"திங்க"க்கிழமை : ஓட்ஸ் இட்லி - மனோ சாமிநாதன் ரெஸிப்பி

 

சமீப காலமாக எங்கள் வீட்டில் மாவு இட்லி வேண்டாம் என்று என் மகன் சொல்ல, ஆரோக்கியமான விதமாக இருக்க வேண்டுமென்று இந்த ஓட்ஸ் இட்லி செய்ய ஆரம்பித்து இப்போதெல்லாம் இரவு நேரங்களில் இது தொடர் கதையாகி விட்டது. 

மருத்துவர்கள் பரிந்துரைக்கும் இந்த ஓட்ஸ் , இட்லி, கஞ்சி, ஆம்லட் என்று பல வடிவங்களில் எங்கள் இல்லத்தில் இடம் பெற்று வருகிறது. இப்போது ஓட்ஸ் இட்லிக்கு போகலாம்....

ஓட்ஸ் இட்லி

தேவை:

முக்கால் கப்- ஓட்ஸ்

முக்கால் கப்- ரவா

தயிர்- முக்கால் கப்

நெய்- 1 ஸ்பூன்

எண்னெய்-1 ஸ்பூன்

சீரகம்- 1 ஸ்பூன்

பெருங்காயப்பொடி-அரை ஸ்பூன்

பொடியாக அரிந்த பச்சை மிளகாய்-2

இஞ்சி துருவல்- 1 ஸ்பூன்

கடலைப்பருப்பு- 2 ஸ்பூன்

கறிவேப்பிலை- 1 கொத்து

தேவையான உப்பும் நீரும்

பேக்கிங் சோடா அல்லது ஈனோ சால்ட்- அரை ஸ்பூன்

செய்முறை:

வாணலியில் நெய், எண்ணெய் இரண்டையும் ஊற்றி சூடாக்கவும்.

எண்ணெய் சூடானதும் சீரகம், கடலைப்பருப்பு  போட்டு தாளிக்கவும்.

அதிகம் சிவக்காமல் உடனேயே ப.மிளகாய், இஞ்சி , பெருங்காயப்பொடி, கறிவேப்பிலை சேர்த்து குறைந்த தீயில் கிளறவும்.

ரவாவை சேர்த்து கிளறவும். ஐந்து நிமிடம் கிளறினால் போதும். சிவக்க வேண்டியதில்லை.

ஓட்ஸை மிக்ஸியில் ஒரு முறை அடித்து கொரகொரப்பாக எடுத்து ரவாவில் சேர்த்து மேலும் ஒரு 2 நிமிடம் நன்கு கலந்து கிளறி எடுத்து ஆற வைக்கவும்.

ஆறிய ரவா, ஓட்ஸ் கலவையை ஒரு பாத்திரத்தில் கொட்டி ஈனோ சால்ட் சேர்த்து கலக்கவும்.

பின் தயிர், உப்பு, போதுமான அளவு நீர் சேர்த்து இட்லி மாவு பதத்திற்கு கலந்து ஒரு அரை மணி நேரம் மூடி வைத்து ஊற விடவும்.

பிறகு திறந்து பார்க்கையில் சற்று கெட்டியாக மாவு இருந்தால் மேலும் சிறிது மோர் அல்லது நீர் சேர்த்து மறுபடியும் இட்லி மாவு பதத்துக்கு கலக்கவும்.

ஐந்து நிமிடம் கழித்து இட்லித்தட்டில் ஊற்றி 12 நிமிடம் வேக வைத்து எடுக்கவும்.

மிருதுவான ஓட்ஸ் இட்லி தயார்!!

குறிப்பு:

தாளிதத்துக்கு பின் துருவிய காரட், சோள முத்துக்கள், சிறிதளவில் வெங்காயம், தக்காளி என்று சேர்த்து வதக்கி எடுக்கலாம்.

எந்த சிவப்பு சட்னியும் இதற்கு நல்ல பக்கத்துணையாக இருக்கும்.

***************************************************************************************************************************************************