக்கு வசதியோ அதில் இந்தத் தட்டு ஸ்டாண்டை வைத்து 10 நிமிடம் ஆவியில் வைத்து எடுத்தால் பழ இடியாப்பம் ரெடி. 

இதற்குத் தொட்டுக் கொள்ள, வெல்லம் போட்ட தேங்காய்ப்பால் நல்லாருக்கும். ஆனால் பழம் போட்டிருப்பதால் அதுவே கொஞ்சம் தித்திப்பாக இருக்கும்.

நான் வெல்லம் சாப்பிட முடியாது என்பதால் காய்கறி தேங்காய்ப்பால் கலந்த ஸ்ட்யூ செய்துவிடுவதுண்டு. (சொதி அல்ல)

என் தங்கை வந்திருந்த போது கேழ்வரகு மாவில் பழ இடியாப்பம் செய்திருந்தேன். அவளுக்கு ரொம்பப் பிடித்திருந்தது. அதைப் படம் எடுக்க விட்டுப் போச்!

=========================================================================================

இடுக்கண் களைந்த கலைஞர் 

கலைஞரின் ஆட்சியைக் கடுமையாக விமரிசித்து தினமணி நாளேட்டில் அவ்வப்போது தலையங்கக் கட்டுரைகள் வெளியாவது உண்டு. இது கலைஞருக்குச் சற்று எரிச்சலை ஏற்படுத்தி இருந்தது. அதை ஒரு வகையான கோபம் என்று கூடச் சொல்லலாம். அப்போதெல்லாம் சாவி அவர்கள்தான் கலைஞர் அவர்கள் திருப்தி அடையும் வகையில் சமாதானம் பேசி விட்டு வருவது வழக்கம்.

கலைஞர் அவர்களின் ஆட்சி மாறி எம்.ஜி.ஆர். தலைமையில் அ.இ.அ.தி.மு.க. ஆட்சி அமைந்தபோது எம்.ஜி.ஆர். படத்தை தினமணி கதிர் அட்டையில் போட வேண்டும் என்று நிர்வாகம் சாவியிடம் கேட்டுக் கொண்டது. ஸ்பெஷல் ஆபீசர் ராமகிருஷ்ணன் எம்.ஜி.ஆர். படத்தைக் கதிர் அட்டையில் வெளியிட வேண்டும் என்பதில் ரொம்பக் குறியாக இருந்தார். சாவியிடம் நைச்சியமாகப் பேசி காரியத்தைச் சாதிக்கப் பல உபாயங்களைக் கையாண்டார்.

"அட்டையில் யார் படத்தைப் போடுவது என்பது அப்பத்திரிகையின் ஆசிரியருக்குள்ள உரிமை. அதில் யாரும் தலையிடுவதை நான் விரும்பவில்லை. தினமணி கதிர் அட்டையில் எம்.ஜி.ஆரின் படத்தை நான் வெளியிட மாட்டேன். என்னையும் மீறி அப்படி ஒருவேளை அவர் படம் கதிரில் வெளியாகுமானால் அதற்கடுத்த வாரம் நான் கதிர் ஆசிரியராக இருக்கமாட்டேன்" என்று ராமகிருஷ்ணனிடம் கண்டிப்பும் கறாருமாகச் சொல்லி விட்டார் சாவி.

'எம்.ஜி.ஆர். படத்தை அட்டையில் வெளியிட வேண்டும் என்று நிர்வாகமும் தொடர்ந்து சாவி அவர்களுக்குப் பல்வேறு முனைகளிலிருந்து நிர்ப்பந்தம் தந்து கொண்டே இருந்தது. இதில் மிகவும் தீவிரம் காட்டியவர் ஸ்பெஷல் ஆபீசர் ஆர்.ராமகிருஷ்ணன்.

"இதோ பாருங்கள்! எத்தனை முறை யார் மூலம் வந்து கேட்டாலும் என் பதில் ஒன்றேதான். நான் ஆசிரியராக இருக்கும்வரை தினமணி கதிர் அட்டையில் எம்.ஜி.ஆரின் படம் வராது" என்று ஒரே அடியாக மறுத்து விட்டார் சாவி.

இதற்கிடையில் சாவி அவர்கள் தம் குடும்பம் தொடர்பான ஒரு முக்கிய வேலையாக அமெரிக்கா செல்ல வேண்டியதாயிற்று. தாம் ஊரில் இல்லாதபோது சூழ்ச்சி நடக்கும் என்பது சாவிக்குத் தெரியாததல்ல. ஆனாலும் அவர் அமெரிக்கா போக வேண்டிய கட்டாயம் இருந்ததால் புறப்பட்டுச் சென்றார்.

எக்ஸ்பிரஸ் நிறுவனத்தின் சிறப்பு அதிகாரி ராமகிருஷ்ணன் அவர்களிடம் சொல்லி அனுமதி பெற்ற பிறகே சாவி அமெரிக்கா போனார். திரு. ராமகிருஷ்ணனும் எந்த ஆட்சேபனையும் சொல்லாமல் சந்தோஷமாகவே அனுப்பி வைத்தார்.

இதுதான் தக்க தருணம் என்று எண்ணி சாவி ஊரில் இல்லாததைப் பயன்படுத்திக் கொண்டு தினமணி கதிர் அட்டையில் எம்.ஜி.ஆர். படத்தைப் போட நிர்வாகம் முடிவு செய்துவிட்டது. அதே சமயம் கூடவே சாவி அவர்களையும் பதவியிலிருந்து நீக்கிவிடுவது என்றும் முடிவு எடுத்தது.சாவி ரிடயர் ஆகவேண்டிய வயதைக் கடந்து, மேலும் இரண்டாண்டுகள் ஆகிவிட்டதால் அதையே ஒரு சாக்காகச் சொல்லி அவரைப் பதவியிலிருந்து நீக்கி இருப்பதாக வீட்டுக்குக் கடிதம் அனுப்பி விட்டார்கள்.

சாவி தினமணி கதிரிலிருந்து வெளியேற்றப்பட்டதற்கு எம்.ஜி.ஆர். அட்டைப்பட விவகாரம்தான் ஒரே காரணம் என்று சொல்லத் தேவை இல்லை."

இது ராணிமைந்தன் எழுதிய சாவி 85 புத்தகத்தில் இருக்கிறது.  அமெரிக்காவிலிருந்து திரும்பிய சாவியை வரவேற்க்க கூட ஆளில்லாத நிலையில் கலைஞர் ஆளனுப்பி சாவி அவர்கள் கவலைப்பட வேண்டாம் என்றும் அவருக்காக தான் ஒரு பத்திரிகை ஆரம்பிப்பதாகவும் சொல்லி ஆற்றுப்படுத்தினார்.