நான் தரிசனம் செய்த கோவில்கள்: நெல்லைத்தமிழன் : வைரமுடி யாத்திரை 02

 

வைரமுடி யாத்திரை – ஸ்ரீரங்கப்பட்டினம் ரங்கநாதர்  – பகுதி 2

தொட்டமளூர் அப்ரமேயஸ்வாமியையும் நவநீத கிருஷ்ணரையும் சேவித்துவிட்டு ஸ்ரீரங்கபட்டினத்தை நோக்கிச் சென்றோம். மாலை 6 ½ மணிக்குத் தங்குமிடத்தை அடைந்தோம். பேருந்து பயணத்தின்போதே மைசூர்பாக்கும், காராபூந்தி பாக்கெட்டும் கொடுத்தார்கள். இங்கு முதல் மாடியில் 4 அறைகள் இருந்தாலும், எல்லாமே சுமார் ரகம்தான். ஆனால் தரை தளம் மற்றும் முதல் தளத்தில் இருந்த ஹால், நிறைய மின்விசிறிகள் மற்றும் மொபைல் சார்ஜிங்குக்கான ப்ளக்குகள் இருந்தன. 4 பேர் ஒரு அறையைப் பகிர்ந்துகொண்டாலும் (மற்றவர்கள் ஹாலில்), நான் இரவு படுப்பதற்கு ஹாலைதான் உபயோகித்தேன்.

எல்லோரும் அவரவர் உடைமையை வைத்து செட்டில் ஆனபிறகு, காபி சாப்பிட்ட பிறகு, கோவிலை நோக்கிச் சென்றோம். இங்கு முதன்மையான கோவில் ஸ்ரீரங்கநாதர் ஆலயம். ஸ்ரீரங்கபட்டினத்தின் பெரும்பகுதி கோட்டைக்குள் அமைந்திருக்கிறது. இங்குதான் திப்பு சுல்தானின் அரண்மனைச் சிதிலங்களும், அவன் உபயோகித்த மசூதியும், சிறைச்சாலையும், போரில் காயம்பட்டு அவன் உடல் கிடந்த இடமும் இருக்கின்றன. ரங்கநாதர் ஆலயத்திற்கு நாங்கள் தங்கிய இத்திலிருந்து நடந்து சென்றுவிடலாம். வழியில் மிகப் பழமையான உக்ர நரசிம்மர் ஆலயமும் உண்டு. இவை அனைத்தும் தொல்பொருள் துறையின் பாதுகாப்பில் இருக்கின்றன.  இந்த இடத்தின் அருகிலேயே காவிரி கரைபுரண்டு ஓடுகிறது.

நான் சென்றிருந்தபோதெல்லாம், நரசிம்மர் ஆலயம் இரவில் நடைசாற்றியிருப்பார்கள். காலையில் 9 மணிக்குத்தான் நடை திறக்கும். (காரணம் பக்தர்கள் வருகை குறைவு). ஆனால் அன்று கோவிலில் விசேஷம் என்பதால், கோவில் திறந்திருந்தது. முதலில் நரசிம்மர் ஆலயத்துக்குச் சென்றோம். உற்சவர் புறப்பாட்டிற்காக மஞ்சளும் சந்தனமும் சேர்த்து கவசம் சார்த்தியிருந்தார்கள்.

ஸ்ரீ லக்ஷ்மி நரசிம்ம ஸ்வாமி ஆலயம் 9ம் நூற்றாண்டில் திருமலைராயன் என்ற அரசனால் கட்டப்பட்து. 17ம் நூற்றாண்டில் இந்த ஆலயம் சீர்செய்யப்பட்டது.

நரசிம்மர் சந்நிதிக்கு வலது புறத்தில், மைசூரின் புகழ்பெற்ற அரசனான கந்தீவர நரசராஜ உடையாருக்கு ஒரு சிலை, சிறிய அறையில் இருக்கிறது. இந்த அரசன் 17ம் நூற்றாண்டில் இந்தக் கோவிலைச் சீர்படுத்தியவன். அரசருக்கு உரிய உடையலங்காரத்துடன் கூடிய 1 மீட்டர் உயரமுள்ள சிலை, அந்த அரசன் நினைவாக கோவிலுக்குள்ளேயே அமைத்திருக்கின்றனர்.

நரசிம்மரைச் சேவித்த பிறகு, ரங்கநாதர் கோவிலுக்குச் சென்றோம். கூட்டமில்லை. ரங்கநாதரைச் சேவித்த பிறகு மீண்டும் நரசிம்மர் கோவிலுக்கு வந்து புறப்பாட்டில் கலந்துகொண்டோம். புறப்பாடு என்பது நரசிம்மர் உற்சவரை, கோவிலுக்குள்ளேயே பல்லக்கில் ஏற்றிக்கொண்டு பிரகாரத்தில் சுத்திவருவார்கள். அதில் கலந்துகொண்டு பிரசாதங்களும் வாங்கிக்கொண்டு (கூடவே சேவித்தவர்களுக்கு வெற்றிலை பாக்கு, சிறிய மாலையையும் கழுத்தில் அணிவித்தார்கள். பிறகு வந்திருந்த சுமார் 50 பேர்களுக்கு தட்டு போட்டு, புளியோதரையும் கோசுமல்லியும் கொடுத்தார்கள்) நாங்கள் தங்கியிருந்த இடத்திற்கு 9 மணிக்கு வந்து சேர்ந்தோம்.

நான் சென்ற யாத்திரைக் குழுவை நடத்துபவர் எப்போதும் உணவு விஷயத்தில் மிக மிக நன்றாக கவனிப்பார்கள். அன்றைய இரவு உணவு, வெண்டைக்காய் சாம்பார், கத்தரி கறியமுது, சௌசௌ கூட்டு, ரசம், ரவா கீர்.  மறுநாள் காலை 6 மணிக்கு காபிக்குப் பிறகு அருகிலிருக்கும் காவிரி ஆற்றில் குளித்துவிட்டு 7 ½ க்கு ரங்கநாதர் கோவிலுக்குச் சென்று தரிசனம் செய்யச் சொன்னார்கள்.

ஸ்ரீரங்கபட்டினா, ஹைதர் அலி மற்றும் அவனது மகன் திப்பு சுல்தானின் தலைநகராக விளங்கிற்று. மைசூரிலிருந்து சுமார் 16 கிமீ தூரத்தில் இருக்கும் இந்த இட த்தில்தான் திப்பு சுல்தானின் அரண்மனை அமைந்திருந்தது.  ஸ்ரீரங்கபட்டினம், எல்லாப்புறமும் காவிரி ஆற்றால் சூழப்பட்ட ஒரு தீவு. (ஸ்ரீரங்கம் போன்று). இங்கிருக்கும் ஸ்ரீரங்கநாதர் ஆலயத்தால்தான் இந்த இடம் ஸ்ரீரங்கபட்டினம் என்று அழைக்கப்பட்ட து.

இந்த ஆலயம் 8ம் நூற்றாண்டில் கட்டப்பட்டது. ஆதிசேஷன் மடியில் பள்ளி கொண்ட நிலையில் இருக்கும் ஸ்ரீரங்கநாதர், கர்நாடகாவிலேயே பெரிய சிலாமூர்த்தி. ஸ்ரீரங்கநாதர் பாதத்தின் அருகில் கௌதம முனிவரும் காவிரியும் அமர்ந்த நிலையில் இருக்கிறார்கள். கோவிலின் அர்த்த மண்டபத்துக்கு நுழையும் வழியில் சதுர்விம்சதி என்று அழைக்கப்படும் இரண்டு தூண்களில், விஷ்ணுவின் 24 வடிவங்கள் செதுக்கப்பட்டுள்ளன (முந்தைய நாள் இரவு, அவற்றைப் புகைப்படம் எடுத்துக்கொள்ளலாம் என்று அனுமதி கொடுத்தனர். அப்போது இரவு என்பதால் தெளிவாக இல்லை. மறுநாள் காலையில் எடுத்துக்கொள்ளலாம் என்று நினைத்தேன். மறுநாள் வந்த அலுவலர், புகைப்படம் எடுக்க அனுமதி கொடுக்கவில்லை. அடுத்த முறை செல்லும்போது புகைப்படம் எடுப்பேன்)

கர்நாடகாவில் உள்ளவர்களுக்கு, மூன்று ரங்கனை ஒரே நாளில் தரிசிப்பது முக்கியம். ஆதிரங்கர் (ஸ்ரீரங்கபட்டினா), மத்திய ரங்கர் (சிவணசமுத்ரா) மற்றும் அந்த்ய ரங்கர் (ஸ்ரீரங்கம்). நாங்கள் ஒருமுறை இப்படிச் சேவித்திருக்கிறோம். அப்போது காலையில் ஸ்ரீரங்கபட்டினாவில் காவிரி ஸ்னாநத்திற்குப் பிறகு சேவித்துவிட்டு, மத்திய ரங்கம் சென்று சேவித்து (அப்படியே அருகில் இருக்கும் சத்யகாலா என்ற இட த்திற்குச் சென்று அங்கு இருக்கும் கோவிலிலும் சேவித்தோம். இங்கு, ஸ்ரீரங்கத்தில் முஸ்லீம் படையெடுப்பு நடந்தபோது-13ம் நூற்றாண்டு, ஸ்ரீரங்கத்தை விட்டு விலகி, சமயநூல்களைக் காக்கும்பொருட்டு அவற்றை எடுத்துவந்து வேதாந்த தேசிகர் கர்நாடகாவிற்கு வந்து சத்யாகாலத்தில் பல வருடங்கள் வாழ்ந்திருந்தார். இந்தப் பயணத்தைப் பற்றி பிறகு ஒரு சமயம் எழுதுகிறேன்.) பிறகு ஸ்ரீரங்கம் வந்து ரங்கநாதரைச் சேவித்தோம். நாங்கள் ஸ்ரீரங்கத்தில் ரங்கநாதரைச் சேவிக்கும்போது இரவு 8 ½ மணி.

பெங்களூர் மார்ச் முதல் மே இறுதி வரையில் கொஞ்சம் சூடாக ஆரம்பித்திருக்கிறது. நான் வீட்டில் ஏசி உபயோகிக்கிறேன். பசங்க அறைகளுக்கு ஏசி இன்னும் வாங்கவில்லை. ஸ்ரீரங்கபட்டினமும் கொஞ்சம் கசகசவென்றே இருந்தது.  நான் ஹாலிலேயே படுத்துக்கொண்டேன்.  காலை 4 மணிக்கு எழுந்து, 1 ½ மணி நேரம் நடந்தேன். காபிக்குப் பிறகு காவிரி ஆற்றிர்க்குச் சென்று ஸ்நானம் செய்தோம்.

தண்ணீரில் வேகம் இருந்தது. இந்த ஆற்றில் குளிப்பது எனக்கு எப்போதுமே பிடித்தமானது

உடை மாற்றிக்கொண்டு, ரங்கநாதர் கோவில் விஸ்வரூப தரிசனத்திற்குச் சென்றோம் (7 ½ மணிக்கு விஸ்வரூபம்). கோவிலில் பல்வேறு சந்நிதிகளில் சேவித்த பிறகு 9 ¾ க்கு எல்லோரும் கோவிலை விட்டு வெளியில் வந்தோம்.

இந்தக் கோவிலில் மூலவரைப் பார்த்த மாதிரி, அர்த்த மண்டபத்திற்கு முன் மண்டபத்தில் இரண்டு பெரிய திருவுருவங்களாக கருடர் சந்நிதியும் ஆஞ்சநேயர் சந்நிதியும் அமைந்துள்ளன.  அதற்கு அருகிலேயே வியாசராயரால் பிரதிஷ்டை செய்யப்பட்ட திருவேங்கடமுடையான் சந்நிதி அமைந்துள்ளது (ஆஞ்சநேயரும் அவர் பிரதிஷ்டை செய்தது என்று சொல்கின்றனர்) திருவேங்கடமுடையான் இளைய கோலத்தில், பிரபாவளியுடன் சேர்ந்த திருவுருவமாகச் செதுக்கப்பட்டுள்ளது. கருட வாஹனத்துடன் கூடியது. மிக அழகான சந்நிதி. 

பழமை படிந்த, அழகாகக் கடையப்பெற்ற கோவில் தூண்கள்.

கோவில் கருவறையில் சயன நிலையில் இருக்கும் ரங்கநாதர். திருமார்பில் மஹாலக்ஷ்மி.

அழகிய யானைச் சிற்பங்கள் இரண்டு பகுதியிலும்.

(இணையத்திலிருந்து)

அடுத்து எப்போது மீண்டும் இந்தக் கோவிலுக்கு வருவதற்குப் ப்ராப்தம் இருக்கிறதோ என்ற நினைவில் கோவிலை விட்டு வெளியே வந்தேன். இதற்குப் பிறகு எங்கே சென்றோம் என்பதை அடுத்த வாரம் காணலாம்.

( தொடரும்)