நான் தரிசனம் செய்த கோவில்கள்: நெல்லைத்தமிழன் : வைரமுடி யாத்திரை 03

 

                  வைரமுடி யாத்திரை – ஸ்ரீரங்கப்பட்டினம் ரங்கநாதர்  – பகுதி 3 

ஸ்ரீரங்கநாதரைச் சேவித்த பிறகு சிறிது நேரம் இருந்தால் அருகிலிருந்த நரசிம்மர் கோவிலுக்கும் சென்று தரிசனம் செய்தோம். பிறகு 9 ¾ க்கு அருகிலிருந்த திப்புசுல்தான் உபயோகித்த சிறைச்சாலை (நிலவறை-Dungeon என்று அழைக்கப்படுகிறது)க்குச் சென்றோம். 

இது தரை மட்டத்திலிருந்து கீழே அமைந்துள்ளது. இங்கு சுவர்களில் இரும்பாலான வளையங்கள் உள்ளன. கைதியின் இரு கைகளையும் அதில் கட்டிவைத்துவிடுவார்களாம். காவிரியிலிருந்து நீர் இந்த இடத்திற்கு வந்து, கைதியின் இடுப்புவரைகூட உயர்ந்துவிடுமாம். இந்த டஞ்சனிலிருந்து மைசூருக்குச் செல்லும் சுரங்கப்பாதை இருக்கிறதாம். ஆங்கிலேயர்களின் ஆட்சியில் கலோனல் பெய்லி இங்கு இருக்கும்போது மரணமடைந்ததால், அவன் பெயரில் கலோனல் பெய்லி நிலவறை என்று அழைக்கப்படுகிறது. 

ஸ்ரீரங்கப்பட்டினம், திப்புசுல்தானின் தலைநகராக இருந்ததால், இங்கு அவனது சிதைந்துபோன அரண்மனை மற்றும் அவன் உபயோகித்த மசூதியும் உள்ளன. ஊரைச் சுற்றி கோட்டைச் சுவர்களையும் காணலாம். ஸ்ரீரங்கபட்டினத்திலிருந்து சிறிது தூரத்தில், ஹைதர் அலியின் சமாதியும் சிதிலமடைந்த அரண்மனைப் பகுதிகளும் உள்ளன. நாங்கள் இந்தச் சிறைச்சாலையையும், அங்கிருந்து மற்ற இடங்களுக்குச் செல்லும் வழியில், போரில் திப்பு சுல்தான் உடல் பிணமாகக் கிடந்த இட த்தையும் பார்த்தோம்.

மேலிருந்து பார்த்தால் சிறைச்சாலை இருப்பது தெரியாதபடி, 20 படிகள் இறங்கிச் செல்லும்படி இந்த நிலவறை என்று அழைக்கப்படும் இடம் இருக்கிறது

அரசனானவன் எவ்வளவுதான் நீதிமானாக இருந்தாலும் தவறு செய்யாமல் இருக்கவே முடியாது. பல நேரங்களில் அவனது அமைச்சர்கள் அல்லது மற்றவர்கள் சொல்வதை வைத்துத் தவறான நீதி வழங்கவும், நல்லவர்களைச் சிறையில் வைக்கவும் நேரிடும். இதனால் ஏற்படும் பாவத்தால், எல்லா அரசர்களும் நரகத்தையும் அனுபவிக்க நேரிடும் என்று இந்து சமய நீதி நூல்கள் சொல்கின்றன. இந்தச் சிறைச்சாலையில் எத்தனை நல்லவர்கள் அடைக்கப்பட்டார்களோ.

ரங்கநாதஸ்வாமி கோவிலிலிருந்து 150 மீட்டர்கள் தொலைவில் லால் மஹால் அரண்மனை என்று சொல்லப்பட்ட திப்புசுல்தான் அரண்மனை இருந்தது. இது மிக அழகாக வடிவமைக்கப்பட்டிருந்ததாக 1800ல் அதனைப் பார்வையிட்ட ஆங்கிலேயர்கள் எழுதியிருக்கின்றனர். 18ம் நூற்றாண்டில் இறுதியில் நடந்த போரில் இந்த அரண்மனை அழிவைச் சந்தித்தது. அதுவும் தொல்லியல்துறையினால் பராமரிக்கப்படுகிறது. 

போர் நடைபெற்ற இட த்திற்கு வெகு அருகிலேயே அமைந்திருக்கிறது ஸ்ரீரங்கபட்டினம் ஸ்ரீரங்கநாதர் ஆலயம். இது ஆச்சர்யமாக இருந்தது. அது மட்டுமல்ல, அந்தப் பகுதியே பரந்த வெளியைக் கொண்டு இருக்கிறது. என்னவென்ன விலையுயர்ந்த பொருட்கள் கோவிலிலிருந்து ஆங்கிலேயர்களால் கொள்ளையடிக்கப்பட்டதோ.

ஸ்ரீரங்கப் பட்டினத்தில் இந்தப் பகுதி முழுமையுமே கோட்டைக்குள் இருந்தது. அங்கு நடந்த கடைசிப் போரில், திப்பு சுல்தானின் சடலம் கிடைத்த இடம் அடையாளப்-படுத்தப்பட்டு இருக்கிறது. அதனையும் கண்டோம்.

இதெல்லாமே முக்கால் மணி நேரத்தில் பார்த்தோம். பிறகு தங்குமிடத்திற்குத் திரும்பி, காலை உணவு உண்டோம்.  அன்றைய உணவு, வெண்டைக்காய் கறி, பறங்கிக்காய் கூட்டு, குடமிளகாய் சாம்பார், மெதுவடை, அக்காரவடிசல். பிறகு தண்ணீர் பாட்டில் மாத்திரம் எடுத்துக்கொண்டு, மற்ற லக்கேஜ்களை தங்குமிடத்திலேயே வைத்துவிட்டு, பேருந்தில், அன்றைய இடங்களைப் பார்க்கச் சென்றோம். கிளம்பும்போது மணி 11 ½ ஆகிவிட்டது.

அநந்தாழ்வான் அவதாரத் தலம். 

இது, ஸ்ரீரங்கப்பட்டினத்திலிருந்து (தங்கியிருந்த இடத்திலிருந்து) 2 ½ கிமீ தூரத்தில், கிரங்கூர் என்ற இடத்தில் உள்ளது. 

இராமானுஜரின் தாய் மாமன் திருமலை நம்பி, திருப்பதியில் இருந்தார்.  இராமானுஜர், கர்நாடகாவில் இருந்தபோது, திருப்பதி கோவிலுக்கு பூ கைங்கர்யத்துக்காக ஒருவர் வேண்டும், பெருமாளுக்கு பூந்தோட்டம் அமைக்கவேண்டும் என்ற செய்தி வந்தது. அப்போது திருப்பதி, வனத்திற்குள், மலைமேல் அமைந்திருந்த கோவில். ஆட்கள் வருகை குறைவு. பாதுகாப்பும் குறைவு. இராமானுசர், தன்னுடைய கூட்டத்தில் இருந்தவர்களைப் பார்த்து (கர்நாடகாவில் அப்போதுதான் வைணவத்தைப் பரப்பிக்கொண்டிருந்தார் இராமானுஜர். அதனால் அவருடைய கூட்டத்தில் இருந்தவர்கள் கர்நாடகத்தைச் சேர்ந்தவர்கள்தாம்), உங்களில் யார், திருமலை சென்று பெருமாள் கைங்கர்யம் செய்யத் தயாராக இருக்கிறீர்கள் என்று கேட்டார். அப்போது அநந்தாழ்வான் எழுந்து, தான் செல்லத் தயாராக இருப்பதாகத் தெரிவித்தார். மலைமேல் பூந்தோட்டம் அமைத்து, பூக்களைத் தொடுத்து திருப்பதி பெருமாளுக்கு தினமும் வழங்கும் கைங்கர்யத்தை மேற்கொள்ள தைரியமாக முன்வந்த அநந்தனை, இராமானுசர், அநந்தான் பிள்ளை (அனந்தன் ஆண் பிள்ளை) என்று அழைத்தார்.  

அனந்தான் பிள்ளை, திருமலை கோவிலின் அருகில் தோட்டம் அமைத்து, அதற்கு நீர் நிலை சமைத்து பெருமாளுக்குக் கைங்கர்யம் செய்துவந்தார், அவர் உருவாக்கிய குளம்  திருமலை கோவிலின் இடது புற மூலையில் உள்ளது, அவர் உபயோகப்படுத்திய கடப்பாரை கோவிலின் நுழைவாயிலின் வலது புற கதவுப் பகுதியில் தொங்கவிடப்பட்டுள்ளது. இப்போதும் அதனைக் காணலாம்.

கிரங்கூரில் இருந்த அனந்தாழ்வானுடைய அவதாரத் தலத்துக்குச் சென்று சேவித்தோம்.

திருப்பதியில் உள்ள அனந்தாழ்வான் வசித்த இடம். இது, கோவிலிலிருந்து நடந்து செல்லும் தூரத்தில் உள்ளது (மாட வீதியின் ஒரு மூலையில்). அங்கு அவர் அமைத்த திருக்குளமும், அவருடைய பிருந்தாவனமும் உள்ளன. ஜூலை 2022ல் திருப்பதியில் (மலையில்) ஆறு நாட்கள் இருக்கவேண்டியிருந்தது. அப்போது இந்த இடங்களுக்கெல்லாம் சென்றுவந்தேன். இங்கு இப்போதும் அனந்தாழ்வான் வம்சத்தினர் வசித்து வருகிறார்கள். அவர்களுக்கு கோவிலில் தனிப்பட்ட மரியாதைகள் உண்டு.

பிறகு அங்கிருந்து புறப்பட்டு, சங்கமம் என்று அழைக்கப்படும் இடத்திற்குச் சென்றோம். இங்கு கபினி, ஹேமாவதி, சாரங்கி என்ற மூன்று ஆறுகள் சங்கமமாகின்றன. இது எல்லாமே மாண்டியா மாவட்ட த்தைச் சேர்ந்தது. மாண்டியா, கரும்பு விளைச்சலுக்குப் பெயர் போனது. சங்கமத்துக்குச் செல்லும் பாதையில்தான் திப்பு சுல்தானின் இன்னொரு அரண்மனை இருந்த இடமும், அவனுடைய தந்தை ஹைதர் அலி மற்றும் திப்புவின் சமாதிகளும் இருக்கின்றன (கூடவே ஏகப்பட்ட உறவினர்களின் சமாதிகளும்). பேருந்திலிருந்தே அதனைப் பார்த்தோம்.

திப்பு சுல்தான் இறந்த பிறகு, அவனுடைய தந்தை ஹைதர் அலி புதைக்கப்பட்ட  இடத்திலேயே புதைக்கப்பட்டான். இந்த இடம் ஸ்ரீரங்கப்பட்டினத்திலிருந்து சுமார் 4 கிமீ தூரத்தில் உள்ளது. பேருந்திலிருந்து பார்த்துக்கொண்டே சென்றோம்.  பொதுவாக ஆன்மீக யாத்திரையில் இந்த மாதிரி இடங்களுக்குச் செல்வதில்லை. (தாஜ்மஹாலுக்கே, பார்க்கப் போகிறவர்கள் மாத்திரம் போய்விட்டு வாங்க, ஆனால் வந்த பிறகு குளித்துவிட்டு உடைகளை மாற்றிக்கொள்ளணும் என்பார் யாத்திரை நடத்துபவர்)

இங்கு டூரிஸ்டுகள் வருகை உண்டு என்பதால், கடைகளும் உண்டு. நிறைய இளநீர் கடைகளும் (30 ரூபாய்), கரும்புச் சாறு கடைகளும், மற்ற கடைகளும் உண்டு. கர்நாடகாவில் கரும்புச் சாறு கடைகளே ரொம்பவும் சுத்தமாக இருக்கும். சிறிய இயந்திரம், அதில் கரும்பைச் செலுத்தினால் சாறு வெளியே வரும். (நம்ம ஊர் மாதிரி ஒரு பக்கம் கரும்பைக் கொடுத்து, அடுத்த பக்கம் இழுத்து…சக்கைகளெல்லாம் அருகிலேயே கிடக்க, ஈ மொய்த்துக்கொண்டு…என்றெல்லாம் இருக்காது). 20 ரூபாய்தான்.  பயண அலைச்சல் இருக்கும் என்பதால் இளநீர் குடித்தேன். மதியம் 1 மணி வெயிலுக்கு இதமாக இருந்தது.

இங்கிருந்து 2 மணி வாக்கில் கிளம்பி, 40 நிமிடப் பேருந்துப் பயணத்திற்குப் பிறகு மைசூர் அரண்மனைக்கு வந்து சேர்ந்தோம்.  மைசூர் அரண்மனை பற்றி அடுத்த வாரம் காணலாம்.

(தொடரும்) 

= = = = =