நான் தரிசனம் செய்த கோவில்கள்: நெல்லைத்தமிழன் : வைரமுடி யாத்திரை 05

 

வைரமுடி யாத்திரை – மைசூர் அரண்மனை – பகுதி 5

அரண்மனையிலேயே இன்னும் பார்க்கவேண்டிய பகுதிகள் பலவும் இருக்கின்றன. பிரம்மாண்டமான மண்டபங்கள், தூண்கள், சிற்பங்கள் என ஏகப்பட்டவை இருக்கின்றன. தொடர்ந்து பார்ப்போம்.

மிகப் பெரும் பள பளா தூண்கள் மற்றும் பழைய மின்விசிறி

அலங்காரக் கதவு கொண்ட அறை. அதில் பிளாஸ்டர் ஆஃப் பாரிஸில் செய்த கிருஷ்ணராஜ உடையாரின் சிலை. இவர்தான் இந்த அரண்மனையைத் தான் பதவி ஏற்றுக்கொண்ட 1884க்குப் பிறகு கட்டியவர். (உங்களுக்குத் தெரியுமா? மெழுகுச் சிலையில் என்னதான் முயற்சி எடுத்துக்கொண்டு பிரபலங்களின் உருவங்களை வடிவமைத்தாலும், ஒரு சிலவற்றைத் தவிர மற்றவை அந்தப் பிரபலங்களை முற்றிலுமாகப் பிரதிபலிப்பதாக எனக்குத் தோன்றியதில்லை. அதிலும் நம் நாட்டைச் சேர்ந்தவர்களின் உருவங்களில் சில பொம்மை ரேஞ்சுக்குத்தான் இருக்கும். அதே நேரத்தில் வெளிநாட்டு பிரபலங்களின் சிலைகள் அப்படியே இருப்பதாக நமக்குத் தோன்றும். மேடம் டுஸ்ஸாட் மெழுகு மியூசியங்களை நான் பார்த்தபோது இப்படி எனக்குத் தோன்றியது. அங்கு எடுத்த படங்களை இன்னொரு பதிவில் பகிர்கிறேன்)

இவ்வளவு தூண்கள் இருக்கிறதே… எதிரிகள் யாரேனும் தூணின் பின்னால் மறைந்து நின்று தாக்க வந்தால்? இப்படிப்பட்ட ஹாலில் நடப்பதே அச்சம் தரக்கூடியதாக எனக்குத் தோன்றியது.

உங்களில் எத்தனை பேருக்கு இத்தகைய அரண்மனையில் வசிக்கவேண்டும் என்று ஆசை வருகிறது? அரண்மனைகளின் பிரம்மாண்டத்தைப் பார்த்தால் எனக்கு அதன் அழகு பிரமிப்பாக இருக்கும். ஆனால் அங்கு வசிப்பது என்பதை நினைத்துக்கூடப் பார்க்கமுடியாது. (நீங்கள் ரா.கி.ரங்கராஜன் எழுதியா “நான் கிருஷ்ணதேவராயன்” என்ற நாவலைப் படித்திருக்கிறீர்களா? இளவரசனை அரண்மனையின் ஒரு இடத்திலிருந்து இன்னொரு இடத்திற்கு இதற்கெனப் பணியில் இருக்கும் சேடிப்பெண்கள் முதுகில் தூக்கிச் செல்வார்களாம். அரண்மனை வளாகங்கள் அவ்வளவு பெரியனவாக இருக்குமாம். போருக்குச் செல்லவேண்டிய இளவரசனுக்கு நடப்பதற்கு முடியாதா என்று சிலரும், சேடிப்பெண்கள் வயது என்னவாக இருந்திருக்கும் என்று சிலரும் யோசிக்கிறீர்கள் அல்லவா?)

( தொடரும்) 

========