"திங்க"க்கிழமை : சுட்ட கத்தரிக்காய் சட்னி - மனோ சாமிநாதன் ரெஸிப்பி

 சாதாரணமாய் கத்தரிக்காய் சட்னி செய்வதைக்காட்டிலும் இப்படி கத்தரிக்காய்களை சுட்டு அவற்றை வைத்து சட்னி செய்வது மிகவும் சுவையாக இருக்கும். 

கத்தரிக்காய் கொத்ஸும் இப்படி செய்யலாம். பொன்னிறமாக நல்லெண்ணெய் ஊற்றி சுட்டெடுக்கும் தோசைக்கு இந்த சட்னி அத்தனை ருசியாக இருக்கும். ‘ முத்தபல் ‘ என்னும் அரேபிய சாலட் இந்த சுட்ட கத்தரிக்காயை வைத்து செய்யும்போது அதன் ருசி பிரமிக்க வைக்கும். இங்கெல்லாம் அரை கிலோ அளவுக்கு ஒரு கத்தரிக்காய் கிடைக்கும். அதில் தான் சுட்ட கத்தரிக்காய் பதார்த்தங்கள் நான் செய்வது. 

கத்தரிக்காய் ஊருக்கு ஊர், நாட்டுக்கு நாடு வேறு படும். ருசியும் வேறு படும். தஞ்சையில் கிராமப்புறங்களிலிருந்து சந்தைக்கு விற்பனைக்கு வரும் பிஞ்சு கத்தரிக்காய்களின் ருசியே தனி!

இனி சட்னிக்கு போகலாம்!!

சுட்ட கத்தரிக்காய் சட்னி

தேவை:

நடுத்தரமான கத்தரிக்காய்கள்-4

நடுத்தரமான தக்காளி-5

பெரிய வெங்காயம்-1

வற்றல் மிளகாய்-4

புளி- நெல்லிக்காயளவில் பாதியளவு

தேவையான உப்பு

நல்லெண்னெய் – 5 மேசைக்கரண்டி

செய்முறை:

கத்தரிக்காய்களை நெருப்பில் சுட்டெடுத்து அவை ஆறியதும் மேல் தோல்களை நீக்கி சதையை எடுத்து வைத்துக்கொள்ளவும்.

2 மேசைக்கரண்டி எண்ணெயை ஒரு வாணலியில் ஊற்றி சுட வைத்து கடுகு தாளித்து ஒரு சட்னி கிண்ணத்தில் கொட்டிக்கொள்ளவும்.

அதே வாணலியில் பாக்கியுள்ள எண்ணெயைக் கொட்டி அது சூடானதும் வெங்காயத்தை அரிந்து போட்டு வதக்கவும்.

அடுத்து மிளகாயைப்போட்டு ஓரிரு நிமிடங்கள் வதக்கவும்.

பின் அரிந்த தக்காளி துண்டுகளைப்போட்டு புளியையும் போட்டு மிதமான தீயில் தக்காளி குழையும் வரை வதக்கியெடுத்து ஆற வைக்கவும்.

முதலில் மிளகாய், புளி, வதக்கிய தக்காளி பாதியளவு சேர்த்து நன்கு அரைக்கவும்.

அதன் பின் உப்பு, சுட்ட கத்தரிக்காய், பாக்கியுள்ள தக்காளி சேர்த்து கொரகொரப்பாக அரைத்து தாளித்து வைத்துள்ள கிண்ணத்தில் கொட்டி கலக்கவும்.