எந்தெந்த விஷயங்களில் தன்னிச்சையாக முடிவெடுக்கலாம்?

 

 பானுமதி வெங்கடேஸ்வரன்: 

குடும்பத்திலும்,வெளி வட்டாரத்திலும் எந்தெந்த விஷயங்களில் தன்னிச்சையாக முடிவெடுக்கலாம்? எவையெவற்றில் மற்றவர்களை கலந்து முடிவெடுக்க வேண்டும்?

# யாரையும் பாதிக்காத விஷயங்களில் தீர யோசித்து நாமே ஒரு முடிவு எடுக்கலாம். 

மற்ற விஷயங்களில் - பாதிக்கப்படும் நபர் அல்லது அவருக்கு நெருக்கமான நபர்கள் இவர்களைக் கலந்து ஆலோசித்து முடிவெடுப்பது சரியாக இருக்கும் அல்லது பிரச்சனைகள் எதுவும் தோற்றுவிக்காததாக இருக்கும் .

நம் நெருங்கிய உறவினர்கள், நண்பர்கள் பலரிடம் பல நல்ல குணங்களை பார்த்தாலும், அவற்றை கடைப்பிடிக்க நாம் ஏன் முயலுவதில்லை?

& அப்படி முயலாமல் இருப்பதாக எனக்குத் தோன்றவில்லை. நான் பொதுவாக நண்பர்கள், உறவினர்களிடம் நான் காணும் எனக்குப் பிடித்த நல்ல குணங்களை நானும் கடைபிடிப்பேன். 

= = = = = = =

எங்கள் கேள்விகள் : 

கீழ்க்கண்ட இரண்டிரண்டு பொருட்களில் உங்கள் தேர்வு அல்லது பிடித்தது எது? ஏன்? 

1) பெரிய கடுகு, சிறிய கடுகு 

2) பெரிய வெங்காயம், சிறிய வெங்காயம் 

3) (மக்காச்) சோளக் கொண்டை, பேபி கார்ன் 

4) மாங்காய், மாவடு 

5) பெரிய உருளைக்கிழங்கு, பேபி பொட்டேட்டோ 

= = = = =   =

KGG பக்கம் : 

JTS ஆசிரியர்கள் பற்றி ஒவ்வொருவாராகக் குறிப்பிட்டு வருகிறேன். 

இரண்டாம் வருட படிப்பின் போது வரலாறு / புவியியல் மற்றும் ஆங்கிலம் இரண்டுக்கும் ஒரே ஆசிரியர். துரைராஜ் என்று பெயர். இரண்டு பாடங்களையும் நன்றாக சொல்லிக்கொடுத்தார். எப்பொழுதும் சாந்தமாகவே பாடம் நடத்துவார். 

சில சமயங்களில் கோபம் வரும்போது - " என்னை கோபமூட்டாதீர்கள்; நான் ராமநாதபுரம் மாவட்டத்தைச் சேர்ந்தவன். கோபம் வந்தால் - எங்கள் மாவட்டத்துக்காரர்கள் அருவாளைத் தூக்குபவர்கள். அப்படித் தூக்கினால் கொலை செய்யவும் அஞ்சமாட்டார்கள். நானும் அப்படித்தான்" என்பார். 

புவியியல் பாடத்தில் / பரிட்சையில் அவர் அடிக்கடி கேட்கும் கேள்வி : " சென்னை, பெங்களூர் மற்றும் மங்களூர் இவை மூன்றும் கிழக்கு மேற்காக ஏறக்குறைய ஒரே நேர்கோட்டில் அமைந்துள்ளன. ஆனால் பெங்களூர் மற்ற இரண்டு இடங்களையுமவிட எப்பொழுதும் குறைந்த சீதோஷ்ண நிலையிலேயே எப்பொழுதும் இருக்கிறது. இதன் காரணம் என்ன? " 

அதற்கான காரணத்தையும் அவரே விளக்கினார். அதை நான் கெட்டியாகப் பிடித்துக் கொண்டேன்! அதாவது 'கடல் மட்டத்திற்கு மேலே செல்லச் செல்ல, வெப்பம்  ஒவ்வொரு முன்னூறு அடி உயரத்திற்கும் ஒரு டிகிரி celcius குறையும். பெங்களூர் கடல் மட்டத்தைவிட மூவாயிரம் அடிகள் மேலே அமைந்துள்ளது. எனவே பெங்களூர் -  சென்னை, மங்களூர் போன்ற கடல் மட்ட நகரங்களைவிட குறைந்த சீதோஷ்ண நிலையில் உள்ளது' ஒவ்வொரு பரிட்சையிலும் இந்த பதிலை எழுதி முழு மதிப்பெண்கள் பெற்றேன். கேள்விகள் கொஞ்சம் மாற்றம் இருக்கும். Why Ooty is cooler than Coimbatore? போன்று சிறிய மாற்றங்கள் இருந்தாலும் விடை ஒன்றுதான்! 

பெங்களூர் குளிரை அனுபவிக்கும் இந்த நாட்களில் ஆசிரியர் துரைராஜ் ஞாபகம் அடிக்கடி வரும். சென்னை, பெங்களூர் மங்களூர் உட்பட எல்லா ஊர்களையும் பார்த்ததும்  அவற்றின் சீதோஷ்ண நிலையை உணர்ந்ததும் எனக்கு வாய்த்தது அதிசயமே! 

அவருடைய காலத்தில்தான் நான் சோசியல்ஸ்டடீஸ் பாடத்தில் நூற்றுக்கு தொன்னூற்று ஐந்து மதிப்பெண்கள் எல்லாம் வாங்கி  அசத்தினேன். 

ஆங்கிலப் பாடத்திலும் ஒவ்வொரு வார்த்தைக்கும் அதற்குரிய தமிழ்ச் சொல் கூறி விளக்குவார். to - என்றால் க்கு என்பதை சொல்ல அவர் கூறிய விளக்கம் : " when you say " give 2 idlies to the child " it means பாப்பாவு'க்கு' இரண்டு இட்லி கொடு. - இதில் உள்ள 'க்கு' என்பதுதான் ஆங்கிலத்தில் 'to'. எவ்வளவு எளிய விளக்கம் ! இப்பொழுதும் ஞாபகம் இருக்கிறது. எப்பொழுதும் ஞாபகம் இருக்கும். 

= = = = = = =