"திங்க"கிழமை 180402 : திரிசங்குபாகம் - கீதா ரெங்கன் ரெஸிப்பி

ஹாய்! ஹாய்! ஹாய்! எபி கிச்சன் ஷோ ரசிகர்களுக்கு எங்கள் குழுவின் சார்பில் அன்பான வணக்கங்கள்! கொஞ்ச நாளா எங்கள் குழுவின் அ அ, ஏஞ்சல், ம த, காணாமல் போய்விட்டார்கள். எங்களின் சிறப்பு விருந்தினர் துரை செல்வராஜு அண்ணாவுக்கும் கை வலி வந்திட, அவருக்குக் கொஞ்சம் ஓய்வு கொடுத்துவிட்டு மீண்டும் அவரது உரையாடலைத் தொடரலாம் என்றிருக்கிறோம். என்றாலும் அவரும் எங்களுடன் கலந்து கொள்வார். ஷோ முடிந்ததும் இனிப்பு பற்றி கருத்து சொல்லுவார்.  

ஹலோ நம்ம குழு கைஸ்! இன்றைய ஷோ வில் இடம் பெறும் பதார்த்தம் ஒரு பழமையான, இந்த இணையம் எல்லாம் நம் வீட்டிற்குள் நுழையும் முன் எங்கள் வீட்டில் என் அப்பா வழிப்பாட்டி அவ்வப்போது செய்து தந்த ஒரு இனிப்பு. ஒரு வருடமாக நினைவில் பின் தங்கிய இனிப்பு. ரொம்ப சிம்பிள்தான். நான் சொல்லற சாமான் எல்லாம் கிச்சன்ல இருக்கானு பார்த்து, இல்லைனா வாங்கி வைச்சுருங்க ஓகேயா! அப்பத்தானே படம் புடிச்சுக் காட்ட முடியும்.  அதுக்குள்ள எனக்கு இங்க கொஞ்சம் கதை விட இருக்கு. அளந்துட்டு வரேன்.

இது நம்ம கீதாக்கா, வல்லிம்மா, காமாட்சிம்மா, மனோ அக்கா, பானுக்கா, கோமதிக்கா போன்ற அனுபவ சீனியர்ஸுக்குத் தெரிந்த பதார்த்தமாகத்தான் இருக்கும். ஒரு வேளை உங்களது செய்முறை, அளவு மாறலாம். உங்களின் கருத்து எங்களுக்குப் பெரிது!  சரி அதன் செய்முறை பற்றிச் சொல்லும் முன் ஒரு சின்ன ஃப்ளாஷ் பேக்.

சில நாட்கள் முன்…

“அண்ணி நீங்க கல்யாணம் ஆன புதுசுல மைசூர்பா செய்ய நினைச்சு சரிவராம ஏதோ கொழுக்கு மொழுக்குனு ஒன்னு திருபாகம்னு சொல்லி எங்களை எல்லாம் ஏமாத்தினீங்களே! அதைக் கொஞ்சம் செஞ்சு தர முடியுமா. அம்மாக்கும் (மாமியார்) ஈசியா இருக்கும் சாப்பிட.”

“ஏம்பா என்ன கொலைவெறி? இப்படிப் பப்ளிக்கா மானத்த வாங்கறீங்க!! இது மைன்ட் வாய்ஸ்…ஆனா நாம விடுவோமா….ஹலோ…என்ன? என்னனு கேக்கறேன். என்னாது மைசூர்பா சரிவராம செஞ்சு ஏமாத்தினேனா!! சொல்லுவீங்க…சொல்லுவீங்க..…”.ஆஹா!! அற்புதம்….அப்படியே வாயில போட்டா நழுவி உள்ள போயிடுது! வாவ்! சூப்பர்! ஸ்ப்ளெண்டிட்”..அப்படினு எல்லாம் சொல்லி நல்லா வளைச்சுக் கட்டிட்டு அப்புறமும் செய்யச் சொல்லிக் கேட்டுட்டு, போன தீபாவளிக்கு முந்தின தீபாவளிக்குக் கூடச் சென்சேனே! மறந்து போச்சா..இப்பவும் செய்யச் சொல்லிக் கேட்டுட்டு….கொழுப்பு ரொம்பக் கூடிப் போச்சுப்பா உங்களுக்கெல்லாம்…” "சரி சரி பொங்காதீங்க. மரியாதையா செஞ்சு கொடுங்க"

தன் வினை தன்னைச் சுடும்!! ஹா ஹா ஹா! மேலே சொன்னது பின் வினை. இதற்கான முன் வினை……….+2 படித்துக் கொண்டிருந்த காலம். நாங்கள் கஸின்ஸ் எங்கள் அப்பா வழிப் பாட்டி வீட்டிற்கு விடுமுறைக்குச் சென்ற சமயம்….”பாட்டி ஏதோ மணக்குதே! ஆஹா! மைசூர் பாகு!! இன்னிக்கு என்ன விசேஷம்?”

“அதெல்லாம் ரகசியம் சொல்ல முடியாது! பண்ணி முடிச்சதும் தெரியும்! இங்க எல்லாம் வந்து எட்டிப் பாக்கக் கூடாது…”

“எட்டிப் பாக்கக் கூடாதா ஹா ஹா ஹா…ஹான்! மைசூர்பாகு சரியா வராம ஏதாவது குளறுபடியாச்சுனா பாட்டி ஏதாவது ஒரு பெயர் சொல்லி நம்மள ஏமாத்துவா பாருங்களேன்….” என்று நான் என் கஸின்களிடம் சொல்லிக் கலாய்த்தேன். 


என் பாட்டி மைசூர்பாகு ரொம்ப அருமையாகச் செய்வார். இருந்தாலும் கலாய்ப்போம். இப்படித்தான் ஒரு முறை கடலை மாவு பாயாசம் என்று செய்து கொடுத்தார். அருமையாக இருந்தது இருந்தாலும் மைசூர்பாகு தண்ணியாயிடுச்சோனு சொல்லிப் பாட்டியை ஓட்டினேன். அப்பா வழி பாட்டிக்கு நான் செல்லம். என் தோழி போன்றவர்.

“போக்கிரி…போ அந்தப் பக்கம். அடுப்படிப் பக்கம் நீங்கல்லாம் வரப்டாது… போய் கிணத்தடியிலயோ, இல்ல ஆத்தங்கரையிலோ போய் குளிச்சுட்டு வாங்கோ. சாப்டலாம்”

வந்தால் என் அத்தை, அத்தையின் கணவர்…என் அத்தையின் நாத்தனார்கள் என்று ஒரே விருந்தினர்…….ஓ அதான் ஸ்வீட் போல!!!

எல்லோருக்கும் கையில் ஸ்வீட் உருட்டி வழங்கப்பட்டது! “பாட்டி இது என்னது  இது?

“திருபாகம்”

நான் சிரித்துவிட்டேன். 


“ஹா ஹா ஹா....பாத்தீங்களா நான் அப்பவே சொன்னேன்ல... பாட்டிக்கு மைசூர்பாகு சரியா வரலை போல! பாட்டி! மைசூர்பாகும் இல்ல, கடலைமாவு ஸ்வூட்டுமில்லாம “திரிசங்குபாகம்”நு சொல்லு!!!” என்றதும் “ஹை இந்தப் பெயர் கூட நல்லாருக்கே” என்று எல்லோரும் சிரித்தனர்.

"ஏதோ ஒன்னு...நீ என்ன வேணா பேர் வைச்சுக்கோ. நன்னாருக்கா இல்லையா அதச் சொல்லு...." எல்லோரும் நன்றாக இருக்கு என்று ரசித்துச் சாப்பிட்டனர். சில வருடங்களுக்கு முன் தான் தெரிந்தது இந்த ஸ்வீட் தான் பட்டர் பேப்பரில் வைத்து மடக்கி சுற்றப்பட்டு வருகிறது என்று திருநெல்வேலியில் இருக்கும் கஸின் சொன்னாள். நான் சாப்பிட்டுப் பார்த்ததில்லை.

“எல்லாம் ரெடி. வாங்க கீதா” பாருங்க! நம்ம கிச்சன் எக்ஸ்பெர்ட்ஸ் ரொம்ப ஸ்மார்ட்! எல்லாம் ரெடி பண்ணிட்டாங்க!. சரி செய்முறைக்குப் போவோம். குழுவினரே குறிச்சுக்கங்க…

கடலைமாவு – 1 கப் (நீங்கள் எந்தக் கப்பினால் அளக்கின்றீர்களோ அந்தக் கப்பையே எல்லா பொருட்களுக்கும் அளவாக வைத்துக் கொள்ளுங்கள்.)

பால் – 2 கப் (தேவைப்பட்டல் கொஞ்சம் கூடவும் சேர்த்துக் கொள்ளலாம்)

சீனி – ஒரு கப் – நாட்டுச் சர்க்கரை என்றால் 1 ¼ கப். (நான் இங்கு இரு முறைகள் செய்திருக்கிறேன். விளக்கம் கீழே)

நெய் – ¾ - 1 கப். 

முந்திரிப்பருப்பு, - ஒரு கப். (பாட்டியின் செய்முறையில் இது ஒரு கப் கிடையாது. மிகவும் கொஞ்சம். என் மாமியாருக்கு முந்திரி பாதாம் சேர்த்துச் செய்வதுதான் ஸ்வீட். அதனால் சேர்த்துச் செய்வதுண்டு.)

பச்சைக்கற்பூரம், குங்குமப்பூ, ஏலப்பொடி – எல்லாம் கொஞ்சம் படத்தில் உள்ளதுபோல்.

இம்முறை செய்து கொண்டே சொல்லிவிடுகிறேன் ஓகேயா. ஸோ, கைஸ் நீங்க இப்படி சுத்தி நின்னு பார்த்துக் குறிச்சுக்கங்க!

முதலில் நான் கொஞ்சம் மாற்றி, மாமியாருக்காகச் செய்த முறை. இந்தக் கப்புதான் இரண்டு முறைக்கும் நாம இப்ப இங்க யூஸ் பண்ணறோம். ஓகேயா! அந்தக் கப்புல ஒரு கப் கடலை மாவை அளந்து, அடுப்பு ஏற்றி அதில் வாணலியில் மாவைப் போட்டு கொஞ்சம் வெதுப்பிக் (பாட்டியின் வார்த்தை அதாவது மாவு வறுபடக் கூடாது. ஜஸ்ட் கொஞ்சம் லைட்டாக நன்றாகச் சூடாகும் வரை புரட்டணும்) கொள்ளுங்கள்.

கடலைமாவு ஆறியதும். அதைப் பால் விட்டுக் கட்டியில்லாமல் கரைத்துக் கொள்ளவும். அப்படியே அதில் நாட்டுச் சர்க்கரை 1 1/4 கப் (படங்கள் அதிமாகும் என்பதால் இங்கு ஒரு கப் அளவுதான் காட்டியிருக்கிறேன். கூட கால் கப் சேர்க்க வேண்டும். நன்றாகக் கலந்துகொள்ளவும்.

ஒரு கப் முந்திரி பருப்பு பொடி செய்து அதில் கட்டியில்லாமல் கலந்து, மீண்டும் அடுப்பில் வைத்துக் கிளறவும். என் மாமியாருக்கு முந்திரி, பாதாம், தேவைப்பட்டால் குங்குமப்பூ சேர்த்துச் செய்வதுதான் ஸ்வீட். அதனால் சேர்த்துச் செய்வதுண்டு. குங்குமப்பூ சேர்ப்பதென்றால் பாலில் போட்டு வைத்துக் கொள்ளவும். இதில் முந்திரி பாதியும், பாதாம் பாதியும் சேர்த்துப் பொடி செய்தும் சேர்க்கலாம். என்னிடம் பாதாம் இல்லை அதனால் முந்திரி மட்டும் சேர்த்தேன். கலந்து மீண்டும் அடுப்பை ஏற்றி வாணலியை வைத்துக் கிளறவும்.

கிளறும் போது நெய்யைக் கொஞ்சம் கொஞ்சமாக விட்டு, அடுப்பை சிம்மில் வைத்துக் கிளறவும். கலவை திரண்டு கெட்டியாகி ஹல்வா போன்று வரும் சமயம், பச்சைக் கற்பூரத்தை விரலால் பொடித்து ஒரு பிஞ்ச் அளவு மற்றும் ஏலப்பொடி சேர்த்துக் கிளறி இறக்கிவிட வேண்டியதுதான். நாட்டுச்சர்க்கரை சேர்த்த திருபாகம் ரெடி. இதோ எடுத்துக் கொள்ளுங்கள்.

அடுத்து என் பாட்டி செய்வது. அளவு, செய்முறை எல்லாம் அதே என்பதால் கொஞ்சம் படங்களும், விளக்கங்களும் மட்டும்.

பாட்டியின் செய்முறையில், கடலை மாவை வெதுப்பிக் கொண்டு பின்னர் ஆற வைத்து, அதில் 2 கப் பால், 1 கப் சீனி, மற்றும் 4 முந்திரி மட்டும் நன்றாகப் பொடித்துச் சேர்த்துக் கட்டியின்றி நன்றாகக் கலக்கிக் கொண்டு,  (நான் மேலே அலங்கரிக்கப் பயன்படுத்திய முந்திரியைப் பொடித்தேன்) அடுப்பில் ஏற்றிக் கிளற வேண்டியதுதான். என் பாட்டி முந்திரி இவ்வளவுதான் சேர்ப்பார். என் பிறந்த வீட்டில் முந்திரி, பாதாம், குங்குமப்பூ எல்லாம் இருக்காது. ஏலம், பச்சைக் கற்பூரம் மட்டும் தான் இருக்கும். 

கிளறும் போது 3/4 கப் நெய் கொஞ்சம் கொஞ்சமாக விட்டு, சிம்மில் வைத்துக் கிளற வேண்டியதுதான். என் பாட்டி ஒரு கப் நெய் சேர்ப்பார். கெட்டியாகி வரும் போது ஒரு கால் ஸ்பூன் ஏலப் பொடி சேர்த்துக் கிளறி இதோ படத்தில் காட்டியபடி கொஞ்சம் கெட்டியாகி வந்ததும் இறக்க வேண்டியதுதான். பாட்டி அதை சின்னச் சின்ன உருண்டையாக்கித் தருவார்.

ஏலப் பொடி                                            பாட்டி செய்யும் திருபாகம்

எனது குறிப்புகள்:

பாட்டியின் செய் முறையில் செய்யும் திருபாகத்தை நான் நெய் தடவிய ப்ளேட்டில் இப்படிப் படத்தில் உள்ளது போல் பரப்பி ஒரு மணி நேரம் அப்படியே விட்டுவிட்டு. அப்புறம் அதன் மீது வறுத்த நட்ஸ் எல்லாம் ஒன்றிரண்டாகப் பொடித்துக் கொண்டு, ட்ரை ஃப்ரூட்ஸ் எல்லாம் பரப்பி, பாய் போல் சுருட்டிக் கட் குறுக்காகக் கட் செய்தும் சாப்பிடலாம். சுவையாக இருக்கும். என்னிடம் பருப்புகள் இல்லை எனவே படம் இல்லை. 

ஓகே நண்பர்களே, எங்களின் அடுத்த திங்க பதிவு வரும் வரை காத்திருங்கள். எபி ஆசிரியர்கள், ஷோ டைரக்டர் ஸ்ரீராம் எல்லோருக்கும் எங்கள் குழுவின் மனமார்ந்த நன்றி கூறி விடை பெறுகிறோம்.

 

நண்பர் செல்லம்னு சொல்லறாங்களே தவிர எனக்கு யாருமே எதுவும் செஞ்சு தரமாட்டேன்றாங்க. அவங்க மட்டும் என்னெல்லாமோ செஞ்சு செஞ்சு நல்லா கொட்டிக்கறாங்க. லொள் லொள்! உனக்கு மட்டும் எங்கருந்து கிடைச்சுச்சு?