வியாபாரம் செய்பவர்களுக்கு வேடம் முக்கியமா?

 

ஜீவி: 

2026- சட்டசபை தேர்தல்லே திமுகவும் பாஜாகவும் பெருந்தலைவர் வாஜ்பாய் அவர்கள் வழிகாட்டியது போல கூட்டணி அமைக்கலாம்.

ஊஹூம். அதெல்லாம் நடக்காது என்பது உங்கள் பதிலாக இருந்தால் ஆணித்தரமான காரணங்கள் குறைந்த பட்சம் நான்காவது சொல்லுங்களேன்.

# 1. இந்தியா என்பது ஒரு தனி நாடு அல்ல பல நாடுகள் சம்மதித்து இருக்கும்  " ஒன்றியம் " எனும் கொள்கை .

2. இந்திக்குப் பரம விரோதிகள்.

3. பிராமணியம் (?) சநாதனம் இரண்டும் ரொம்பவும் கெடுதல் எனும் சித்தாந்தம்.

4. கட்சிக்காரர்களுக்கு வரம்பு மீறிய சலுகையும் அவர்கள் சுயநலம் காரணமாகப்பெரும் தவறு செய்தால் கூட கண்டுகொள்ளவேண்டியதில்லை என்ற‌ விதிமுறை.‌

5. ஆதரவு காட்டுவோருக்கு தனிமனிதரேயானாலும் அசாதாரண சலுகைகள்.‌

6. ஆயிரக்கணக்கான ஆண்டுகள் இங்கு வாழும் பார்ப்பனர் வந்தேறிகள் என்று எண்ணும் மனப்பாங்கு.‌

7. இந்து அல்லாத இதர மதத்தினருக்குக் காட்டும் சலுகைகள் உணர்வுகள் இந்துக்கள் என்ற ஒரே காரணத்திற்காக மறுக்கப்படுவது.‌

8. வரம்பு மீறி சம்பாதிப்பதில் அளவுக்கதிகமான ஈடுபாடு.‌

இதில் பலவும் அங்கும் இருக்கிறதே என்றால்,  தீவிரம் எந்த அளவு என்பதில் பெரிய வேறுபாடு.

& ஊஹூம் இதெல்லாம் நடக்காது என்று சொல்ல நான் தயாராக இல்லை. 

நெல்லைத்தமிழன்: 

1.ஜோதிடம் சொல்பவர்கள் எல்லாருமே ஏன் நெற்றி நிறைய பட்டை, உருத்திராட்சக் கொட்டை, காவி உடை என்று பக்திமயமாகக் காட்சியளிக்கிறார்கள்? இதுபோலவே யோகா மாஸ்டர் என்றால் வெண்ணிற ஆடை/காவி ஆடை, நெற்றியில் குங்குமம் அல்லது சந்தனம் என்று காட்சியளிப்பதன் காரணம் என்ன?     

# வரும் "வாடிக்கையாளர்களைக் கவர்வதற்காக இந்த மேக் அப் யுக்தி தேவைப்படுகிறது.‌ ஜோதிடம் யோகா இரண்டுமே வேதத்திலிருந்து பெறப்பட்டது என்று சொல்கிறார்கள்.‌ அதற்கிசைவான பிம்பம் வேண்டாமா‌ ?

& வேடம் போடும் இன்னொரு இடமும் ஞாபகம் வருகிறது. அசோக் லேலண்ட் கம்பெனி - உள்ளே என்னதான் பதினாறு பைசா டிஃபன், எட்டு பைசா டீ என்று கொடுத்தாலும், காலை நேரத்தில் தொழிலாளர்கள் கூட்டமாக ரயிலில் இருந்து இறங்கி வேகமாக வரும்போது, நுழைவாயில் அருகே, சூடான டிஃபன் வியாபாரம் நடக்கும். விலை நாற்பது பைசா / ஐம்பது பைசா போல இருக்கும்.

என்னுடைய நண்பர் தனசேகரன், ' இருடா - அதோ அந்த ஐயர்கிட்ட இடியாப்பம் வாங்கிக்கிட்டு போகலாம் ' என்று ஒரு ஆளிடம் செல்வார். ஒரு மொட்டை ஆசாமி, வாய் நிறைய வெற்றிலை போட்டுக் குழப்பியபடி, வெற்று மார்பு, பூணூல் சகிதம் பரபரவென்று தாமரை இலைகளில் இட்லி , இடியாப்பம், குருமா என்று கட்டிக் கொடுத்து சில்லறைகளை வாங்கி பெட்டியில் போட்டுக்கொண்டு பிஸியாக இருப்பார். 

அருகில் சென்று பார்த்தபோது அவர் அணிந்திருந்த தடி பூணூலில் சரியாக நான்கு இழைகள் மட்டும் இருந்தன. 

'பாரு ஐயர் கிட்ட வாங்கினால் சுத்தமான டிஃபனாகக் கிடைக்கும்' என்ற நண்பரிடம், " இவர் ஐயர் என்றால், நான்தான் ஜவஹர்லால் நேரு" என்றேன்!  

2.  பெங்களூரு குளிர், ரொம்ப வெயில் இல்லாமல் வானம் மந்தமாக இருப்பது, மழை என்று ஜிலுஜிலுவென, 9 மாதங்கள் இருக்கின்றன. சென்னை சென்றால், கசகசவென கடும் வெயிலுடன் இருக்கிறது. இந்தச் சென்னையிலா இத்தனை வருடம் குப்பை கொட்டினோம் என்று எண்ணவைக்கிறது. உங்களுக்கு எப்படி?  

# எனக்கும் அப்படித்தான். ஃப்ரிட்ஜ், ஏ.ஸி , வாஷிங் மெஷின் - ஏன் ஸீலிங் ஃபேன் இல்லாமல் இருந்திருக்கிறேன் என்பதை என்னாலேயே நம்ப முடியவில்லை.‌

& எனக்கும் அப்படித்தான்! முதலில் சென்னையில் முப்பத்து ஐந்து ஆண்டுகள் குப்பை கொட்டிவிட்டு பிறகு பெங்களூரு வந்ததால் அப்படி தோன்றுகிறதோ என்றும் நினைக்கிறேன். முதலில் பெங்களூரு பல ஆண்டுகள் - பிறகு சென்னை என்று சென்றிருந்தால் என்ன ஆகியிருக்கும்? யோசித்துப் பார்க்க இயலவில்லை! 

 3. இனிப்புகளில், பாதுஷா/தேங்காய் பர்பி/மைதா பர்பி என்று எடுத்துக்கொண்டால், கிலோ 1000 ரூபாயிலும் கிடைக்கிறது, கிலோ 500 ரூபாய்க்கும் இருக்கிறது, பெட்டிக்கடைகளில் 1 piece (எங்கள் ஊரில் எண்ணம் என்று சொல்வாங்க. 3 எண்ணம் என்றால் 3 pieces) 10 ரூபாய்க்கும் கிடைக்கிறது. ஏன் இந்த விலை வித்தியாசம்?

# இடு பொருட்களின் தரம், செய்முறையில் சுத்தம், இடைநிலை விநியோகஸ்தர் எண்ணிக்கை,  தொழிலாளர் ஊதிய ஏற்றத்தாழ்வு இப்படிப் பல காரணங்கள் இருக்கும். ருசியும் விலைக் கேற்ப தானே இருக்கிறது ?

கே. சக்ரபாணி சென்னை 28. 

வெய்யிலுக்கு. குடை பிடித்துக்கொண்டு  போன அனுபவம்  உண்டா?

# உண்டு. 

& வெயிலுக்கு எல்லாம் குடைபிடித்துக்கொண்டு போவதில்லை. எனக்கு மட்டும்தான் குடைபிடித்துக்கொண்டு போவேன். 

சின்னவீடு  என்பதற்கும்  சிறியவீடு  என்பதற்கும் உள்ள  வித்தியாசம்  என்ன?

# இந்த "சின்ன வீடு" , "முருங்கைக்காய்" ரக பதிவுகள் என்றால் எனக்கு அலர்ஜி. தமன்னா படம் அனுஷ்கா பட விவாதம் மாதிரி..

& சி'றி'ய வீட்டுக்கு பெரிய றி ; பெ'ரி'ய வீட்டுக்கு சிறிய ரி என்று குழப்பாமல், சின்ன வீட்டுக்கு சின்ன 'ன' இருப்பதுதான் வித்தியாசம்!  

கடலை  மிட்டாயை  விரும்பாதவர்களே உலகத்தில். யாரும்  இருக்க மாட்டார்கள் என  நினைக்கிறேன்  சரியா?

#  சரியாக இருக்கலாம்.  ஆனால் என் ஆதிகால நண்பர் ஒருவருக்குப் பிடிக்காத இரண்டு பொருட்கள் வேர்க்கடலை & வாழைப்பழம்.

பல் இல்லாத நபர்கள் க.மி யை விரும்ப இயலாதே.

& சிறு வயதில் எனக்கு க மி பிடிக்காது. தேங்காய் பர்பிதான் பிடிக்கும். 

போஸ்ட்மார்ட்டம் என்பது  இறந்தபின்  உடலை பரிசோதனை செய்வது 

போஸ்ட் சர்ஜரி என்பது அறுவைசிகிச்சை க்கு பிறகு  என்பது 

போஸ்ட்  ரிடயர்மென்ட்  என்பது. பணி ஓய்வு பெற்ற பிறகு

அப்போ

போஸ்ட் ஆபீஸ் என்பது  அலுவலகம்   முடிந்தபிறகு  என்பதுதானே?

# எதுவோ ஒன்று ஆனபின் தகவலை எழுதிக் கொண்டு போய் அனுப்ப நாம் செல்லும் ஆபீஸ் என்பதால் போஸ்ட் ஆஃபீஸ்.

கோ என்றால் பசு : பால் என்றால் மில்க்  . கோபாலை பயன் படுத்தி ஏன் யாரும் காபி போடுவதில்லை ?

2. லூசு  பைத்தியம் என்ற  வார்த்தையை  உபயோகிக்காத குடும்பமே இருக்க முடியாது.  சரிதானே?

# லூசு அல்லது  பைத்தியம் இருக்கும் எல்லா வீடுகளிலும் நாகரிகம் கருதி (லூசுகள் மனம் புண்படுமே என்று)  பயன்படுத்தமாட்டார்கள்.

3. நம்பிக்கையின்  உச்சகட்டம்   டி வி  ரிமோட்வேலைசெய்யவில்லை என்றால் இரண்டு தட்டு தட்டினால் வேலை செய்யும் என்று நம்புவதுதானே?

(கே. ஜி. ஜி அவர்களுக்கு  2 & 3 வது  உங்கள் அபிமான  நடிகைகள் அனுஷ்கா. தமன்னா  வீட்டிலும். நடக்கிறது என்பதை  தெரிவித்துக்கொள்கிறேன். ) 

# நம்பிக்கை அல்ல அனுபவம்.‌ இரண்டு தட்டு தட்டி நூறு முறையாவது சரியாக  வேலை செய்திருக்கிறதே.

= = = = = =

KGG பக்கம் : 

வேலை தேடிக்கொண்டிருந்த நாட்களில் வெயில் நேரத்தில் வீட்டில் சமர்த்தாக புத்தகம் படித்துக்கொண்டிருப்பேன். மாலை நேரம் வந்ததும், உலா கிளம்பிவிடுவேன். 

எல்லா இடங்களுக்கும் நடந்தே செல்வேன். முக்கியமாக மூர் மார்க்கெட் சென்று பழைய புத்தகங்களை மேய்ந்து, சில பிடித்த புத்தகங்களை வாங்குவேன். 

முதன் முதலில் மூர் மார்க்கெட் சென்றபோது, ஒரு கடையில், " மேஜிக் செய்வது எப்படி? " என்று ஒரு புத்தகம், Transphone என்ற ஒரு புத்தகம், ஒன்று முதல் ஒன்பது வரை ட்ரான்சிஸ்டர் ரேடியோ, என்ற புத்தகம் ஆகியவற்றை தேர்ந்தெடுத்தேன். எல்லாவற்றிற்கும் குறிப்பிட்டுள்ள விலைகளைக் கூட்டினால் மூன்று ரூபாய் வந்தது. 

கடைக்காரர், நான்கு ரூபாய் விலை என்றார். 'புத்தகங்களில் குறிப்பிட்டிருக்கும் விலையே மொத்தம் மூன்று ரூபாய்தானே' என்றேன். 

'இந்தப் புத்தகங்கள் எல்லாம் இப்போ பிரிண்ட்ல கிடைக்காது - அதனால்தான் அவ்வளவு விலை' என்றார் கடைக்காரர். 

" சரி. திரும்பி வரும்போது வாங்கிககொள்கிறேன். மற்ற கடைகளைப் பார்த்துவிட்டு வருகிறேன் " என்று சொல்லிக்  கிளம்பினேன்.  

இரண்டு வரிசைகள் தாண்டி இருந்த வேறு ஒரு கடையில் மேஜிக் புத்தகமும், ட்ரான்சிஸ்டர் ரேடியோ புத்தகமும் இருந்தன. வேறு சில கதைப் புத்தகங்களைக் கையில் எடுத்துப் பார்த்துவிட்டு, விலை விஜாரித்தேன். நாம் எதைத் தேர்ந்தெடுத்து விலை விஜாரிக்கிறோமோ அதை எப்போதுமே விலை அதிகமாகச் சொல்கிறார்கள் என்பதைத் தெரிந்துகொண்டேன். 

அந்தப் புத்தகத்திற்கு ஆனை விலை சொன்னதும், ' அப்பாடி விலை அதிகம் ' என்று சொல்லிவிட்டு, சுவாரஸ்யமில்லாமல் இருப்பவனாகக் காட்டிக்கொண்டு - எனக்கு வேண்டிய இரண்டு புத்தகங்களை காட்டி - ' இது என்ன விலை? இதுவும் அதிக விலைதானா ?' என்று கேட்டுவிட்டு, அடுத்த கடை நோக்கி செல்பவன் போல நடித்தேன். 

கடைக்காரர், அந்த ரெண்டு புத்தகமும் சேர்ந்து முக்கால் ரூபாய்தான் என்றார். 

நான் என்னுடைய சட்டைப் பைக்குள் பார்த்துவிட்டு, 'என்னிடம் எட்டணாதான் இருக்கு' என்றேன். 

'சரி. அதைக் கொடுத்துவிட்டு, ரெண்டு புத்தகத்தையும் வாங்கிக்க' என்றார் கடைக்காரர். 

சந்தோஷமாக இரண்டு புத்தகங்களையும் வாங்கிக்கொண்டு வீட்டிற்கு வந்தேன். 

சென்னை மூர் மார்க்கெட் ஷாப்பிங் செய்வது எப்படி என்றும் பேரம் பேசுவது எப்படி என்றும் ஓரளவு முதன் முதலில் தெரிந்துகொண்டது இப்படித்தான். 

== = = =

ரீட்டா & மீட்டா 03. 

1) ஆனந்த் ரீத்திகா திருமணம்; ஆனந்தின் முன்னாள் காதலி ரீட்டாவிடமிருந்து மிரட்டல் கடிதம். 

2) ஆனந்த் எழுதிய காதல் கடிதங்களை திரும்ப அவனிடமே சேர்ப்பிக்க பத்து லட்ச ரூபாய் அனுப்பச் சொல்கிறாள் ரீட்டா. 

அக்கவுண்ட் விவரங்கள் 'ரகசிய' பக்கத்தில் என்று எழுதியிருந்ததைப் படித்தவுடன், ஆனந்த், ரீட்டா அனுப்பியிருந்த சிவப்பு உறையை கவனமாகக் கத்தரித்து அதன் உள் பக்கத்தில் எழுதப்பட்டிருந்த விவரங்களை மொபைல் ஃபோன் மூலம் படம் பிடித்துக்கொண்டான். ஆனந்த் ரீட்டா இருவரும் அந்தக் காலத்தில் ஒருவருக்கொருவர் கடிதங்கள் எழுதிக்கொண்ட நாட்களில் முக்கிய விவரங்களை கடிதத்தின் உறையின் உள்பக்கத்தில் எழுதுவது அவர்கள் இருவருக்கு மட்டுமே தெரிந்திருந்த ரகசிய இடம். பிறகு ரீட்டாவிடமிருந்து  வந்திருந்த கடிதங்கள், உறைகள் எல்லாவற்றையும் தன்னுடைய அறையில் இருந்த பேப்பர் shredding மெஷினுக்கு இரையாக்கினான். 

ஆனந்த் தன்னுடைய பாங்க் அக்கவுண்ட் பேலன்ஸ் என்ன இருக்கிறது என்று பார்த்தான். ரெடி காஷ் இருபத்துநான்கு லட்ச ரூபாய் இருந்தது. 

நண்பனுக்கு பத்து லட்ச ரூபாய் உதவி செய்யப்போவதாக ரீத்திகாவிடம் சொல்லிவிட்டு, அன்றே, ரீட்டாவின் அக்கவுண்டுக்கு பத்து லட்ச ரூபாய் அனுப்பிவைத்தான். 

நான்கு நாட்கள் கழித்து ஆனந்த் பெயருக்கு ஒரு கூரியர் பார்சல் வந்தது. ரீட்டாவின் புதிய விலாசம் அந்த பார்சல் மீது எழுதி இருந்தது.  அதையும் தன்னுடைய மொபைல் போனில் படம்பிடித்துக்கொண்டான் ஆனந்த். 

கூரியர் மூலமாக வந்த, தான் எழுதிய காதல் கடிதங்கள், அதனோடு ரீட்டா எழுதியிருந்த 'நன்றி' கடிதம் (இனி உன் வாழ்வில் நான் குறுக்கிடமாட்டேன்!) எல்லாவற்றையும்  பேப்பர் shredding மெஷின் வாயில் போட்டுக் கடித்துத் துப்பியது. 

இரண்டு வாரங்கள் ஆனந்துக்கு நிம்மதியாகக் கழிந்தது. ரீத்திகா இண்டஸ்ட்ரீஸ், ரீத்திகா கெமிக்கல்ஸ், ரீத்திகா டெக்ஸ்டைல்ஸ், ரீத்திகா மெஷின் டூல்ஸ் - என்று ஏகப்பட்ட ரீத்திகா & coவின்  வரவு செலவு, நிர்வாகம், எல்லா விஷயங்களையும் திறம்பட பார்த்துக்கொண்டான் ஆனந்த். 

எல்லாம் சரியாகிவிட்டது என்று நினைக்கும்போது, மீண்டும் ரீட்டாவிடமிருந்து ஒரு சிவப்புக் கடிதம். 

(தொடரும்) 

= = = = = = = = = = =