நாங்கள் தரிசனம் செய்த கோயில்கள் - பிரம்மதேசம்-சோமஸ்கந்தர் கோயில் : நெல்லைத்தமிழன்

 

 பிரம்மதேசம்-சோமஸ்கந்தர் கோயில். 

சென்ற வாரம், சோழ பாண்டியர்களைப் பற்றிப் பார்த்துக்கொண்டிருந்தோம். இவர்கள் ராஜேந்திர சோழன் வாரிசுகளே. அதனைப் பற்றி விரிவாகப் பார்க்கலாம்.

எதற்காக இந்த வரலாற்றில் எனக்கு ஆர்வம் வந்தது? காரணம் நாம் பார்த்துக்கொண்டிருக்கும் பிரம்மதேசம் சோமஸ்கந்தர் கோயிலில் பல சிற்ப, மண்டப அமைப்புகள் சோழர்களின் கலையை ஒத்திருந்தது. குறிப்பாக மண்டபத்திற்கான படிகளின் இரு புறமும் யானை அலங்காரம் காணப்பட்டது. இதனை அனேகமாக சோழர் கால முக்கியக் கோயில்களில் காணலாம். இதனைப் பற்றிய செய்திகளை, வரலாறைத் தேடிக்கொண்டிருந்தபோது சோழ பாண்டியர்களைப் பற்றிய செய்திகளைப் படித்தேன். அதனை உங்களிடம் பகிர்ந்துகொள்ளவே எழுத ஆரம்பித்தேன்.

முதலாம் ராஜேந்திரனுக்கு,  1. ராஜாதிராஜன்  2. ராஜேந்திரன் 3.  மகள் அம்மங்கை  4. இராஜ மகேந்திரன் 5. வீர ராஜேந்திரன், 6. மதுராந்தகன்  7. பராந்தகன், 8. மகள் அருமொழி நங்கை என்று எட்டு குழந்தைகள்.

ராஜேந்திர சோழன் ஆட்சிக்கு வந்ததும் முதல் மகன் ராஜாதிராஜனை 1018ல் இளவரசனாக ஆக்குகிறான் (தான் பதவிக்கு வந்து நான்கு வருடங்களில்).  பாண்டிய நாடு தன்னுடைய அரசின் கீழ், நம்பிக்கையான ஒருவரால் ஆளப்பட வேண்டும் என்று கருதி, இரண்டாம் மகன் ராஜேந்திரனை, ஜடாவர்மன் சுந்தரச் சோழ பாண்டியன் என்ற பட்டப் பெயரில், பாண்டி நாட்டு அரசனாக ஆக்கினான். ஜடாவர்மன் சுந்தரச்சோழ பாண்டியன், கிபி 1022-23 லிருந்து கிபி 1052 வரை பாண்டிய நாட்டு அரசனாக ஆண்டான்.

அம்மங்கா தேவி, வேங்கி இளவரசனான ராஜராஜ நரேந்திரனை மணந்து, ராஜேந்திர சாளுக்கியனைப் பெற்றெடுக்கிறாள். இவனே பிற்காலத்தில் சோழ அரியணை உரிமை கிடைக்கப்பெற்று முதலாம் குலோத்துங்கச் சோழன் என்ற பெயரைப் பெற்றவன்.

1052ல் இரண்டாம் மகனை சோழ சாம்ராஜ்யத்துக்கு இளவரசனாக ஆக்கிவிட்டு, (இரண்டாம் ராஜேந்திர சோழன்) பாண்டிய நாட்டை அரசாள, தனது தம்பியான இராஜ மகேந்திரனை அனுப்புகிறான் ராஜாதிராஜன். ராஜ மகேந்திரன், மாறவர்மன் பராக்கிரம சோழ பாண்டியன் என்ற பெயரில் பாண்டிய நாட்டு மன்னனாக முடிசூடுகிறான். 58-59லிருந்து 1063 வரை, இராஜ மகேந்திரன், சோழ இளவரசனாக ஆக்கப்படுகிறான்.

கிபி 1063ல் இராஜமகேந்திரன் மறைகிறான். அதன் பிறகு, அடுத்த தம்பியான வீர ராஜேந்திரன் சோழ இளவரசனாக ஆகிறான். (அதாவது சோழ சாம்ராஜ்ய அதிபதி). அவனுடைய மகன் அதே வருடம், கிபி 1063ல் பாண்டிய நாட்டுக்கு ‘ஜடாவர்மன் சோழ பாண்டியத் தேவன்’ என்ற பெயரில் அரசனாகிறான்.

கிபி 1068ல் அதிராஜேந்திரனை சோழப் பேரரசுக்கு இளவரசனாக ஆக்குகிறான் தந்தை வீர ராஜேந்திரச் சோழன்.  அதிராஜேந்திரனுக்கு வாரிசு இல்லை. 1070க்குப் பிறகு அவனது கல்வெட்டுகள் இல்லை என்பதாலும், முதலாம் குலோத்துங்கச் சோழனின் கல்வெட்டுகள் காணப்படுகின்றன என்பதாலும் அதிராஜேந்திரச் சோழன் கிபி 1070ல் மறைந்திருக்கவேண்டும்.

இப்படி ராஜேந்திரச் சோழனின் மகன்களே பாண்டிய நாட்டுக்கும் அரசராக இருந்திருக்கின்றனர், சுமார் 70 வருட காலம் வரை.

இதனால்தான் அவர்களின் கல்வெட்டுகள் நெல்லையில் பல கோயில்களிலும் காணக் கிடைக்கின்றன. 

இராஜேந்திர சோழனின் மற்ற இரு மகன்களான மதுராந்தகன் 1063லும், பராந்தகன் 1059லும் மறைந்துவிட்டனர்.

முதலாம் ராஜேந்திர சோழனின் மகன்கள், தங்கள் கல்வெட்டுகளில் சிறிய தந்தை (தாதை) கங்கைகொண்டான் என்று குறிப்பிடுகின்றனர்.

1052ல், தன்னுடைய அடுத்த தம்பியான இரண்டாம் ராஜேந்திரனை,  ராஜாதிராஜன் இளவரசனாக்குகிறான். பிறகு கொப்பம் (கிருஷ்ணா நதிக்கரை) என்ற இடத்தில் கல்யாணியைத் தலைநகரமாகக் கொண்டிருந்த சாளுக்கியர்களுடன் (இவர்களை கல்யாணி சாளுக்கியர்கள் என்பார்கள். அரசன் முதலாம் சோமேஸ்வரன்) ராஜாதிராஜன், இரண்டாம் ராஜேந்திரனுடன் சென்று போர் புரிந்தபோது, ஆரம்பத்தில் வெற்றி தேவதை சோழர்கள் பக்கம் இருந்தாலும், இடையில், யானை மீது இருந்து போர் புரிந்த சோழ அரசன் ராஜாதிராஜனை, சாளுக்கிய வில்லாளர்கள் அம்புகள் எய்தி படுகாயமடையச் செய்து உயிரிழக்கச் செய்தனர். மன்ன ன் உயிரிழந்த தால் சோழப் படை பின்வாங்கியபோது, இரண்டாம் ராஜேந்திரன், படைக்குத் தலைமையேற்று படைகளை ஒன்றுதிரட்டி போரைத் தொடர்ந்தார். சாளுக்கியப் படைகள் பெரும் இழப்பைச் சந்தித்து போரில் தோற்று ஓடினர். வெற்றி பெற்ற பிறகு இரண்டாம் ராஜேந்திர சோழன், போர்க்களத்திலேயே முடிசூட்டிக்கொண்டார். கொப்பம் போரில் வெற்றி பெற்றதன் நினைவாக அங்கு ஒரு வெற்றித் தூண் அமைக்கப்பட்டது.  இந்த கொப்பம் என்ற இடம், கோலாப்பூருக்கு அருகில் இருக்கிறது என்று வரலாற்றாசிரியர்கள் கருதுகிறார்கள்.

1063ல் இரண்டாம் ராஜேந்திர சோழன், தன் தம்பியான வீர ராஜேந்திரனுக்கு இளவரசுப் பட்டம் சூட்டினான். 1064ல் இரண்டாம் ராஜேந்திர சோழன் மறைந்ததும் வீர ராஜேந்திரன் சோழ அரசனானான்.

இப்போது நமக்கு இயல்பாகவே ஒரு சந்தேகம் எழ வேண்டும். அடுத்த தம்பியான இராஜமகேந்திரன் இருக்க, ஏன் வீர ராஜேந்திரனுக்கு இளவரசுப் பட்டம் கட்டினான்? இதைக் கண்டுபிடிக்கத் துணை வருவது மரங்கியூர் கல்வெட்டு. இது இராஜமகேந்திரனின் நான்காம் ஆண்டுக் கல்வெட்டு. இதில் உள்ள தேதி 27 ஜூலை 1062.  அதனால் இராஜமகேந்திரன் 1058-59களில் பட்டம் சூட்டப்பட்டான் என்று கொள்ளலாம்.  இரண்டாம் ராஜேந்திர சோழன், 1063 ஏப்ரலில் வீர ராஜேந்திரனுக்கு முடி சூட்டியதால், இராஜமகேந்திரன் அதற்கு முன்பு, அனேகமாக 1063 ஆரம்பத்தில் மறைந்திருக்கவேண்டும்.

இந்தப் பெயர்களைப் பார்க்கும்போது நமக்கு இன்னொரு சந்தேகமும் எழ வேண்டும். ராஜேந்திர சோழன் (முதலாம்) மகன்கள் என்று நாம் அறுவரைக் குறிப்பிட்டோம். அதில் இரண்டாவது மகனுக்கு ராஜேந்திரன் என்ற பெயர் என்றும் சொன்னோம். (அவனே இரண்டாம் ராஜேந்திர சோழன் என்ற பெயரில் அரசாண்டவன்). அப்பாவுக்கும் மகனுக்கும் எப்படி ஒரே பெயர் இருக்க முடியும்?

முதலாம் ராஜேந்திர சோழனின் இயற் பெயர் மதுராந்தகன். பட்டம் ஏற்கும்போது அபிஷேகப் பெயராக ராஜேந்திர சோழன் என்ற பெயர் அமைந்தது. அவனுக்குப் பின் மூத்த மகன் ராஜாதிராஜன் அரசாண்டான். அவனுடைய தம்பியின் இயற் பெயர் சுந்தரச் சோழன். (அதனால்தான் பாண்டிய நாட்டுக்கு அரசனாக அவன் சென்றபோது அபிஷேகப் பெயராக ஜடாவர்மன் சுந்தரச் சோழ பாண்டியன் என்ற பெயர் ஏற்பட்டது).  பிறகு சோழ நாட்டுக்கு இளவரசாக ஆக்கப்பட்டபோது அபிஷேகப் பெயராக ராஜேந்திர சோழன் என்ற பெயரை வைத்துக்கொண்டான் (மூன்றாம் தலைமுறை அரசன் என்பதால்). இப்போது புரிந்திருக்கும் என்று நினைக்கிறேன்.

சரி… இராஜமகேந்திரன் 1058-59களில் சோழ இளவரசனாகப் பட்டம் சூட்டப்பட்டான்.  (அதற்கு முன்பு மாறவர்மன் பராக்கிரம சோழ பாண்டியன் என்ற பெயரில் பாண்டிய நாட்டிற்கு அரசனாக இருந்தவன் இவன்). இராஜமகேந்திரன் 1063 ஆரம்பத்தில் இறந்திருக்கவேண்டும், அதனால்தான் ஏப்ரலில் அடுத்த தம்பியாகிய வீர ராஜேந்திரன் பட்டம் பெற்றான் என்று பார்த்தோம். இந்த அனுமானம் சரிதானா என்பதை அடுத்த வாரம் பார்ப்போம்.

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

நல்ல பழமையான பிரம்மதேசம் கோயிலைக் கண்டீர்களா? என்னுடைய பகுதியான நெல்லையைச் சேர்ந்த கோயில் இது. அடுத்த வாரம் நான் தற்போது வசிக்கும் பகுதியில் உள்ள சோழர் காலக் கோயில் ஒன்றைப் பார்க்கலாம். தொடர்ந்து இணைந்திருங்கள்.

(தொடரும்)