மஸால் தோசை 50 பைசா

 இந்நாளில் 50 பைசா புழக்கத்தில் இருக்கிறதா, தெரியவில்லை. 

கூடிய விரைவில் ஒரு ரூபாய் நாணயம் கூட வழக்கொழிந்து போகலாம்.  ரூபாய் அளவில் ஒரு ரூபாய், இரண்டு ரூபாய் எல்லாம் கூட உபயோகத்தில் இல்லை.  ஐந்து ரூபாய் நோட்டு  புழக்கத்தில் இருக்கிறதா என்றும் தெரியவில்லை.  கண்ணிலேயே படுவதில்லை.  புதிய வகை ஒரு ரூபாய் நோட்டை நான்கு வருடங்களுக்கு முன் என் மாமா என்னிடம் கொடுத்த நினைவு இருக்கிறது.

இந்த ரசீதை வாட்ஸாப்பில் கொஞ்ச நேரம் பார்த்துக் கொண்டிருந்த நண்பன் "ஐந்து முதல் ஒன்பது வரை..  ஆனால் ஏழு இல்லை" என்றான்.

இந்த ஹோட்டல் ரசீது வழங்கப்பட்ட நாளில் பத்து பைசா அஞ்சு பைசா, ஏன் மூன்று பைசா இரண்டு பைசா கூட வழக்கத்தில் இருந்தது.  ஹோட்டல் பெயரைப் பார்த்தால் கொஞ்சம் காஸ்ட்லி ஹோட்டல் போல தெரிகிறது!  ஸ்டார் ஹோட்டலோ என்னவோ...  இன்றைக்கு 53 வருடங்கள் ஆகி விட்டன!  அப்போது நான் பிறந்திருக்கக் கூட மாட்டேன்.  

இப்போது கூட இந்தப் பெயரில் சோழிங்கநல்லூரில் ஒரு ஹோட்டல் இருக்கிறது.

கவனியுங்கள்..  ஒரு மசாலா தோசை 50 பைசா...   ஒரு காஃபி 50 பைசா...  காஃபி விலை அதிகம் என்பதிலிருந்துதான் இது ஸ்டார் ஹோட்டலாயிருந்திருக்கக் கூடும் என்று அவதானித்தேன்!  இப்போதெல்லாம் காஃபி A2B யில் 37 ரூபாய்க்கு கிடைக்கிறது...  அது என்ன 37 ரூபாய் கணக்கோ...   35 அல்லது 40 என்றில்லாமல்!  சத்தமாக சொல்லக் கூடாது...  நேயர்களின் எதிர்பார்ப்பு என்று மாற்றினாலும் மாற்றி விடுவார்கள்.  என்ன சொல்ல வருகிறேன் என்றால் காஃபி 37 ரூபாய் என்றால் மசால் தோசை 120, 130 ரூபாய்.  அப்போது இரண்டும் ஒரே விலை!  ஏன், எப்படி?  எதற்கு?!    இப்போது மஸால் தோசை என்றுதானே சொல்கிறோம்?  ஏன் அப்போது மசாலா தோசை என்று விளம்பி இருக்கிறார்கள்?!  'விளம்பி' க்கு இரண்டு பொருள் உண்டு தெரியுமோ?

அந்தக் காலத்தில் மாச சம்பளமே 150 ரூபாய்தான் இருந்திருக்கும்! இப்போது வாங்கும் தோசை விலை அப்போதைய மாசச்சம்பளம் என்றால் பார்த்துக் கொள்ளுங்கள்.  அப்படியே போனால் சிலபல வருடங்கள் கழித்து தோசை நாற்பதாயிரம், ஐம்பதாயிரம் என்று விற்குமோ என்னவோ...  என்றால், ஒரு நடுத்தர குடும்பம் வாங்கும் சம்பளம் எவ்வளவு இருக்கும் என்று கற்பனை செய்து கொள்ளுங்கள்!

இதில் பாருங்கள், அந்த ரசீதில் முகவரி இல்லை.  Paid என்று சீல் போடப்பட்டு 2.16 என்று குறிப்பிடப்பட்டிருக்கிறது.  இரண்டு ஒரு ரூபாய் ஒரு பத்து பைசா, ஒரு ஐந்து பைசா அல்லது மூன்று இரண்டு பைசாவோ, இரண்டு மூன்று பைசாவோ கொடுக்கப் பட்டிருக்கலாம்.  இரண்டு பேர் சாப்பிட்டிருக்கிறார்கள்.  ஆளுக்கொரு மசாலா தோசை, காஃபி.  இடது புறம் பாருங்கள்...  No Tips Please என்று அச்சிட்டிருக்கிறார்கள்.  டிப்ஸ் கொடுக்கும் வழக்கம் இருந்தது.  அதேபோல இவர்கள் அதை வேண்டாம் என்று சொல்லும் நேர்மை இருந்திருக்கிறது.

இரண்டு ரூபாய்க்கு 10+6 பைசா வரி...பரவாயில்லையா?! சாப்பிட்டவர்கள் பணம் கொடுத்து விட்டு வெளியில் வந்து, பஸ் பிடித்து, ஏழு பைசா அல்லது எட்டு பைஸா டிக்கெட் வாங்கி வீடு சென்று சேர்ந்திருப்பார்கள்!!

கணினி ரசீது இல்லாமல் கையால் எழுதப்பட்ட ரசீது.  இப்போது அதுவே ரொம்ப அபூர்வம்!  சர்வர் என்பவர் காதில் பென்சிலுடன் சுற்றி வருவார்.  செல்லம் ஜோக்ஸ் படங்களில் பார்த்திருப்பேர்கள்!  செல்லம் குமுத ஓவியர்.

குமுதம் என்றதும் நினைவுக்கு வருகிறது.  

ஜீவி ஸார் தன் வலைத்தளத்தை (பூவனம்) மீண்டும் திறந்து குமுதம் என்று ஒரு தொடர் ஆரம்பித்திருக்கிறார், தெரியுமோ?  எனக்கும் நெல்லைக்கு, JKC சாருக்கு. கோமதி அக்காவுக்கு தெரியும்!

=============================================================================================

கல்கத்தா டு லண்டன் பஸ் பதிவில் சேர்க்க எடுத்து வைத்த படம்.  எங்கோ உள்ளே பாதுகாத்து வைத்ததில் சேர்க்க விட்டுப்போய் விட்டது.  இப்போது கண்ணில் பட்டது.   விடுவானேன்...?  இணையத்தில் பார்த்த இந்தப் படத்தை வைத்துதான் மேல்விவரங்கள் தேடிப் படித்தேன். 

பதிவில் சேர்க்க படங்களை தனியாகவும், டெக்ஸ்ட் தனியாகவும் சேர்த்து வைப்பது வழக்கம்.  மாறாமல் இருக்க இரண்டுக்கும் ஒரே பெயர் கொடுத்திருப்பேன்.  அப்படியும் விட்டுப்போவதும், தேடுவதும் வாடிக்கை!

இவருக்கு எந்த அடையாளமும், பெயரும் கொடுக்கவில்லை.  இவர் யார்?  தெரிந்தால் சொல்லுங்கள்.  உள்ளே ஏதாவது டெக்ஸ்டில் இவர் சம்பந்தமாக ஏதாவது சேமித்திருக்கிறேனா என்று பார்க்கிறேன்!  S L பைரப்பாதானே இவர்?  எனில், கொஞ்சம் வைத்திருக்கிறேன்!

********************************************************************************************************************

நியூஸ் ரூம் 

பானுமதி வெங்கடேஸ்வரன் 

- உக்ரைன் போர் நிவாரணத்திற்கு 50 டாலர் நன்கொடை கொடுத்த குற்றத்திற்காக அமெரிக்க வாழ் ரஷ்ய பெண்ணுக்கு 12 ஆண்டுகள் சிறை தண்டனை விதித்து ரஷ்ய கோர்ட் தீர்ப்பளித்தது.  அமெரிக்க வாழ் ரஷ்யா நாட்டை சேர்ந்தவர் கேஸினியா கரேலினா,33, அமெரிக்காவின் லாஞ் ஏஞ்சல்ஸ் நகரில் பாலே நடன கலைஞராகவும், ‛ஸ்பா' மசாஜ் சென்டர் ஊழியராக உள்ளார்.  ரஷ்யா உக்ரைன் மீது போர் நடத்தி வரும் நிலையில், அமெரிக்காவின் நியூயார்க்கில் செயல்பட்டு வரும் அறக்கட்டளை அமைப்பு உக்ரைன் நிவாரணத்திற்கு நன்கொடை வசூலித்து தருகிறது. இந்த அமைப்பிற்கு கேஸினியா கரேலினா 50 அமெரிக்க டாலர் நன்கொடையாக வழங்கினார்.  இதையறிந்த ரஷ்ய அரசு அவர் மீது சட்டத்திற்கு புறம்பாக நிதி வழங்கியதாக வழக்குப்பதிவு செய்தது. சமீபத்தில் தனது குடும்பத்தினரை பார்க்க ரஷ்யா வந்த கேஸினியா கரேலியா கைது செய்யப்பட்டார். உள்ளூர் கோர்ட்டில் நடந்த விசாரணையில் அவருக்கு 12 ஆண்டுகள் சிறை தண்டனை விதித்து தீர்ப்பளித்தது.

- மத்திய பிரதேசம் மாநிலம் தார் மாவட்டத்தில் உள்ள பாக்கனேர் போலீஸ் ஸ்டேஷனுக்கு வந்த 5 வயது சிறுவன், தன் அப்பாவுக்கு எதிராக புகாரளிக்க வந்ததாக கூறியுள்ளான். இதனை கேட்ட போலீசார் ஆச்சரியத்துடன், என்ன மாதிரியான புகார் என விசாரித்தனர். அதில், சாலை அருகே செல்லக்கூடாது, ஆற்றுக்கு அருகே செல்லக்கூடாது என தினமும் தன் தந்தை திட்டுவதாகவும், அதற்காக அடிப்பதாகவும், அவரை கைது செய்து சிறையில் அடையுங்கள் என்றும் கோபமாக கூறுகிறான்.

- கோபா பெரு கால்பந்து போட்டியில் atletico awajun அணியும், Canttorcillo FC அணியும் மோதின. போட்டி விறுவிறுப்பாக நடந்து கொண்டிருந்தது. ஆட்டத்தின் 71வது நிமிடத்தில் atletico awajun அணி வீரர் செபாஸ்டியன் முனோஸ் என்பவர் திடீரென எல்லைக் கோட்டை தாண்டி வெளியில் சென்றார்.  அடுத்த சில நொடிகளில் அனைவர் முன்னிலையில் அவர் சிறுநீர் கழிக்க ஆரம்பித்துள்ளார். எதிர்பாராத அவரின் இந்த செயலை கண்ட எதிரணி வீரர்கள் ஆட்ட நடுவரிடம் புகார் தெரிவித்தனர். உடனடியாக செயல்பட்ட அவர், செபாஸ்டியன் முனோசை எச்சரித்தார். அடுத்த சில நொடிகளில், சட்டை பையில் இருந்த சிவப்பு அட்டையை எடுத்துக் காட்டி உடனடியாக ஆட்டக்களத்தில் இருந்து வெளியேறுமாறு கூறினார்.

- நாளுக்கு நாள் பயணிகள் எண்ணிக்கை அதிகரித்துக் கொண்டே வரும் சூழலில் மெட்ரோ ரயில் பெரும் வரப்பிரசாதமாக அமைந்திருந்தது. இந் நிலையில் விரைவில் 2ம் கட்ட மெட்ரோ ரயில் வழித்தடத்தில் டிரைவர் இல்லாத ரயில்கள் இயக்கப்படுகின்றன. அதற்காக மொத்தம் 62 ரயில்கள் தயாரிக்கும் பணிகள் ஆந்திர மாநிலம் ஸ்ரீசிட்டியில் மும்முரமாக நடந்து வருகிறது.  அதன் அடுத்த கட்டமாக, 3 பெட்டிகளுடன் டிரைவர் இல்லாத மெட்ரோ ரயில் அடுத்த மாதம் சென்னைக்கு கொண்டு வரப்பட உள்ளது.

- கன்னட திரையுலகம் தற்போதிருக்கும் மந்த நிலையிலிருந்து மீண்டு வர வேண்டும் என்பதற்காக பிரும்மாண்டமான பூஜையையும், ஹோமத்தையும் கன்னட திரையுலகத்தினர் செய்துள்ளனர். இந்த செயல் ஆதரவு, விமர்சனம் இரண்டையுமே பெற்றிருக்கிறது. - தேர்வு விடைத்தாளில் சரியான விடை எழுதாமல், ஸ்ரீராமஜெயம் என்று எழுதுவதைப் போல இல்லை?

- பெங்களூரில் மனைவி தொல்லை தாங்க முடியாமல் வீட்டை விட்டு ஓடிய கணவன். இரண்டு வருடங்களுக்கு முன்பு மணம் செய்து கொண்ட பெண் ஏற்கனவே திருமணமாகி விவாகரத்தானவர், 12 வயதில் ஒரு பெண் குழந்தையும் உண்டு. திருமணத்திற்கு பிறகு அந்தப் பெண் தன்னை மிகவும் கட்டுப்படுத்தியதாகவும், வெளியே போய் ஒரு டீ குடிக்க கூட தனக்கு உரிமை இல்லை எனவும் கூறியிருக்கிறார். சிசிடிவி காமிரா ஃபுட்டேஜ்கள் பலனளிக்காத நிலையில் டில்லியில் தன்னுடைய செல்ஃபோனுக்கு புது சிம் கார்ட் மாற்றி பேசியதை வைத்து அவர் இருக்கும் இடத்தை ட்ரேஸ் செய்த போலீஸிடம் "வாட் நெக்ஸ்ட்? என்னை ஜெயிலில் வேண்டுமானாலும் போடுங்கள், வீட்டிற்கு மட்டும் திரும்பி வர மாட்டேன்" என்றாராம்- என்னம்மா? இப்படி பண்றீங்களேம்மா?

- சென்னை: யானைகள் தண்டவாளத்தை கடப்பதை செயற்கை நுண்ணறிவு மூலம் கண்டறிந்து, விபத்தை தடுக்க நடவடிக்கை. தென்னக ரயில்வே தகவல்.

- 40% மருத்துவ மாணவர்கள் மன அழுத்தத்திற்கு ஆளாகின்றனர்- தேசிய மருத்துவ ஆணையத்தின் ஆய்வு முடிவு. 

- பழைய நாணயங்களை வாங்குவதாக இணையத்தில் வந்த விளம்பரத்தை நம்பி ₹45000 இழந்திருக்கிறார் புதுச்சேரி இளைஞர்.

- இன்று நடிகர் விஜய் தொடங்கி உள்ள புதிய கட்சியின் கொடி அறிமுகமாகிறது.

- சத்தீஸ்கர் மாநிலம் முங்கெலி மாவட்டத்தில் நடந்த சுதந்திர தின விழாவில், எஸ்.பி., பறக்க விட்ட புறா, பறக்காமல் படுத்துக்கொண்டது. விழாவுக்கு வந்தவர்கள், சிரித்து விட்டதால் அவமானம் அடைந்த எஸ்.பி., புறாவுக்கு பொறுப்பு வகித்த அலுவலர்கள் மீது நடவடிக்கை எடுக்க கோரியுள்ளார்.

\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\

உங்களிடையே மட்டும் அல்ல எங்களிலும் உண்டு 

கைவிடப்பட்ட காட்சிகள்.  

இளமையில் உங்களை போலவே 

நாங்களும் பொலிவாய் இருந்தோம்.

எங்கள் இளமையைக் கொண்டாடியோர் 

அப்போது நாங்கள் காயம் படாமல் பார்த்துக் கொண்டார்கள். 

வீடு முழுவதும் வெளிச்சமாய் இருந்தது.  

குழந்தைகள் சத்தம் விடாது ஒலித்தது.  

விசேஷ நாட்கள் விதம் விதமாய் நிறங்கள் காட்டின.  

இரவுகளில் பாதுகாப்பான உறக்கம் நாடி 

எங்கள் மடியில்தான் தூங்கினார்கள்.

தினந்தோறும் சுத்தம் செய்தார்கள் 

வருடத்துக்கொருமுறை 

வண்ணம் தீட்டினார்கள்.

கதவுகளை 

கவனமாக தாழிட்டார்கள்.

ஊருக்கு சென்றாலும் பள்ளி அலுவலகம் சென்றாலும் 

எங்களைக் காண 

ஆவலுடன், தாகத்துடன், பாசத்துடன் ஓடி வந்தார்கள்.  

ஓய்வு கொண்டார்கள்.

எங்களை பிரிந்து வெளியே 

இருந்த நாட்களில் ஏக்கம் கொண்டாடினார்கள்.

எங்கள் தேவை அவர்களுக்கு இருந்தவரை 

நாங்களும் செல்வாக்காய்த்தான் இருந்தோம்.

எந்தப் புள்ளியில் எங்கள் தேவை அவர்களுக்கு குறைந்ததோ 

கொஞ்சம் கொஞ்சமாக ஒதுக்கப்பட்டோம்.

தங்கிய ஆட்கள் குறைந்தார்கள்.  

வேறிடம் தேடிச் சென்றார்கள்.  

புதிய பளபளப்பில் மயங்கினர்.

இங்கு வருவதைக் குறைத்துக் கொண்டனர்.

இங்கேயே இருந்தவர்கள் மறைந்தார்கள். 

இப்போது இருக்கும் 

இந்த நிலையை நாங்கள் 

கொஞ்சம் கொஞ்சமாய் அடைந்தோம்.

எங்கள் மடியில் பிறைந்தவர்களே 

எங்களைக் காண வருவதில்லை 

இப்போதெல்லாம்

வெளியிலிருந்தே விலைபேசுகிறார்கள் 

வெளியாருக்கு எங்களை விற்றுவிட  

இன்னும் கொஞ்ச நாள் கழித்து 

இப்போது நாங்கள் இப்படி இருக்கும் நிலை கூட 

உங்களால் காணமுடியாது போகலாம்.

நாங்கள் மண்ணோடு மண்ணாகலாம்.

புதிய உருவம் இங்கு உருவாகலாம்.

நினைவில் கொள்ளுங்கள்.  

இது உங்கள் ஆரம்பம்.

நீங்களும் அடைவீர்கள் 

இதுபோன்ற ஒரு இறுதி நாட்களை.  

சாபமல்ல, நிதர்சனம்.  

வாழ்க்கை தத்துவம்.

&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&

எழுத்தாளர் லதா அவர்கள் சென்ற ஆண்டு திருமணநாள் அன்று எழுதிய பதிவு...

37 வருடங்கள் இன்றுடன் திருமணம் நடந்து. இருவரும் பிரிந்து 21 வருடங்கள் ! 

வாழ்வு குறித்தான வருத்தங்கள் ஏதுமில்லை.  வாழ்வென்பதே அனுபவங்களின் கலவை தான் எனும்போது நான் நானாக இருக்கும் இந்நிலை அடைவதற்கு இந்தத் திருமணம் ஒரு முக்கிய காரணிதானே? ஆகவே இந்நாளையும் கொண்டாடும் மனநிலையில் தான் இருந்து கொண்டிருக்கிறேன் பல வருடங்களாக. இதற்கு முக்கிய காரணம் என் மகன் ....இந்நாளை நினைவு வைத்திருந்து அலுவலகத்திலிருந்து வரும் போதே எனக்குப்பிடித்த இனிப்பு, ஒரு விஸ்கி பாட்டில் என  வாங்கிவந்து வாம்மா கொண்டாடலாம் என்பான். இந்த கல்யாணம் இல்லனா நானும் ஆரண்யாவும் உனக்கு கிடைச்சிருக்க மாட்டோமில்ல? அப்போ கொண்டாடனும் தானே என்பான். அவரும் இந்நிலையை அடைந்திருந்தால் அவருடன் சேர்ந்தே கொண்டாடி இருப்பேன். (ஒரு முறை அதை செய்தும் இருக்கிறேன்). 

இருப்பினும் சில உண்மைகளை ஏற்றுத்தான் ஆகவேண்டும். திருமணத்தன்று மனதில் ஏற்பட்டது மகிழ்வல்ல. எதோ ஒரு பயம் கலந்த உணர்வுதான் இருந்தது எதோ தவறு செய்கிறேனோ என்று. இருப்பினும் வாக்கு கொடுத்துவிட்டேன். தவறக்கூடாதல்லவா?  (அப்படித்தானே பாடம் கற்பிக்கப்பட்டிருக்கிறோம்)

இனி சேர்ந்து இருக்க இயலாது என்று முடிவு செய்து வெளிநடப்பு செய்தபோது மனதில் ஏற்பட்ட நிம்மதி வேறொரு நிலை. அப்பாடா என்றிருந்ததே உண்மை! இன்று வரை அந்த நிம்மதி தொடர்கிறது. 

அதைக் கொண்டாட எனக்கு காலை வேளையில் சாப்பிடப் பிடித்த பொங்கல் வடையை ஒரு கை பார்த்து தொடங்கிவிட்டேன் இந்நாளை! 

 Happy wedding anniversary to me! 

-லதா

- நன்றி திரு R. கந்தசாமி, பேஸ்புக்.

%%%%%%%%%%%%%%%%%%%%%%%%%%%%%%%%%%%%%%%%%%%%%%%%%%%%%%%%%%%%%%%%%%%%%%%%

அண்ணா தமிழ்ச்சங்கம் பேச்சு...

" காளமேகத்தைப் போலக் கவி பாடினான் என்று எழுதாதீர்கள். காளமேகத்தைப் போல ஆகவேண்டுமானால் ஒரு காளி வேண்டும். அந்த கோவிலுக்கு அவன் போகவேண்டும். பிரசன்னமானதும் வாயைத் திறக்கச் சொல்லவேண்டும். திறந்த வாயிலே ஈட்டியால் எழுதவேண்டும் இவ்வளவு சிரமத்தை. அவனுக்குக் கொடுக்காதீர்கள். ஏன் நாமக்கல் கவிஞரைப்போல அற்புதமாகப் பாடினான் என்று எழுதுங்கள்.

ஆண்மையிலே பீமனைப் போல் எழுதவேண்டாம். அவினாசிலிங்கத்தைப்போல் ஆண்மை வேண்டும் என்று எழுதுங்கள். வியாசரைப் போல் எழுதினான் என்று எழுதாதீர்கள் – தோழர் டி.எஸ்.சொக்கலிங்கத்தைப்போல் எழுதினான் என்று எழுதுங்கள். சம்பந்தப்பட்டவன் உடனே புரிந்து கொள்ள இதுதான் சரியானவழி .

உங்கள் ஏட்டை அழுக்குத் துடைக்கும் துடைப்பம் ஆக்குங்கள் நாற்றம் எடுக்கும் குப்பைத் தொட்டியாக்கிவிடாதீர்கள்.

நான் சில பத்திரிக்கைகளைப் பார்க்கிறேன். பத்துப் பக்கம் மூடநம்பிக்கை என்ற தலைப்பில் சோதிடத்தை நம்பாதீர்கள். அது சுத்தப்புரட்டு. மக்களை அஞ்ஞானக் காரிருளில் ஆழ்த்தி வைக்கும் அறியாமை. அதில் ஆழ்ந்து விடாதீர்கள் என்று வாசார கோசரமாய் எழுதிவிட்டு பதினோராவது பக்கத்திலே, திருத்தணி ஜோசியர் உங்கள் ஜாதகத்தை அனுப்புங்கள். அற்புதமாகக் கணித்து அனுப்புவார் என்றிருக்கும். இது வயிற்றுப் பிழைப்புக்காக என்றால், அவர்கள் வாழ்வதிலும் சாவதுமேல்.

வ.ரா.சொன்னார். காதல் இல்லாவிட்டால் கதையே இல்லை என்று. அவரது கருத்து காதல் அதிகம் வரக் கூடாது என்பது. அதுவல்ல உண்மை; பழைய புராணிகர்களிலிருந்து இன்றைய மறுமலர்ச்சி எழுத்தாளர்கள் வரை காதலைப் பற்றி எழுதுகிறார்கள். ஆனால் அவர்களுக்கும் இவர்களுக்கும் ஒரு வித்தியாசம்.

அன்றிருந்தவர் ஆரத்தழுவாயோ என்று ஆரம்பித்தார். தழுவல் காதலிலே பிறக்கிறது. ஆரத் தழுவாயோ என்று ஆரம்பித்தால் உலகை மாயையாக்கும் வைதீகக் கூட்டங்கள் அடிக்க வந்துவிடுமே என்ற பயந்தார். அரங்கனே என்று முடித்தார்.

இன்று பகுத்தறிவு ஆக்கம் பெற்றுவிட்டது. எழுத்தாளர்கள் பகிரங்கமாகக் காதலைப்பற்றி எழுதுகிறார்கள். ஆனால் அதில் பழமை வாடை வீசுகிறது.

கமலா விதவை; பிராமணப் பெண். நாராயணன் அழகன்; முதலியார் பையன் – இருவரும் காதலித்தார்கள் கல்யாணம் செய்துகொண்டார்கள். சாதிக் கட்டுப்பாடுகள் உறுமின; தகர்த்தெறிந்தார்கள், என்று முடியுங்கள் கதையை பெயருக்குப் பின்னால் வரும் சாதி வால்களை அறுத்தெரியுங்கள் ! "

- 14 -12 - 1946 ல் , சென்னையில் நடந்த தமிழ் எழுத்தாளர் சங்க இரண்டாம் மாநாட்டில் அறிஞர் அண்ணா .

சந்திரன் வீராசாமி, பேஸ்புக். 

$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$$ 

இணையத்திலிருந்து நான் ரசித்ததை நீங்களும் ரசிக்க.....

==========================================================================================

நட்பதிகாரம்....

############################################################################################

இதுவரை பெயராக மட்டுமே என்னால் அறியப்பட்டவர்....

=======================================================================================

பொக்கிஷம்   :

சில ஓவியர்களின் புகைப்படங்கள்...