சொல்லவா... குறை சொல்லவா..

 ...................  இன்னொரு நண்பர் இருக்கிறார். அவரும் உரத்த குரலில் கோபப் படுபவர்தான்.  அர்த்தமே இருக்காது..  எடுத்த எடுப்பிலேயே உரத்த குரல் அதிகார த்வனியில் வந்து விடும்.  மற்றவர்களை தம்ப் கண்ட்ரோலில் வைத்திருப்பதாக அவர் எண்ணம். 

அவர்களோ இவர் மீது தீராத வெறுப்பில்..  ஆனால் இவருக்கு சில நல்ல குணங்கள் உண்டு.  மற்றவர்களின் பிரச்னைகளையும் கொஞ்சம் அறிந்தவர்.  உதவுபவர்.  அதனால் இவரது இந்தக் குறை பெரிய அளவில் பாராட்டப்படாமல் போகிறது.

மகளோ, மகனோ, மனைவியோ..  அவர்கள் நம்மிடம் தயங்காமல் உண்மையைச் சொல்லும் நிலையில் நாம் பழகவேண்டும்.  தவறாக நினைத்துக் கொள்வார்களோ என்று நினைக்கும் வண்ணம் நாம் நடந்து கொண்டால் உண்மையான அபிப்ராயம் நமக்குத் தெரியாமலே போகும்.

அது போலவே மற்றவர்களை பற்றி எப்போதும் குறை கூறிக்கொண்டிருந்தாலும் உறவுகளும், நட்பும் நம்மை ஒதுக்க ஆரம்பித்து விடுவார்கள்.  சொல்லி ஆகவேண்டிய குறையைச் சொல்லக் கூடாதா என்று கேட்கலாம்.  அங்குதானே இந்தப் பிரச்னை எல்லாம் வருகிறது!  குறைகளை அவர்களிடம் தனியாகக் கூட சொல்ல முடிவதில்லை.  ஏனென்றால் குறையை தனியாகவும், பாராட்டை எல்லோர் முன்னிலையிலும் செய்ய வேண்டும் என்பார்கள்.  

உறவுகளுக்குள்ளேயே உரிமையுடன் பேசுவது, உண்மையாக பேசுவது முடியாமல் போய்க்கொண்டிருக்கிறதா?  என்னைக் கேட்டால் ஆம் என்றுதான் சொல்வேன்.

போலித்தனம் இல்லாமல் பேச உங்களுக்கு எத்தனை நண்பர்கள் இருக்கிறார்கள்?  மனம் விட்டுப் பேச உறவில் யாராவது இருக்கிறார்களா?  நாம் சொல்லும் பொருளை விடுத்து அவர்களாக அர்த்தம் செய்து கொள்ளும் பொருளுடன் மனத்தாங்கல் கொள்பவர்கள் இருக்கிறார்கள்.  மனதில் நினைப்பது எல்லாவற்றையும் மறைக்காமல் பேசி எத்தனை பேர்களிடம் பழக முடியும்?  பதில் வாங்க முடியும்?  முதலில் நம்மைப் பற்றி நாம் போலித்தனமான பிம்பங்கள் கொண்டிருப்பதை மாற்ற வேண்டும்.  நாம் யார் என்பது நமக்கே தெரிந்திருக்க வேண்டும்,  நம் பலங்களைவிட, நம் பலவீனங்கள் நமக்குத் தெரிந்திருக்க வேண்டும்.  அப்போதுதான் நாம் மற்றவர்களிடம் உண்மையாய் இருக்க முடியும்.

நாம் உண்மையாய் இருந்துவிட்டுதான் மற்றவர்களிடம் அதை எதிர்பார்க்க வேண்டும்.  

முன்னெல்லாம் அப்பாவோ, மகனோ, மகளோ, மனைவியோ, அண்ணனோ, தம்பியோ ஒருவருக்கொருவர் பேசிக்கொள்ளும்போது உரிமையுடன் நீ செய்தது தவறு..  இப்படி செய்திருக்கக் கூடாது என்று வாதிடும் சுதந்திரம் இருந்ததது.

இப்போது நிறைய குடும்பங்களில் அந்தத் சுதந்திரம் இல்லை என்று நினைக்கிறேன்.

மனைவியிடமே, அல்லது கணவனிடமே  நீ இப்போது நடந்து கொண்டது தவறு என்றோ, பேசியது தவறு என்றோ சொல்ல முடியாத நிலைதான் பல குடும்பங்களில் நிகழ்கிறது. அண்ணன்-தங்கை, தம்பி உறவுகள் எல்லாம் இன்னும் மோசம்.  சேர்ந்து வாழ்பவர்களிடையேயே இல்லாத புரிந்துணர்வு தனித்தனியாய் வாழ்பவரிடம் இருக்கும் என்று எப்படி எதிர்பார்க்க முடியும்?!

சமீபத்தில் தந்தை சொன்ன ஒரு சொல்லுக்காக 'அல்டிமேட் முடிவெ'டுத்து விட்ட ஒரு தனயன், கடைசி நொடியில் திடீரென என் நினைவு வந்து, என்னைத்தேடி வந்து,  குமுறிக் குமுறி கொட்ட, அவரை சமனப்படுத்தி அப்பா, அம்மா, உறவு பற்றி பேசி, பேசுவதற்கு கூட உரிமை இல்லாத உறவினால் என்ன பயன் என்று கேட்டு தெளிய வைத்து அனுப்பினேன்.  இப்போது ஒரு திடீர் மாற்றத்துடன் அந்தத் தனயன் நல்ல முறையில் பழக்க வழக்கங்களை மாற்றிக் கொண்டுள்ளதாக தகவல் வந்துள்ளது.

ஆனால் இந்தக் காலத்தில் எத்தனை பேர் இப்படி பேசுவதை ஏற்றுக்கொள்வார்கள்?  ஏதோ அவராக தேடி வந்ததால் என்னால் உரிமையுடனும், உண்மையாகவும் பேச முடிந்தது.

===================================================================================================

எப்பவோ பகிர்ந்ததுதான்..  இப்போ மறுபடி...

================================================================================================================

படித்ததை ரசித்து, பகிர்வது...

தமிழ்த் திரையுலகின் முதல் பின்னணிப் பாடகர் யார் தெரியுமா?, மந்திரி குமாரி திரைப்படத்தில், பாடிய ‘வாராய் நீ வாராய்’ என்ற பாடல் மூலம் அடையாளங் காட்டப்பட்ட திருச்சி லோகநாதன்தான் அவர். முதன் முதலில் எம்.ஜி.ஆர். கதாநாயகனாக நடித்த “ராஜகுமாரி” திரைப்படத்தில் பின்னணி பாடியவர் ..

சிவாஜிகணேசனுக்காக கள்வனின் காதலி திரைப்படத்திலும், எம்ஜிஆருக்காக ‘மர்மயோகி’ ‘சர்வாதிகாரி’ ஆகிய திரைப்படங்களிலும் பாடியிருக்கிறார். நடிகர்களுக்காக குரலை மாற்றாமல், இயல்பான குரலிலேயே பாடும் திருச்சி லோக நாதன், மாயா பஜார் திரைப்படத்தில் எஸ்.வி.ரங்காராவ் பாடுவதாக அமைந்த ‘கல்யாண சமையல் சாதம் பாடல், இன்று வரை பட்டிதொட்டியெங்கும் ஓங்கி ஒலித்துக் கொண்டிருக்கிறது.

வண்ணக்கிளி திரைப்படத்தில் பி.சுசீலாவுடன் இணைந்து பாடிய ‘அடிக்கிற கைதான் அணைக்கும்’ என்ற பாடலும் மிகப் பெரிய வரவேற்பை பெற்றது. இரும்புத்திரை படத்தில் ‘கையில வாங்கினேன் பையில போடலே காசு போன இடம் தெரியல’ என்ற பாடல், இன்றும் மாதச்சம்பளம் பெறும் ஊழியர்களின் நிலையை கூறும். ‘பானை பிடித்தவள் பாக்கியசாலி’ படத்தில் திருச்சி லோகநாதன் பாடிய ‘புருஷன் வீட்டில் வாழப்போகும் பெண்ணே தங்கச்சி கண்ணே’ என்ற பாடல் கிராமப்புறங்களில் திருமண வீடுகளில் இன்றும் ஒலிக்கிறது.

தை பிறந்தால் வழி பிறக்கும் திரைப்படத்தில், ‘ஆசையே அலைபோலே நாமெல்லாம் அதன் மேலே’ என்ற பாடல், டெண்ட் கொட்டகையில் மணல் திட்டில் உட்கார்ந்திருந்த ரசிகர்களை அப்படியே ஓடத்தில் ஏற்றி வந்தது..

திருச்சி லோகநாதன் மகன்களில் ஒருவரான டி.எல்.மகாராஜன் சிறுவனாக இருந்தபோது, திருவருட் செல்வர் திரைப்படத்தில் பாடிய காதலாகி கசிந்து பாடலை கேட்டு பரவசமடைந்த திருச்சி லோகநாதன், நெகிழ்ச்சியுடன் கண்ணீர் சிந்தியதாக குறிப்பிடுகிறார் அவரது மகன் டி.எல்.மகாராஜன்.

திருவருட் செல்வர் திரைப்படத்தில் ‘ஆலயமணி கதவே தாழ் திறவாய்’ என அண்ணன் மகாராஜன் பாடினால் அவரது சகோதரரும் மற்றொரு பிரபல பின்னணி பாடகருமான தீபன் சக்கரவர்த்தி, நிழல்கள் திரைப்படத்தில் பூங்கதவே தாழ்திறவாய் பாடலை பாடியுள்ளார்.

‘வாராய் நீ வாராய்’ பாடலுக்காக மலைகளும் ‘உலவும் தென்றலுக்காக ஓடங்களும், ஆசையே அலை போல’ பாடலைக் கேட்க, அலைகளும் திருச்சி லோகநாதனின் குரலுக்காக இன்றும் ஏங்கிக் கொண்டிருக்கின்றன. ஆலயத்தின் கதவென்றாலும், பூங்கதவின் தாழ் திறந்தாலும், இனிய பாடல்களை கேட்கும்போது நமது மனங்களின் கதவு திறந்து, கவலைகள் மறக்கின்றன என்பதில் மாற்றுக் கருத்தில்லை…

நன்றி: நியூஸ் 7 தமிழ் - நன்றி கந்தசாமி ஸார். (முகநூல்)

===================================================

============================

மனம்

பழைய குப்பைகளை 

பெருக்கித் தள்ளி 

பாங்காய் பளிச்சென 

சுத்தம் 

செய்து வைக்கிறேன்..

புதிய குப்பைகள் 

காத்திருக்கின்றன..

------------------------------------------------------------------------------------------------------------------------------------------------------

அப்பப்போ இப்படிதான் ஏதாவது உருப்படாத, உபயோகமில்லாத எண்ணங்கள் வரும். இங்கும் அங்கும் பகிர்ந்து வைப்பேன். இப்போ வந்திருக்கும் எண்ணம் என்னன்னா...

சினிமாவில் டைட்டில் கார்ட் போடும்போது எத்தனை பேர் அதனை  சுவாரஸ்யமாக பார்ப்பீர்கள்?  அப்படியே பார்ப்பவர்களும் கூட என்னென்ன பெயர்களுக்காக காத்திருப்பீர்கள்?  ஹீரோ, ஹீரோயின்  யார் என்று தெரிந்து தான் படத்துக்கு வந்திருப்பீர்கள்.  பெரும்பாலும் இசை, இயக்கம் எல்லாம் கூட யார் என்று தெரிந்திருக்கும்.  தெரியாதவர்கள் ஒருவேளை அதை சுவாரஸ்யமாக பார்க்கலாம்.  அப்புறம் பாடலாசிரியர் யார் என்று சிலபேர் பார்க்கலாம்.

அப்புறம் துணை நடிகர் ஏஜென்ட், படத்தொகுப்பு, கலர் ப்ராசஸிங் இன்னும் நாம் இதுவரை படித்திராத விவரங்கள் எல்லாம் என்று ஏகப்பட்ட விவரங்கள் வந்த வண்ணம் இருக்குமே..  அவற்றை யார் யார் படிக்கிறீர்கள்? சம்பந்தப்பட்டவர் அல்லது அவர் குடும்பத்தைச் சேர்ந்தவர் படிக்க நினைத்தால் படித்து சந்தோஷப்பட்டுக் கொள்ளலாம்.  அதுவும் கூட நொடியில் மறைந்து விடும்.

இன்னும் சில படங்களில் படம் முடிந்த பின் யாருமே படிக்க முடியாத பொடி எழுத்துகளில் ஓடிக்கொண்டிருக்கும்.

யாருக்காக...   இவையெல்லாம் யாருக்காக?

========================================================================

நியூஸ் ரூம் :- பானுமதி வெங்கடேஸ்வரன்

29.6.23

உலகிலேயே அதிக கோல் போட்டவர் என்ற பெருமைக்கு உரியவராகிறார் ரொனால்டோ.

இந்த வருடம் கர்னாடகாவில் பருவ மழை போதுமான அளவு பெய்யாததால் அணைகட்டுகள் நிரம்பவில்லை. மழை பெய்ய வேண்டும் என்பதற்காக இரண்டு குழந்தைகளுக்கு பால்ய விவாகம் நடத்தப்பட்டிருக்கிறது. இதில் குறிப்பிடத்தக்க அம்சம் என்னவென்றால் இரண்டு குழந்தைகளுமே ஆண் குழந்தைகள்!!

37 ஆண்டு கால லஞ்ச வழக்கில் நவாஸ் ஷெரீப் விடுதலை.

கணவன் டி.வி.சேனல்களை அடிக்கடி மாற்றிக் கொண்டெ இருந்ததில் தம்பதிகளுக்கிடையே மூண்ட தகறாரில் கோபித்துக் கொண்டு வீட்டை விட்டு வெளியேறிய மனைவி அருகிலிருந்த ஒரு குட்டையில்  குதிக்க, அவளைக் காப்பாற்ற நீச்சல் தெரியாத கணவனும் குதித்து இருவருமே மரணமடைந்தனர். இப்போது 9 மற்றும் 7 வயதுகளில் இருக்கும் அவர்களது மகனும், மகளும் அனாதைகளாகி விட்டனர்.

கம்போடியாவில் அடுத்த மாதம் நடக்கவிருக்கும் பொதுத் தேர்தலில் வாக்களிக்காதவர்கள் எதிர்காலத்தில் தேர்தலில் போட்டியிட முடியாது என்னும் சட்டத்தை நிறைவேற்ற அந்நாட்டு பார்லிமெண்ட் ஒப்புதல் அளித்துள்ளது.

சண்டையில் காதை கடித்த தமிழருக்கு சிங்கப்பூரில் ஐந்து மாத சிறை.சிங்கப்பூரில் வேலை பார்க்கும் மனோகர் சங்கர் என்பவர் குடியிருந்த வீட்டின் மாடியில் அமர்ந்து கொண்டு மது அருந்தியிருக்கிறார், சந்தேகப்பட்டு கேள்வி கேட்ட வீட்டு உரிமையாளரோடு வாக்குவாதத்தில் இறங்கிய மனோகர் சங்கர் வீட்டு உரிமையாளரின் காதை கடித்து விட்டாராம். பாதிக்கப்பட்டவர் அளித்த புகாரின் பேரில் கைது செய்யப்பட்டு தண்டனை விதிக்கப்படிருகிறது. 

நம்ம ஊர்லதான் பேனா சர்ச்சைன்னு பார்த்தா லண்டலயும் சர்ச்சை! அழியக்கூடிய மையால் ஆன பேனாவை பிரிட்டன் பிரதமர் ரிஷி சுனாக் பயன்படுத்தி வருவதாக புகார் எழுந்ததால், சர்ச்சையில் சிக்கி இருக்கிறாராம்.

கிரிக்கெட் உலகக் கோப்பையை கொண்டு போய் ஆகாசத்துல வச்சிருக்காங்க....  இங்கிலாந்தில் உள்ள விண்வெளி ஆய்வு மையத்தில் இருந்து 'ஸ்டிராட்டோஸ்பியரிக் பலுான்' மூலம் நேற்று உலக கோப்பை விண்ணில் செலுத்தப்பட்டது. பூமியில் இருந்து 1,20,000 அடி உயரத்தில் நிலை நிறுத்தப்பட்டுள்ளது. உறைபனிக்கும் கீழான, மைனஸ் 65 டிகிரி செல்சியஸ் வெப்பநிலையில், பூமியின் வெளிவட்டப் பாதைக்கு 99.5% அருகில் ஜொலிக்கிறது. உலக கோப்பை இருக்கும் இடத்தை '4டி' தொழில்நுட்ப கேமரா உதவியால் படம் பிடிக்கப்பட்டது. உலக கோப்பை துவங்க இன்னும் 100 நாள் உள்ள நிலையில், இன்று உலகின் பெரிய மோடி மைதானத்தில், பலுான் தரையிறக்கப்பட உள்ளது.

"சோழர்கள் இன்று" அப்படீன்னு ஒரு புத்தகம் வெளியாகி இருக்குங்க...  தினமலர்ல விளம்பரமா வருது, வாங்க நமக்கும் ஆவலாதான் இருக்கு.  சமஸ் தொகுத்திருக்கிறாராம்.  நிறைய பேர் தனக்கு மட்டுமில்லாமல்  நண்பர்களுக்கு சேர்த்து வாங்கறாங்களாம்.  தனியார் நிறுவன ஊழியரான வாசகர் ராஜ விமலகுமார் நேற்று, 'தினமலர்' நாளிதழ் அலுவலகம் சென்று 25,000  ரூபாய்க்கு அந்தப் புத்தகம் வாங்கினாராம், நண்பர்களுக்கு பரிசளிக்க..  புத்தக விலை 450 

டெல்லியில் சாலையில் நடந்து சென்ற நடந்து சென்ற தம்பதியிடம் வழிப்பறி செய்ய முயன்றதாம் இரு சக்கர வாகனத்தில் வந்த இருவர் குழு!  இவர்களிடம் 20 ரூபாய்தான் இருந்தது என்று தெரிந்ததும் 100 ரூபாய் தந்து விட்டு சென்றதாம்..  ஆளுங்களை பிடிச்சுட்டாங்கன்னு வச்சுக்கோங்க...

ஆங்காங்கே கம்பெனிகள் ஆட்குறைப்பு செய்து வரும் நியூஸ் தெரியும்தானே..  அதுவும் அமெரிக்க நிறுவனங்கள் நஷ்டம் காரணமாக நிறையவே செய்கின்றன.. நேற்றைய நியூஸ் அமெரிக்காவில் கோல்ட்மேன் சாஷ் நிறுவனம் உலகம் முழுதும் 125 மேனேஜிங் டைரக்டர்களை பணி நீக்கம் செய்துள்ளதாக தகவல் வெளியாகியுள்ளது.

லண்டன்லேருந்து டெல்லி வந்த ஏர் இந்தியா விமானம் மோசமான வானிலைன்னு ஜெய்ப்பூர்ல தரை இறக்கி இருக்காங்க..  மூன்று மணிநேரம் ஆனதும், "அவ்வளவுதான்..  எங்க டியூட்டி டைம் ஓவர்"னு பைலட் லாம் வீட்டுக்கு கிளம்பிட்டாங்களாம்.  தவித்த பயணிகளை சொகுசு பஸ்ஸில் அங்கிருந்து டெல்லி அழைத்து வந்தார்களாம்.  என்ன ஒரு தின்னக்கம்...!

 

================================================================================

என்ன செய்வார்கள்? எப்படிச் செய்வார்கள்?

============================================================================================

பொக்கிஷம் :-

என்ன ஒரு சந்தேகம்!

"ஆ....!"

என்ன செய்ய... கூச்ச சுபாவம்!

இப்படி மெயின்டெயின் பண்ணுமளவு அப்படியென்ன தொழில் பன்றாராம்?

ஹிஹிஹி...