ஆனந்தக் கண்ணீர் வடித்தது உண்டா?

 நெல்லைத்தமிழன் : 

? நாட்டுத் தலைவர்களைக் கொலை செய்யவேண்டும் என்று நினைத்துவிட்டால் (வெளிநாடு உட்பட) அதை பயங்கரவாதிகள் நிறைவேற்றிவிடுகிறார்கள். அப்படி இருக்கும்போது எதற்கு அவங்க சேஃப்டிக்காக மிக விலையுயர்ந்த குண்டு துளைக்காத கார், பாதுகாப்பு ஏற்பாடுகள் என்று மக்களுடைய காசைச் செலவழித்து மெனெக்கிடறாங்க?

# பாதுகாப்பு கார் இதையெல்லாம் விட அதிக விலை  பயங்கரவாதிகளுக்கு ஆகலாமோ என்னவோ !!

& நல்ல கேள்வி. பாதுகாப்பு கொடுப்பது அரசாங்கத்தின் கடமை. பாதுகாப்புகளைத் தாண்டி கொல்ல நினைப்பது பயங்கரவாதிகளின் மடமை. இப்படி ஆகிவிட்டது உலக நாடுகளின் நிலைமை. 

கே சக்ரபாணி, சென்னை 28 : 

? நான்  ஆனந்த கண்ணீர்  வடிக்கும் இயல்படையவன். சூப்பர் சிங்கர் போன்ற நிகழ்ச்சிகளில் மனமுருக பாடினாலோ சினிமாவிலோ  டிவி  சீரியல்களில்  உருக்கமான காட்சிகள்  வந்தாலோ  திருமணங்களில்  மணப்பெண்ணுக்கு  தாலி கட்டியதும் என்னையறியாமல்  என் கண்களில்  ஆனந்தகண்ணீர் வந்துவிடும்.  இதுபோன்று அனுபவம்  தங்களுக்கு உண்டா?

# இயல்பு என்று சொல்ல முடியாது ஆனால் சில சந்தர்ப்பங்களில் நெஞ்சம் விம்மி,  கண்ணீர்  ததும்பும் சந்தர்ப்பங்கள் மிக சாதாரணமான நிகழ்ச்சிகளால் கூட சில சமயம் எனக்கு ஏற்பட்டது உண்டு. அட, ஏன் இப்படி என்று நானே என்னைக் கேட்டுக் கொள்வேன். விடை கிடைப்பது இல்லை. வேறு எண்ணங்களால் இடையூறு இல்லாத சந்தர்ப்பம் அமையும் போது இவ்வாறான உணர்ச்சி வசப்படல் நிகழும் என்று தோன்றுகிறது. ஆச்சரியகரமாக அது நமக்கு ஒரு மகிழ்ச்சியை அளிக்கிறது.

& கண்ணீர் வந்தது உண்டு - வாழ்க்கையில் சில சந்தர்ப்பங்களில் மற்றும் சில சினிமாக்களை மனம் ஒன்றிப் பார்த்தபோது. ஆனால் அதில் எதுவும் ஆனந்தக் கண்ணீர் கிடையாது. அனுதாபக்  கண்ணீர் அல்லது வருத்தக் கண்ணீர்  மட்டுமே. 

? நாகப்பட்டினம் ஒரிஜினல்  நெய்மிட்டாய் கடையில்  வாங்கி சாப்பிட்டு இருக்கிறீர்களா?

# நாகப்பட்டினம் ஒரிஜினல் நெய் மிட்டாய்க் கடை  மதுரையில் இருக்கிறது என்பது எல்லாருக்கும் தெரிந்திருக்கும் என்று நினைக்கிறேன். கிட்டத்தட்ட 40 ஆண்டுகளுக்கு முன்பு அங்கே போய் , பெரிய எதிர்பார்ப்புடன் ஆசையாக இரண்டு இனிப்பு வகைகளை வாங்கி சாப்பிட்டுப் பார்த்ததில் ஒரு பெருத்த ஏமாற்றம் மட்டுமே ஏற்பட்டது. வேறு இடங்களில் கிடைக்கிற அல்வாவுக்கும் இந்த ஒரிஜினல் நெய் அல்வாவுக்கும் இடையே எந்த வேறுபாடும் எனக்குத் தெரியவில்லை.

& நா ஒ நெ மி க வில் நான் சாப்பிட்டது இல்லை. அதற்கான சந்தர்ப்பம் கிடைக்கவில்லை. 

? 50 , 60 வருடங்களுக்கு முன்பு  சக்கரை வியாதி  என்றால் அது  பணக்கார  வியாதி  என்று சொல்வார்கள்.  ஆனால்  இப்போது அநேகமாக எல்லாருக்கும்  இருக்கிறதே  எல்லோரும்  பணக்காரர்கள்  ஆகிவிட்டார்களா?

# அந்தக் காலத்தில் எல்லாருக்கும் உடல் உழைப்பு, சத்தான‌, சரி அளவான  உணவு என்பது வாடிக்கையாக இருந்தது. இந்த சுறுசுறுப்பும் உழைப்பும் இல்லாமல் ஆடம்பர வாழ்க்கை வாழ்ந்து,  வெறும் பொழுது போக்கி ,  சாப்பிடுவது ஒன்றை மட்டுமே மையப்படுத்தி இருப்பது பணக்காரர்களின் தன்மையாக இருந்தது. "அவருக்கென்ன !  ஏழு தலைமுறைக்கு உட்கார்ந்து சாப்பிட சொத்து இருக்கிறது" என்று பணக்காரர்களைக் குறித்து சொல்வது வழக்கம்.  உழைக்காத வர்க்கம் ஆகிய பணக்காரர்களுக்கான நோய் என்று சர்க்கரை வியாதி அறியப்பட்டது.  இப்போது எல்லாரும் பணக்காரர்கள் ஆகிவிட்டார்கள் என்பதும் கூட ஒரு வகையில் உண்மைதான்.‌ எல்லோருமே 200 ரூபாய் கொடுத்து சினிமா பார்க்கிறார்கள், 100, 150  ரூபாய் கொடுத்து மசால் தோசை சாப்பிடுகிறார்கள்.‌ திருமணம், பிறந்தநாள் போன்ற நிகழ்ச்சிகளில்  காணப்படும் ,  மிதமிஞ்சிய ஆடம்பரம் எல்லோரும் பணக்காரர்கள் ஆகிவிட்டார்கள், அல்லது பணக்காரர்களின் வாழ்க்கை முறையைப் பின்பற்ற ஆசைப்படுகிறார்கள் என்பதை உறுதி  செய்கிறது.

= = = = = = =

KGG பக்கம் :

kgs நினைவுகள். 

என்னுடைய தாத்தா சுப்ரமணியன் பற்றி என் அம்மா கூறியது ஒன்று நினைவுக்கு வருகிறது. 

என் தாத்தா 1942 ஆம் ஆண்டு, ஆடி அமாவாசை கழித்து வந்த ஞாயிற்றுக் கிழமையில் காலமானார் என்னும் தகவல்தான் அது. இணையம் மூலம் விவரங்களைக் கண்டெடுத்தேன். அதன்படி, தாத்தா காலமானது 16.8.1942 என்று தெரிந்துகொண்டேன். 

அண்ணன் K G சுப்ரமணியன் காலமானது 14.8.2024 - இது ஆடி அமாவாசைக்குப்  (5.8.24) பத்து நாட்கள் கழித்து ! 

தாத்தா சுப்ரமணியத்திற்கும் (16.8.42) அவர் பேரன் சுப்ரமணியத்திற்கும் (14.8.24) இறப்பில் இந்த ஒற்றுமை! 

= == = = =

எனக்கு நினைவு தெரிந்த நாளிலிருந்து என் வீட்டில் அப்பா அம்மா தவிர இரண்டாவது அக்கா, மூன்றாவது அண்ணனாகிய  kgs, ஐந்தாவது அண்ணன் விசு(வேஸ்வரன்)  ஆகியோரைப் பற்றிய நினைவுகள் மட்டுமே உள்ளன. எனக்கு நினைவு தெரிந்த காலத்தில் முதல் இரண்டு அண்ணன்கள் வேலை கிடைத்து, வேலை பார்க்கச் சென்றுவிட்டனர். முதல் அண்ணனுக்கு திருமணம் ஆகியிருந்தது. பெரிய அக்காவுக்கும் திருமணமாகி சென்றுவிட்டார். ( நான்காவது அண்ணன் சந்தானம் - சிறு வயதில் எதையோ கண்டு பயந்துபோனதால், பேச முடியாதவராக ஆகி, மனநிலை பாதிக்கப்பட்டவராக இருந்து இருபதாவது வயதில் காலமானார்.) 

ஆக - kgs அண்ணன் மட்டுமே எனக்கும் என் ஐந்தாவது அண்ணனுக்கும் caretaker. அப்பா அடிக்கடி ஆடிட் செய்ய வெளியூரகள் செல்லவேண்டியிருந்ததால் kgs அண்ணனிடம்தான் முழுப் பொறுப்பும் ஒப்படைக்கப்பட்டது ! 

என்னைப் பள்ளிக்கூடத்தில் சேர்க்கவேண்டுமா - kgs. 

வகுப்பிற்காக நோட்டு & புத்தகங்கள் வாங்க வேண்டுமா - kgs. அநேகமாக எல்லா நோட்டுகளும், பேப்பர் + பிரவுன் ஷீட் வாங்கி வந்து, அவரே நோட்டுகள் தைத்துக் கொடுத்து விடுவார். நோட்டுகள் ஸ்கூலில்தான் வாங்க வேண்டும் - இல்லையேல் பெஞ்சு மேலே ஏற்றிவிடுவார்கள் என்று சொன்னால் - ' ஆரம்பத்தில் சில நாட்கள் பெஞ்சு மேலே நிற்கச் சொல்லுவார்கள். அப்புறம் யாரும் ஒன்றும் சொல்லமாட்டார்கள்' என்பார். 

நாங்கள் வீட்டுப்பாடம் எல்லாம் ஒழுங்காக எழுதுகிறோமா - மேற்பார்வை kgs !

எங்களுக்கு தீபாவளிக்கு துணிகள் வாங்கி, தைக்கக் கொடுக்கவேண்டுமா ? kgs. 

தீபாவளிக்கு பட்டாசுகள் வாங்கிக் கொடுத்து, விசு அண்ணனுக்கு, எனக்கு, என்னுடைய தங்கைக்கு என்று பங்கு பிரிக்கவேண்டுமா ? அதற்கும் kgs. (என்னுடைய தம்பி என்னைவிட ஏழு வயது சிறியவன் என்பதால், kgs தாக்கம் அவனுக்கு அதிகம் இல்லை என்று நினைக்கிறேன்!) 

மொத்தத்தில் விசுவுக்கும், எனக்கும் kgs தயவில்தான் எல்லாம்! 

பள்ளிக்கூட நாட்களில் நான் மிகவும் சோம்பேறி (இப்பவும்தான்!). வீட்டுப் பாடம் எதுவும் உருப்படியாக எழுதமாட்டேன்! திங்கட்கிழமைக் காலையில்தான் வீட்டுப் பாடங்கள் etc etc ஞாபகம் வரும்! கண்ணீர் வழிய, உதடுகள் துடிக்க, ஒவ்வொன்றாக சொல்வேன். அண்ணன், அக்கா என்னைத் திட்டிக்கொண்டே, கிள்ளிக்கொண்டே என்னுடைய வீட்டுப் பாடங்களை செய்துகொடுப்பார்கள்!  

கணக்குப் பாடத்தில் ரொம்ப வீக் ! இரண்டாம் வகுப்புப் படித்தபோது, டைஃபாய்ட் வந்து பல வாரங்கள் (1958 ஆம் வருடம்) பள்ளிக்குப் போகாமல் இருந்ததால் - பள்ளிக்கூட பாடங்கள் பலவற்றில் பின் தங்கினேன். 

முதல் வகுப்புப் படித்தபோது எனக்கு ஒரு பெரிய சந்தேகம் வந்தது. அ , ஆ, இ , ஈ வரை எழுதிவிடுவேன். 

அடுத்த எழுத்து உ வா அல்லது எ யா - என்பது எவ்வளவு தடவைகள் சொல்லிக் கொடுத்தாலும் நினைவில் நிற்காது! ஐ க்கு அடுத்த எழுத்தாக - ஆ - ஈ - ஊ - ஏ போன்று நீண்ட உச்சரிப்புடன் ஒரு எழுத்து உண்டா என்று சந்தேகம் வரும். 

அண்ணன் kgs பலமுறைகள் தலையில் குட்டி சொல்லிக் கொடுத்தபின் ஒருவழியாக அகர முதல எழுத்தெல்லாம் அறிய வைத்தாய் kayjee என்று பாடும் வகையில் முன்னேறினேன். kayjee (KG) என்பது எங்கள் எல்லோருக்கும் இனிஷியலாக இருந்தபோதும், பள்ளிக்கூட நாட்கள் தொடங்கி, பாலிடெக்னிக் படிப்பு, வேலை பார்த்த இடங்கள், நண்பர்கள் - எல்லோருக்கும் KG (kayjee) என்றால் அது k g சுப்ரமணியன் மட்டும்தான்! 

(தொடரும்) 

= = = = = = = = = = =

ரீட்டா & மீட்டா 06 

1) ஆனந்த் ரீத்திகா திருமணம்; ஆனந்தின் முன்னாள் காதலி ரீட்டாவிடமிருந்து மிரட்டல் கடிதம். 

2) ஆனந்த் எழுதிய காதல் கடிதங்களை திரும்ப அவனிடமே சேர்ப்பிக்க பத்து லட்ச ரூபாய் அனுப்பச் சொல்கிறாள் ரீட்டா. 

3) ஆனந்த் பத்து லட்ச ரூபாயை, ரீட்டாவுக்கு அனுப்புகிறான். ஆனந்த் எழுதிய கடிதங்களை அனுப்பி வைக்கிறாள் ரீட்டா. இரண்டு வாரங்கள் கழித்து மீண்டும் ஒரு கடிதம், ரீட்டாவிடமிருந்து !

4) மேலும் இருபது லட்ச ரூபாய் கேட்கிறாள் ரீட்டா. மீட்டாவின் ஆலோசனைப்படி, 'வேறு வழியில்லை - ரீட்டாவைக் கொல்வதுதான் ஒரே வழி' என்று முடிவு எடுக்கிறான் ஆனந்த். 

5) தடயம் இல்லாமல் நடந்த கொலைகள் பற்றி - மீட்டா சொல்லும்போது CV235 பற்றி குறிப்பிடுகிறது. 

மீட்டாவுடன் நிகழ்த்திய உரையாடல்களிலிருந்தும், இணையத்தின் உதவியுடனும், CV235 பற்றி ஆனந்த் கண்டுபிடித்த சில விவரங்கள்: 

CV235 是一个装有眼镜蛇毒液和催化剂的子。它的工作原理如下：... 

CV = Cobra Venom. 

CV235 சீனாவின் விவசாய ஆராய்ச்சி நிறுவனம் கண்டுபிடித்த ஒரு கலவை. பயிர்களை நாசம் செய்யும் உயிரினங்களை அழிக்கப் பயன்படுகின்ற மருந்துக் கலவை. சிறிய பீங்கான் கூஜா போன்ற அமைப்பில் விற்பனை செய்கிறார்கள். விலை  இந்திய ரூபாய் மதிப்பில் கிட்டத்தட்ட நான்கு இலட்ச ரூபாய்.

கூஜாவின் மொத்த அளவு ஒரு சதுர அங்குலம் மட்டுமே! மருந்தின் மொத்த எடை ஐந்து கிராம். கூஜாவின் வயிற்றுப் பகுதியில் மூன்று கிராம் எடையில் ஒரு கலவையும், கழுத்துப் பகுதியில் 2 கிராம் எடை உள்ள வேறு ஒரு  கலவையும் இருக்கும். 

கூஜாவின் மேலே உள்ள குமிழ்ப் பகுதியை நீக்கிவிட்டு, தண்ணீர் விழக்கூடிய இடத்தில் வைத்துவிட்டால், தண்ணீர் உள்ளே விழுந்த அடுத்த ஐந்து மணி நேரத்திற்குள், சுற்றுப்புற ஐநூறு கன அடி கொள்ளளவுக்கு காற்றில் விஷ வாயு கலக்கும். இந்த விஷ வாயு சுவாசத்தில் கலந்தால், உயிருக்கு ஆபத்து. விஷ வாயு வெளியே வந்த பிறகு, வெற்று ஜாடியால் ஆபத்து எதுவும் இல்லை. 

ஆனந்த், சென்னையில் கிண்டி தொழிற்பேட்டை அருகே அமைந்திருக்கும் ரீத்திகா கெமிக்கல்ஸ் நிறுவனம் சார்பில் CV235 வாங்க, சீன நிறுவனத்திற்கு ஆர்டர் அனுப்பி, பணமும் அனுப்பி வைத்தான். 

முக்கிய வியாபாரப் பேச்சு வார்த்தைகக்காக சென்னை - ரீத்திகா கெமிக்கல்ஸ் -செல்வதாக ரீத்திகாவிடம் சொல்லிவிட்டு, ஹைதராபாதிலிருந்து சென்னைக்கு விமானத்தில் புறப்பட்டான். 

(தொடரும்)