"திங்க"க்கிழமை " - கொண்டைக்கடலை லசான்யா - ராதா சுரேஷ் ரெஸிப்பி

கொண்டைக்கடலை லசான்யா

கொண்டைக்கடலை போட்டு சுண்டல்தான் செய்ய வேண்டுமா என்ன?  சுண்டலுக்காக வேகவைத்த கொண்டைக்கடலை ஒருநாள் அவதாரம் மாற்றப்பட்டது.

வெறும் பொரியலாகவோ, சுண்டலாகவோ சாப்பிட்டு அலுத்துப் போகும் நாளில், அல்லது வீட்டில் உள்ளோர் சாப்பிட மறுக்கும் நாளில் புதிய முயற்சி உருவாகிறது.

ரெட் சாஸ், ஒயிட் சாஸ் என்று கஷ்டப்பட வேண்டியதில்லை.  சிம்பிளாக ஒன்று கூட போதும்.

தக்காளி, மிளகு, துளசி இலை, பூண்டு மற்றும் சோள மாவு சேர்த்து ஒரு சாஸ் தயாரிக்கவும்.

உப்பில்லாத வெண்ணெய் எடுத்து பானில் அல்லது வாணலியில் இட்டு அது உருகிய உடன் பொடியாக நறுக்கிய பூண்டு ஒரு ஸ்பூன் சேர்த்து வதக்கி, பின்னர் வெங்காயம் நறுக்கியதைச் சேர்த்து, அது கலந்து வந்த உடன் தக்காளியை போட்டு புரட்டி இறக்கி வைத்து, ஆறிய உடன் மிக்சியில் அரைத்து எடுத்துக் கொண்டு, மறுபடி பானில் பூண்டு சீரகம், சில்லி பிளேக்ஸ், மிளகுத்தூள், தாளித்து கலவையை அதில் கொட்டி  கொஞ்சம் சோள மாவு போட்டு பால் ஊற்றி கொதிக்க விடவும்.  ரொம்ப கெட்டியாக ஆகும் முன் இறக்கி வைக்கலாம்.  ஏனென்றால் ஆறிய உடன் இன்னும் கெட்டியாகி விடும். 

இங்கு நான் வெங்காயம் சேர்க்காமல் தக்காளி மிளகு துளசி இலை சேர்த்தேன்.

பின்னர் வேகவைத்த கொண்டைக்கடலையை நன்கு மசித்து எடுத்துக் கொண்டு தேவைப்பட்டால் ஓரிரு சிட்டிகை கடலைமாவு சேர்த்துக்கொண்டு இரண்டு பிளாஸ்டிக் தாள்களுக்கு நடுவில் அல்லது பட்டர் பேப்பருக்கு நடுவில் வைத்து அப்பளம் போல் இட்டு காய வைக்கவும்.  சிறிய எவர்சில்வர் தட்டின் அடியில் அழுத்தி கூட அப்பளம் தயார் செய்துகொள்ளலாம். 

பின்னர் உங்களுக்குப் பிடித்த காய்கறி பூரணத்தைச் சேர்க்கவும்.  இதுதான், இன்னதுதான் என்றில்லை.  உங்களுக்கு எது பிடிக்குமோ, எது தோன்றுகிறதோ..  அல்லது அன்று செய்த கறி மிஞ்சி இருந்தால் அதைக் கூட வைத்து ஸ்டஃப் செய்யலாம்.  எல்லாம் திப்பிச வேலைகள்தான்.

ஒரு பிளேட்டில் முதலில் சாஸ் தடவி பரப்பி விட்டு, அதன்மேல் ஒரு அப்பளம் வைக்கவும்.  அதன்மேல் நீங்கள் வைத்திருக்கும் காய்கறி கலவையை இட்டு பரப்பவும்.  (காய்கறி கலவையையும் முன்னதாக பானில் தாளித்து புரட்டி எடுத்து வைத்திருக்க வேண்டும்.)  பிறகு மீண்டும் ஒரு அப்பளத்தை மேலே வைத்து மறுபடி இதே ப்ராசஸ்.  இது போல நான்கு அடுக்குகள் வைக்கலாம்.

எனது தோழி ஒருவர் வெறும் கத்தரிக்காய் நடுவில் வைத்து செய்து அசத்தினார்.  இன்னொருவர் அன்று செய்த வெண்டைக்காய் கறியை நடுவில் வைத்தார்.

நான் உருளைக்கிழங்கு, கேரட், இனிப்பு பட்டாணி மற்றும் காலிஃபிளவர் ஆகியவற்றை சேர்த்து பூரணமாக்கினேன்

அதன் மேல் சீஸ் தூவவும்..

180 டிகிரியில் 25 நிமிடங்கள் சுடவும்.  எதைச் சேர்த்தாலும், என்ன செய்தாலும் இதுதான் முக்கியம்.

உங்களிடம் காய்க்கலவை மீதமாகி விட்டால் இருந்தால் அதைக் கொண்டு ராஜ்மா செய்யலாம்.