நான் தரிசனம் செய்த கோவில்கள்: நெல்லைத்தமிழன் : வைரமுடி யாத்திரை 01

 

வைரமுடி யாத்திரை – தொட்டமளூர் அப்ரமேயர்  – பகுதி 1

வைரமுடி யாத்திரை என்று ஐந்து நாட்கள் யாத்திரையில் நான் 2022ல் கலந்துகொண்டேன். யாத்திரைக் குழு புறப்பட்து சென்னையிலிருந்து. அவங்க மதியம் பெங்களூர் கண்டோன்மெண்டில் வந்து சேர்ந்தாங்க. (காலையில் இரயில் ஏறும்போது பொங்கல் கொத்ஸு கொடுத்தாங்களாம். மதியம் கண்டோன்மெண்ட் வந்து சேர்ந்தும் கதம்ப சாதமும், தயிர்சாதமும் கொடுத்தார்களாம். நான் பெங்களூரில் இருப்பதால் கண்டோன்மெண்ட் சென்று அவர்களுடன் கலந்துகொண்டேன். அதுபோல திரும்ப வரும்போது, பெங்களூர் மெஜெஸ்டிக் இரயில் நிலையத்தில் அவங்க, சென்னை செல்லும் இரயிலில் ஏறி சென்னை திரும்புவாங்க.

இந்த வருடமும் அந்த யாத்திரையில் கலந்துகொண்டேன். (அதாவது மார்ச் 2022 மற்றும் மார்ச் 2023)  யாத்திரையைப் பற்றிச் சுருக்கமாகவும், யாத்திரையின் ஒரு பகுதியாக, நான் பார்த்து பிரமித்த ஹொசஹொசாலு லக்ஷ்மி நாராயணர் கோவில் பற்றி விரிவாகவும் எழுத நினைக்கிறேன்.  (அப்படி நினைத்துத்தான் இந்தத் தொடரை எழுத ஆரம்பித்தேன்…ஆனால் பாருங்க ரொம்பவே நீளமாகிவிட்டது. இப்படித்தான் ஸ்ரீராம் சொன்னாரே என்று பஞ்சத்வாரகா  யாத்திரை சென்று வந்த உடனேயே எழுத ஆரம்பித்தேன். பத்து நாள் யாத்திரையில் முதலிரண்டு நாட்களை எழுதுவதற்கும் 40 பக்கங்கள் போய்விட்டது. அப்படியே நிறுத்திவிட்டேன். அதைவேறு எழுத ஆரம்பிக்கணும்)

கண்டோன்மெண்டில் இருந்து மதியம் 2 ½ மணி வாக்கில்,  பஸ்ஸில் புறப்பட்டு, முதலில் Dதொட்டமளூர் இராமப்ரமேய ஸ்வாமி கோவிலை 4 மணிக்கு அடைந்தோம். இந்தக் கோவில், இராமநகரா மாவட்டத்தில் சென்னப்பட்டினா தாலுக்காவில், கன்வ ஆற்றின் அருகில் அமைந்துள்ளது. இந்த இடத்தை 11ம் நூற்றாண்டில் சோழ அரசர்கள் ஆண்டனர்.  11ம் நூற்றாண்டில் இராஜேந்திர சிம்ஹன் என்ற சோழ அரசன், அவனது தளபதியான அப்ரமேயன் நினைவாக  புனரமைத்த கோவில் இது. தலக்காடு கங்கர்களால் கோவில் கட்டப்பட்து என்றும் பிறகு சோழத் தளபதி அப்ரமேயனால் புனரமைப்பு செய்யப்பட்டது என்றும் சொல்கின்றனர். கன்வ ஆற்றின் கரையில் மணற்பாங்கான இடத்தில் அமைந்திருந்ததால் மணலூர் என்று இருந்த பெயர், காலத்தில் மளூர் என்று மாறியதாம்.  கோவில் 3000 ஆண்டுகளுக்கு முற்பட்டது, கிபி 980ல் கோவிலுக்கு விளக்கெரிப்பதைப் பற்றி எழுதப்பட்ட ஒரு document இப்போதும் இருக்கிறது என்கிறார்கள். விஷ்ணு சஹஸ்ரநாம த்தில் வரும் ‘அப்ரமேயோ’ என்ற பெயரில் இருக்கும் ஒரே விஷ்ணு தலம் இதுதான். மூலவர் பெயர் அப்ரமேயர் (இராமப்ரமேயர்).  இந்தக் கோவிலின் பிரகாரத்தில் வலது மூலையில் தவழும் கிருஷ்ணருக்கு ஒரு சந்நிதி இருக்கிறது. அந்த சந்நிதி மிகவும் பிரபலமானது. குழந்தையில்லாதவர்கள் இங்கு வந்து வேண்டிக்கொண்டு சென்றால் விரைவில் குழந்தை வரம் கிடைக்கும் என்றும் அப்படிக் கிடைத்த பிறகு இங்கு சிறிய தொட்டில் கட்டுவது வழக்கம் என்றும் சொல்கின்றனர்.  

நான் பெங்களூருக்கு வருவதற்கு முன்னமே ஒரு முறை இந்தக் கோவிலுக்குச் சென்றிருக்கிறேன். பெங்களூர் வந்த பிறகு வருடா வருடம், துலா மாதத்தில், காவிரி ஆற்றில் குளிப்பதற்காக ஸ்ரீரங்கபட்டினம் செல்லும் வழியில் தொட்டமளூர் கோவிலுக்குச் செல்வேன்.

இந்தக் கோவிலில் அப்ரமேயர் சந்நிதி, தாயார் சந்நிதி, தவழும் கிருஷ்ணர் சந்நிதி மற்றும் பரமபதநாதர் சந்நிதிகள் அமைந்துள்ளன.

கோவிலின் தோற்றம் (அருகிலிருந்த அர்ச்சகர் வீட்டு மாடியிலிருந்து எடுத்தது-மே 2022)

40 வருடங்களுக்கு முன்பு, இந்த ஊர் அக்ரஹாரத்தில் (கோவிலுக்கு எதிரே உள்ள தெரு) சுமார் 100 குடும்பங்கள் வாழ்ந்துவந்தனவாம். வேலை மற்றும் சுய முன்னேற்றத்திற்காக பலரும் இந்த ஊரை விட்டு வெளியேறி மைசூர், பெங்களூர் என்று சென்றுவிட்டனர். அவர்களில் பலர், பெரிய பதவிகளில் இருந்திருக்கிறார்களாம்.

பல வருடங்களுக்கு முன்பு முதல் முறை இந்தக் கோவிலுக்குச் சென்றிருந்தபோது, தெருவில் நானும் மனைவியும் நடந்துசென்றோம். அப்போது ஒரு சிறிய மண்டபத்திலிருந்து நாலாயிர திவ்யப் ப்ரபந்தம் சொல்லும் சப்தம் கேட்டு உள்ளே சென்றோம். அங்கிருந்த வைணவர்கள், அந்த ஊரைப் பூர்வீகமாக உடையவர்கள். வருடத்தில் பத்து நாட்கள் வந்திருந்து, நாலாயிரத்தையும் சேவிப்பார்களாம். அவர்கள் தமிழ் நாலாயிரத்தை, கன்னட லிபியில் உள்ள புத்தகத்தை வைத்துச் சேவிக்கிறார்கள். பலர் என்னிடம், நீங்க தமிழைத் தாய் மொழியாகக் கொண்டவர், அதனால் பிரபந்த த்தை எளிதாகச் சேவித்துவிடுவீர்கள், ஆனால் இவர்கள் கன்னடத்தைத் தாய் மொழியாகக் கொண்டிருந்தும், பிரபந்தத்தைக் கற்று, கன்னட லிபியில் உள்ள புத்தகத்திலிருந்து சொல்லுகிறார்கள் என்று சொல்வர். இதுபோலவே தெலுங்கு வைணவர்களும் தெலுங்கு லிபி புத்தகத்திலிருந்து சேவிப்பர். இவர்களின் முன்னோர் தமிழகத்திலிருந்து சென்ற வைணவர்கள். (இதை எழுதிய போதுதான், ஏன் சைவர்கள், திருமுறைகளை அடுத்த தலைமுறைக்குக் கற்றுக்கொடுத்து, கோவில்களில் பாராயணம் செய்வதில்லை என்ற சந்தேகம் தோன்றியது. தமிழ் பக்தி இலக்கியங்கள்தாம் தமிழை வளர்த்தன என்றால் மிகையில்லை)

அப்ரமேயர் கருவறை விமானம்

பிரகாரத்தின் வாயிலில் இருந்த மரத்தில் செய்யப்பட்டிருந்த விஷ்ணு சிற்பம். (மூலவர் அப்ரமேயரைப் போன்றது). தற்போது காணவில்லை.  ப்ராகாரத்தின் சுற்றுப் பாதையில் இருக்கும் அப்ரமேயரின் சிற்பம். அது இந்த இடத்திலேயே எனக்குத் தெரிந்து பல வருடங்களாக இருக்கின்றது (தவழும் கிருஷ்ணர் சந்நிதிக்குப் போகும் வழியில்).

 

கோவிலின் உட்புறத் தோற்றம்

சுமார் 120 ஆண்டுகளுக்கு முன்பு, மைசூர் மஹாராஜா, இந்தக் கோவிலுக்கு வந்து அப்ரமேயர், அரவிந்தவல்லித் தாயார் மற்றும் தவழும் கிருஷ்ணரைச் சேவித்தாராம். கிருஷ்ணரின் அழகில் மயங்கி, இந்த விக்ரஹத்தை தன்னுடைய அரண்மனைக்குக் கொண்டுசென்றாராம். அன்றிரவு, அவரது கனவில், விக்ரஹத்தை தொட்டமளூர் கோவிலிலேயே வைத்துவிடும்படி கிருஷ்ணர் கட்டளையிட்டாராம். அதை சட்டைசெய்யாதால், அவரது அரண்மனையின் ஒரு பகுதி தீக்கிரையானதாகவும், உடனே ராஜா தவழும் கிருஷ்ணரை திரும்ப இந்தக் கோவிலிலேயே கொண்டுவந்து வைத்துவிட்டாராம்.

இராமர், இந்த அப்ரமேயர் விக்ரஹத்தை வழிபட்டாராம். அதனால் இந்த மூலவரை இராமப்ரமேயர் என்று அழைக்கின்றனர். இராமர் காலத்தில் ஹோமம் போன்றவை நடந்ததற்கு கோவிலில் அடையாளமிருக்கின்றன என்கிறார்கள்.

(நமக்கு, கோவில் 10ம் நூற்றாண்டில் கட்டப்பட்டது என்று சொல்கிறார்கள், ஆனால் இராமர் காலத்துக்கு வரலாறு போகிறதே என்று தோன்றும். பெரும்பாலான கோவில்களில் சீர்திருத்தமோ இல்லை கோவிலை இன்னும் பெரிதாக்கிக் கட்டுவதோ அவ்வப்போது நடந்துகொண்டுதான் இருக்கிறது. தஞ்சைப் பெரியகோவிலில், கோவில் கட்டும்போதுதான் பெருவுடையாரை பிரதிட்டை செய்தார்கள். ஆனால் பல ப்ராசீனமான கோவில்களில் அப்படி அல்ல. மூலவர் இருக்கும் இடத்தை விரிவாக்கி, மேலும் பல சந்நிதிகளைச் சேர்த்து அவ்வப்போது கோவில் விரிவாக்கம் பெற்றிருக்கும்.)

கோவிலின் பிரகாரத்தில் இருக்கும் கிணறு

தொட்டமளூர் இராமப்ரமேய ஸ்வாமி (இணையம்)

தொட்டமளூர் தவழும் (நவநீத) கிருஷ்ணர் (இணையம்) 

சென்ற வருடம் (2022) மே மாதம், இந்தக் கோவில் பட்டாச்சார்யாரின் (இராதாகிருஷ்ண பட்டாச்சார்யார்) 75வது பிறந்த நாளுக்காக, அவரது இல்லத்தில் பிரபந்தத்தைச் சேவிப்பதற்காக சிலரைக் கூப்பிட்டிருந்தார். எனக்கும் அந்த வாய்ப்பு கிடைத்தது. அந்தச் சமயத்தில் தொட்டமளூர் அப்ரமேயரை வெகு அருகில் நின்று சேவிக்கும் வாய்ப்பும் கிடைத்தது.

 சமீபத்தில் இணையத்தில் தொட்டமளூர் பற்றிப் பார்த்துக்கொண்டிருந்தபோது, அவரைப் பற்றிய தகவல்களைப் படிக்க நேர்ந்து. அவரது தந்தையார் கோவிந்தராஜ பட்டர் அவர்கள், இந்தக் கோவிலில் பட்டாச்சார்யாராக 1940களிலிருந்து பணியாற்றி 2013ல் மறையும்வரை கோவில் பணிகளில் ஈடுபட்டிருந்தார். இராதாகிருஷ்ண பட்டர், மைசூர் பல்கலைக் கழகத்தில் ஆகமம் மற்றும் பிரபந்தங்கள் கற்றுத் தேர்ந்தவர். 70களில் அவருக்கு அமெரிக்கா பிட்ஸ்பெர்க் வெங்கடேச்வரர் கோவில் மற்றும் வேறு பல பணிகள் கிடைத்தபோதும், வேறு எங்கும் செல்லும் மனமின்றி, தொட்டமளூர் கோவிலிலேயே பணியாற்றினார். 

கோவிலில் பணிபுரியும் பட்டாச்சார்யார்களுக்கு சம்பளம் மிகக் குறைவு, தமிழகத்தைவிட பரவாயில்லை. (இன்னும் பணியாற்றுகிறார்). அவருக்கு சில வருடங்களுக்கு முன்பு பெங்களூர் பல்கலைக்கழகம் முனைவர் பட்டம் கொடுத்தது. இப்படிப்பட்ட சிலரை நான் சந்தித்திருக்கிறேன். (திருவரங்கம் கோவிலில் பணியாற்றுபவரின் மனைவிக்கு வெளிநாட்டு வேலை கிடைத்தும், கணவருக்காகவும் கோவில் பணிகளுக்காகவும் வேலையை ஏற்றுக்கொள்ளவில்லை. இதுபோல, Engineering படித்த பெண், கோவில் பட்டர் ஒருவரைத்தான் திருமணம் செய்துகொள்ளவேண்டும் என்று ஆசைப்பட்டு திருமணம் செய்துகொண்டுள்ளார், அந்த பட்டருக்கு வருமானம் குறைவு என்றபோதும்). பணத்தைவிட கோவில் கைங்கர்யமே பெரிது என்று நினைக்கும் மனம் எப்படி வருகிறது? 

நாமெல்லாம் பக்தி உடையவர்கள் என்று சொல்கிறோமே தவிர உண்மையான பக்தி நமக்கு இருக்கிறதா என்றெல்லாம் எனக்குத் தோன்றும். 

கோவிலின் அருகிலேயே சிற்றுண்டி நிலையம் இருக்கிறது. அங்கு காபி/டீ சாப்பிடுபவர்கள் சாப்பிட்ட பிறகு, அங்கிருந்து மாலை 5 மணிக்குப் புறப்பட்டு ஸ்ரீரங்கபட்டினம் சென்றோம். அங்கு, வரவரமுநி சபாவின் சத்திரத்தில்தான் இரவு தங்கப்போகிறோம்.

சென்றமுறையைவிட, இந்த முறை, மைசூருக்கு 8 வழிச் சாலை சில மாதங்களுக்கு முன்பு திறக்கப்பட்டிருப்பதால், சாலைப்பயணம் தடங்கலில்லாமல் அமைந்தது. 6 ½ மணிக்கு ஸ்ரீரங்கப்பட்டினம் வந்து சேர்ந்தோம்.

( தொடரும்)