"திங்க"க்கிழமை : குடைவரை கோஸ் - கீதா ரெங்கன் ரெஸிப்பி

 

                          குடைவரை கோஸிற்குள் புதைந்திருக்கும் ரகசியம்!

 இந்த ரெசிப்பி ஒரு தத்துவ பொக்கிஷங்க!!!! அப்படி அடிச்சு விட்டுக்குவோம்! அட! என்னங்க உலக உருண்டைக்குள் எத்தனை ரகசியங்கள் ஒளிந்திருக்கின்றன! எவ்வளவு நொந்து நூடுல்ஸ் சிக்கல்கள்? 

ரகசியம் எதுவும் இல்லை. எல்லாம் நாம குடைந்து புதைத்து வைக்கறதுதான்! மனதிற்கும் பொருந்தும்.

சென்னைல இருக்கறப்ப புதுசு புதுசாய் சாப்பிட விரும்பும் உறவினர்/கள். அது ஒரு கனா காலம்! அவங்க சமீபத்துல வந்திருந்தார்கள். வந்து கொண்டிருந்த போதே என்னை அழைத்து, முன்பு, நான் ஃப்ரைட் ரைஸ் செய்தப்ப இப்படிச் செய்ததை சாப்பிட்டதை நினைவு வைச்சுருந்து, "நாம அதைச் செய்வோம். நீங்க இப்ப மில்லட் சாப்பிடறீங்க அதுக்காகவே இந்த முறை "ஆர்கானிக் மில்லட் நூடுல்ஸ் கொண்டு வரேன்" என்று சொல்லிவிட்டார். அவர் நட்பு வட்டத்தில் கொடுக்கப்பட்ட நூடுல்ஸாம்! 45 நிமிடத்தில் வீட்டிற்கு வந்துவிடுவார்கள்.

"வாழ்க்கையே நூடுல்ஸ்தான். நாம அதைப் பிரிச்சு மேயும் பிஸ்தாஸ்! செஞ்சுடுவோம்" கீதாவின் தத்துவ வசனம்.

பரபர என்று ஆயத்தாமானேன். மைன்ட் வாய்ஸ் 'ஸ்ரீராம் கோஸின் கண்ணீர் பதிவு போட்டப்ப, நான் வேற ஜம்பமா இதப் பத்தி சொல்லி, "ஸ்ரீராம், நான் செய்யறப்ப ஃபோட்டோ எடுத்து அனுப்பறேன்னு.'

'ஓ கடவுளே! ஃபோட்டோ எடுக்கணுமே'.....எடுத்துக்குவோம் எப்படியாச்சும்...வந்தவங்க டயர்டா இருந்ததால் 'பேசிக் கொண்டே ரெஸ்ட் எடுங்க!!! நான் வேலைய முடிக்கறேன்னு' இல்லைனா அவங்க எடுத்திருப்பாங்க எனக்கும் ஈசியா இருந்திருக்கும். ஒரு சின்ன வீடியோ ...அதை மட்டும் அவங்களை எடுக்கச் சொன்னேன்.

சரி வாங்க நாம கொஞ்சம் நேரம் சிற்பியாக மாறி....கோஸை குடைந்து குடைவரை கோஸாக மாற்றும் முன்...

முதலில் நூடுல்ஸை கொதிக்கும் தண்ணீரில் போட்டு கொதிக்க விட்டு, அது வெந்ததும் தண்ணீரை வடித்து கொஞ்சம் குளிர்ந்த நீரிலும் போட்டு வடித்து வைத்துவிடலாம். தண்ணீ நல்லா வடியட்டும். அதுக்குள்ள,

வீட்டில் கோஸ் இல்லை. அவர்கள் வருவதற்குள் அருகில் கடைக்குச் சென்று கோஸ் கூடையை ஆராய்ந்து.... இதற்குக் கோஸ் வாங்கும் போது சிறியதாகக் கைக்குள் அடங்கும் சைஸ் அளவு போதும். படத்தில் பெரிதாகத் தெரிகிறது. டென்னிஸ் பந்து சைஸ் ஒன்றும், அதைவிடக் கொஞ்சம் பெரியதாக மற்றவையும் கிடைத்தன.

நான் செய்தது இப்படி. முதலில் கோஸின் உச்சியில்! தண்டைச் சற்றி ஒரு சதுர வடிவில் கத்தியால் சிறியதாக அழுத்தி, கொஞ்சம் கொஞ்சமாகக் கத்தியை இறக்கி வட்டமாகச் சுத்தி நெம்பி எடுத்தீங்கனா மேல் தண்டு வந்துவிடும். 

அதுக்குப் பிறகு உள்ளே கத்தியால் லாவகமாகக் குடைந்து அடி பாகம் வரை சுரண்ட வேண்டும். சுரண்டி வருவதையும் கத்தியாலேயே அல்லது ஸ்பூனால் வெளியில் எடுத்துப் பயன்படுத்திக் கொள்ளலாம். ரொம்ப அழுத்தம் கொடுத்தால் பாவம்ங்க கோஸ்! வெட்டுப்பட்டுவிடும். 

இரண்டாவது படத்தில் இரண்டில் ஒன்று மட்டும் டென்னிஸ் பந்தை விடக் கொஞ்சம் பெரியது

நூடுல்ஸிற்குத் தேவையான,

வெங்காயம் 2,  

பெரிய குடை மிளகாய் - 1

காரட் - 1 தோல் எடுத்துக் கழுவி...

தக்காளி - 3 

பச்சை மிளகாய் - 1 அல்லது 2

எல்லாம் நல்லா கழுவி நீட்ட நீட்டமாக, அதாங்க julienne cut, நறுக்கிக்கலாம்.  பச்சை மிளகாய் உட்பட கீறிக்கலாம். தக்காளி தவிர.

குடைவரை கோஸினுள் என்ன வைக்க? ஆராய்ந்தேன். 200 கிராம் பனீரில் பாதி 100 கிராம் இருந்தது. எடுத்துக் கொண்டேன். உதிர்த்தோ இல்லைனா துருவிக் கொள்ளலாம். நான் துருவிக் கொண்டேன். வெங்காயம் 1

துருவிக் கொண்ட பனீருடன் சிறிது உப்பு, கொஞ்சம் மஞ்சள் தூள், மிளகுப் பொடி, மிளகாய் தூள், சின்ன துண்டு குடைமிளகாயைப் பொடியாக நறுக்கி, ஒரு வெங்காயத்தைப் பொடியாக நறுக்கி, ஒரு பச்சை மிளகாயைப் பொடிப்பொடியாக நறுக்கி, எல்லாம் நல்லா கலந்து வைத்து....

படத்தில் கோஸ் பெரியதாகத் தெரிகிறது. 

குடைவரைக் கோஸின் நடுவிற்குள் நன்றாக அழுத்தி அடைத்த பின், கொஞ்சம் மிளகாய்த் தூள், கொஞ்சம் உப்புத் தூளையும், சிறிது எண்ணையும் கலந்து அதை கோஸின் இலைகளுக்குள் தெரியும் இடைவெளியில் எல்லாம் மெதுவாக விட்டுத் தடவி விட்டு, (ஃபோட்டோ எடுக்க முடியலை. வெளி இலை ஒன்றை உரித்து மேலே மூடி அதற்கென்றே உள்ள சின்ன மரக்குச்சியால் குத்தி.... உள்ளே என்ன என்று தெரியாமல்! ஆனால் அன்று நான் மூடவில்லை.) ஆவியில் வைத்து எடுக்கலாம். 20-25 நிமிடங்கள் ஆகலாம். உள்ளுக்குள் வைப்பவை நம் விருப்பம். நம் கற்பனை.

நான் ரைஸ் குக்கரில் நீர் விட்டு, மேலே வடிதட்டு ஒன்றைப் போட்டு அதில் கோஸ்களை வைத்து மூடி போட்டு ஆவியில் வைத்து எடுத்தேன். 

ஆவி பிடிக்கட்டும்! ஸ்ரீராமிடம் கண்ணீர் விட்ட கோஸாயிற்றே!

அதற்குள் வாணலியில் சிறிது எண்ணை விட்டு, வெங்காயம், காரட், குடை மிளகாய் எல்லாம் போட்டு, தாபா கடையில் அதிகமான தீயில் டொக்கு டொக்குன்னு கரண்டி சத்தம்கேட்கறா மாதிரி புரட்டுவாங்களே அப்படிப் புரட்டும் போது அதில் சிறிது உப்பு, பச்சை மிளகாய், காரப்பொடி, மிளகுப் பொடி, தனியாப்பொடி, ஜீரகப் பொடி சேர்த்த காய் மசாலாப்பொடி கொஞ்சம் எல்லாம் போட்டு, கலந்து பச்சை வாசனை போனதும் ஒரு பாத்திரத்தில் எடுத்து வைத்துக் கொண்டுவிடவும்.

அதே வாணலியில் ஒரு ஸ்பூன் எண்ணை விட்டு அதில் அரைத்த தக்காளியைப் போட்டு நல்லா வதக்கணும். தக்காளி வதங்கியதும் அதில் எடுத்து வைத்த வதங்கிய காய்களைப்  போட்டுக் கலந்து...

வேகவைத்து நீர் வடிந்திருக்கும் நூடுல்ஸை அதில் போட்டு மென்மையாகப் புரட்டிக் கலக்க வேண்டும். இது இருக்க...

கோஸை கொஞ்சம் அழுத்திப் பாருங்க (இந்த செட்டில் முதல் படம்)  மென்மையாக இருந்தால் உள்ளேயும் லேசாக வெந்திருக்கும். அதிகம் வெந்திடாமல் பார்த்துக்கணும். (இப்படி ஆவியில் வைக்காமல் நேரடியாத அடுத்த படிநிலைக்கும் போகலாம். ஆனால் அதிக எண்ணையைத் தவிர்க்க ஆவியில் வைப்பது என் வழக்கம்) அதை எடுத்து வாணலியில் 2 ஸ்பூன் எண்ணை விட்டு, கோஸை அதில் போட்டு, மேலே காரம் உப்பு கொஞ்சம் தூவி மெதுவாகக் கவனமாகப் புரட்டிவிட்டால் எல்லாம் ரெடி. அடுத்து Exhibition! Photo shoot! 

கொஞ்சம் நூடுல்ஸை ஒரு தட்டில் பரப்பி நடுவில் இந்தக் கோஸை நடுவில் வைத்து ஃபோட்டோ ஷூட் நடத்திய பிறகு கோஸின் நடுவில் பிளந்து, குறுக்காலும் ஒரு சின்ன வெட்டு. (நறுக்குவதுக்கு ஏற்பதான் ஆவியில் வைத்து எடுத்திருக்க வேண்டும். ரொம்ப வெந்திருந்துச்சுன்னா கட் செய்யும் போது வடிவம் எல்லாம் போய்விடும்) கவனமாகக் கட் செய்து விரித்து நூடுல்ஸ் மீது நடுவில் வைத்துக் கொடுத்துவிட்டால்.....நூடுல்ஸில் கோஸ் போடாமல் இப்படிச் செய்து கலந்து....

கொடுத்ததை சாப்பிடுவது உங்க விருப்பம்!! அதை எப்படிச் சாப்பிடுவது என்பதும் உங்க இஷ்டம்! இல்லைனா பொருட்காட்சியில் கண்ணால் பார்த்துவிட்டு நகர்வது போல நகர்வதும் உங்க விருப்பமுங்க! என்ன சொல்றீங்க!! டேஸ்ட் பார்க்கறீங்களா இல்லை சும்மா பார்த்துட்டு நகர்ந்துடறோம்னு சொல்றீங்களா!

அதுவும் சரிதான். எதுக்கு ரிஸ்க் இல்லையா! ரைட்டோ!

பின் பொன் குறிப்பு - 1 - நான் கோஸின் இரண்டு இலை லேயர்களைப் பிரித்து, நடுவில் உள்ள கலவையோடு நூடுல்ஸையும் வைத்தும், ஒரு சில இலைகளுக்குள் நூடுல்ஸை வைத்துச் சுருட்டியும்....இப்படிப் பல விதங்களில் சாப்பிட்டேன்/சாப்பிட்டோம்.

ஹாங் சொல்ல மறந்து போச்சு பாருங்க! அவர்களுக்குப் பிடித்திருந்தது. 80ன் கடைசி வருடத்தில் இருப்பவர் ஒருவர், 80ஐத் தொட இருப்பவர் ஒருவர், என்னிடம் செய்யச் சொல்லிக் கேட்டவர் 60 ஐ நெருங்குபவர்! 

பின் பொன் குறிப்பு - 2 - இதை ஃப்ரைட் ரைஸ் செய்து (அதில் கோஸ் போடாமல் இப்படிச் செய்து நடுவில் வைக்கலாம். கொஞ்சம் பெரிய கோஸாக இருந்தால் இரண்டாகவோ நான்காகவோ நறுக்கி நூடுல்ஸ் அல்லது ஃப்ரைட் ரைஸ் நடுவில் ஒரு பாகம் வைத்து தரலாம்.

என் மகன் இப்படிச் செய்த கோஸ் ஒன்றே ஒன்று நறுக்கிச் சாப்பிடுவான்.  கலோரி குறைவு, உள்ளே பனீர் ப்ரோட்டின் இருப்பதால். உள்ளே சன்னா, பயறு என்று எது வேண்டுமானாலும் சுண்டல் போலச் செய்து வைக்கலாம். உங்கள் விருப்பம்.