சோன்பப்டி

 உங்களுக்கு ஸ்வீட் வகையறாக்களின் எது ரொம்பப் பிடிக்கும்?

இந்தக் கேள்விக்கு யோசித்து நிறைய சொல்லலாம்.  ஆவின் போன்ற நிறுவனங்களால் பால் அல்வா என்று சொல்லப்படும் திரட்டுப்பால் முதல் வட இந்திய ஸ்வீட் வகைகள் சில.  உதாரணமாக பாஸந்தி அல்லது ரசமலாய்.  இந்த இரண்டுக்குமே என்ன பெரிய வித்தியாசம் என்று எனக்குத் தெரியாது.  அப்புறம் பெங்காலி ஸ்வீட்ஸ்.  ஆனாலும் அவையும் அதிகம் சாப்பிட்டால் அலுத்துப் போகும்.  ஆமாம், திரட்டுப்பாலை திரட்டுப்பால் என்று சொல்லாமல் பால் அல்வா என்று ஏன் சொல்கிறார்கள்?  ஆனாலும் வீட்டில் என் பாட்டி செய்யும் திரட்டுப்பாலுக்கு ஈடாகாது இதெல்லாம்...

ரசகுல்லாவை எல்லோரும் சிறப்பித்துச் சொல்வார்கள்.  ஆனால்  நீண்ட நாட்களாக அதன் பெயரை மட்டுமே அறிந்து, கைக்கு வராத காலங்களில் அதன்மேல் தவறான ஒரு பெரிய எதிர்பார்ப்பு என் நாக்கில் நான் வைத்திருந்த காரணத்தினால், அது முதலில் என் நாக்குக்கு வந்ததும் அது அதை நிராகரித்தது.  "நான் நினைத்தது இதுவல்ல.  என் நினைவுக்குகளில் இருக்கும் சுவை வேறு.."

சில சமயங்களில் நம் எதிர்பார்ப்பே நமக்கு எதிரி.  இது இது இப்படிதான் இருக்கும், இப்படிதான் இருக்க வேண்டும் என்ற எதிர்பார்ப்புடன் எதை அணுகினாலும் ஏமாற்றம்தான் மிஞ்சும்.  இந்த விஷயம், சுவை அல்லாத மற்ற விஷயங்களில் ஏமாற்றம் தவிர, அது விரக்தியில், கோபத்தில்  முடியாமல் இருந்தால் நல்லது. (தத்துவம் எண் 98347213)

First Impression is the Best Impression என்பது போல  நம் நாக்குக்கு First cook is the best cook . நாவறியும் சுவைகளில் முதல் சுவை அம்மாவின் சமையல், அம்மாவின் கைப்பக்குவம்.  அதற்குப் பிறகு வெங்கடேஷ் பட்டே வந்து சமைத்தாலும் அது அம்மாவின் சமையலுக்கு இரண்டாம் பட்சம்தான் என்னும்போது மனைவியின் சமையலில் குற்றம் காண்பது மனித இயல்பு.  ஏன், அந்த மனைவியே கூட தன் அம்மாவின் சமையலை தான் முதலில் சிலாகிப்பார்.  என்ன சொல்கிறீர்கள்? 

ஆனால் பெரும்பாலான வீடுகளில் இன்று அம்மாக்கள் சமைக்கிறார்களா இல்லையா, தெரியாது!  சமையலுக்கு ஆள், தினமும் குழம்பும் கூட்டு, பொரியல் ரசம் மட்டும் ஆர்டரின் பெயரில் என்று வாங்கி ஓட்டினால் எந்தக் குழந்தை அதன் அம்மாவின் கைப்பக்குவம் அறியும்!

ஸ்வீட் வகைக்கு மறுபடி வருகிறேன்.  

பிடித்த ஸ்வீட் இருக்கட்டும்..  பிடிக்காத ஸ்வீட் எது?

எனக்கு சோன்பப்டி.   தள்ளுவண்டியில் மணியடித்துக் கொண்டே  வட இந்தியன் போல சிலர் கொண்டு வரும் சோன்பப்டி சின்ன வயதில் நான் விரும்பி சாப்பிட்டதுண்டு.  அதென்னவோ அவன் பெரும்பாலும் மாலை வேலைகளில்தான் வருவான். பத்து பைசாவுக்கு சின்ன பொட்டலத்தில் சலூனில் உதிர்ந்த தாத்தாவின் தாடி மயிர் போல நிறைத்துக் கொடுப்பான்.  இந்த உவமானம் பின்னர் தோன்றியது.  அப்போதே தோன்றி இருந்தால் அதுவும் பிடித்திருக்காது!  கொஞ்சமாக கிடைத்ததாலேயே அதுவும் பிடித்ததோ என்னவோ..

இப்போது பாக்கெட்களில், டப்பாவில் கிடைக்கும் கலர் கலரான, வெவ்வேறு வாசங்களில் வரும் சோன்பப்டி அன்று சாப்பிட்ட தாத்தாவின் தாடி மயிர் சோன்பப்டியிலிருந்து மாறுபட்டது.  பிடிக்கவே பிடிக்காது.  இப்போதும் தள்ளுவண்டியிலும் கொண்டு வருகிறார்கள்.  அது பழைய சுவையில் இல்லாமல் இருப்பதற்கு காரணம் அது மாறி விட்டதா, நான் மாறி விட்டேனா தெரியவில்லை.

நடிகர் மோகனை ஏழைகளின் கமலஹாசன் என்பார்கள்..  அதுபோல காஸ்ட்லீ ஸ்வீட் வாங்க வேண்டாம் என்று யோசிப்பவர்கள் ரீசனபிள் விலையில் கிடைக்கும் சோன்பப்டியை வாங்கி வந்து விடுகிறார்கள்.

அது மட்டுமல்லாமல், ரவா உப்புமா போல இதுவும் ஒரு ஆபத்பாந்தவன்.  சமயங்களில் பெட்டிக்கடை உட்பட, எந்தக் கடையில் வேண்டுமானாலும் கிடைக்கும்.  எதுவும் வாங்காமல் வந்து விட்டோமே என்று நாக்கைக் கடிப்பவர்கள், சட்டென பக்கத்துக்கு கடையில் புகுந்து இதை வாங்கி விடலாம்!

ஒரு வீட்டுக்குச் செல்லும்போது எதையாவது வாங்கிக் கொண்டுதான் செல்ல வேண்டுமா என்றால், ஆம்,  எங்களுக்கு அந்தப் பழக்கம் உண்டு.  அந்தப் பழக்கம் இல்லாத வெகு சிலர் இருக்கிறார்கள்.  நிம்மதியான மக்கள்.  நமக்கும் தொல்லை இல்லை.

திருமதி ஆதி வெங்கட் தனது ஒரு பதிவில் குறிப்பிட்ட மஞ்சள் குங்குமம் டப்பாக்கள், ரவிக்கை பிட் போல சோன்பப்டியும் என்னைப்  பொறுத்தவரை வாங்கியதும் வேறு கைக்கு மாற்றி விடுவேன்!  கிட்டத்தட்ட ஹால்டிராம் இதற்கு தனியுரிமையே கொண்டாடுகிறார்கள்! 

இன்னொரு விஷயம்.  நம்  வீட்டுக்கு வருபவர்கள் அன்போடு எதையோ வாங்கி வருகிறார்களே என்று சந்தோஷப்பட வேண்டும்தான்,  ஆனால் என் அலுவலக நண்பர் ஒருவர் எப்போது வந்தாலும் அதென்னவோ ஜாங்கிரிதான் வாங்கி வருவார்.  அவருக்கு மிகவும் பிடித்த ஸ்வீட் போலும்!  அதையாவது வாங்கி வருகிறார் என்று சந்தோஷப் பட்ட அதே அளவு ஒவ்வொரு முறையும் அதைத் திறந்து 'இந்த முறையாவது வேறு ஏதாவது ஸ்வீட் இருக்குமா?' என்று ஏமாந்தும் இருக்கிறேன்!

ஒரு நண்பர் முதல் முறை வரும்போது பால் பேடா வாங்கி வந்தார்.  அவரை குஷிப்படுத்த உடனே அதைத் திறந்து ஒன்றை எடுத்து வாயில் போட்டுக் கொண்டு அவருக்கும் நீட்டினேன்.  அந்தச் சிறிய ஸ்வீட்டின் ஓரத்தில் சிறிது கிள்ளி எடுத்துக் கொண்டவர் (எனக்காக விட்டுக் கொடுக்கிறாராம்)  "பிடிக்குமா?" என்றார்.  உண்மையில் எனக்கு மில்க் ஸ்வீட்ஸ்களில் பால்கோவா ஓகே.  மற்றவை இரண்டாம் பட்சம் கூட இல்லை, மூன்றாம், நான்காம் பட்சம்தான்.  ஆனால் அதற்காக பிடிக்காது என்றா சொல்வீர்கள்?  

அவ்வளவுதான்.  இன்று வரை அவர் வந்தால் பால் பேடாதான். 

"ஸ்ரீராமுக்கு ரொம்பப் பிடிக்கும்"  அவ்வ்வ்வ்வ்வ்.......

===========================================================================================

நியூஸ் ரூம் 

பானுமதி வெங்கடேஸ்வரன் 

- ​25 பேருக்கு வழங்க ஆர்டர் செய்த சாப்பாட்டில் ஊறுகாய் வைக்காத விழுப்புரம் ஹோட்டல் உரிமையாளருக்கு 35,000 ரூபாய் அபராதம் விதித்து நுகர்வோர் நீதிமன்றம்.  கொடுத்த சாப்பாட்டுக்கு ரசீது கூட தர மறுத்திருந்தாராம் ஹோட்டல் உரிமையாளர்.

- பெங்களூரு கிரிநகர் - புற்றுநோயால் பாதிக்கப்பட்ட நண்பனின் மனைவிக்கு சிகிச்சை அளித்து காப்பாற்ற, பைக் திருட்டில் ஈடுபட்ட ஆந்திரா பழ வியாபாரி கைது செய்யப்பட்டார்.

- ஆர்டர் செய்த உணவில் பல்லி இருந்ததாக, எலி இருந்ததாக ஒரு வாரமாக செய்தி.  இன்று பல்செட்..  ம பி கார்கோன் மாவட்டத்தில் ஒரு விழாவில் தரப்பட்ட சாக்லெட்டை எடுத்து வந்த ஓய்வுபெற்ற தமிழாசிரியை சாக்லெட்டை ருசித்துக் கொண்டிருந்தபோது ஒரு சாக்லெட்டை கடிக்கவே முடியவில்லையே என்று பிரித்துப் பார்த்தபோது அதனுள் பல்செட்டின் 4 பற்கள் இருந்தனவாம்.  விசாரணை நடக்கிறதாம்.

- கொக்கைன் தொழிற்சாலை கழிவுகள் கொட்டப்படுவதாலோ, கடத்தல்காரர்கள் வீசி எறியும் கொக்கைன் மிச்சங்களாலோ...  பிரேசில் கடலில் உள்ள சுறா மீன்கள் கொக்கைன் போதைப் பொருளால் பாதிக்கப்பட்டிருப்பதை, ஆவற்றிடமிருந்து  மாதிரி எடுத்துக் பார்த்து, அந்நாட்டு விஞ்ஞானிகள் உறுதி செய்திருக்கிறார்கள்.  பெரும்பாலான  பெண் சுறாக்கள் கர்ப்பமாக இருந்தாலும், குழந்தையை கொக்கைன் பாதித்ததாக தெரியவில்லையாம்.

- வாக்குவாத சர்ச்சையின் உச்சகட்ட ஆத்திரத்தில் உடன் வந்த இன்னொரு பஸ்ஸின் டிரைவரை டோல் அருகே பஸ்ஸை ஏற்றிக் கொன்ற இந்த பஸ்ஸின் ஓட்டுநர் - சம்பவம் மாண்டியா அருகே.

- பொள்ளாச்சி-உடுமலை சாலையில் உள்ள ஒரு பிரபல உணவகத்தில் இட்லி மற்றும் வடை பார்சல் வாங்கிய சுந்தர் என்பவர், பார்சலுக்கென்று தனியாக அதிகப்படியாக கட்டணம் வசூலித்தது தவறு, அதற்காக ஹோட்டல் நிறுவனம் ரூ.2 லட்சம் இழப்பீடு தர வேண்டும் என்று உணவகத்தின் மீது வழக்கு தொடர்ந்திருந்தார். வழக்கை விசாரித்த சேலம் மாவட்ட நுகர்வோர் குறைதீர் ஆணையம், வீட்டிலிருந்து பாத்திரம் கொண்டு வந்தால் கட்டணம் செலுத்த வேண்டாம் என அறிவிப்பு பலகை வைத்திருக்கிறார். உணவு பாதுகாப்பு சட்டப்படி அங்கீகரிக்கப்பட்ட பேக்கிங் பொருள்கள் மூலம் உணவு வழங்கங்கப்பட்டதை நிரூபித்திருக்கிறார். எனவே அவர் இழப்பீடு எதுவும் தரத் தேவையில்லை என் அந்த மனுவை தள்ளுபடி செய்து விட்டனர்.

- லடாக்கின் லே யில் தற்சமயம் 32 டிகிரி வெப்பம் நிலவுவதால் காற்றின் அடர்த்தி மிகவும் குறைந்து விமானங்கள் பாதுகாப்பாக தரையிறங்க முடியாத சூழல் என்பதோடு வெப்ப அலை வீசுவதால் கிட்டத்தட்ட 30 விமானங்கள்(spice jet & Indigo) ரத்து செய்யப் பட்டிருக்கின்றன.

- கர்நாடகாவில் இந்த வருடம் பட்டப்படிப்பில் ஸ்போர்ட்ஸ் கோட்டாவில் சேர்ந்தவர்களின் எண்ணிக்கை 90% குறைந்திருக்கிறது.

- சேத்துபட்டு ரயில் நிலையத்தில் கத்தியோடு திரிந்த மூன்று பேர்கள் கைது. விசாரணையில் அந்த மூன்று பேரும் புதுக்கல்லூரி மாணவர்கள் என்பதும், பச்சையப்பன் கல்லூரி மாணவர்கள் சிலர் மீது இருந்த பகை காரணமாக அவர்களை கொலை செய்யவதற்காக கத்தியோடு அலைந்ததாக தெரிகிறது.

- புனே: பதினாறு வயதான, பத்தாம் வகுப்பு மாணவன் ஒருவன் பதினான்காவது மாடியில் இருக்கும் தங்களுடைய வீட்டின் பால்கனியிலிருந்து குதித்து இறந்திருக்கிறான்.  காரணம் ஆன் லைன் விளையாட்டிற்கு அடிமையான அவன் விளையாடிக் கொண்டிருந்த விளையாட்டில் கொடுக்கப்பட்டிருந்த ஆணை ‘குதி’(jump) என்பதாகும். அதற்கு கட்டுப்பட்ட அவன் யோசிக்காமல் செயல் படுத்தி விட்டான்.- கடவுளே!  எங்கு சென்று கொண்டிருக்கிறது நம் இளைய சமுதாயம்...

- ஆக்ரா: அரசு துவக்கப் பள்ளி ஒன்றில் ஆசிரியர் ஒருவர் பள்ளி நேரத்தில் வகுப்பில் தூங்கியிருக்கிறார், அதுவும் எப்படி? பாயை விரித்து படுத்துக் கொண்டு, மாணவர்களை விசிறச் சொல்லி, தூங்கியிருக்கிறார். இன்னொரு நாள் குழந்தைகளை பிரம்பால் அடித்திருக்கிறார். இவைகள் சோஷியல் மீடியாவில் பரவ, அவர் கைது செய்யப்பட்டிருக்கிறார். – அடடா! நான் துவக்கப் பள்ளியில் படித்த பொழுது சோஷியல் மீடியா இல்லையே??

- பெலகாவி: திருவிழாவில் காணாமல் போன நாய் நான்கு நாட்களில் 195 கி.மீ. நடந்தே எஜமானர் வீட்டை அடைந்திருக்கிறது.

- புதுடில்லி:மின்சார கார்களைப் பயன்படுத்தும் 51 சதவீதம் பேர், இன்ஜின் கார்களுக்கு திரும்ப நினைப்பதாக, பார்க்கிங் சேவைகளை வழங்கும் 'பார்க் பிளஸ்' நிறுவனம் நடத்திய கணக்கெடுப்பில் தெரியவந்து உள்ளது. சார்ஜிங் கட்டமைப்பு, குறைந்த வேக சார்ஜிங் உள்ளிட்ட பல்வேறு கூடுதல் பிரச்னைகளும் இருப்பதால், இந்திய சூழ்நிலைகளுக்கு ஹைபிரிட் கார்கள் சிறந்ததாக இருக்கும் என, ஆட்டோமொபைல் வல்லுனர்கள் தெரிவிக்கின்றனர்.

==================================================================================================

ஹிஹிஹி....

===============================================================================================

ஃபேஸ்புக்கில் படித்து வியந்தது.....

\\\\\\\\\\\\\\\\\\\\\\\\//////////////////////////////\\\\\\\\\\\\\\\\\\\\\\\\\\\\\\\\\\\\\\\\\\\\\\//////////////////////////////////////\\\\\\\\\\\\\\\\\\\\\\\\///////////////////////////\\\\\\\\\\\\\\\\\\\\\\

மனம் ரசிக்கும் மழையை 

உடல் ரசிப்பதில்லை!

பட உதவி (மட்டும்)  : திரு R. கந்தசாமி ஸார், FACE BOOK.

சன்னலில் நின்றா,  சாலையில் நின்றா 

எங்கிருந்து பார்க்கிறீர்கள் 

சாரல் மழையை.. 

ரசிப்பதற்கும் 

இயற்கையோடு 

இணைந்து நனைவதற்கும் 

இருக்கும் 

சுகமான வித்தியாசம் 

உணர்ந்திருக்கிறீர்களா?

சளிபிடிக்கும் 

சாத்தியங்களைத் தாண்டி 

மின்னல்தாக்கும் 

மரங்களின் கீழே 

ஒதுங்காமல் 

யாரோ நம்மைப் 

பார்க்கிறார்கள் 

என்ற லஜ்ஜையின்றி 

யாருமற்ற சாலையில் 

ஓடி ஆடி நனைந்திருக்கிறீர்களா?

ஆயின்,  அந்த கணம் 

 வாழ்ந்திருக்கிறீர்கள்   

உங்கள் வாழ்க்கையை

பரிபூரணமாய்.

ரசிக்கிறியா?  கவிதையா...  டேய்..   மழை பெய்தால் எங்க நிலைமையை யோசித்துப் பார்த்தியா...  உங்களுக்கெல்லாம் வீடு இருக்கற கொழுப்புடா...

==========================================================================================================

வெளிநாட்டுப் பயணம் பற்றி ஜெயகாந்தன் 

வெளிநாட்டு பயணம் - ஜெயகாந்தன்

நான் வெளி நாடுகளுக்குப் போனதில்லை. அன்னியர் வீட்டில் நுழைந்து பார்த்து, "அங்கே அது இருக்கிறது; இது இருக்கிறது, நம்மிடம் அதெல்லாம் இல்லையே...' என்று, தம் வீட்டோடு ஒப்பிட்டு ஏங்கி, அங்கலாய்க்கும், அலையும் குணமே, வெளிநாடு சுற்றிப் பார்க்கும் பலரிடமும் நிறைந்திருப்பதாக, எனக்குத் தோன்றுகிறது. வேடிக்கை பார்ப்பதற்காகச் சிலர் செல்கின்றனர். எனக்கோ, நம் வீதிகளில் நடக்கும் வேடிக்கைகளே, இன்னும் பார்த்துத் தீரவில்லை. புதுமைகளை ரசிப்பது எனில், என்னைத் தேடி வரும் ஒவ்வொன்றுமே, புதுமையாக இருக்கின்றன. கற்றுக் கொள்வதற்காக எனில், என்னைச் சுற்றி இருக்கும் மிகக் குறுகிய வட்டத்தில் கூட, நான் காணவும், கற்கவும், ஏராளமான விஷயங்கள் இன்னும் இருக்கின்றன.

ரஷ்ய எழுத்தாளர்களான கோகோல், புஷ்கின், தாஸ்தியேவ்ஸ்கி, டால்ஸ்டாய், துர்க்கனீவ் ஆகியோரின் படைப்புகளைப் படித்திருக்கிறேன். அவர்கள் நேசித்த ருஷ்ய ஆத்மா மிக உயர்வாக இருந்தது. அதன் காரணமாகவே, ரஷ்யாவை காண, நான் ஒருமுறை இசைந்தேன்.

நம் பெருமையை உலகு அறிவதற்காக, அதனால், உலகு பயன் உறுவதற்காக - ஒரு விவேகானந்தர் போல் நம்மால் போக முடியுமா?

அல்லாமல், லண்டனில் இட்லி - சாம்பார், கும்பகோணம் வெற்றிலை - சீவல் கிடைப்பதைப் பற்றி, கதை அளந்து, ஜப்பானிய, "கீய்ஷா' பெண்களைப் பார்த்து, "அப்பப்பா... அச்சச்சோ!' என்று வாய் பிளந்து, ஆச்சரியப் படுவதற்கும் தானா போக வேண்டும்!

சுங்க இலாகா சோதனை, வருமான வரி சர்ட்டிபிகேட், பாஸ்போர்ட், விசா, அறிமுகக் கடிதங்கள், இத்யாதி சங்கடங்களைத் தாங்கிக் கொண்டு, ஒரு சர்வதேச கைதி போல, இந்தச் சடங்குகளைச் சுமந்து கொண்டு, ஒவ்வொரு நாட்டிலும் ஏறியும், இறங்கியும், நான் சாதிக்கப் போவது ஏதுமில்லை என்று எனக்குத் தெரியும். நான் இருக்குமிடத்தில் தான், எனக்குச் சிறப்பு.

எங்கும், எல்லாரும் சுதந்திரமாகத் திரியும் காலம் வரும். அப்போது, எல்லாருக்கும் இந்த மோகம் குறையும். எனக்கு, இப்போது இந்த மோகம் இல்லை.

- ஜெயகாந்தன் ஒரு கட்டுரையில்.

நன்றி - தினமலர்

 நன்றி திரு R. கந்தசாமி 

===============================================================================================

வெள்ளம் வந்தாலும் சீரியல் முக்கியம் பாஸ்....!  

இணையத்திலிருந்து 'வினோத இந்தியா' என்கிற பக்கத்திலிருந்து.....!

Floods happen all around the world, but in some places, there’s no choice but to deal with them as they are. India is one of those places, for many families. If a flood isn’t that severe, you may find people just walking around in ankle-deep water because there’s no alternative.  Technically these types of floods aren’t that bad, but only relatively speaking. It’s just that they could certainly be much worse.

&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&

பொக்கிஷம் :- 

1962 கல்கி - அமுதசுரபி..

இந்தக் கடை இன்னும் இருக்குமா?

வினோபாஜி யின் வாழ்த்து ராஜாஜிக்கு 

ஓவியர் உமாபதி தெரியுமா?  அவரின் அரசியல் கார்ட்டூன்ஸ்...  அப்போதைய அரசியல் நினைவுக்கு வருகிறதா?

அடப்பாவி...  யோவ்....

அமுதசுரபியில் 1963 ல் வெளிவந்த ஒரு சிறுகதை.  கார்த்திகா என்னும் ஓவியரை நான் அறிந்ததில்லை.  ஓவியத்தைப் பாருங்கள்...  அந்தியில் இருக்கும் உருவம் முன்னாலே..  கலங்கித் தெரிகிறது.  என்ன மனக் கஷ்டமோ...  கதையின் தலைப்பு வேறு 'மன நிழல்' என்றிருக்கிறது.   அந்தியின் இடதுபுறம் அரும்பும் மலர்கள்..  வலதுபுறம் வளர்ந்த வாலிபம்..  வாழ்க்கையின் பருவங்கள்...  கதை எதைப்பற்றியதாய் இருக்கும் என்று நாம் நினைப்போமோ அதற்கு மாறாகக் கூட இருக்கலாம்!