மற்றவர்கள் பதில் சொல்லமுடியாத, kgg மட்டுமே பதில் சொல்லக்கூடிய கேள்விகள் உண்டா?

 

கே. சக்ரபாணி  : சென்னை 28: 

நான் ஒரு  காபி  பிரியர். வீட்டில்  குறைந்தது  ஒரு நாளைக்கு  நான்கு தடவை குடிப்பேன். கிச்சனுக்குபோயி  திருட்டு காபி ஒரு தடவை  குடிப்பேன்.  எங்கேனும்  வெளியே சென்றால்  காபி குடிக்காமல்  வரமாட்டேன் . தாங்கள்  எப்படி? 

# நான் காஃபியே குடிப்பதில்லை.  தினசரி‌ 2 டீ மட்டுமே.

& முன்பு காபி குடிக்காமல் இருந்து வந்தேன். காபி குடிப்பதை நிறுத்துவதில் எனக்கு அனுபவம் அதிகம். இதுவரை வாழ்க்கையில் காபி குடிப்பதை ஐந்து முறை நிறுத்தியிருக்கிறேன் என்றால் பார்த்துக்கொள்ளுங்கள். 

நிறுத்தி வைத்த காபி பழக்கம் திரும்ப எப்படி ஏற்படுகிறது என்றால், தங்கள் பொருட்களை விளம்பரம் செய்ய continental coffee என்று ஒரு பிராண்ட் அடிக்கடி இலவச பாக்கெட் கொடுத்துவிடுகிறார்கள். அதை வீண் செய்ய மனம் இல்லாமல் காபி பழக்கம் திரும்ப ஆரம்பிக்க வேண்டியதாகிறது. 

இன்னும் சில சமயங்களில் வீட்டில் வேலை செய்பவர்கள் கேட்பதால், காபி பொடி அல்லது காபி டிகாக்ஷன் ( V S Mani - என்று ஒரு பிராண்ட் - நல்லா இருக்கு!) வாங்கி, குறிப்பிட்ட நாளுக்குள் சாப்பிட்டு முடிக்க ( expiry date கடக்காமல் இருக்க ) நானும் சாப்பிட வேண்டியதாகிறது. 

ஆ - சொல்ல வந்ததை விட்டுவிட்டேனே - 

இப்போதைக்கு நான், "ஒரு காபி" பிரியர். அதாவது - காலை சிற்றுண்டிக்குப் பின் ஒரே ஒரு காபி. அதுவும் அதிக பட்சம் 40 மி லி மட்டுமே. அதற்குப் பின் காபி குடிப்பதில்லை. 

2) குழந்தையை  கொஞ்ச கன்னத்தை கிள்ளுகிறோம்.  அன்பை காண்பிக்க கன்னத்தில்  முத்தமிடுகிறோம் . ஆனால்  கோபம். வந்தால்  அதே  கன்னத்தில்தான்  அறைகிறோம். ஏன் அப்படி?  

#  கன்னத்தில் ஸ்பரிசம் பின்னமாகாமல் மூளைக்கு அனுப்பப்படுவது காரணமாக இருக்கலாம்.

& இப்படிக் குழப்பம் வராமல் இருப்பதற்காக நாம் வேண்டுமானால் நடைமுறையை கொஞ்சம் மாற்றிக் கொள்வோம் - கொஞ்சுவதற்கு காதை லேசாகத் திருகலாம்; அன்பைக் காட்ட மூக்கை நிமிண்டலாம்; கோபம் வந்தால், முதுகில் ஒரு சாத்து சாத்தலாம் - ஆனால் எல்லாவற்றிற்கும் குழந்தை அப்படியே எதிர்வினை ஆற்றினால் என்ன ஆகும்! 

தாய்க்குப்பின்  தாரம்  என்பதுபோல் தந்தைக்குப்பின் யார் என்று   கூறவில்லையே

# அந்தக் காலத்தில்  " தம்பியுடையான் படைக்கு அஞ்சான் " என்று சொல்வார்கள். எனவே உடன்பிறந்தோர்கள் தந்தைக்குப் பின் நமக்கு உதவி செய்வார்கள் ஆதரவு தருவார்கள் என்று பார்க்கலாம்.  உடன் பிறந்தோரை விட்டால் நெருக்கமான நண்பர்கள் உதவி செய்வார்கள் என்பது நமது எதிர்பார்ப்பு. 

& " தாய்க்குப்பின் தாரம் " என்பது கல்யாணம் செய்துகொண்ட ஆணுக்கு சொல்லப்பட்டது. தாயைப் போல தாரம் உடனிருந்து கவனித்துக்கொள்வார் - என்பதற்கு. நாம் வேண்டுமானால் தந்தைக்குப் பின் மாமனார் என்று வைத்துக்கொள்வோம் !

பெண்கள்  ஆண்களைவிட அதிகமாக பேசுகிறார்களே  அது. ஏன்? 

# ஆண்களை விட, பெண்களை விட என்பதைக் காட்டிலும்,  அதிகம் பேசுவோர் -  அதிகம் பேசாதோர் என்று மக்களை  வகைப்படுத்துவதே நியாயமாக இருக்கும்.

& ஒருவர், தன் மனைவியிடம் ஒரு பத்திரிக்கைத் துணுக்கை படித்துக் காட்டினார். அது, ' கணவன் சராசரியாக மனையிடம் ஒரு நாளில் 2500  வார்த்தைகளும், மனைவி ஒரு நாளில் சராசரியாக கணவனிடம் 5000 வார்த்தைகளும் பேசுகிறார்கள்' என்பது. 

அத்தோடு விட்டிருக்கக் கூடாதா அவர் ? 

மனைவியிடம் : " இது பற்றி நீ என்ன சொல்ல விரும்புகிறாய் ?" (6 வார்த்தைகள்) 

மனைவி " ஏன் என்றால், ஆண்கள் எதையும் ஒருமுறை சொன்னால்  புரிந்துகொள்ள மாட்டார்கள் - எல்லாவற்றையும் இரண்டுமுறை சொன்னால்தான் புரிந்துகொள்வார்கள் " (12 வார்த்தைகள்!) 

ஜெயகுமார் சந்திரசேகரன்: 

google க்கும் meta ai க்கும் என்ன வித்தியாசம்? இரண்டும் கேள்விகளுக்கு பதில், சந்தேகங்களுக்கு விடை தருபவைதானே? 

# கூகுள் இருப்பதை தேடி எடுக்கிறது. மற்றையது உண்டாக்குகிறது.

& கூகிள் - நண்பன் போல - எதை வேண்டுமானாலும் கேட்கலாம். விடை கிடைக்கும். 

Meta AI - பள்ளி ஆசிரியர் போல. - அனுஷ்கா, தமன்னா பற்றி எல்லாம் கேள்வி கேட்டால் பதில் சொல்லாது. பெஞ்சு மேல ஏறு என்று சொல்லாமல் சொல்லும். 

மற்றவர்கள் பதில் சொல்லமுடியாத, kgg மட்டுமே பதில் சொல்லக்கூடிய கேள்விகள் உண்டா? உண்டு எனில் யாது?

# இந்தக் கேள்விதான்.

& உண்டு, அது "kggயின் ஆதார் நம்பர் என்ன ?" 

= = = = = = = = =

KGG பக்கம் : 

புரசவாக்கம் - மதார்ஷா பக்கத்தில் இருந்த சலூன் - முதல் விஜயம் பற்றி .. 

சென்னையில் இந்த மாதிரி பயந்த முகத்துடன்(!) உள்ள சிறுவனை(!) அந்த சலூன் கடைக்காரர் அதுவரை பார்த்திருக்கமாட்டார். 

போலியான பணிவுடன் ஒரு காலி இருக்கையில் ஏறி அமரச் சொன்னார். 

ஒரு பச்சைத் துணி கொண்டு எனக்குப் பொன்னாடை போர்த்தினார். 

எஸ் பி சம்முவம் கடையில் இருந்ததுபோல சுற்றிலும் அரசியல் தலைவர்கள் படமோ அல்லது (ஆபாச) பிரெஞ்ச் அழகி படமோ இல்லை. 

அதற்கு பதில், புரியாத / தெரியாத பிக்காசோ ஓவியங்கள் போல சில கண்ணாடி ஓவியங்கள். 

முடி திருத்துபவர் என்னிடம், " சிக்கடிங்கா ?" என்று கேட்டதுபோல இருந்தது. ஒன்றும் சொல்லாமல் லேசாகப் புன்னகை செய்து வைத்தேன். 

அவர் மீண்டும், " சிக்கடிங்கா ?"

' ஆ கடவுளே ! இது என்ன சோதனை! இவர் என்ன பாஷை பேசுகிறார்? ' என்னிடம் ஏதோ பதில் எதிரபார்க்கிறார் போலிருக்கே! 

சற்றுக் குழப்பத்துடன் அவரைப் பார்த்தேன். 

அவர் அதற்குள் என்னை 'ஊமை அல்லது தமிழ் தெரியாதவர்' என்று நினைத்துவிட்டார் போலிருக்கு. 

அதனால் அவர் தன்னுடைய உபகரணங்கள் வைக்கும் மேஜை டிராயரைத் திறந்து, ஒரு கத்தரிக்கோல் மற்றும் முடி வெட்டும் மெஷின் இரண்டையும் வெளியில் எடுத்துக்  காட்டி, " இந்த இரண்டு சின்னங்களில் எதற்கு உன் ஓட்டு ?" என்று சைகையில் கேட்டார். 

அப்போதுதான் எனக்குள்  " சிக்கடிங்கா ?" என்றால் 'சிசர் கட்டிங்கா' என்று பல்பு  எரிந்தது! நான்தான் சொன்னேனே - சென்னைவாசிகள் வேகமாக தமிழ் பேசுவார்கள் என்று. அதில் ஒன்றுதான் இந்த " சி(சர்)க்க(ட்)டிங்கா !"

சந்தோஷமாக கத்தரிக்கோலுக்கு ஓட்டுப் போட்டேன். அவர் கத்தரியும் சீப்புமாக வேலையைத் தொடங்கினார். 

அப்பொழுது என்னுடைய மனதில் ஒரு ஃபிளாஷ் பேக் .. 

******* 

டார்டாய்ஸ் சுழல்கிறது .. .. 

நாகையில் மூன்றாம் வகுப்புப் படித்துக்கொண்டிருந்த சமயம் .. 

முடி திருத்துபவர் ஒருவர் ஞாயிற்றுக் கிழமைகளில் தன் பெட்டியோடு வீதியில் வருவார். எங்கள் மூன்று குடித்தன வீட்டுக்கு அவர் வரும்போது நிச்சயமாக சிறியவர், பெரியவர்கள்  என்று குறைந்தபட்சம் ஐந்து பேருக்காவது முடி திருத்துவார். 

நடுக்குடித்தனக்காரர் (ஓய்வு பெற்ற) ஆசிரியர் பாலசுப்ரமணியன் - அவருடைய கடைசி பையன் - (நான்காம் வகுப்புப் படித்துக்கொண்டிருந்த) நாராயணனைக் கூப்பிட்டு, முடி திருத்துபவரிடம் ஒரு கேள்வி கேட்கச் சொல்லுவார். 

" மெஷின் இருக்கா ? "

'இருக்கு' என்று பதில் சொன்னால்தான் - அவரிடம் கட்டிங் செய்துகொள்வார்கள்! 

(யோசனைகளில் இப்படி நான் ஆழ்ந்திருக்கும்போது என்னுடைய தலையை - சற்று லேசாகப்பிடித்து வேண்டிய திசையில் / கோணத்தில் திருப்பினார் சென்னை  முடிதிருத்துபவர்.) 

டார்டாய்ஸ் நின்று, பிறகு சுழல்கிறது! 

வாசலில் வருகின்ற முடிதிருத்துபவரிடம் மாட்டிக்கொண்ட சில சமயங்களில், அதுமாதிரி யோசனையில் நான் ஆழ்ந்தால் - அந்த பெரிய சிவந்த கண்கள், வெற்றிலைப்பாக்கு வாய் கொண்ட - நாட்டுச் சரக்கு குடித்த முடிதிருத்துபவர் - என் தலையை அமுக்கிப் பிடித்து என் முகத்துக்கு அருகே அவர் முகத்தை வைத்து, நாக்கைத் துருத்தி, சிவந்த கண்களை என்னை நோக்கி முழித்துப் பார்த்து 'தலையை ஆட்டக்கூடாது ' என்பார். 

பயத்தில் அடங்கி ஒடுங்கி உட்கார்ந்திருப்பேன். 

கடைசி நடவடிக்கையாக அவருடைய மொன்னக் கத்தியைத் தீட்டிக்  கொண்டு என்னுடைய பின் கழுத்தில் 'சர்ர் ரக்' என்று ஒரு இழு இழுப்பார் பாருங்கள் - என்னுடைய உடம்பில் உள்ள ரோமங்கள் எல்லாமே 'வந்ததுடா ஆபத்து' என்று சிலிர்த்து நிற்கும்! 

அதோடு விடுவாரா - உடனே என் காதருகில்  வந்து, " கூசுதா? " என்று கேட்பார் - சற்றும் எதிர்பார்க்காத இந்த கேள்வியாலும், அவருடைய வாயிலிருந்து வந்த வெற்றிலைப் பாக்கு மற்றும் நாட்டுச் சரக்கு வாடையாலும் என் தலை சுற்றும்! 

ஃபிளாஷ் பேக் ஓவர். டார்டாய்ஸ் சுருள் நின்றுவிட்டது. 

******* 

சென்னை முடிதிருத்துபவர் கத்தரிக்கோல் & கத்திக்கு ஓய்வு கொடுத்து, மெஷினைக் கையில் எடுத்தார். 

அப்போதுதான் எனக்கு முக்கியமான விஷயம் ஒன்று ஞாபகத்திற்கு வந்தது! 

அது என்ன? 

(தொடரும்) 

= = = = = = = = =