ரவாலாடு :: K G கௌதமன் ரெஸிபி(!)

 

அது ஒரு பிரபல மென்பொருள் நிறுவனம். 

இடம் சென்னை. 

அடுக்கு மாடி அலுவலகம். கட்டிடத்தின் பல தளங்களில் பல்வேறு பிரிவுகளுடன், ஆயிரக்கணக்கானவர்கள் வேலை செய்து வரும் ஒரு நிறுவனம். 

இந்தக் கதையில் இடம் பெறுவது முக்கியமாக இரண்டு தளங்களை சேர்ந்த 4 யுவதிகள் ஒரு ஜொள்ளர் மற்றும் ஒரு யுவன். அவ்வளவுதான். 

அந்த அலுவலகத்தில் வம்படிக்கும் எல்லா ஆண்களுக்கும் தெரிந்திருந்த, அடிக்கடி சொல்லப்படும்  ஒரு வார்த்தை, 'ரவாலாடு' 

" இன்றைக்கு ரவாலாடு வந்தாச்சா? " 

" வா ஏன் சோகமா இருக்கு? " 

" ஆயிரம் சொல்லு - ஆனால் லா தான் எல்லாவற்றிலும் கியூட். ஸ்மார்ட் டிரஸ், குட் ஹியூமர், ஸ்டிரைகிங் ப்யூடி .. " 

இப்போ அநேகமாக யூகித்திருப்பீர்கள் ரவாலாடு என்பது ஒரு சங்கேத பாஷை என்று. 

ஆம்! 

ர : ரம்யா. விரைவில் திருமணம் ஆகப்போகின்ற பெண். அமெரிக்க மாப்பிள்ளை கூடிய விரைவில் வந்து கல்யாணம் செய்து கொள்வதாக நிச்சயம் செய்யப்பட்டதாக *டும்மி நியூஸ். 

வா : வாஸந்தி. கொஞ்சம் முசுடு. எந்த நேரத்தில் சிரிப்பார், எந்த நேரத்தில் கடிப்பார் என்று யாராலும் சொல்ல முடியாது! அவருக்கே தெரிந்திருக்காது! 

லா : லாவண்யா. இவரின் பெற்றோருக்கு என்ன தீர்க்கதரிசனம்! பெயருக்கேற்ற பேரழகி. Lavanya means “grace”, “beauty”, “loveliness” and “prettiness” (from Sanskrit “lāvaṇya/लावण्य”).

* டு : டும்மி ! - அம்மா அப்பா வைத்த பெயர் மோகனா. ஆனால் எதனாலோ வீட்டிலும், நண்பிகள் நடுவிலும் அவர் 'டும்மி' ஆனார்! அறுபது கிலோ சரீரம்; அலுவலகத்தில் ஆண்கள், பெண்கள் என எல்லோருடனும் சகஜமாக பேசுவார். பழகுவார். அலுவலகத்தில் யாரைப் பற்றி விவரம் கேட்டாலும் இவர் சொல்லுவார். சில விஷயங்கள் கேட்காமலேயே சொல்லுவார். ' வாசந்தி மணக்கப்போகும் அமெரிக்கா ரிட்டர்ன் பையன்', 'அட்மின்  செக்ஷன் அபிராமி' ஸ்ரீமந்தம், 'மூன்றாவது ஃபுளோர் சந்திரன், லாவண்யாவிடம் வம்பு செய்து வகையாக வசவு வாங்கியது' எல்லாமே DNS- Dummi News Service !! 

யுவன் : பெயர் கண்ணன். 25 வயது. இவருக்கு லாவண்யா மீது ஒரு கண் என்னும் செய்தி இவருக்கு மட்டும்தான் தெரியும். டும்மி உட்பட வேறு யாருக்கும் தெரியாது. 

ஜொள்ளர் யார்? அவர் பெயர்  : J. வெங்கடராமன் - சுருக்கமாக JV. வயது 50. ஏனோ இன்னும் திருமணம் செய்துகொள்ளவில்லை / அல்லது ஆகவில்லை. கல்லூரி நாட்களில் காதலித்து அது தோல்வியில் முடிந்தது என்று டும்மி நியூஸ். யாருக்கும் உண்மை தெரியாது. JVதான் கண்ணன், லாவண்யா, டும்மி மூவரும் பணி புரியும் செக்ஷன் மேலாளர். லாவண்யாவிடம்  அடிக்கடி ஏதாவது  (- செக்ஷனில் உள்ள மற்றவர்கள் ஜாடை மாடையாக JV (ஜொள்ளு விட) ஆரம்பிச்சுட்டார்யா என்று சொல்லும் அளவுக்கு) பேசுவார். அவருக்கு கண்ணன் மீது சற்றுப் பொறாமை உண்டு. லாவண்யா கண்ணனை லவ் செய்கிறாளோ என்றும் அவருக்கு ஒரு சந்தேகம். அதனால் வாய்ப்புக் கிடைக்கும்போதெல்லாம் கண்ணனிடம், லாவண்யா தன்னிடம் மிகவும் அன்பாக நடந்துகொள்கிறாள் என்றும், தான் சொல்லும் வார்த்தைகளுக்கு பெரும் மதிப்பு கொடுக்கிறாள் என்றும் சொல்லிக்கொண்டு இருப்பார். அதில் அவருக்கு ஒரு திருப்தி. 

சரி. இப்போ கதைக்குச் செல்வோம். 

= = = = = = = =

நிறுவனத்தின் vice president வைத்யநாதனின் பெண்ணுக்குத் திருமணம். வெகு விமரிசையாக நடத்த திட்டமிட்டார் வைத்தீஸ் ( அப்படித்தான் நிறுவனத்தில் எல்லோரும் அவரை அழைப்பார்கள்!). அலுவலகத்தில் உள்ள எல்லோருக்கும் கல்யாண இன்விடேஷன் கொடுத்து எல்லோரும் வரவேண்டும் என்று சொல்லியிருந்தார். 

கல்யாண ரிசப்ஷன், டின்னர் இரண்டுக்கும் அலுவலக ஆட்கள் எல்லோரும் வந்திருந்தனர். மணமக்களை மேடையில் சென்று வாழ்த்தி, பரிசுப் பொருட்களைக் கொடுத்து, கை குலுக்கி, போட்டோ + வீடியோவுக்கு நின்று போஸ் கொடுத்து வந்தனர். 

அங்கேயும் ரவாலாடு நால்வரும் இணைந்தே எல்லாவற்றிலும் பங்கேற்றனர். ஆண்கள் பெண்கள் எல்லோருமே இந்த நால்வரை மட்டுமே focus செய்துகொண்டு இருந்தனர். 

எல்லோரும் டின்னர் சாப்பிட புறப்பட்டனர். ரவாலாடு நால்வரும் புறப்பட்டவுடன் அலுவலக நண்பர்கள் எல்லோருமே ஒரே அணியாக அவர்கள் பின்னே கிளம்பினார்கள். எல்லோருக்குமே ரவாலாடு அருகே இடம் பிடிக்க ஒரு ஆர்வம். 

டின்னர் ஹாலில் மொத்தம் எட்டு வரிசைகள். ஒவ்வொரு வரிசையிலும் ஐம்பது பேர் அமர்ந்து சாப்பிட வசதி. ரவாலாடு உள்ளே நுழைந்ததுமே பெண்கள் வரிசையில் அமர்ந்திருந்த ஒரு தோழி, " யேய் டும்மி - நாலு பேரும் இங்கே வாங்க - உங்களுக்காக நாலு சீட் இங்கே ரிசர்வ் செய்து வைத்துள்ளேன் என்று டும்மியை அழைக்க - ரவாலாடு அங்கே சென்று காலியாக இருந்த நான்கு இடங்களில் உட்கார்ந்துகொண்டனர். 

நால்வரையும் பின் தொடர்ந்து வந்த ஆண்களில் கண்ணனுக்கு மட்டுமே ரவாலாடுக்கு பின்னால் உட்கார இடம் கிடைத்தது - ஆனால் அவர்களின் பின் வரிசை என்பதால், அந்த வரிசைக்கு நேர்  எதிர் திசை பார்த்த வரிசை இவனுடைய வரிசை. அவர்கள் பேசுவது எல்லாம் இவனுக்குக் கேட்கும் வகையில், குறிப்பாக லாவண்யாவிற்குப் பின் பக்கமாக உட்கார்ந்தான் கண்ணன். 

JV  - ஆசையாக ரவாலாடு அருகே அமர்ந்து பேசலாம் என்று வந்தார். ஆனால் அவர்  கை கழுவிக்கொண்டு சாப்பிட வருவதற்குள் மூன்று நான்கு வரிசைகள் நிரம்பி நான்காவது வரிசையின் மறு கோடியில்தான் அவருக்கு இடம் கிடைத்தது. 

அந்த நான்காவது வரிசை மறுகோடியிலிருந்து அவர் கண்ணனுக்கு அலைபேசியில் அழைப்பு விடுத்தார். " கண்ணன் - நீ ரொம்ப லக்கி. ரவாலாடுக்கு அருகிலேயே இடம் பிடித்துவிட்டாய். டின்னர் சாப்பிட்டு முடிக்கும் சமயத்தில் நான் லாவண்யாவுக்கு ஃபோன் செய்து பேசுவேன். அப்போ அவள் எப்படி என்னிடம் குழைந்து குழைந்து பேசுகிறாள் என்று பார்" என்று சொன்னார். 

" சரி சார்" என்றான் கண்ணன். மனதுக்குள் 'ஜொள்ளு கிழவன்' என்று சொல்லிக்கொண்டான். 

* * * * 

ரவாலாடு நால்வருக்குமிடையில் நடந்த உரையாடல்களை கவனித்தவாறு கண்ணன் சாப்பிட்டுக்கொண்டிருந்தான்.

டின்னர் முடிகின்ற  சமயம். பைன்ஆப்பிள் ரசம் சாதம் முடிந்து, இலையில் போடப்பட்ட ஸ்வீட் ரவாலாடு! 

அந்த நேரத்தில், லாவண்யாவின் கைப்பேசி ஒலித்தது. 

கைப்பேசி திரையில் ' K K calling ' என்று காணப்பட்டதை லாவண்யா பக்கத்தில் அமர்ந்திருந்த டும்மி முதலில் பார்த்தாள். 

" யேய் லாவ்ஸ் - யாருடி கே கே ? "

" கே கே என்றால் கள்ளக் காதலன்" என்று சொன்னாள் வாஸந்தி. 

" இல்லை, இல்லை. கே கே என்றால் கவர்ச்சிக் கண்ணன் " என்றாள் ரம்யா. 

" சும்மா இரு டும்மி - அப்புறம் சொல்றேன் " என்று சொல்லியவாறு போனை எடுத்தாள் லாவண்யா. 

" ஹலோ சொல்லுங்க " 

( "லாவண்யா - இன்றைய டின்னர் பார்ட்டி ஹைலைட்டே ரவாலாடுதான் - சூப்பர் ஸ்வீட்" )

" அப்படியா! - நான் இன்னும் டேஸ்ட் பண்ணலை " 

( " மிஸ் பண்ணிடாதே. வெரி நைஸ் அண்ட் சோ ஸ்வீட் - ஜஸ்ட் லைக் யு" )

" ஓ ! இஸ் இட் ? தாங்க் யூ " 

( " டின்னர் முடிஞ்ச உடனே - உன்னுடைய வீட்டுக்கு என்னுடைய காரிலேயே கொண்டுபோய் விடுகிறேன். சரியா ?") 

" உங்களுக்கு ஏன் வீண் சிரமம் ? நாங்க நாலு பேரும் ஒரு டாக்ஸி புக் செய்துகொண்டு ஒன்றாக வந்திருக்கோம். அதிலேயே திரும்பிச் சென்றுவிடுவோம். " 

( " ஏம்மா - நீ எப்போ கல்யாண சாப்பாடு போடப்போறே ? ") 

" எதுவும்  உங்களுக்குத் தெரியாம போடமாட்டேன். நிச்சயம் நீங்க எல்லோரும் வரவேண்டும்." 

தொடர்ந்து கொஞ்ச நேரம் மறுமுனையின் அசட்டு வார்த்தைகளுக்கும் கேள்விகளுக்கும் லாவண்யா, பணிவாக, அடிக்கடி மெல்லியதாகச் சிரித்து பதில்கள் கூறினாள். 

அவள் பேசி முடிக்கும் முன்பு  ரம்யாவும் வாஸந்தியும் எழுந்து கை கழுவ சென்றிருந்தார்கள். 

டும்மி மட்டும் லாவண்யாவை விடுவதாக இல்லை. 

" கே கே யாருடி? " 

லா : " நம்ம ஆபீஸ் - நம்ம செக்ஷன் ஆள்தாண்டி " 

" நம்ம செக்ஷன்ல கே கே என்று யாருமே இல்லையே! " 

" நம்ம மானேஜர்தான்பா " 

" அவரு பேரு JV தானே - நீ ஏன் கே கே என்று பேரு போட்டு வெச்சிருக்கே ? "

லாவண்யா இதுக்கு என்ன பதில் சொல்லப்போகிறாள் என்று கண்ணன் தன் காதுகளைத் தீட்டிக்கொண்டு கவனமாகக் கேட்டான். 

" கே கே என்றால் 'கிழக் கோட்டான்' " 

டும்மி அடக்கமுடியாமல் பெரிதாகச் சிரித்தாள். 

கண்ணனும் சத்தம் இல்லாமல்  சிரித்தான். 

லாவண்யா கை கழுவச் சென்றபோது, அவளுடைய போனுக்கு கால் செய்து, 'தனக்கு  எந்த பட்டப் பெயர் வைத்து இருக்கிறாள்?' என்று டும்மியிடம்  கேட்டுத் தெரிந்துகொள்ளலாமா? என்று ஒரு நொடி யோசித்து, வேண்டாம் என்று முடிவு செய்தான் கண்ணன். 

= = = = = =