தேவன், சாவி, பாக்கியம் ராமசாமி, சுஜாதா யாருடைய நகைச்சுவையை அதிகம் ரசிப்பீர்கள்?

 

நெல்லைத்தமிழன்: 

பெண்கள் ஆறு போன்ற மிகுந்த எழுச்சியும் தீரமும் நிரம்பப்பெற்றவர்கள் என்பதால் அவர்களுக்கு பலமான கரை அல்லது பாதுகாப்பு தேவைப்படுகிறது, ஆண்கள் அதிலிருந்து கிளைத்துவரும் வாய்க்கால் போன்றவர்கள் என்பதால் கட்டுப்பாடு தேவையில்லை என்று சமீபத்தில் படித்தேன். பொதுவாகவே இந்த உலகம் 'ஆண்களே உயர்ந்தவர்கள்' என்ற எண்ணமுடையவர்களைக் கொண்டதால் இப்படியெல்லாம் சித்தரித்து பெண்களை அடக்கியே வந்திருக்கிறார்களோ?   

# வீட்டுக்குள் பெண்தான் தலைவி.  கல்யாண மார்க்கெட்டில் இப்போது பெண் வைத்ததுதான் சட்டம்.  இந்த இரண்டு தவிர வேறு எல்லா தளங்களிலும் ஆணாதிக்கம்தான்.  விலங்குகள் கூட விலக்கல்ல.‌  ஆண்-பெண் சமத்துவம் என்பது ஒரு மாயக் கனவு என்பதே நடப்பு.‌ இதற்கான காரணங்கள் மிகச் சிக்கலான பல.‌

குளிர்சாதனப் பெட்டி மற்றும் பல்வேறு இயற்கைக்கு மாறான கெமிக்கல் வசதிகளெல்லாம் இருப்பதனால்தான் நாம் 'புதியதாக' உள்ளதைச் சாப்பிடும் வாய்ப்பு குறைந்துகொண்டே வருகிறதோ? நம் முன்னோர்கள், ஓரளவு புதிய பழங்கள், காய்கறிகள் சாப்பிட்டனர், நாமோ மிகவும் பழையதான ஆனால் புதியதுபோலக் காட்சியகப்படுத்தப்பட்ட பழங்கள் காய்கறிகளை உண்ண நேர்கிறதோ?  

# விரயம் வேண்டாம் என குளிர் சாதனப் பெட்டியை நாடுபவர்கள் அடுத்த நாளே சேமித்ததை வெளியே எறிவார்கள்.  மாறாக ஏன் சற்றுக் குறைவாக சமைக்கக் கூடாது என்பது புரியாத புதிர்.‌

மார்க்கெட்டில் நான் கிலோ 30 ரூபாய்க்கு வாங்குவது என் வீட்டருகே இருக்கும் கடைகளில் 40-50 ரூபாயாக ஆகிவிடுகிறது. போக்குவரத்துக்கான செலவு என்று ஒத்துக்கொண்டாலும், அப்போ பல வாரங்கள்/மாதங்கள் கஷ்டப்பட்டு விளைவிப்பவனுக்கு 10 சதம் கூடப் போய்ச்சேருவதில்லை என்பது ஜீரணிக்கக்கூடியதாகவா இருக்கிறது?   

# லாபத்தில் பெரும் பங்கு விளைவித்தவருக்குத்தான் சேரவேண்டும்.‌ எளிதில் பாழாகும் பொருள்கள் என்பதால் இப்படி அவர்களை நடு ஆட்கள் வஞ்சித்து லாபத்தை அள்ளிக் கொண்டு போகிறார்கள்.  மிகப் பெரிய அளவில்  கூட்டுறவு முயற்சிகளை யாரோ ஒருவர் முன்னெடுத்துச் செய்யாதவரை இந்த அவலம் இப்படியேதான் இருக்கும்.‌

தியேட்டர்களில் திரைப்படம் பார்க்கும்போது 500-1000 ரூபாய் பத்துபைசா பெறாத பாப்கார்னுக்குச் செலவழிக்க மனம் உள்ளவர்கள், கோயிலுக்குச் செல்லும்போது 10 ரூபாய் தட்டில் போட ஏன் இவ்வளவு தயங்குகிறார்கள்?

# தனக்கென்றால் கணக்குப் பார்க்காதது நம் ரத்தத்தில் ஊறிவிட்ட சுபாவம். தெரு வியாபாரிகள் விலையைக்குறைக்க இயலாமையைச் சொல்லும் போது வெளிப்படும் பரிதாபக் குரலை கவனித்திருக்கிறீர்களா ?

பானுமதி வெங்கடேஸ்வரன்: 

தேவன், சாவி, பாக்கியம் ராமசாமி,  சுஜாதா யாருடைய நகைச்சுவையை அதிகம் ரசிப்பீர்கள்?

# சாவி, பாக்கியம் ராமசாமி, சுஜாதா, தேவன் என்பது என் வரிசை.

& என்னுடைய வரிசை : பாக்கியம் ராமசாமி, தேவன், சாவி, சுஜாதா. 

கோவிலில் நெரிசல், சினிமா தியேட்டரில் தள்ளு முள்ளு, கோவில் உண்டியலில் இத்தனை ரூபாய் வசூல், டாஸ்மாக்கில் இத்தனை ரூபாய் வருமானம் போன்ற செய்திகளை வாசிக்கும் பொழுது என்ன நினைத்துக் கொள்வீர்கள்?

# நல்லதுக்கும் கெட்டதுக்கும் பெரிய அளவில் ஆர்வம் காட்டும்  மக்களை நினைத்து வியப்படைவேன்.

அநியாய விலை கொடுத்து , ஒரு மிகச் சாதாரணமான சினிமாவைப் பார்க்க ஒரு பெருங்கூட்டம் கூடுகிறது என்பதைப்  பார்க்கும் போது வெகுஜன மதிப்பீடுகளுக்கான அடிப்படை என்னவாக இருக்கும் என்று யோசிக்க வைக்கிறது.

வடை, பஜ்ஜி, போண்டா இந்த  மூன்றில் காபி அல்லது டீக்கு முன்பாக சாப்பிடுவதற்கு ஏற்ற ஸ்நாக் எது? 

# எனக்கு பஜ்ஜி, பெரும்பாலோர்க்கு வடை.

& எனக்கு போண்டா! 

கே. சக்ரபாணி, சென்னை 28.

வாழைப்பழத்தை  எந்தபக்கத்திலிருந்து  உரித்து  சாப்பிடுவது  சரியான முறை?  காம்பு பக்கத்திலிருந்தா  அடுத்தபக்கத்திலிருந்தா.  எப்படி  வேண்டுமானாலும் சாப்பிடலாம்  என்ற  பதில் வேண்டாம்.  சரியான முறை  வேண்டும். 

& ஒரு இஞ்ஜினியராக என் பார்வையில் ... 

காம்புப் பக்கத்தை ஒரு கை விரல்களால் உறுதியாகப் பிடித்துக் கொண்டு, மற்ற கை விரல்கள் உபயோகித்து தோலை உரித்தல் சரியான முறை. 

விளக்கம் : When you perform operation on a work piece, the work piece must be held firmly in a jig or fixture. 

= = = = = =  =

படமும் பதமும் :

பானுமதி வெங்கடேஸ்வரன் : 

கோகுலாஷ்டமிக்கு என் பேத்தி வரைந்த ஓவியம். அவளே நெட்டில்  பார்த்து வரைந்தாள். 

- - - - - - -

ஸ்ரீராம் : 

நிழலும் தராது.  காற்றும் வராது. ஆனால் தோற்றம் மட்டும் காற்றாடி மாதிரி!

- - - - - - - - - - -

நெல்லைத்தமிழன் : 

சூரியனுக்கே இப்போதெல்லாம் விமானம் விட்டுவிட்டார்களா?  மனிலாவில் (பிலிப்பைன்ஸ்), சூரியனை விமானம் கடந்த சமயத்தில் நான் எடுத்த படம்.

(விமானம், கீழே உள்ள இரண்டாவது படத்தில் நன்றாகத் தெரியும்.)

- - - - - - - - -

நம் ஊரில் ஷேர் ஆட்டோ என்று படு திராபையான ஆட்டோக்களை நீங்கள் பார்த்திருக்கலாம். (சாதாரண ஆட்டோக்கள் மாத்திரம் என்ன வாழ்கிறது? என்று நினைக்கிறீர்கள் அல்லவா? தற்போது வரும் எலெக்ட்ரிக் ஆட்டோ கொஞ்சம் அழகாகவே இருக்கின்றது). பிலிப்பைன்ஸில் இந்த மாதிரி சிறிய பேருந்து என்று சொல்லமுடியாது, ஷேர் ஆட்டோவின் அழகிய வடிவம் என்று வேண்டுமானால் சொல்லலாம், டிரான்ஸ்போர்ட்டுக்கு உபயோகிக்கிறார்கள். ஒரு கிராமத்திலிருந்து இன்னொரு கிராமத்துக்குச் செல்ல இத்தகைய ஜீப்னிக்களை (jeepney) உபயோகிக்கிறார்கள். இது மிகவும் குறைந்த கட்டணத்தில் ஒரு இடத்தில் இருந்து இன்னொரு இடத்திற்குச் செல்ல உபயோகப்படுகிறது. ஒவ்வொரு பேருந்து நிறுத்தம் அல்லது முக்கிய இடங்களிலும் இத்தகைய ஜீப்னிக்கள் நிறைய இருக்கும். பயணிகளைக் கூவிக்கூவி அழைப்பார்கள். இரண்டு வரிசைகளில் பயணிகள் உட்கார்ந்துகொள்ளும் விதத்தில் இருக்கும். கசகசவென இருக்கும், சுகாதாரமற்ற ஷேர் ஆட்டோக்களைவிட இத்தகைய ஜீப்னிக்கள் மிகவும் உபயோகம்தானே?

- - - - - - - - - - - - - - - 

பிலிப்பைன்ஸில் தேங்காய்கள் மிக மிகப் பெரியவை. அந்த அளவில் நான் வேறு எங்கும் பார்த்ததில்லை.  சிலர், சில tropical islandsல் (வெப்ப மண்டலத் தீவுகளில்) தேங்காய் மிகப் பெரிதாக வளரும் என்று சொல்கின்றனர். ஒரு தேங்காய்/இளநியில் 1 லிட்டர் தண்ணீர் வரும்.  இந்தக் கடை, அங்கு இருக்கும் எரிமலைத் தீவுப் பகுதியில் அமைந்துள்ளது. அதனாலும் அங்கு விளையும் பழங்கள் மிக ருசியாக இருக்கும்.  படத்தில் காணும் பெண் இந்த மாதிரி இளநிக்களை வெட்டி, அதன் தண்ணீர் மற்றும் தேங்காய்ப் பகுதிகளை உபயோகித்து அவர்கள் செய்யும் வினிகருக்காக கடைகளுக்கு பெரிய அளவில் அனுப்புகிறார். எனக்கு இரண்டு இளநீரை வெட்டி இரண்டு ஒரு லிட்டர் பாட்டிலில் தந்தார். அவ்வளவு ருசி.

இந்த இரண்டாவது படத்தில் பாத்திரத்தில் அவற்றைச் சேகரிப்பது தெரியும். கேனில் உள்ளவை தேங்காய் நீரை உபயோகித்துச் செய்த வினிகர். இது பிலிப்பைன்ஸ் ஸ்பெஷல்

- - - - - - - - - - - - - -

பிலிப்பைன்ஸில் நான் பார்த்த இன்னொரு வகையான டிரான்ஸ்போர்ட். பைக்கில் மழைக்கான தடுப்பும், அதையொட்டி பயணிகள் அமர சிறு வண்டியும் (கூரையுடன்). ஒரு பைக்கில், ஐந்து பேர் லக்கேஜுடன் பயணித்துவிடுகிறார்கள்.

- - - - - - - - 

இது நம்மூரில் நாம் ஸ்கூட்டருடன் இருக்கும் சிறிய அட்டாச்மெண்ட் மாதிரி இல்லை. கூடுதல் பயணிகள் மற்றும் லக்கேஜுகளுடன் பயணிக்க மாறுதல் செய்யப்பட்ட பைக்குகள் இவை. 

==   ===    ===     =====    =====

KGG பக்கம் : 

கடந்த 108 மாதங்களில் மிகவும் சந்தோஷமாக நான் உணர்ந்து கொண்டு உள்ளது இந்த ஆகஸ்ட் 2025 மாதம்தான். உறவினர்கள், நண்பர்கள் வருகை, பல வருடங்கள் கழித்து உறவினர்களுடன் நீண்ட தூர உல்லாசப் பயணம்.

இதெல்லாம் வாழ்க்கையில் இனி மீண்டும் வருமா என்று ஏங்கித் தவித்திருந்த நிகழ்வுகள். எல்லாம் கொடுத்த இறைவனுக்கும், உறவினர்களுக்கும், நண்பர்களுக்கும் நன்றி சொல்ல வேண்டும். 

யாருக்கும் ஒரே இடத்தில், ஒரே மாதிரி வாழ்க்கையை தொடர்ந்து வாழ்ந்து கொண்டு இருந்தால், வாழ்க்கை சீக்கிரம் அலுத்துவிடும். சின்னச் சின்ன மாற்றங்கள், பலவகை மனிதர்கள், பலவகை இடங்கள், பலவகை உணவுகள் என்றெல்லாம் அடிக்கடி மாற்றங்கள் இருந்தால் மனம் இறக்கை கட்டிப் பறக்கிறது! 

குழுவாக பல இடங்களுக்கும் பயணம் செய்பவர்கள், அதற்கான வசதி, வாய்ப்பு, நேரம் இருப்பவர்கள் பாக்கியசாலிகள். 

நம் எ பி குடும்பத்தில் அப்படி பலர் உள்ளனர் என்பது மிகவும் மகிழ்ச்சி அளிக்கிறது. 

சமீபத்தில் நான் சென்று வந்த பயணத்தின் போது எடுக்கப்பட்ட சில படங்கள் இங்கே. 

= = = = = = = =