நான் தரிசனம் செய்த கோயில்கள் – ஐந்து துவாரகைகள் யாத்திரை – பகுதி 32 : நெல்லைத்தமிழன்

 

மதியம் 1 ½ மணிக்கு ஆக்ராவிலிருந்து புறப்பட்ட எங்கள் பேருந்து சுமார் 4 மணிக்கு கோகுலத்தை அடைந்தது.  கோகுலம் கிராமம் யமுனை நதிக்கரையில் இருக்கிறது.  கோகுலத்தின் நுழைவாயிலை அடைவதற்கு முன்பு சாதாரண பாதையில் நடக்கிறோம். இரு புறமும் வளையல், இனிப்பு, படங்கள் போன்ற கடைகள் இருக்கின்றன.

பேருந்து நிறுத்திய இடத்திலிருந்து நடந்து சென்றோம். கோகுலம் கிராமத்தின் நுழைவாயில். நினைவிருக்கட்டும்…இந்தக் கிராமம் யமுனை நதிக் கரையில் அமைந்துள்ளது. அக்கரையில் சிறிது தூரத்தில் மதுரா நகரம்.

வளையல், ஜால்ரா கடைகளைத் தவி கணிசமான அளவில் இனிப்புக் கடைகளும் இங்கு உள்ளன. இங்கு வசிக்கும் மனிதர்களைவிடப் பசுக்கள் அதிகமாம். அதனால் பாலுக்கும் அது சார்ந்த இனிப்புகளுக்கும் பஞ்சமில்லை.

வழியில் பார்த்த ஒரு கோசாலை (பசுக்களைப் பராமரிக்கும் இடம்). கோகுலத்தில் மனிதர்களைவிட பசுக்களின் எண்ணிக்கை அதிகமாம்.

சிறிய சந்துகளாக இருக்கும் பாதை வழியாக நாங்கள் நடந்து சென்றோம். சுவர்களை பகவான் ஸ்ரீகிருஷ்ணர் சம்பந்தமான படங்கள் அலங்கரித்தன.

சுமார் பத்து நிமிடங்கள் நடந்தால் யமுனை நதிக்கரை தெரியும் இடத்தை அடையலாம். சிறிய சந்துகளாக இருந்தாலும், சுவரெங்கும் பகவான் ஸ்ரீகிருஷ்ணனை நினைவுபடுத்தும் விதமான பெரிய அளவு சுவரோவியங்கள். வடநாட்டில், எந்த ஒரு புனித இடத்திற்கும், கோவில் முக்கியமான இடம் கிடையாது. அந்த மண்ணை மிதித்தாலே நமக்கு அந்த இத்திற்குப் போனதற்கான பலன் கிடைத்துவிடும். கோகுலம், கோவர்தன், பிருந்தாவனம், நைமிசாரண்யம் போன்ற பல இடங்களில் அப்படித்தான். கிருஷ்ணன் தவழ்ந்து விளையாடிய கோகுலம் மண்ணை மிதித்ததே எங்களுக்குப் புல்லரித்தது. 

எவ்வளவு அழகாக யமுனை நதி இருக்கிறது பாருங்கள்… அமைதியான இந்த நதியினில் ஓடத்தில் சென்றால் எவ்வளவு அழகாக இருக்கும்.  நள்ளிரவில், சிறைக்காவலர்கள் மயக்கத்தில் கிடக்க, வசுதேவர், தன் குழந்தையைத் தலையில் ஏந்திக்கொண்டு, ஆதிசேஷன் குடை போல குழந்தை கிருஷ்ணரைப் பாதுகாக்க, இந்த யமுனை நதியைத் தாண்டித்தான் கோகுலத்திற்கு வந்தார்.

அழகான யமுனை என்று கண் வைத்துவிடாதீர்கள். ஒரு முறை சென்றிருந்தபோது இந்த யமுனை ஆற்றின் நிலையைப் பார்த்தேன். அதனை அடுத்த வாரம் பகிர்கிறேன். நமக்கு நீர்நிலையை விட சுயநலமே மிகப் பெரிது என்று காட்டுகின்ற படங்கள் அவை.

கோகுலத்தில் இது முக்கியமான படித்துறை. 

இந்த இடத்திற்கு வந்து சேர்ந்ததும், கோகுலத்தைச் சேர்ந்த ஒருவர், கோகுலத்தின் புனிதத் தன்மையையும், வரலாற்றையும், கிருஷ்ணன் மதுராவிலிருந்து யமுனை ஆற்றைத் தாண்டி இரவில் வசுதேவரால் கொண்டுவரப்பட்டதையும், கோகுலத்தில் வளர்ந்ததைப் பற்றியும் சொன்னார். பிறகு அங்கிருந்து கோகுலத்தில் நந்தகோபர் மாளிகை இருந்ததாக நம்பப்படும் இடத்திற்குச் செல்கிறோம். இதுவும் சில நிமிடங்கள் நடக்கும் தொலைவில் இருக்கிறது. ஆனால் எல்லாமே சந்துகள்தாம்.

வழியில் யோகமாயா பிறந்த இடம் (ஜன்மஸ்தான்) என்று ஒரு இடத்தைப் பார்த்தோம். உள்ளே செல்லவில்லை. இவரைத்தான் வசுதேவர், கிருஷ்ணனுக்குப் பதிலாக மதுரா சிறைக்குத் தூக்கிச் செல்லப்போகிறார்.

சென்ற பாதையின் தோற்றம் (சந்துகள் என்று குறிப்பிட்டேனே அது). இங்கு பாதைகளில் பளிங்கு டைல்ஸ் பதித்திருக்கிறார்கள், அதற்கான பணத்தைத் தந்து உதவியர்களின் பெயரோடு.

நாம் நந்தபவனுக்கு வந்து சேர்ந்துவிட்டோம்.  இந்த இடத்தில்தான்  நந்தகோபர் மாளிகை இருந்த தாம் (இதெல்லாம் நம்பிக்கையின்பாற்பட்ட து)

இந்த வாரப் பகுதியை படங்களின் எண்ணிக்கையை மனதில் கொண்டு நிறுத்திக்கொள்கிறேன். நாம் இங்கு பார்க்கப்போவது குழந்தை கிருஷ்ணர் சன்னிதி.  இதைப்பற்றி அடுத்த வாரம் நாம் பார்க்கலாம். ஆனாலும் அந்த சன்னிதியின் படத்தைப் போட்டு இந்தப் பதிவை முடிக்க நினைக்கிறேன். நம்மை அந்த கிருஷ்ணர் காக்கட்டும்.

 (தொடரும்)