வாக்கிங் செல்வதுண்டா?

 

பானுமதி வெங்கடேஸ்வரன் : 

CA, MS போன்ற கடினமான படிப்புகளில் சிறப்பாக தேறிய பெண்களை மணந்து கொண்டவர்கள் அவர்களை வேலைக்கு செல்லக் கூடாது என்று சொல்வது சரியா?

# பெண் பிள்ளை இருவரும் இசைந்து என்ன முடிவு எடுத்தாலும் சரிதான்.  பெண் வேலை பார்க்க விரும்பி, கணவன் வேண்டாம் என்றால் சிக்கல்.  போதுமான  நிதி வசதி இருப்பின் வேலைக்கு ஒருவர் போனால் போதும் என்பது என் சொந்தக் கருத்து.  வீட்டு நிர்வாகம் ஒரு முழு நேர வேலை. அதை சிறப்பாகச் செய்வது மிக நல்ல விஷயம்.

& CA, MS போன்ற கடினமான படிப்புகளில் சிறப்பாக தேறிய பெண்களை மணந்து கொண்டு அவர்களை வேலைக்கு செல்லக் கூடாது என்று சொல்லக் கூடியவர்களை அந்தப் பெண்கள் மணந்துகொள்வது சரி இல்லை. 

வாக்கிங் செல்வதுண்டா? உண்டு என்றால் எப்படிப்பட்ட நடை

அ). சாதாரண நடை

ஆ). கைகளை வீசி வீசி நடப்பது

இ). ஒரு ரவுண்டு நடக்கிறோம் என்றால் அதில் முதல் பாதியை  சாதாரணமாகவும், இரண்டாம் பாதியை வேகம் கூட்டி ஜாகிங் ஆக முடிப்பது

ஈ). எட்டு போடுவது

உ). சாதாரணமாக நடந்து விட்டு, கடைசியில் ரிவர்ஸில் நடப்பது

ஊ). ட்ரெட்மில்லில் நடப்பது

# என் வயது காரணமாக நான் மணிக்கு 3 கி மீ வேகத்தில் சுமார் ஒரு மணி நேரம் நடக்கிறேன். அவ்வளவே.

& தினமும் அரை மணி நேரம் அ + ஆ. மணிக்கு 4 km வேகம். 

மழை பெய்தால், கிளப் ஹவுஸ் ட்ரெட்மில்லில் நடப்பது. 

= = = = = = =

KGG பக்கம் : 

நான் ஆரம்பப் பாடசாலையில் படித்த காலத்தில், பள்ளிக்கூடத்திலிருந்து கூப்பிடு தூரத்தில், நாகை ஸ்டார் தியேட்டர். அங்கே திரையிடப்படும் நல்ல கருத்து உள்ள சில படங்கள் பார்க்க வரும் கூட்டம் குறைந்தவுடன்,   ஸ்டார் உரிமையாளர், எங்கள் பள்ளிக்கூட ஹெட் மாஸ்டரை வந்து பார்த்து, ஸ்கூல் பையன்களுக்கு சலுகை விலையில் படத்தை ஒருநாள் போட்டுக் காட்ட அனுமதி கொடுத்துவிடுவார். 

அப்படி ஆரம்பப் பள்ளிக் காலத்தில், நான் பார்த்த சில படங்கள், கண் திறந்தது, இரும்புத்திரை, தெய்வப்பிறவி ஆகியவை நினைவில் உள்ள படங்கள். 

கண் திறந்தது படத்தில் 'பள்ளிக்கூடம் போய் படிக்காமல் இருப்பது எவ்வளவு தீமை பயக்கும்' என்பதை விளக்கும் படம். அதில் ஒரு பாட்டு - ஒரு பையன் கழுதை மீது உட்கார்ந்துகொண்டு, " மனுஷனைப் பார்த்துட்டு உன்னையும் பார்த்தா .. " என்று பாடிச் செல்லும் பாடல். அந்தக் காலத்தில் அது ஒரு ஹிட் சாங்! காரணம் என்ன என்றால், அந்தப் பாடலில் வரும் வரிகள்! " பள்ளிக் கூடம் இல்லாத ஊருக்கு பயணம் போறேண்டா .. " 

பள்ளிக்கூடம் என்றாலே வேப்பங்காயாக கசக்கும் பசங்களுக்கு இந்தப் பாடல் பிடித்துப் போனதில் ஆச்சரியம் இல்லைதானே! 

(இந்தப் பாடலை அடிக்கடி பாடிய என் இன்னொரு நண்பன் ராமன், இதை ஒரு உந்து சக்தியாகக் கொண்டு - நான்காம் வகுப்பில் பரிட்சை எழுதாமல் 'பரிட்சைகள் முடிந்துவிட்டன' என்று வீட்டில் பொய் சொல்லிவிட்டு கும்பகோணம் - அக்கா வீட்டிற்குச் சென்றுவிட்டான். அந்த வருடம் அவன் ஃபெயில் ஆனதற்கு இந்தப் பாடல்தான் காரணம் என்று நினைக்கிறேன்.) 

ஸ்டார் டாக்கீஸ் உரிமையாளர், ஹெட் மாஸ்டரைப் பார்த்து சலுகை அறிவித்துப் போனவுடன், பள்ளியில் உள்ள சில ஆசிரிய ஆசிரியைகள், அந்தப் படத்திற்கு டிக்கெட் தயார் செய்வார்கள். 

பரிட்சை எழுதுவதற்காக வாங்கி வைத்துள்ள சில பேப்பர்களை எடுத்துக்கொண்டு, அவைகளை 'ஒன்றரை X இரண்டு' அங்குல அளவுக்கு வெட்டி எடுத்து அடுக்குவார்கள். பிறகு அவைகள் ஒவ்வொன்றிலும் பள்ளிக் கூடத்தின் பெயர் கொண்ட நீள்  வட்ட ரப்பர் ஸ்டாம்ப் முத்திரை குத்தப்படும். ஐந்து பைசா கொடுக்கும் பையன்களுக்கு ஒரு டிக்கெட் கொடுக்கப்படும். 

வாரத்தின் இறுதி நாளில், மதியம் ஒன்றரை மணிக்கு, இந்த பெனிஃபிட் ஷோ திரையிடப்படும். பசங்களுக்கு தரை டிக்கெட். ஆசிரிய ஆசிரியைகளுக்கு (ஓ சி !) பெஞ்சு டிக்கெட். 

'கண் திறந்தது' படத்தைப் பார்க்கச் சென்ற போது, நண்பன் கோவிந்து அவனுடைய வீட்டிலிருந்து ( காபிப் பொடி விற்கும் மெல்லிய காகித பையில் போட்டு ஒரு பாதி ஜாங்கிரி கொண்டு வந்திருந்தான். 

'மனுஷனைப் பார்த்துட்டு' - பாடல் காட்சியில், பையன்கள் எல்லோரும் கையால் தாளம் போட்டு ரசித்துப் பார்த்துக்கொண்டிருந்த நேரம், அவன் ஜாங்கிரி பாக்கெட் எடுத்து அதிலிருந்து அவன் கொஞ்சம் சாப்பிட்டு, எனக்கும் கொஞ்சம் கொடுத்தான். ஒரு பக்கம் பாடல் காட்சி, வாயில் இனிப்பான ஜாங்கிரி - ஆஹா சொர்க்கலோகமே அன்று எனக்கு கிடைத்தது போல இருந்தது! 

ஆனால் அந்த ஜாங்கிரித் துண்டு பிறகு ஒருநாள் எனக்கு பெருத்த சங்கடத்தை ஏற்படுத்தப்போகிறது என்பதை நான் அப்போது அறிந்திருக்கவில்லை! 

(தொடரும்) 

 = = = =

அப்பாதுரை பக்கம் : 

ரெண்டே ரெண்டு

ஒரு வார டென்வர், லாஸ் ஏஞ்சல்ஸ் பயணம். (சில பேரு ந்யூஜெர்ஸி போறாங்க, விடுங்க). 

டென்வர்ல ரெண்டு நாள் வேலை. தினம் நல்லா நடந்தேன். இந்தப்பக்கம் மலை, அந்தப்பக்கம் வெளி, காற்று, தனிமை, ஆகா, ஒகோ, அத்புதம்.

டென்வர்லந்து எல்ஏ (சேர்த்து எழுதினா எங்கப்பா என்னைக் கூப்ட்றாப்ல இருக்கு.. எலே?) என் பெண்ணைப் பார்த்து நலம் விசாரித்து விட்டு டல்லஸ் திரும்பிட்டிருக்கேன். (அப்பா சேர்த்து வச்ச காசுக்கு வழக்கம் போல வேட்டு வச்சா மகள். இந்த கல்யாணம் குழந்தை எல்லாம் அதிகமா விளம்பரப்படுத்தப்பட்ட வாழ்க்கைப் பலன்கள்னு நினைக்கிறேன். இதைப்பத்தி அவும் ஆவும்  எபி வாட்சப்ல கன்னாபின்னாவென்று விவாதம் செய்ய மண்டியிட்டு தண்டனிட்டுக் கேட்டுக்குறேன்).

வழக்கமா என் விமானப்பயண அதிர்ஷ்டம் எப்படினா எனக்கு முன்னாலோ பின்னாலோ சில நேரம் விமானத்தின் பல வரிசைகளில் அடங்காபிடாரி நாலு வயசுகள் உட்கார்ந்து பயணம் முழுக்க அடாவடி கூச்சல் அழிச்சாட்டியம் செய்யும்.  இந்த முறை அப்படியில்லாமல் ப்ளேன்லயே நாலு வயசு நஹி, ஆறு வயசும்  நஹி! நஹி நஹி ரக்ஷது டுக்ரிங்க்ரனே. பயணிகள் அனைவரும் நாலாறு வயசுக்கு மேலே!  விர்ர்ரென்று வேகம் பிடித்து விமானம் தரைவிட்டு மேலெழுந்ததும் நிம்மதியா ஒரு தூக்கம் போட இமை மூடினேன். 

பத்து நிமிசம் கண்ணயர்ந்திருப்பேனா? முன் சீட்டில் சண்டை. கொஞ்சமே மேட்டர், மத்தபடி நாலெழுத்தில் தொடங்கி பனிரெண்டு எழுத்து வரை வரிசையா கொச்சைத்திட்டுகள். அட, இலவச பொழுதுபோக்குனு மத்த பயணிகளோட நானும் கவனிக்கத் தொடங்கினேன். 

மேட்டர் இதான். நடு மற்றும் ஓர சீட்காரர்கள் ஜன்னலை மூடச்சொல்ல, ஜன்னல் சீட்காரர் பிடிவாதமாக மறுத்துக் கொண்டிருந்தார்.

என்றேனும் ஒரு நாள் நானும் சென்னை வெயில் போல வருவேன்னு சூளுரைத்துக் கொதியோ கொதினு கொதிக்குது லாஸ் ஏஞ்சல்ஸ் வெயில். அனல் உள்ள அடிக்குது. யோவ் ஜன்னலை மூடுயானா ஜன்னல் திறப்பு தன் உரிமை பிறப்புனு இல்லாத மீசையை உருவிக்கிட்டு வெள்ளை வைரமுத்து போல சிரிக்கிறார் ஜன்னல் சீட்காரர். (வைமு பலமா சிரிச்சு பாத்திருக்கீங்களா? இல்லையா? கொடுத்து வச்சவங்க. காந்திஜியின் கண்காதுவாய் குரங்குகள்  தெரியுமா? வைமு பலமா சிரிக்கிறதை கற்பனை செய்தாலே காககு என் நினைவுக்கு வரும்). ஆனால் குரங்கறியா நடு சீட்காரரோ உடனே நாலெழுத்துல திட்ட, கூட்டணி சேர்ந்த ஓர சீட்காரர் ஐந்தெழுத்துல திட்டி ஜன்னலை மூடுயான்னாரு. ஜன்னல் சீட்காரர் விடுவாரா? ஆறெழுத்துல திட்டி போங்கடானு மறுத்தாரு. இப்படியே ஏழு எட்டு ஒன்பது எழுத்துனு மூணு பேரும் மாத்தி மாத்தி மாத்தித் திட்ட, ப்ளேன் சிப்பந்தி வந்து தடுத்தாரு. நாங்கள்ளாம் கூட்டா சேர்ந்து ப்ளேன் சிப்பந்தியைத் தடுத்து "பைசா வசூல் தாயே.. கம்னு கெட"னு அனுப்பிட்டோம்.

ஒரு கட்டத்தில் பனிரெண்டு எழுத்துக்கு மேல் திட்ட வசதியில்லைனு புரிஞ்சு ஜன்னல் சீட்காரர் தன் சுட்டு விரலையும் கட்டை விரலையும் உயர்த்தி நடு, ஓர சீட்காரர்களைச் சுடுவது போல ஜாடை செய்தார். அடுத்த சில நிமிடங்களில் ப்ளைட் கேபினிலிருந்து வந்த கேப்டனும் இன்னொருவரும் ஜன்னல் சீட்காரரைக் கைது செய்து பின் வரிசைக் கடைசி சீட்டில் உட்கார வைத்தனர். 

யார் அந்த இன்னொருவர்னு நியாயமான கேள்வியைக் கேட்டிங்கன்னா, அவுரு ப்ளைட் போலீசாம்.  செப்டம்பர் 11க்குப் பிறகு உலகமெங்கும் முக்கிய நகர விமானங்களில் ப்ளைட் போலீஸ் மப்டியில் பயணம் செய்வதுண்டுனு படிச்சிருந்தாலும் இப்பத்தான் நேரில் பாக்குறேன்.

ஜன்னல்காரர் அப்படியென்ன செஞ்சாரு? ப்ளைட்டில் துப்பாக்கி சுடுவது போல சைகை செய்ததே கைதுக்குக் காரணமாம். சட்டப்படி நடவடிக்கை எடுத்தால் அவருக்கு அபராதம் ஜெயில் எல்லாம் உண்டாம்!

இதுலருந்து மக்களே, என்ன தெரியுது? ப்ளேனல் போறப்ப மூணு நாலு பனிரெண்டு பதினாலு எத்தனை எழுத்துல வேணா எத்தனை வேணா திட்டுங்க, ஆனா ரெண்டே ரெண்டு விரலை வச்சு சுடுற சைகை மட்டும் காட்டாதிங்க. ஸம்ஜே?

                                                  டென்வர் ஹோட்டல் வெளி.

லாஸ் ஏஞ்சல்ஸ் வீட்டின் மல்லிகை மதில்! இரவில் பூக்கும் மல்லிகையாம். என்ன மணம்!!

= = = = =