மூன்றில் ஒன்று.. நீ என்னிடம் சொல்லு..

 மூன்று விஷயங்கள்...   மூன்று விஷயங்கள் பற்றி பேசவேண்டும்.

அந்த விழாவுக்குப் போனதில் நடந்த மூன்று நிகழ்ச்சிகள் பற்றி பேச வேண்டும்.

திருமணம் போன்ற விசேஷங்களுக்குச் செல்லும்போது அந்நிகழ்ச்சியை என்றும் நினைவில் வைத்திருக்க வீடியோ எடுப்பதைப் பார்த்திருப்பீர்கள்.  நல்ல விஷயம்தான்.  நானும் செய்வேன்.  நீங்களும் செய்வீர்கள்.  

பெரும்பாலும் இப்படி வீடியோ எடுப்பவர்கள் என்ன செய்வார்கள் என்றால், நிகழ்ச்சி நடக்கும் நேரம் முக்கியமான தருணங்களில் மேடையில் நடப்பதை மறைத்துக்கொண்டு படம் எடுப்பார்கள் என்பது அனைவரும் அறிந்ததே...  போதாக்குறைக்கு நாமும் நம் செல்போனில் அவர்களுக்கு இடையில் புகுந்து நம் படமெடுக்கும் திறமையையும் காண்பிப்போம்.  பின்னால் அமர்ந்திருப்பவர்கள் பாவம்..  படம் எடுப்பவர்களின் பின்னழகைத்தான் பெரும்பாலும் தரிசிக்க வேண்டும்.  அதற்குதான் அவர்கள் போடும் அட்சதை சென்று விழும்! 

இங்கு ஒன்றைச் சொல்லவேண்டும்.  அட்சதை போடுவது பற்றி.  மண்டபம் முழுவதும் நிறைந்திருப்பவர்கள் எத்தனைபேர் மங்கலநாண் பூட்டும் சமயமோ, அல்லது ஆசீர்வாதம் வழங்கும் நேரமோ மேடைக்கு அருகில் வந்து அட்சதையை சம்பந்தப்பட்டவர்கள் சிரசில் போடுகிறார்கள்?  இருக்கும் இடத்திலிருந்தே மேடையை நோக்கி 'த்ரோ' செய்வார்கள்.  கடமை முடிந்தது.  அட, அதை விடுங்கள்.  மேடையில் நடக்கும் மங்கள வைபவத்தை கவனிப்பவர்கள் எத்தனை பேர்?  அவரவர் ஆங்காங்கே நின்று நீண்ட நாள் கழித்து சந்திப்பவர்களுடன் பேசிக் கொண்டிருப்பார்கள்.  இல்லை, தலைகுனிந்து மோனத்தவம் செய்து கொண்டிருப்பார்கள்.  சிலர் செல்போனில், சிலர் சும்மா...!

வழக்கமாக இது மாதிரி விழாக்கள் நீண்ட நாள் சந்திக்காத உறவுகளை சந்திக்கும் வாய்ப்பாகவும் இருக்கிறதுதான்.  ஒருவரை ஒருவர் பார்த்து பேச, விஷயங்களை பரிமாறிக்கொள்ள வசதிதான்.  அதற்கு இதுமாதிரி கெட் டுகெதர்கள் மிக்க உபயோகம்தான்.  சில சமயங்களில் இது மாதிரி விழாக்களில் இன்னொரு திருமணம் கூட நிச்சயமாகும்தான்.  அதுவரை உறவுகளுக்கிடையே இருந்து வந்த சில தவறான புரிதல்கள் சரியாகும்தான்.

எல்லாம் சரிதான்..  ஆனால்.... 

ஆனாலும் நாம் சென்றிருப்பது தம்பதிகளை ஆசீர்வதிக்க, அல்லது அவர்களிடமிருந்து ஆசி பெற என்பதை நினைவில் கொண்டு மேடை நிகழ்ச்சிகளில் கவனம் செலுத்த வேண்டும், பங்கெடுக்க வேண்டும்.  அவர்களை தனியாக உணர வைக்கக் கூடாது.  அப்புறம் இருக்கவே இருக்கிறது இடைவேளை நேரங்கள்.  சாப்பிடும்போது, நிகழ்ச்சிகளின் இடைவேளைகளில், மாலை இரவுகளில் அளவளாவலாம்.

சரி..  வழக்கம்போல சொல்ல வந்த விஷயம் டிராக் மாறுகிறது.  நான் இங்கு முதல் விஷயமாக பேச வந்தது வீடியோ பற்றி...  இந்த வீடியோக்ராபர்கள் இருக்கிறார்களே..  அவர்கள் ரொம்ப விசுவாசமானவர்கள்.  பெரும்பாலும் மேடையைத்தான் படம் எடுத்துக் கொண்டிருப்பார்கள்.  எப்போதாவது வந்திருக்கும் விருந்தினர்களை எடுப்பார்கள்.  மேடையைத் தவிர அவர்கள் அதிகம் எடுப்பது வீடியோக்காரரை அமர்த்தி இருக்கும் குடும்பத்தாரை..  அவர்கள் எங்கெல்லாம் செல்கிறார்களோ, அங்கெல்லாம் கேமரா பின்தொடரும்,  பெண் வீட்டார் வீடியோ ஏற்பாடு செய்திருந்தால், மாப்பிள்ளை வீடே கூட கொஞ்சம் கம்மியாய்த்தான் வீடியோவில் இருக்கும்.  அப்போ மற்றவர்கள்?  Gift கொடுக்க மேடையில் நிற்கும்போது எப்படியும் வீடியோவில் இடம்பெற்று விடுவோம்.  மற்ற சமயங்களில் எங்காவது, எப்போதாவது கண்ணில் படுவோம்.  விரைந்து நகரும் கேமிரா பார்வையில், பார்வையாளர்களில் நாமும் அமர்ந்திருப்போம்.

ஆனால் இந்த விழாவில் நான் பார்த்த வீடியோக்ராபர் வித்தியாசமானவர்.  

பாலாஜி.

முன்னர் அகேஷனாலாகவும் இப்போதெல்லாம் நிறைய பங்க்ஷனிலும் இவரை நான் பார்க்கிறேன். உற்சாக ஊற்று.  இரண்டு மூன்று உதவியாளர்கள் வைத்திருக்கிறார்.  பாலாஜி விடியோஸ்.  உள்ளே நுழைந்த கணம் முதல் அந்த உற்சாகம் எதிர்ப்படுவோர் அனைவரிடமும் தொற்றிக்கொள்ளச் செய்து விடுகிறார்.  நிறையபேர் இவரை தங்கள் ஆஸ்தான வீடியோகிராபராக வரித்துக்கொண்டு விட்டனர்.  அவர்கள் வீட்டு விழாக்களில் எல்லாம் இவர் வீடியோ தான்.  கிட்டத்தட்ட எல்லோரையும் பெயர் தெரியுமளவு பரிச்சயமாகி இருக்கிறார்.  விழாவில் குழுமி இருப்போர் ஒருவரை விடுவதில்லை.  புதிதாக உள்ளே வரும் ஒருவரையும் விடுவதில்லை.  எல்லோரையும் ஒருமுறை அல்ல, அவ்வப்போது வீடியோவில் பதிவு செய்து விடுகிறார்.  அதுவும் ஒரே மாதிரி அல்ல.  அவர்களை வித்தியாசமாக நிறுத்தி வைத்து, வித்தியாசமான போஸ்களில், ஜோடியாய் தனியாய் கேண்டிடாய் என்று எடுத்து கவர்ந்து விடுகிறார்.

சில விழாக்களில் இவர் கலந்து கொண்டாரா என்கிற சந்தேகம் வரும் அளவு சிலர் எந்தப் படத்திலும், காணொளியிலுள்ள விழுந்திருக்க மாட்டார்கள்.  கேமிரா இங்கு வரும்போது அவர் அங்கிருப்பார்.  அங்கு செல்லும்போது இங்கிருப்பார்.  யதேச்சையாகத்தான்....

அது இவரிடம் நடக்காது.

நீங்கள் எதிரில் வந்தால் உங்களையும் விதம் விதமாய் படம் பிடித்து விடுவார். கூடவே அவரைப்பற்றி பேசச்சொல்லி ஒரு ரெக்கார்டிங்கும் கேட்பார்.  திறமை, உழைப்பு..   தனது திறமையை விளம்பரமாக்கிக் கொள்ளும் திறமை.

தான் செய்வதை ரசித்துச் செய்கிறார். சிடுசிடுப்பதில்லை.     சிரித்த முகம்..  பேஸ்புக்கில் இருக்கிறார்.

இனி இரண்டாவது சம்பவத்துக்கு வருகிறேன்.

==============================================================================================================

பார்த்திருக்கிறீர்களா?  கேட்டிருக்கிறீர்களா?

பாரதியாரின் கொள்ளுப்பேரன் ராஜ்குமார் பாரதி(65), பாரதியாரின் கவிதைகள், கட்டுரைகளை இந்த தலைமுறையினரிடம் கொண்டு செல்வதற்காக கச்சேரி, சொற்பொழிவு வடிவில் உலகம் முழுவதும் பயணம் செய்து பல்வேறு நிகழ்ச்சிகளை நடத்தி வருகிறார்.

பாரதியாருக்கு தங்கம்மா பாரதி, சகுந்தலா பாரதி ஆகிய 2 மகள்கள் இருந்தனர். தங்கம்மா பாரதி மகள் லலிதா பாரதி. இவரது மகன்தான் வெ.ராஜ்குமார் பாரதி. சிறு வயதிலே முறைப்படி கர்நாடக, ஹிந்துஸ்தானி இசைகளைக் கற்றுக் கொண்டவர்.

அடிப்படையில் பொறியாளரான இவர், இசை மீதான ஆர்வத்தில் இசை நிகழ்ச்சிகளை நடத்தி வருகிறார். பாடகராகவும், இசையமைப்பாளராகவும் அறியப்படுகிறார். பாரதியார் போலவே தமிழ் மொழி மீது பற்றுக்கொண்டு தமிழ் புலமை பெற்ற இவர், இசைத் துறையில் அதிக நாட்டம் கொண்டிருந்தார்.

பாரதியார் பாடல்களை குறுந்தகடு வடிவில் வெளியிட்டு அதனைப் பரப்புவதிலும் முக்கியப் பங்காற்றி வருகிறார்.

பாரதி பாடல்களுக்கு இசை: பாரதியாரின் பல பாடல்களுக்கு இசையமைத்துப் பாடியுள்ளார். சில திரைப்படங்களில் பின்னணிப் பாடல்களையும் பாடியுள்ளார். மற்ற தமிழ் அறிஞர்களைப்போல் ராஜ்குமார் பாரதியும் தமிழ் மொழியையும், பாரதியாரின் கவிதைகளையும், கட்டுரைகளையும் உலகம் முழுவதும் பரப்பி வருகிறார்.

ஆனால், அவருக்கு இதுவரை தமிழக அரசால் உரிய அங்கீகாரம் கிடைக்கவில்லை. பாரதியாருக்குப் பின் அவரது கொள்ளுப்பேரனுக்கு அவர் செய்து வரும் சேவைகளுக்கு மரியாதை அளிக்க வேண்டும் என தமிழ் ஆர்வலர்கள் ஆதங்கப்படுகின்றனர்.

இதுகுறித்து மதுரை மகாகவி பாரதியார் சிந்தனையாளர்கள் மன்றத்தின் செயலாளர் ரா.லெட்சுமிநாராயணன் கூறியதாவது: தமிழக அரசு பாரதியார் கவிதைகள், கட்டுரைகளை நன்கு கற்று அவரின் சமூகச் சீர்திருத்தக் கொள்கைகளைக் கடைப்பிடித்து மக்களிடம் கொண்டு சேர்ப்போருக்கு `மகாகவி பாரதியார் விருது' வழங்குகிறது. அவர்களைப்போலவே பாரதியாரின் கொள்ளுப்பேரன் ராஜ்குமார் பாரதியும், பாரதியார் கவிதைகள், பாடல்களைப் பாடியும், கட்டுரைகள் எழுதியும் சொற்பொழிவாற்றியும் தமிழ் மொழி வளர்ச்சிக்காகவும் பாடுபட்டு வருகிறார். மேலும், சமூக முன்னேற்றத்துக்காகவும் பாடுபட்டு வருகிறார்.

தமிழ்நாடு தவிர ராஜ்குமார் பாரதி, மலேசியா, சிங்கப்பூர், இலங்கை, கனடா, அமெரிக்கா, பிரிட்டன் போன்ற நாடுகளில் சுற்றுப்பயணம் செய்து தமிழ் சங்கங்களின் ஏற்பாட்டில் நடக்கும் நிகழ்ச்சிகளில் பாரதியாரின் கவிதைகளைப் பாடி தமிழ் மொழிக்கும், பாரதியாருக்கும் சிறப்புச் செய்து வருகிறார்.

பாரதியாரின் தேசியப் பாடல்களை முறையான சங்கீத சுருதி, ராகம், தாளத்தோடு பாடக்கூடியவர். கர்நாடக சங்கீத இசை நிகழ்ச்சிகளில் அதிகம் பங்கேற்றாலும் அங்கு முதலில் பாரதியார் கவிதைகளைப் பாடுவார். பாரதியாரின் பெண் விடுதலை, பெண் உரிமை, தாழ்த்தப்பட்ட மக்களின் முன்னேற்றம் பற்றி ராஜ்குமார் பாரதி தனது பேச்சால் மக்களிடையே விழிப்புணர்வு ஏற்படுத்தி வருகிறார்.

பாரதியின் கட்டுரைகளை சிறப்பான முறையில் சொற்பொழிவாற்றும் ஆற்றலைப் பெற்றவர். இவர் கலைமாமணி, சங்கீத நாடக அகாடமி விருது பெற்றுள்ளார். இந்த விருதுகளை அவர் பெற்றிருந்தாலும் இதுவரை தமிழக அரசு வழங்கும் ‘மகாகவி பாரதியார்’ விருது அவருக்கு வழங்கப்படவில்லை.

அதனால், 2023-ம் ஆண்டுக்கான மகாகவி பாரதியார் விருதை தமிழக அரசு வழங்க வேண்டும். பாரதியாரின் குடும்பத்தினர், அந்த விருதை அவருக்கு வழங்க வேண்டும் என்று கூற மாட்டார்கள். பாரதியாரின் கொள்கைகளைப் பரப்பும், பின்பற்றும் எங்களைப் போன்ற தமிழ் ஆர்வலர்கள்தான் கேட்க வேண்டும். இந்த விருதைபெற, பாரதியாரின் கொள்ளுப்பேரன் ராஜ்குமார் பாரதிக்கு முழு தகுதி உண்டு. தமிழ்மொழிக்கும், தேசிய ஒருமைப்பாட்டுக்கும் பாடுபடுவோரைத் தேடிக் கண்டறிந்து ஊக்குவிக்கு வேண்டியது தமிழக அரசின் கடமை. இவ்வாறு அவர் கூறினார்.

நன்றி: இந்து தமிழ் திசை - நன்றி கந்தசாமி ஸார். (முகநூல்)

==============================================================================================

நான் எடுத்தவைதான்... நீங்களும் ரசிக்க....

கத்திப்பாரா மேம்பாலம் கட்டப்படும்போதே அது ஆரம்பிக்கும் முன் அந்த இடத்தை புகைபபடம் எடுத்து வைக்க ஆசைப்பட்டேன். புறா பறக்கவிடும் நேரு சிலையுடன் வெளியூர் பஸ்கள் வந்து திரும்பி நிற்கும் இடம் அதுதான். அங்கு கணிசமாக பயணிகள் இறங்கி விடுவார்கள். ஆனால் எந்த இடத்தில நின்று எடுப்பபது என்று வாகாக இடம் கிடைக்காததால் அப்படி எடுக்க முடியவில்லை.

கீழே உள்ள படம் அசோக் பில்லர், உதயம் தியேட்டர் உள்ள இடம், உதயம் தியேட்டர் வாசலிலிருந்து எடுத்தேன். இப்போது என்ன மாறுதல் என்று உங்களுக்கு தெரியும்தானே? சாலையின் நடுவே பிரம்மாண்டமாய் மெட்ரோ ரயில் பாதை பாலம் செல்லும் இப்போது.

எப்போதும் காஃபியைத்தானே படம் எடுக்கிறோம்? எப்போதும் அதைத்தானே குடிக்கிறோம் என்று ஒருமுறை 'சாய்' ஆர்டர் செய்து அது வந்த உடன் எடுத்த படம். காஃபி என்றால் நுரையுடன் இருக்கும். 'ச்சாயி'ல் அது இல்லை! நீங்கள் 'ச்சாயை' அப்படியே குடிப்பீர்களா? இல்லை சாஸரில் ஊற்றி குடிப்பீர்களா? காஃபிக்கு ஆயிரம் சிங்கிநாதம் சொல்கிறோமே, தரமான சாய் என்பது எப்படி இருக்க வேண்டும்?

=====================================================================================================

பழசு ஒன்று மீளாய்...

பசுக்கள்

திரும்பி விட்டன

மேய்ச்சலிலிருந்து.

மேய்ப்பனைத்தான் காணோம்.

வெள்ளை மாடொன்றின்

கொம்பில்

மாட்டியிருக்கிறது

உடைந்த புல்லாங்குழலின்

துண்டு ஒன்று...

=====================================================================================

நியூஸ் ரூம் : பானுமதி வெங்கடேஸ்வரன்

கேரளா,திருவனந்தபுரத்தில் லாட்டரி சீட்டு விற்கும் ஒருவரிடம் லாட்டரி சீட்டு வாங்கிய அவரது மகளுக்கு ரூ.75 லட்சம் பரிசு விழுந்திருக்கிறது. மகளுக்கு கிடைத்த 75 லட்சத்தை தவிர ஏஜெண்டுகளுக்கு கிடைக்கும் பரிசு தந்தைக்கு கிடைக்குமாம். ஒரு கல்லுலரெண்டு மாங்காய்!

ராமநாதபுரம் மாவட்டம், நயினார் கோவில்,பொட்டகவயல் கிராமத்தில் இருக்கும் தொடக்க வேளாண்மை கூட்டுறவு கடன் சங்க வங்கி உள்ளது. ஜூன் 30ம் தேதி வங்கி நேரம் முடிந்ததும், அதன் மேலாளர் தன் நண்பரிடம் வங்கியை பூட்டி விட்டு செல்லும்படி சொல்லிவிட்டு, சென்றிருக்கிறார். அவரது நண்பர் பூட்ட மறந்து விட்டாராம்.. இரவு பத்து மணி வரை வங்கி பூட்டப்படாமல் இருந்ததை பார்த்த பொது மக்கள் ஊராட்சித் தலைவரிடம் கூற அவர் கலெக்டருக்கு தகவல் தெரிவித்து, அவர் நடவடிக்கை எடுத்ததன் பேரில் வங்கி மேலாளர் வந்து வங்கியை பூட்டியிருக்கிறார். இதில் ஒரு நல்ல விஷயம் பணம்,எதுவும் திருட்டுப் போகவில்லை.

கர்நாடகாவில் குடும்பத்திற்கு மாதம் 10 கிலோ அரிசி தருவதாக தேர்தல் வாக்குறுதி அளித்த் காங்கிரஸ், இப்போது, போதுமான அரிசியை மத்திய அரசு வழங்காததால் 5கிலோ அரிசியோடு, ரூ.170 ரொக்கம் அளிக்க முடிவு செய்திருக்கிறது.

கர்னாடகாவுக்கு ஆபத்து அதிக மழையால் பாதிப்பு நேரிடும். உலக அளவில் மூன்று தலைவர்க:ளின் உடல் நலத்திற்கு கேடு.…- பெங்களூரில் இருக்கும் ஒரு சாமியார் அருள்வாக்கு -  யாகவா முனிவர் நினிவுக்கு வரவில்லை?

ஆஸ்கர் தேர்வுக் குழுவில் இந்த வருடம் இந்தியாவிலிருந்து இயக்குனர் மணிரத்னம், இசையமைப்பாளர் மரகதமணி, நடிகர் ஜூனியர் என்.டி.ஆர். போன்றவர்கள் இடம் பெறுகிறார்கள்.

பொறியியல் பொருள்கள் ஏற்றுமதியில் மூன்று ஆண்டுகளாக தமிழகம் முதலிடம்.

மைசூர் சந்தன சோப்பின் விற்பனையை உய்ர்த்த ஆலோசனை கேட்டிருக்கும் அமைச்சர். கர்னாடகத்தின் பெருமைக்குரிய தயாரிப்பான மைசூர் சந்தன சோப் தரமாக இருந்தாலும் 3% மட்டுமே ஏற்றுமதியாகிறது. இதை கூட்டுவதற்கு தொழில் முனைவர்களிடம் ஆலோசனை கேட்கப் பட்டிருகிறது. விற்பனை உயர்ந்து மணம் வீசட்டும். 

==============================================================================

பொக்கிஷம் :