திங்கக்கிழமை : விளிம்பிப்பழயோதரை - கீதா ரெங்கன் ரெஸிப்பி

  

விளிம்பிப்பழயோதரை/விளிம்பிப்பழஹோரா/விளிம்பிப்பழ சாதம்

சும்மா இப்படி ஒரு பெயரை வைத்துக் கொள்வோம். வணக்கம், வந்தனம், சுஸ்வாகதம்! நம்ம நிலைய வித்வானுக்கு திங்க பதிவு, தான் போட வேண்டியதாச்சே என்று ஆகிவிட்டது. நிலைய வித்வானின் சொந்த சாஹித்யத்துக்கு என்ன குறைச்சல்? நல்லாதானே வாசிக்கிறார்….Oh! No! ….சமைக்கிறார்! ஸ்ரீராமின் கற்பனைக் குதிரை புல்லை மேயப் போயிருக்கிறதாம். பின்ன அடுத்த  கற்பனை வருவதற்குள் வயிற்றுக்குச் சிறிது ஈயப்பட வேண்டாமோ. வந்ததும் நல்லா வேகமா ஓடும்.

So, ஸ்ரீராம், உங்களுக்கு அடுத்த கற்பனை தயாராகிடும். சமையலறைக்குப் போய் ஏதாவது கைக்கு அகப்பட்டதைப் போட்டு வித்தியாசமா சமைச்சு தயாரா இருங்க. உங்க கற்பனைக் குதிரை சமையலறைக்குள் வரதுக்குள்ள …….

இந்தாங்க பிடிங்க இந்த வாரம் எபி சமையலறையில் Star fruit வைச்சு செய்முறை. Wait a minute! முதல்ல இதுக்குத் தமிழ்ல என்ன பெயர்னு கூகுளிடம் கேட்டுவிட்டு வரேன்.

“ஹலோ கூகுள் Star Fruit க்குத் தமிழ்ல என்னன்னு சொல்வாங்க?”

"விளிம்பிப்பழம், தமரத்தம் அல்லது தம்பரத்தம் (Carambola, starfruit) என்பது விளிம்பி மரத்தின் பழமாகும்."

நன்றி விக்கி!, கூகுள்! விளிம்பிப் பழம் பெயர் நல்லாருக்குல்ல. அப்படியே சொல்லிக்குவோம். தலைப்பும் அப்படி வைச்சா "என்னாது இதுன்னு" யோசிச்சு எட்டிப் பார்க்கலாம் இல்லையா அதான்!!!

இது பழம்னா மஞ்சள் நிறத்தில் இருக்கும். அதுவும் பெரிய பழங்கள்னா இனிப்பும், சிறிது புளிப்புமாக, நீர்ச்சத்து அதிகமாக இருக்கும். இளம் பச்சையாக இருக்கும் போது புளிப்பு தூக்கலாகவும் இனிப்பு கொஞ்சமாகவும் இருக்கும்.

இதை முன்னரே பார்த்திருக்கிறேன் என்றாலும், இங்கு பங்களூர் வந்துதான் அதிகமாகப் பார்க்கிறேன். பழமும்  காயும். ஆனால் பெரும்பாலும் இளம் பச்சை நிறத்தில் மஞ்சள் பூசினாற்போல பச்சையும் மஞ்சளுமாக (நல்ல Combination இல்லையா! நான் புடவை கட்டுவது அபூர்வம் என்றாலும் மஞ்சளில்/Mustard வண்ணத்தில் பச்சை பார்டர் சேலைகள் ரொம்ப நல்லாருக்கும்!)

சமையலறைக்குள்ள என்ன புடவைய பத்தி பேச்சு? No diversion! - திங்க director நம்ம ஸ்ரீராம்தான்!!!

வந்த புதிதில் எப்படி இருக்கும் என்று பார்க்க வாங்கியாச்சு. விளம்பிப்பழத்தைதான். பச்சை மாமேனியில் மஞ்சள் பூசினாற் போல இருந்தது. நினைத்தது போல் புளிப்புதான். மாங்காயின் சுவை இல்லை என்றாலும் பிடித்திருந்தது. உப்பு போட்டும் அல்லது உப்போடு காரமும் பெருங்காயம், வெந்தயப்பொடி போட்டு கடுகு தாளித்துச் சேர்த்து  மாங்காய் ஊறுகாய் போலச் சாப்பிடலாம். Salad இல் சேர்க்கலாம். ரசம் செய்யலாம். சாம்பார் செய்யலாம், பழமாக இருந்தால் அப்படியே சாப்பிடலாம், Smoothie செய்யலாம்.. பழரசம் செய்யலாம். இப்படி நிறைய லாம் கள்.

வேறு என்ன செய்யலாம் என்ற யோசனையில் இதையே எலுமிச்சை சாதம், மாங்காய் சாதம் அல்லது புளியோதரை போன்று புளிப்புக்குப் பதிலாக இதைச் சேர்த்து செய்து பார்த்தாலென்ன என்று விளைந்ததுதான் விளிம்பிப்பழயோரை/ ஹோரா – Star Fruit ஹோரா! விளிம்பிப்பழ சாதம்! வேறொரு நாளில் எலுமிச்சை சாதம் செய்வது போல் செய்தேன்.

நன்றாகக் கழுவி தண்ணீர் வடிந்த பின் இதன் விளிம்பு (ஓ அதான் தமிழ்பெயர்க்காரணமோ!!) போல இருக்கும் பாகங்களின் நாரை உரித்து எடுத்துவிடுங்கள். (படத்தில்) உங்களுக்கு ஒரு புதிர். படத்தில் எத்தனை இருக்கின்றன என்பதை எண்ணிச் சொல்லுங்கள்! அத்தனையும் எடுத்துக் கொண்டேன்!.

அதன் பின் குறுக்காக மெலிதாக நறுக்கிக்கோங்க. (படம்) நட்சத்திர வடிவம் தெரிகிறதா? ஹப்பா Star Fruit பெயர்க்காரண justification ஆகிடுச்சு.

புளிப்பு குறைவு என்று தோன்றினால் சின்ன அருநெல்லிக்காய் அளவு புளியை ரெண்டு மேசைக்கரண்டி தண்ணீர் விட்டுக் கெட்டியாகக் கரைத்துக் கொள்ளுங்கள். நான் சேர்த்தும் சேர்க்காமலும் செய்வதுண்டு. ஆனால் இங்கு இந்தச் செய்முறையில் புளி சேர்க்காமல் செய்தேன்.

கிட்டத்தட்ட புளியோதரைக்குச் செய்வது போல் இந்த எண்ணிக்கைக்கு 1 தேக்கரண்டி வெந்தயத்தை வெறும் வாணலியில் பொன்னிறமாக வறுத்துக்கோங்க. பெருங்காயக் கட்டி என்றால் 2 புளியங்கொட்டை அளவு எடுத்து வெறும் வாணலியில் பொரித்துக் கொள்ளுங்கள். நான் பெருங்காயப் பொடி பயன்படுத்தியதால் 1 தேக்கரண்டி எடுத்துக் கொண்டு அதை வெந்தயத்தோடு கடைசியில் போட்டுக் கொண்டேன் பெருங்காயம் வறுபட அந்தச் சூடு போதும் என்பதால். இரண்டையும் ஆறியதும் பொடிச்சுக்கோங்க.

அடுத்தாப்ல வாணலில 1 தேக்கரண்டி நல்லெண்ணை விட்டு அதில் உங்கள் காரத்திற்கு ஏற்ப வற்றல் மிளகாய் - நான் 3 எடுத்துக் கொண்டேன். அதோடு 1 தேக்கரண்டி உளுத்தம் பருப்பு, 1 தேக்கரண்டி கடலைப்பருப்பு போட்டு பொன்னிறமாக வறுத்து எடுத்து வைத்துக் கொள்ளுங்கள். ஆறியதும் பொடித்து வைத்துக் கொள்ளுங்கள்.

பொடித்து வைத்தவை எல்லாம் அப்பால இருக்கட்டும், இப்ப வாணலில/சட்டில 3/4 மேசைக்கரண்டி நல்லெண்ணை விட்டுக்கோங்க. எண்ணை சூடானதும் 1 வற்றல் மிளகாயைச் சின்ன சின்னதாகக் கிள்ளிப் போட்டு அவை நன்றாகச் கருஞ்சிவப்பாக வரப்ப, 1/2 தேக்கரண்டி கடுகு, 1 தேக்கரண்டி உளுத்தம் பருப்பு, 1 தேக்கரண்டி கடலைப்பருப்பு தாளித்து எல்லாம் சிவந்து வரும் போது 

நறுக்கி வைத்திருக்கும் பழ/காயின் துண்டுகளைச் சேர்த்து வதக்கவும். 

தாளிக்கும் போது கறிவேப்பிலை சேர்த்துக்கொள்ளலாம். நான் கறிவேப்பிலை கொஞ்சம் காய்ந்தாலும் அதை அப்படியே பொடித்துச் சேர்ப்பதுண்டு நல்ல மணமாக இருக்கும். காய்ந்த இலைகளைத் தூர எறிவதில்லை. பொதுவாகவே நான் புளியோதரை செய்யும் போது தாளிக்கும் போது சேர்க்காமல் எண்ணை பிரிந்து வரும் சமயம்தான் கறிவேப்பிலை சேர்ப்பது வழக்கம்.

1/4தேக்கரண்டி மஞ்சள் பொடி சேர்த்து, தேவையான உப்பும் போட்டுக் கலந்து வதக்கவும்.

நன்றாக வதங்கி வரும் வேளையில் பொடித்து வைத்திருக்கும் பொடிகளை எல்லாம் சேர்த்து நன்றாகக் கலந்து 

ஒரு 10 நிமிடத்தில், சுருண்டு வரும் பக்குவத்திற்கு வந்ததும் அடுப்பை அணைத்துவிடலாம். 

அவ்வளவுதான். இனி உதிர வடித்த சாதத்தில் தேவையான அளவு போட்டுக் கலக்க வேண்டியதுதான். இதோ கலந்த சாதம். விளிம்பிப்பழயோதரையை விளம்பியிருக்கிறேன்! ENJOY!

எத்தனை Star fruits அந்தத் தட்டில் இருக்கின்றன என்று சரியாகச் சொல்றவங்களுக்கு ஒரு Plate விளிம்பிப்பழயோதரை பரிசு! 

கீதா உனக்கு எங்க மேல என்னம்மா கோபம்! இப்படி வைச்சு செய்யறியே!!!!!