"திங்க"க்கிழமை : எள்ளடை (தட்டை) - துரை செல்வராஜூ ரெஸிப்பி

 எள்ளடை (தட்டை)

துரை செல்வராஜூ 

தேவையானவை :

அரிசி மாவு 200 gr

கோதுமை மாவு 50 gr

பொட்டுக்கடலை மாவு 100 gr

கடலைப்பருப்பு 1 T sp

ஓமம் அல்லது சீரகம் தேவையான அளவு

வெண்ணெய் 1 t sp

பெருங்காயத் தூள் சிறிதளவு

கல்உப்பு சுவைக்கு

கறிவேப்பிலை 1 இணுக்கு

கடலெண்ணெய் பொரிப்பதற்கு

செய்முறை;

எள்  - இதற்குத் தான் முதலிடம்..

தற்போது பலருக்கும் தோலில் ஒவ்வாமை ஏற்படுகின்ற சூழ்நிலையில் - எள், நல்லெண்ணெய் இவற்றை சற்றே விலக்கி வைக்க வேண்டியதாகின்றது..

எவ்வித பிரச்னையும் இல்லை எனில் ஓமம்  சீரகத்திற்குப் பதிலாக எள் சேர்த்துக் கொள்ளலாம்..

கடலைப் பருப்பை ஒரு மணி நேரம் ஊற வைத்து வடிகட்டி உலர்த்திக் கொள்ளவும்..

பாத்திரம் ஒன்றில்  அரிசி மாவு கோதுமை மாவு பொட்டுக்கடலை மாவுடன் -

பெருங்காயத் தூள், மிளகுத் தூள், ஓமம், உப்பு, உலர்ந்த கடலைப் பருப்புடன்  கறிவேப்பிலையைக் கிள்ளிப் போட்டு கொஞ்சம் கொஞ்சமாக  தண்ணீர் தெளித்து  வெண்ணெயும் சேர்த்து பக்குவமாகப் பிசைந்து கொள்ளவும்.. 

பிசைந்த மாவை  அப்படியே அரை மணி நேரத்திற்கு வைத்து விடவும்..

அரை மணி நேரம் கழித்து

மாவை சிறு சிறு உருண்டைகளாக  உருட்டி  மெல்லியதாகத் தேய்த்துக் கொள்ளவும்.

மிதமான சூட்டில் கடலெண்ணெயைக் காய வைத்து - தேய்க்கப்பட்ட தட்டைகளை எண்ணெயில் இட்டு சிவந்ததும் எடுக்கவும்..

கோதுமை மாவு சேர்ப்பது நமது வழக்கமல்ல... பொர பொரப்பாக இருப்பதற்காக கோதுமை மாவு தேவையாகின்றது என்கின்றனர்.. 

இந்த செய்முறையில் சோடா உப்பு சேர்க்கப்படவில்லை என்பதை கவனிக்கவும்..

தட்டை காரமாக இருப்பதற்காக சிலர்

மிளகாய்த் தூளைச் சேர்ப்பார்கள்..

மிளகாய்த் தூள் வேண்டாம்.. அதை விட மிளகுத் தூள் நல்லது.. 

விருப்பம் எனில் மிளகுத் தூள் 1 t sp சேர்த்துக் கொள்ளலாம்..

ஃஃஃ