வயிற்றுப் பசிக்கு ஏதோ ஒரு உணவு போதும் என்றிருக்க நாம் ஏன் விதவித உணவை நாடுகிறோம்?+ சரோஜாதேவி பகுதி

 

கேள்வி பதில்கள் :

நெல்லைத்தமிழன் : 

1. உழவுக்கும் தொழிலுக்கும் வந்தனை செய்வோம் என்பது சரிதான். இருந்தாலும் உழவர்களுக்கும் அது தொழில்தானே ஹோட்டல் பிசினெஸ் போல. ஏன் நாம் அதீதமாக நடிக்க ஆசைப்படுகிறோம்?

# உழவின் பயன் இன்றியமையாத உணவாதலால் உழவுக்கு சிறப்பான இடம் குறளில் கூட தரப்பட்டுள்ளது. 

& உழவன் உழைப்பது தனக்காக கொஞ்சம்; மற்றவர்களுக்காக நிறைய. மற்றவர்கள் உழைப்பது தங்களுக்காக மட்டுமே! 

2 உறவினர் ஒருவர் எதற்கு கோயில் கோயிலாகப் போகணும்? உள்ளூர் கோயிலுக்குச் சென்றால் போதாதா? ஒரு தடவை பயணம் செய்து சென்ற கோயிலுக்கு ஏன் பலமுறை போகணும் என்கிறார். உங்கள் அபிப்பிராயம் என்ன?

# அவர் சொல்வதில் ஓர் உண்மை இருக்கிறது. என்றாலும், வசதியும், நேரமும் இருந்தால் -  அங்கு செல்வதன் மூலம் மன மகிழ்ச்சியும் அமைதியும் கிடைத்தால், திரும்பத் திரும்ப ஒரே கோயிலுக்குப் போவது கூட சரிதான். தினசரி அரிசி சாப்பிடுவது போல.

& நம்முடைய மனத் திருப்திதான் முக்கியம். 

3  வயிற்றுப் பசிக்கு ஏதோ ஒரு உணவு போதும் என்றிருக்க நாம் ஏன் விதவித உணவை நாடுகிறோம்? இந்த மனநிலை உள்ள நாம் ஏன் வீடு என்று வரும்போது சொந்த வீடு என ஆசைப்படுகிறோம்?

# விருப்பங்கள் பலவாக இருத்தல் இயற்கை நியதி.  மனிதன் அனுபவிப்பதற்காக இந்த உலகையும் உலகில் உள்ள பொருள்களையும் இறைவன் படைத்தான் என்ற நம்பிக்கையில் ஓர் உண்மை ஒரு நியாயம் இருக்கிறது.

அதேபோல் வீடு என்று வந்தாலும் சொந்தக்காரர் விரட்டி விட்டால் ஓட வேண்டும் என்றிருக்கும் வாடகை வீடு வேண்டாம் எனக்கென்று ஒரு வீடு வேண்டும் என்று மனிதன் விரும்புவதில்  தவறென்ன ?

4  காதல் உணர்வு, பகை உணர்வு, பொறாமை உணர்வு போன்றவை எப்போது ஒரு மனிதனை விட்டு நீங்குகின்றன?

# இயலாமை அல்லது உடல் சோர்வு வரும்போது. வெகு சிலருக்கு மெய்யறிவு வந்தபோது.

5 எந்த ஒரு ஆசைக்கும் எக்ஸ்பயரி தேதி உண்டு என நம்புகிறேன். பத்திரிகை வாசிப்பு, திரைப்படம் பார்த்தல், நல்ல உணவு, ஏன் கோயில் உலாவிற்கும். காலாவதி ஆகாத ஆசைகள் மனிதனுக்கு உண்டா? உண்டு எனில் எவை எவை?

# உண்டு.  தான் புகழப்பட வேண்டும், மதிக்கப்பட வேண்டும், நோயின்றி சிரமமின்றி இருக்க வேண்டும் என்ற ஆசைகள் நிலையானவை. ஒரு கட்டத்தில் சிரமமின்றி, அடுத்தவருக்கும் கஷ்டம்  இன்றி நம் உயிர் போக வேண்டும் என்ற ஆசையும் எல்லோருக்கும் இருக்கக்கூடும்.

6 கொரானா வைரஸால் நாம் பல நன்மைகள் அடைந்திருக்கிறோம் இல்லையா? அதற்கு யார் யாருக்கு நன்றி சொல்ல வேண்டும்?

# அந்தக் கிருமிக்கு மட்டும்தான்! 

7 அண்மையில் குளிகை காலத்தில் (இது ராகு காலம் எம கண்டம் குளிகை. குளிக்கும் நேரமல்ல) நல்ல செயல்கள் தொடங்கினால் விருத்தியடையும் அசுப காரியங்கள் செய்யக்கூடாது தொடரும் என்பதால் எனப் படித்தேன். ராகு காலம் எம கண்டம் குளிகை பார்க்கிறீர்களா? அவற்றை விளக்க முடியுமா?

# இதெல்லாம் நம்பிக்கையின் பாற்பட்ட விஷயம். ராகு காலத்தில் தொடங்குவது கஷ்டங்களை உண்டாக்கும் என்றும், குளிகை காலத்தில் செய்வது மீண்டும் மீண்டும் வரும் என்றும் நம்பப்படுகிறது. இது உன் வரை உண்மையா என்பதை உண்மையா என்றெல்லாம் கேள்வி கேட்க இடம் இருந்தாலும் கேட்க முடியாது. ஏனென்றால் கிடைக்கும் பதில் எந்த அளவு சரியாக இருக்கும் என்று யாராலும் சொல்ல இயலாது.

பானுமதி வெங்கடேஸ்வரன் : 

ராமர் 15000 வருடங்கள் வாழ்ந்தார் என்று வால்மீகி ராமாயணத்தில் கூறியிருப்பதை அப்படியே எடுத்துக் கொள்வீர்களா? அல்லது 78 வருடங்கள்தான் வாழ்ந்தார் என்று லாஜிக்கலாக துஷ்யந்த் ஸ்ரீதர் சொல்வதை ஏற்பீர்களா?

# அது வேறு யுகம். அப்போது வருஷம் நாள் கணக்கு எப்படி இருந்ததோ நமக்குத் தெரியாது.  இதற்கு விளக்கம் நமக்குத் தேவைதானா என்பது என் கேள்வி.  அது எப்படியும் இருந்து விட்டுப் போகட்டும்.

தயிர் சாதத்தில் மாதுளம் பழ முத்துக்கள், விதையில்லாத திராட்சை பழங்களை சேர்த்தால் பிடிக்குமா?

# பிடிக்கும்.  பிடிக்காதவர்களும் இருப்பார்கள்.  தவறில்லை.  உங்கள் கேள்வியிலிருந்து,  உங்களுக்கே பிடிக்குமா என்கிற ஐயம் தான் எழுகிறது.

& பிடிக்கும். 

= = = = = = = = =

படமும், பதமும் :  

நெல்லைத்தமிழன் : 

பஹ்ரைனில் உள்ள மிகப் பெரிய பள்ளிவாசல் இது. இதற்கும் அம்மாவை அழைத்துச்சென்றிருக்கிறேன். இதன் உள்ளே வேலைப்பாடுகள் உண்டு. ஆனால் உள்ளே அழைத்துச்செல்லவில்லை. காரணம் தலையை கவர் செய்துகொள்ளவேண்டும் என்றெல்லாம் கண்டிஷன்கள் உண்டு. அப்படி அம்மாவை அந்த இடத்திற்கு எதற்கு அழைத்துச் செல்லவேண்டும் என்று விட்டுவிட்டேன். இந்தப் படத்தைப் பார்க்கும்போது 1995 நினைவுகள் வருகின்றன. அவற்றைப்பற்றி ஒரு தொடராக எழுதவேண்டும்.

அரபு தேசங்களைப் பற்றி நினைக்கும்போது, நாம் தொந்தரவு தராத வரை, நமக்கு யாருமே தொந்தரவு தராமல், பாதுகாப்பாக நாம் உணரும்படியாக, எல்லோரும் நட்பாக, நம்மைப் பற்றிக் கவலைப்படாமல் இருக்கும் நிலைதான் எனக்கு நினைவுக்கு வருகிறது.  ஆனால் ஒன்றைப் பற்றி மிகவும் கவனமாக இருக்கவேண்டும். அரபிப் பெண்களை தவறான நோக்கத்துடன் அல்லது அவங்க சந்தேகப்படும்படியாக புகைப்படம் எடுத்துவிடக் கூடாது. அதுல அவங்க ரொம்ப சென்சிடிவ். நமக்கு மிகப் பெரிய பிரச்சனை உருவாகிவிடும். பொதுவாகவே அரபிக்கள், பெண்களிடம் மரியாதை மிக்கவர்கள், ஆண்கள் பெண்களுக்கு எதிராக எந்தக் குற்றச் செயலிலும் ஈடுபட அனுமதிப்பதில்லை.

= = = = = = = = = = =

KGG பக்கம் : 

சரோஜாதேவி தொடர் கதை 

சென்ற வார பகுதி 09 சுட்டி : பகுதி 09 : மாயா மச்சீந்திரா .. ! 

இனி 

இந்த வாரப் பகுதி. 

பகுதி 10: ராபின்ஹூட் நாநா ! 

ஐந்தாறு நிமிடங்களில் திரும்பி வந்த நாநாவிடம், " திடீரென எங்கே போனே?" என்று கேட்டான் பாபா. 

"டாக்டர் கபாலி வீட்டுக்கு."

" எதுக்கு?"

" அவர் வருகிற நோயாளிகளிடம் எப்போதும் பணமாகத்தான் வாங்குவார். ஜி பே, ஃபோன் பே,நெட் பேமெண்ட் எல்லாம் வாங்க மாட்டார். " 

" ஆமாம் - எனக்குத் தெரிந்து இந்த மாதிரி பல டாக்டர்கள் அப்படித்தான் செய்கிறார்கள். கேட்டால் இன்கம்டாக்ஸ் பிரச்சினை வரும் என்பதால் அப்படி பணமாக வாங்குவதாக சொல்வார்கள்" என்றான் பாபா. 

" அதேதான். அதனால நான் போய், அவர் திரைக்கு அந்தப் பக்கம் ஒரு பேஷண்டுக்கு ஊசி போட போனபோது அவருடைய கலெக்ஷன் பணத்திலிருந்து நான்கைந்து ஐநூறு ரூபாய் நோட்டுகளை எடுத்து என் பாண்ட் பாக்கெட்டில் போட்டுக்கொண்டு வந்துவிட்டேன்" 

" அடப்பாவி! திருடினியா" 

" திருட்டா? சேச்சே இது ஒரு ஷார்ட் ஷர்க்யூட்டிங் யுக்தி" 

" எப்படி?"

" அதைச் சொல்வதற்கு முன் இந்த டீக்கடைக்கு இந்தப் பக்கத்தில் இருக்கும் ஃபார்மஸிக்கு வா" 

இருவரும் பக்கத்தில் இருந்த கணபதி ஃபார்மஸிக்கு சென்றார்கள். 

ஃபார்மஸியில் இருந்த ஆள், நாநாவைப் பார்த்ததும் " வாங்க நாநா. மருந்து ஏதாவது வேண்டுமா? " என்று கேட்டார். 

" இல்லை. என் அக்கவுண்ட்ல இன்னும் எவ்வளவு பாக்கி இருக்கு?" என்று கேட்டான் நாநா. 

ஒரு நோட்டை எடுத்துப் பார்த்த அந்த ஆள் "410 ரூபாய் இருக்கு" என்றார். 

" சரி. இந்தா இந்தப் பணத்தை என் கணக்கில் வரவு வெச்சுக்குங்க " என்று சொல்லி தான் டாக்டர் வீட்டிலிருந்து கொண்டு வந்த பணம் எல்லாவற்றையும் கொடுத்தான் நாநா. 

" அப்பப்போ பெரிய அமௌண்ட் மருந்து எதுவும் கொடுத்தால் பில் ஃபோட்டோவை பனானா எண்டர்பிரைசஸ் எண்ணுக்கு அனுப்பிடணும். சிறிய அமௌண்ட் ஆக இருந்தால் என் அக்கவுண்டில் இருந்து கழித்துக் கொள்ள வேண்டும் " 

" சரி சார். இவர் யாரு? " என்று அவர் கேட்டார் பாபாவைக் காட்டி.‌

" இவர் பனானா எண்டர்பிரைசஸ் பார்ட்னர். பாபா என்று பெயர்" 

" நல்லது சார். ஏதாவது மருந்து வாங்க வேண்டும் என்றால் ஃபோன் பண்ணுங்க நாநா சார்" 

இருவரும் கடையிலிருந்து கிளம்பினார்கள். 

" ஒன்றுமே புரியவில்லை என்ன அக்கவுண்ட்? எதற்கு பில் அனுப்பவேண்டும்? " என்று கேட்டான் பாபா. 

" மருந்து வாங்க வருபவர்கள் பணமில்லாத அல்லது வருமானம் குறைந்த ஆட்களாக இருந்தால் அவர்களிடம் பணம் வாங்காமல், மருந்து கொடுத்துவிட்டு சிறிய அமௌண்ட் என்றால் என் அக்கவுண்டில் கழித்துக் கொள்வார். பெரிய தொகை என்றால் பில் நகலை பாவனாவின் எண்ணுக்கு அனுப்பி அங்கிருந்து பணம் பெற்றுக் கொள்வார். " 

" உன் அக்கவுண்டுக்கு இப்போ நீ கொடுத்தது திருடிய பணம்தானே! " 

" ஆனால் அது முழுவதும் ஏழைகளின் மருந்து செலவுக்குதான் போகும். எனக்கு மருந்து எதுவும் வேண்டும் என்றால் நானே முழுப் பணத்தையும் கொடுத்து விடுவேன்" 

" ஆனாலும் டாக்டரிடமிருந்து பணம் கையாடல் செய்தது எனக்கு சரியாகப் படவில்லை " என்றான் பாபா. 

" விளக்கமாக சொல்கிறேன் கேள். 

இந்த டாக்டர் வருமான வரி கட்டாமல் பணமாக வாங்கி வருகிறார். ஒவ்வொரு பேஷண்டிடமும் சராசரி 500 ரூபாய் வாங்குகிறார் என்றால் ஒரு நாளில் 40 பேஷண்ட்  - காலை 2 மணி நேரம்  20 பேர்,   மாலை இரண்டு மணி நேரம் 20 பேர் என்று வைத்துக் கொண்டால் 40x500= 20000. ஒரு மாதத்தில் ஆறு லட்சம். ஒரு வருடத்தில் 72 லட்சம். இது போக இவர் ஒரு பெரிய மல்ட்டி ஸ்பெஷாலிட்டி ஆஸ்பத்திரியில் வேலை செய்து சம்பளம் வாங்குகிறார். அதற்கு மட்டும் வருமான வரி அவர்கள் பிடித்துக் கொள்வார்கள். வருமான வரி ரிட்டர்ன் ஃபைல் செய்யும்போது தன்னுடைய ப்ரைவேட் பிராக்டிஸ் மூலம் கிடைக்கும் வருமானத்தை காட்டமாட்டார் அல்லது குறைத்துக் காட்டுவார். இவர் ஒழுங்காக வரி கட்டி, அது அரசாங்கத்துக்குப் போய், அரசாங்க நலத் திட்டங்கள் - ஜன் ஔஷாதி - போன்றவை மூலமாக ஏழை மக்களுக்கு பயன்பட வேண்டும் என்றால் எவ்வளவு நாட்கள் ஆகும்? நான் அதை ஷார்ட் சர்க்யூட் செய்து உடனடியாக ஏழை மக்களுக்கு உதவுகிறேன்! சரிதானே?" என்றான் நாநா. 

" சரிதான் போ! நானும் இப்படி அருவமாகி ராபின்ஹூட் வேலை செய்ய வேண்டுமா பார்ட்னர்?" 

" இல்லை. இது எனக்கு பொழுதுபோக்கு. எப்பவாவது போர் அடித்தால் ஒரு கிக்குக்காக செய்வேன்" 

இருவரும் பேசியபடி வீட்டுக்கு வந்து சேர்ந்தனர். 

" பாஸ் நம்ம எக்ஸ்பர்ட் ஏகாம்பரம் 15 லட்ச ரூபாய்க்கு ஒரு எஸ்டிமேட் அனுப்பியுள்ளார். முரளீஸ் கஃபே மாடர்னைஸ் செய்ய அவ்வளவு வேண்டியிருக்குமாம். " என்றது பாவனா.‌

" லோன் வாங்க ஏற்பாடு செய்வோம்.‌நம்ம ஏரியாவுல பெரிய பாங்க் எது பாவனா?" 

" அரோகரா பாங்க் பாஸ்" 

" சரி பாவனா அந்த பாங்கின் கடந்த சில வருடங்களின் ஆனுவல் ரிப்போர்ட் எங்கே இருந்தாலும் தேடிப் பிடித்து பாபாவுக்கு அனுப்பு" 

" பாபா உனக்கு முதல் வேலை இதுதான் - பாவனா அனுப்புகிற ஆனுவல் ரிப்போர்ட்களை துல்லியமாக ஆராய்ந்து எங்கேயாவது திப்பிச வேலை நடந்திருக்கா என்று சொல்" 

" உத்தரவு மகாராஜா" என்றான் பாபா! 

(தொடரும்)