பொய்யே சொல்லாமல் வாழ்தல் சாத்தியமா ?

 

ஏஞ்சல் : 

> 1, பொய் சொல்லாமல் , பொய்யே சொல்லாமல் வாழ்தல் சாத்தியமா ?

# நிச்சயம் அரசுப் பணியாளர்களுக்கு சாத்தியமில்லை. ஒரு நாள் லீவு பிராவிடண்ட் ஃபண்ட் கடன் இவற்றைப் பொய் சொல்லாமல் பெறுவது அசாத்தியம்.

& சாத்தியம்தான் என்று நான் சொன்னால், அது பொய். 

> 2, கடினமான கரடுமுரடான அனுபவங்கள் ஒருவரின் வாழ்க்கையை செம்மைப்படுத்துமா அல்லது தவறான வழியை தேர்ந்தெடுக்க வைக்குமா ?

# அனுபவிப்பவரின் மனப் பாங்கை ஒத்து செம்மையோ சலிப்போ சினமோ பிறழ்வோ  ஏற்படும்.

& கடினமான அனுபவங்கள், படித்த பண்பான நல்ல மனிதர்களை செம்மைப்படுத்தத்தான் செய்யும். 

> 3, கடவுளை கடவுளின் அன்பை உணர்ந்த அதாவது அனுபவபூர்வமா உணர்ந்த தருணம் உண்டா ?

# இதுவரை இல்லை. கடவுள் துணை இருக்கிறார் என்று எண்ணவைத்த சில தருணங்கள் உண்டு.

$ கடவுள் அருள் இல்லை என்றால் இப்போது இதை எழுதிக் கொண்டிருக்க மாட்டேன். ஆனால் கடவுள் என்பதே நம் நல்ல குணங்கள் தான் என்று எண்ணுபவன். 

& நிறைய உண்டு. குறிப்பாக விளிம்பு நிலைக்கு சென்று மீண்ட 26 - 06 - 2017. 

> 4, எதோ ஒரு விஷயம் உதாரணத்துக்கு பட்டாம்பூச்சியோ /மரம் இலை இப்படி வந்தவுடன் அதன் காரணம் என்னவாயிருக்கும்னு கூகிளில் ஆராய்ச்சி செய்யும் வழக்கமுண்டா ???இந்த ஆராய்ச்சி பழக்கம் நல்லதா ? கெட்டதா ?

# நல்ல பழக்கம் தான். ஆனால் என்னிடம் இல்லை.

& ஆராய்ச்சி செய்யும் பழக்கம் எப்போதுமே உண்டு. அது நல்லதுதான். அந்தப் பழக்கத்தால் தெரிந்துக்கொண்ட விஷயங்கள் ஏராளம். 

> 5, இன்னிக்கு மிக்ஸர் விரும்பிகள் நிறையபேர் இருப்பதுகண்டு இன்னொரு கேள்வி : கார மிக்சருடன் லேசா சர்க்கரை ஐ மீன் வெள்ளை சர்க்கரை தூவி சாப்பிட்டிருக்கீங்களா ?

 # இல்லை. பிடிக்காது என்று தோன்றுகிறது. 

& ஐயே !! நினைத்துப் பார்க்கவே கஷ்டமா இருக்கு. என்னுடைய நண்பர் ஒருவர் ஆபீஸ் கேண்டீனில் சாப்பாடு சாப்பிட்டு முடித்த பின் வாழைப்பழம் சாப்பிடும்போது - உரித்த வாழைப்பழத்தை உப்புப் பொடியில் தொட்டுச் சாப்பிடுவார். ( என்னுடன் இப்போ வாட்ஸ் அப் குழு ஒன்றில் உள்ளார். 'இப்போதும் அப்படித்தான் சாப்பிடுகிறீர்களா?' என்று கேட்டிருந்தேன். 'இல்லை இப்போதெல்லாம் உப்பு, இனிப்பு, காரம் எல்லாவற்றுக்கும் தடா' என்கிறார்.)

திண்டுக்கல் தனபாலன் : 

> இன்றைய தீநுண்மி போல, தீபாவளி எனும் சொல் முதற்கொண்டு, தமிழர்களிடம் தொற்றின காலம் எப்போது...?

# தீநுண்மி என்றால் என்ன ? இதுவரை கேள்விப்படாத சொல். வைரஸ் ?   

தீபாவளி என்ற சொல் ஆரியருடன் இங்கு வந்தது என்று சொன்னால் சிலர் திருப்தி அடைவர்.

$ வைரஸ் என்று எல்லோருக்கும் புரிகின்ற மாதிரி சொன்னால் என்ன ? Covid19 என்று புரிகின்ற மாதிரி சொல்லும் சொல்லாட்சி நம்மிடம் உண்டா?

தீப ஆவளி என்பது தனித்தமிழ், தனி நாடு எனும் வியாதி வரும் முன் மணிப் பிரவாள நடையில் வந்திருக்கலாம்.

நெல்லைத்தமிழன்: 

> தவறான கேள்வியா நினைக்கவேண்டாம். தமிழர், தமிழ் என்று 'பீத்திக்கொள்ளும்' பெரும்பாலானவர்களுக்கு, தங்களுக்கு வைத்துக்கொள்ள தமிழ் பெயர் இல்லாது போயிற்றே. அதைப் பற்றி என்ன நினைக்கறீங்க?

# பெயரில் என்ன இருக்கிறது ? பெயர்  பெற்றோர் வைத்தது.  தமிழ் ஆர்வம், தமிழின் பெயரால் "போராட்டம்" என்பதெல்லாம் எளிதான முதலீட்டில் எக்கச் சக்கமான வியாபாரம் என்பதைப் பலரும் தெரிந்திருக்கிறார்கள்.

நீங்கள் கேட்பதைப் பார்த்தால் "தனித்தமிழ்"ப் பெயர் ஒன்றே தமிழார்வத்துக்கு உரைகல் என்று ஏற்றுக் கொண்டுவிட்டது போல் அல்லவா இருக்கிறது ?

பெயரில் தம் குடும்பத்து "நட்சத்திரம்" நினைவு கூரப்பட வேண்டும் என்பதன் காரணமாகக் கூட "பால"  "நிதி"  " குமார " போன்ற பகுதிகள் பயன் படுத்தப் படலாம்.

உன் பெயரில் வட சொல் என சண்டைக்குப் போவதில்  நியாயம் இராது.

$ தனித் தமிழ் பெயர் வைத்துக் கொண்டால் காளிதாசனோ கம்பனோ ஆகி கவிதையோ காவியமோபுனைந்திடுவாரா?

கீதா சாம்பசிவம் : 

> 1. தீபாவளிப் பட்டாசு வெடிப்பதில் ஆர்வம் உண்டா?

$ , & :  உண்டு. 

# வெடி ஆர்வம் இளவயதில் இருந்தது . அறுபது பிராயத்தில் மறைந்தது.

> 2.இப்போதெல்லாம் பட்டாசு வெடிக்கத் தடை போடுகிறார்களே! அது சரியா?

$ 100 மைல் வேகத்தில் போகக்கூடிய வாகனங்கள் இருந்தாலும்,வேகத்தடைகள், limit இவை எல்லோர் நன்மை முன்னிட்டு தேவைப் படுவது போல வெடிகள் சப்தம் பெரிதாகி நிரந்தர செவிடர்களை உண்டாக்குகிறதே?

 # சூழல் மாசு படுவதால் பட்டாசு தடை சரிதான். ஆனால் அதை நம்பிப் பிழைப்பவர்களுக்கு மாற்று ஏற்பாடு அவசர அவசியம். 

& பட்டாசுக்கு மட்டும்தானே தடை. மத்தாப்பூ, தரைச்சக்கரம், வாணங்களுக்கு தடை இல்லைதானே? (ஆனால் இந்த தீபாவளி அன்று பல இடங்களில் மக்கள் கட்டுப்பாடுகள் எதையும் இலட்சியம் செய்யாமல் வெடிகள் வெடித்தார்கள் என்று பேஸ்புக் பதிவுகளில் படித்தேன்) 

> 3. தடையை மீறிப் பட்டாசு வெடிப்பவர்கள் பற்றி?

# சிறு குற்றங்கள் மன்னிக்கப் பட வேண்டியவை. 

> 4. பட்டாசு வெடிக்கக் கூடாது என்பதால் சிலரின் வாழ்க்கை கேள்விக்குறியாகிறதே! அதற்கு என்ன செய்யலாம்?

# இது அவசரமாகத் தீர்க்க வேண்டிய பிரச்சினை. 

> 5. தீபாவளி அன்னிக்குப் பட்டாசு வெடிப்பதால் சுற்றுச்சூழல் கெடுகிறதா?

# நாடளாவி ஏக காலத்தில் புகை மண்டலத்தை எழுப்புவது கெடுதி விளைவிக்கும்தான். 

> 6. பொதுவாகவே எந்தக் கொண்டாட்டமாக இருந்தாலும் பட்டாசு வெடிக்கிறார்கள். தலைவர் வரவு, நண்பர்கள் திருமணம், பிறந்தநாள், கிரிக்கெட்டில் ஜெயித்தால், ஆங்கிலப் புத்தாண்டு இப்படினு எல்லாத்துக்கும் பட்டாசு வெடிப்பது உண்டு. தீபாவளி அன்று மட்டும் வேண்டாம்னு சொல்லுவது ஏன்?

# பெரிய அளவில் புகைவது தீபாவளியின் போதுதானே.

> 7.தீபாவளி பக்ஷணம், பட்டாசு, புத்தாடைகள் இவற்றில் உங்களைக் கவர்ந்தது எது? ஏன்? இப்போது எது கவர்கிறது?

$ சின்ன வயதில் பட்சணம், சற்று வளர்ந்த பின் உடை, இப்போது முதுமையில் (77 முதுமையில் சேர்த்தி என்றால்! ) உறவினர் நண்பர்களுடன் கூடி மகிழ்தல்.

# சிறு பிராயத்தில் பட்சணம், இளமையில் வெடி, வளர்ந்த பின் புத்தாடை, கனிந்த பின் அடுத்தவர் மகிழ்ச்சி.

> 8. கூடப் பிறந்தவர்களுடன் சேர்ந்து பட்டாசு வெடித்த அனுபவம் இருக்கும். அதில் யார் சிறப்பாக தைரியமாகப் பட்டாசு வெடிப்பார்கள்? உங்கள் மூத்த சகோதரர்களும் உங்களோடு சேர்ந்து பட்டாசு வெடித்திருக்கிறார்களா?

$ தைரியமாக வெடி வெடித்த (சகோதரர்கள்) நாங்கள் 6 பேரும் பழுவேட்டையர்கள்கள்தான்! அப்பா சித்தப்பா எல்லோரும் கூட வெடி வெடிப்பார்கள். அம்மா, மனைவி, சகோதரிகளும்.

# விலக்கில்லாமல் எல்லாருடனும் கொண்டாடி இருக்கிறோம். நானே ஓவர் (அசட்டு)  தைரியம் கேஸ்தான். 

> 9.தீபாவளி பக்ஷணம் செய்ய அம்மாவுக்கு உதவியது உண்டா? மனைவிக்கு?

$ உதவியது தீபாவளி மட்டும் அல்ல; மற்ற பண்டிகைகள் சமயங்களில்  கூடத்தான்! 

# இல்லை. இருவருமே தனியாகவே சாதிக்கும் திறனாளிகள். 

& அம்மாவுக்கு - அம்மா கேட்டுக்கொண்டால் உதவியது உண்டு. மனைவி உதவி கேட்டது இல்லை. நானாக எப்போதாவது சிறு உதவிகள் செய்தது உண்டு. 

> 10. உங்களால் மறக்க முடியாத தீபாவளி எது? ஏன்?

$ அரியலூர் ரயில் விபத்து நடந்த வருடமும் தனுஷ்கோடி கடலில் கரைந்த நாளும். 

# மிக மோசமான பட்டாசு விபத்து நடந்த இரண்டு தீபாவளிகள்.

& எல்லா சகோதர சகோதரிகளுடனும் சேர்ந்து கொண்டாடிய மகிழ்ச்சியான தீபாவளிகள் எல்லாமே மறக்க முடியாதவை. 

> //கல்வெட்டு ஆய்வாளர் குடவாயில் பாலசுப்ரமணியம் அவர்கள் தீபாவளிப் பண்டிகை பதின்மூன்றாம் நூற்றாண்டிலேயே கொண்டாடப்பட்டதற்கும், கோயில்களில் தீபாவளி கொண்டாடப்பட்டதற்கும் ஆதாரம் கல்வெட்டுக்களில் இருப்பதைக் கண்டு பிடித்திருக்கிறார்,. பத்துப் பதினைந்து நாட்கள் முன்னர் தினமலரில் வந்திருந்தது அவருடைய பேட்டி.//திருச்சிப் பதிப்பில் வந்திருந்தது. அதைத் தேடி எடுக்கணும். இதைக் குறித்து உங்கள் கருத்து என்ன?

# ஒரு நிபுணர் சொன்னதை மறுத்துச் சொல்ல எனக்கு என்ன தகுதி இருக்கிறது?  அதற்கும் முன்பாகவே தீபாவளி வந்திருக்க சாத்தியம் உண்டு தான்.

& நானும் பேஸ்புக் பதிவு ஒன்றில் படித்தேன்.  அந்தப் பதிவின் screenshot  இங்கே  கொடுத்துள்ளேன் :

> இங்கே ஸ்ரீரங்கத்தில் பெருமாள் வருடா வருடம் தீபாவளி கொண்டாடுவதோடு அனைத்து சந்நிதி தெய்வங்களுக்கும் தீபாவளிப் பரிசு, புத்தாடைகள், எண்ணெய், சீயக்காய், பெண் தெய்வங்களின் சந்நிதிகளுக்கு மஞ்சள் பொடி உட்படப் பெருமாள் சார்பில் அளிக்கப்படுகிறது. இதைப் பற்றிக் கேள்விப் பட்டிருக்கிறீர்களா? வேறே எந்தக்கோயிலில் இப்படி உண்டா? சிதம்பரம் நடராஜர் கோயிலில் உண்டுனு நினைக்கிறேன்.

 # கோயில் நடைமுறைகள் எனக்கு அதிகம் பரிச்சயம் இல்லை.

& எனக்கும். 

பானுமதி வெங்கடேஸ்வரன் : 

> நீண்ட பயணங்களில் 

1. பாட்டு கேட்பது(சாஸ்ததிரீய இசை அல்லது சினிமா பாடல்கள்)

2. அருகில் இருப்பவரோடு உரையாடுவது

3. புத்தகம் படிப்பது

4. வேடிக்கை பார்ப்பது

இவற்றில் எதை செய்வீர்கள்?

# உண்மை யில் இவை எல்லாம் பிடிக்கும். செய்வது வழக்கம்.

அவ்வப்போது தக்காளி சூப்,  மசால்வடை, மிளகாய் பஜ்ஜி என விற்பவர்களை ஊக்குவிப்பதும் பிடித்துச் செய்வதுதான்.

& முறையே 4, 3, 2. ரயில் சத்தத்தில் பாட்டு கேட்பது கஷ்டம். 

> தமிழ் திரையுலக இசையமைப்பாளர்களில் கர்நாடக இசை, மெலடி, குத்துப்பாட்டு, கிராமீய இசை இந்த ஒவ்வொன்றிலும் சிறந்தவர் என்று யாரை குறிப்பிடுவீர்கள்?

* பாடல் புகழ் பெற்று விட்டால் எல்லோருமே சிறந்தவர்கள்தான்.  எல்லோருமே எல்லாமே அமைப்பதில் வல்லுநர்கள்தான்.  அமைவதில்தான் இருக்கிறது.

& கர்நாடக இசை : கே வி மகாதேவன். 

    மெலடி : எம் எஸ் வி, இளையராஜா 

    கிராமிய இசை : இளையராஜா 

    குத்துப்பாட்டு : கேட்பதில்லை / இரசிப்பதில்லை. 

----- 

 எங்கள் கேள்வி. 

சமீபத்தில் பேஸ்புக் தளத்தில், Hug ring  என்ற மோதிர விளம்பரம் பார்த்தேன். அந்த விளம்பரப் படத்தில் ஒரு தவறு உள்ளது. அது என்ன என்று கண்டுபிடிங்க !

==============

மின்நிலா பொங்கல் மலர் நாங்கள் எதிர்பார்த்ததை விட அதிகமாக படைப்புகள் வந்துகொண்டு உள்ளன. 

நீங்க என்ன அனுப்பலாம்? 

கீழ்க்கண்ட பட்டியலில் உள்ளவைகள் எதுவாக வேண்டுமானாலும் இருக்கலாம். 

சிறுகதை 

உங்கள் ஊர் பற்றிய கட்டுரை - நீங்க எடுத்த படங்களுடன் 

கவிதை 

சுவாரஸ்யத் தகவல்கள் / துணுக்குகள் 

சமையல் குறிப்புகள் 

பொங்கல் பண்டிகை பற்றிய உங்கள் நினைவுகள் 

நீங்க வரைந்த படங்கள். 

உங்க சொந்தக்கார / நண்பர் வீட்டுக் குழந்தைகள் வரைந்த படங்கள். 

எல்லாவற்றையும் engalblog@gmail.com மின்னஞ்சல் முகவரிக்கு டிசம்பர் 31 ஆம் தேதிக்குள் அனுப்பலாம். 

(இது வரை படைப்புகள் அனுப்பியுள்ள துரை செல்வராஜூ, சுபஸ்ரீ ஸ்ரீராம், கீதா ரெங்கன், நெல்லைத்தமிழன், சூரியப்ரகாஷ், தில்லைநாயகம், kgy ராமன், தேவராஜன் சண்முகம், சியாமளா வெங்கட்ராமன், அட்டைப்படங்கள் + சில கதைகளுக்கு சித்திரம் வரைந்துள்ள அருண் ஜவர்லால் ஆகியோருக்கு எங்கள் நன்றி. இவர்கள் மேலும் படைப்புகளை அனுப்பலாம். வரவேற்கிறோம். ) 

===== 

இந்த வார பட்டிமன்றம். 

(வெண்)பொங்கலுக்கு சிறந்த சைடு டிஷ் எது? 

பின்னூட்டங்களில் கருத்து சொல்லுங்க. ஒருவர் கூறும் கருத்தை ஆதரித்தோ / எதிர்த்தோ மற்றவர்கள் கருத்துகள் பதியலாம். ஆட்களை விமரிசனம் செய்யாதீர்கள். கருத்து மோதல் மட்டுமே இருக்கலாம்! 

பின்னூட்டக் கருத்துகள் தொகுக்கப்பட்டு பொங்கல் மலரில் வெளியிடப்படும். 

நடுவர்கள் தீர்ப்பு அடுத்த வாரம்.  

========== 

======