'திங்க'க்கிழமை : சப்பாத்தி (ஏடாகூடமாக ) Stuffed

 நீண்ட நாட்களாய் கிடப்பில் இருந்த திட்டம் ஒன்றைச் செயல்படுத்தினேன்!  வீட்டில் அண்ணனும் அவர் மகனும் வந்திருக்க அன்று இதைச்செய்ய முடிவெடுத்தேன்.

கொஞ்சம் வேலை இழுக்கும் வேலை!  பொருள் செலவும் கூட!  ஒருமுறைதானே என்று செய்யத் துணிந்தேன்.

முட்டைகோஸ் (இதெல்லாம் அதில் போடுவார்களா என்று கேட்கக்கூடாது) வெங்காயம், பீன்ஸ் (10) குடைமிளகாய், பட்டாணி, கொஞ்சம் கேரட், இவற்றுடன் உருளைக்கிழங்கை வேகவைத்து (இது இல்லாமலா) அதையும் சேர்த்துக் கொண்டேன்.​  மற்ற காய்களை வதக்கிக்கொண்டு அதில் உப்பு காரப்பொடி சேர்த்து உருளைக்கிழங்கை உதிர்த்து, பனீரை (இது வேறயா?) துருவிச் சேர்த்தேன்.

மேலே வலதுபுறம் இருப்பது இறுதி வடிவம்!

இன்னொரு பக்கம் கேரட், பீட்ரூட் துருவிக் கொண்டேன்,  அதை வதக்கிக்கொண்டு லேசாக சர்க்கரை சேர்த்துக்கொண்டேன்.

சப்பாத்திக்கான அப்பளங்களை மாமியார் இட்டுக்குவித்து விட்டார்.  கொஞ்சம் மெதுவாக இட்டிருந்தால் சில திருத்தங்களை அவ்வப்போது செய்து கொண்டிருப்பேன்.  

ஒரு அப்பளத்தை எடுத்து அதில் முதலில் கேரட், பீட்ரூட், தேங்காய்த்துருவல் கலவையை இட்டு, அதனை இன்னொரு அப்பளத்தால் மூடி, முனைகளை பூட்டி, 

அதேபோல இன்னொரு செட் அப்பளத்தில் மற்றொரு கலவையை இட்டு இதே போல 

கல்லில் போட்டு சுட்டு எடுத்துச்....

சாப்பிட்டோம்.

இப்படிச் செய்யலாம்தான்.  ஆனாலும் நான் நினைத்தபடி இப்படிதான் செய்ய வேண்டும் என்று நினைத்துச் செய்தது..

செய்தபின் சாப்பிட பின் சில யோசனைகள் தோன்றின.  கோஸ் வேண்டாம்.  பனீரை வில்லைகளாகப் போடலாம்,  குடைமிளகாய் கூட வேண்டா.......மோ...  காரம் தெரியாதது ஒரு குறை.  ஒரு உள்ளார்ந்த காரம் இருந்து சாப்பிட்டு முடித்தபின் நாக்கில் தெரிவது குறை.