உங்களுக்கு மிகவும் பிடித்த 3 நாவல்கள் பெயர்கள் என்ன?

 

நெல்லைத்தமிழன் : 

தமிழின் மகத்தான 10 நாவல்கள், 100 சிறுகதைகள் என்றெல்லாம் சொல்கிறார்களே. இதற்கான அளவீடு ஒவ்வொருவருக்கும் மாறுபடுமல்லவா? எதை வைத்து இந்த நாவல்தான் சூப்பர் என்று இவர்களால் சொல்ல முடிகிறது? (இனிமேல் இந்த மாதிரி கதை விட்டீங்கன்னா, வெண்முரசு அல்லது காவல் கோட்டம் நாவலை ஒரு இடத்தில் உட்கார்ந்து முழுவதும் படித்து அதில் வைக்கும் பரீட்சையில் பாஸானால்தான் நகர விடுவோம் என்று சொல்லணுமோ?) 

# ஒவ்வொருவருடைய ரசனை ஒவ்வொரு விதமாக இருக்கும் என்பது உண்மைதான் என்றாலும் கூட பொதுவான நோக்கில் ஒரு நல்ல கதை அல்லது ஒரு நல்ல நாவல் என்று சொல்லக்கூடிய தரம் கொண்ட கதையோ நாவலோ இருக்கத்தான் இருக்கும். எவ்வளவுதான் ரசனை வேறுபட்டாலும் பெரும்பாலான மக்கள் நல்லவை என்று ஒப்புக் கொள்வார்கள் என்ற மதிப்பீடு பொய்ப்பதில்லை.  தேர்வு செய்பவர்கள் நமக்குப் பிடித்தவர்களானால் ஒரு உத்தரவாதம் மாதிரி. அதனால்தான் ஒரு சுஜாதாவோ சிவசங்கரியோ நல்ல கதை என்று சொன்னால் அதற்கு ஒரு மரியாதை இருக்கிறது.

உங்களுக்கு மிகவும் பிடித்த 3 நாவல்கள் பெயர்கள் என்ன? அவை திரும்பத் திரும்பப் படிக்கத் தூண்டுபவைகளாக இருக்கவேண்டும். 

# நான் மீண்டும் மீண்டும் படித்த நாவல் என்று சொல்வதானால் மோகமுள்,  அன்பே ஆரமுதே, பொன்னியின் செல்வன் : ஆங்கிலத்தில் Man and Superman,  The Razor's Edge.

& பொன்னியின் செல்வன், ரா கி ர எழுதிய மூவிரெண்டு ஏழு, குமுதம் பத்திரிகையில் முன்பு வந்த பல சித்திரக் கதைகள் . 

முன்னெல்லாம் பதிவர் விழா என்றெல்லாம் இருந்தது. பலரையும் சந்திக்கும் வாய்ப்பு பலருக்குக் கிடைத்தது. இப்போது பதிவர்களை சந்திப்பதே அபூர்வமாகிவிட்டதே. நீங்கள் சென்றிருந்த பதிவர் விழா பற்றிச் சொல்லுங்களேன்.

# நம் அபிமான இவர் அல்லது அவர் சந்திக்காமல் இருக்கும் வரை நமது உச்ச பட்ச ஆராதனைக்குரியவராக இருப்பார். நான் பதிவர்கள் சந்திப்பிற்குப் போனதில்லை.

& பதிவர் சந்திப்பு, பதிவர் விழா எல்லாம் எ பி ஆரம்பித்த சில வருடங்களுக்கு இரண்டோ மூன்றோ சென்றது உண்டு. 

ஆனால் அங்கே வந்தவர்கள் பலரும் மற்றவர்களைப் பற்றி தெரிந்து கொள்வதை விட -  தங்களைப் பற்றியே ( சுயதம்பட்டம்)  பேசிக் 'கொல்'பவர்களாக இருந்ததுதான் வேதனை.

== == ====   ==== 

படமும் பதமும் : 

பானுமதி வெங்கடேஸ்வரன் : 

எதிர் காரில் அழகான பெண் இருந்தால் கண்ணடிக்குமோ?

காருக்கும் உண்டோ

காந்த கண்ணும்

காக்கின்ற இமையும்?

காதலைக் கண்டால் 

கண்சிமிட்டி சிரிக்குமோ?

= = = = = = =

ஸ்ரீராம் : 

இலை தாங்கும் மொட்டு... 

பூ விட்டு காய் விட்டால் கனம் தாங்குமா?

= = = = =

"  டாய்....   கிளாரிட்டி இல்லாம என்னடா இது? "

" Toy Clarinet ங்க.. "

= = = = = = = = = =

நெல்லைத்தமிழன் : 

என் மனைவியிடம், நீ செய்யும் முறுக்கு மாவு ரொம்பவே சூப்பர். அதில் முறுக்கு செய்வது உனக்கு ரொம்ப கஷ்டம். சூப்பி வேண்டுமானால் செய்துகொடு என்றதற்கு, நான் முறுக்கே செய்து தருகிறேன் என்றாள். அப்படீன்னா எனக்கு குறைந்தது 24 முறுக்காவது வேண்டும். என் கையில் கொடுத்துவிடவேண்டும். டப்பால போட்டிருக்கேன் என்று சொன்னால், அப்புறம் எனக்கு 24 முறுக்கு எனக்காகவே செய்தமாதிரி இருக்காது என்று சொல்லியிருந்தேன். அதற்காக அவள் முறுக்கு செய்த பிறகு ஒரு கம்பியில் கோர்த்து என்னிடம் கொடுத்தபோது நினைவுக்கு எடுத்துக்கொண்ட புகைப்படம் இது. 

எலெக்டிரானிக் வேஸ்டை வைத்து ஒரு பெரிய ஓவியம் செய்திருந்ததை நான் புகைப்படம் எடுத்தேன் (Mall பெயர் சட்னு நினைவுக்கு வரலை).  ஓவியம் நல்லா இருக்கு. ஆனால் எலெக்டிரானிக் வேஸ்டை வைத்து வேறு ஏதாவது செய்திருக்கலாம். இதுபோல வேஸ்ட் மெட்டீரியல் வைத்து அல்லது உடைந்த பீங்கான்களை வைத்து நிறைய சிற்பங்களை பாலக்காடு மலம்புழா அணைக்கட்டு அருகே பார்த்தேன். அந்தப் படங்களை இன்னொரு சந்தர்ப்பத்தில் பகிர்கிறேன். 

விளையாடுவதற்கு உனக்கு குரங்குக்குட்டிதானா கிடைத்தது? உன் ஜாதியில் வேறு நாய்க்குட்டிகள் இல்லையா?

சமீபத்தில்தான் வாட்சப் தகவலில் படித்தேன். பைசா நகர சாய்ந்த கோபுரம் 4 டிகிரிகள்தாம் சாய்ந்திருக்கிறதாம். அதற்கே அது உலகப் புகழ் பெற்றுவிட்டது. ஆனால் இந்த சிவன் கோவில் 9 டிகிரிகள் சாய்ந்திருக்கிறது. இதற்கு அதைவிட புகழ் கிடைத்திருக்கவேண்டாமா என்று. உடனே நான் வாரணாசி சென்றிருந்த பயணங்களின் புகைப்படத் தொகுப்புகளைப் பார்த்து இந்தக் கோயிலின் புகைப்படத்தைப் பகிர்கிறேன். இது மணிகர்ணிகா படித்துறைக்கு அருகே இருக்கிறது. (இது நம் முன்னோர்களின் திறமை என்று சொல்லவரவில்லை. கட்டிடத்தின் அடித்தளம், மணல்/களிமண் பரப்பினால் ரொம்ப வருடங்களாகவே சாய்ந்த நிலைக்குச் சென்றிருக்கலாம்)

= = = = = = = = = = =

KGG பக்கம் : 

Jio Hotstar serials 

After HUNT, and Criminal Justice serials, 

நான் பார்த்தவை : 

Special Ops

Hundred

The Freelancer

அது என்னவோ சின்ன வயதிலிருந்தே எனக்கு நகைச்சுவை கதைகளுக்கு அடுத்தபடியாக திகில் கதைகள், துப்பறியும் கதைகள், கோர்ட் சீன் கதைகள் எல்லாம் பிடிக்கும். 

ஜியோ ஹாட் ஸ்டார் தொகுப்புகளில் இந்த த்ரில்லர்கள் நிறைய கொட்டிக் கிடப்பதால் அதை என் ஆஸ்தான பெட்டகமாக எடுத்துள்ளேன். என்னென்ன பார்க்க வேண்டும் என்பதை பட்டியல் போட்டு வைக்க வேண்டும். 

இவற்றில் என்ன சௌகரியம் என்றால் டி வி யை பேசா மடந்தை ஆக்கிவிட்டு சப் டைட்டில்ஸ் படித்தே எல்லாவற்றையும் புரிந்துகொள்ள முடிகிறது. 

நல்ல பொழுதுபோக்கு. 

க்ரைம் த்ரில்லர் ஆக்ஷன் சீரியல்கள் வரிசையில் உங்கள் (வாசகர்கள்) பரிந்துரைகளை கருத்துரை பகுதியில் குறிப்பிடவும். 

சொல்ல மறந்துவிட்டேன்:

முன் காலத்தில் பார்க்க நினைத்து, ஆனால் நேரம் கிடைக்காததால் பார்க்காமல் விட்ட சில படங்களை சென்ற வாரம் பார்த்தேன்.

1) Ajanabee 

2) Anurodh 

இரண்டுமே ராஜேஷ் கன்னா நடித்த படங்கள். சக்தி சமந்தா(?) தயாரிப்புகள் எதுவும் சோடை போனதில்லை என்று நினைக்கிறேன். 

முன் காலத்தில் இந்தி தெரியாமல் ஆராதனா, தோ ராஸ்தே, சச்சா ஜுட்டா, ஆன் மிலோ சஜனா, போன்ற படங்கள் பார்த்தது உண்டு. பாடல்களை மட்டும் ரசித்தது உண்டு. 

இப்போ பாடல்கள் கேட்க முடியாவிட்டாலும் சப் டைட்டில்ஸ் மூலம் படத்தின் கதை வசனம் புரிந்துகொள்ள முடிகிறது. 

இன்னும் சில ரா க படங்கள் பார்க்க வரிசையில் வைத்துள்ளேன்.

ராஜேஷ் கன்னா பற்றி குறிப்பிடுகையில், காலச்சக்கரம் நரசிம்மா அவர்கள் ஃபேஸ்புக் பக்கத்தில் தொடராக எழுதிய 'பாலிவுட்டின் அமானுஷ்ய பங்களா' கட்டுரை ஞாபகம் வருகிறது. 

ஜுஹு கடற்கரைப் பகுதியில் ராஜேஷ் கன்னா வாங்கிய ' டிம்பிள்' பங்களா எப்படி அவரின் வாழ்க்கையில் விளையாடியது என்பது பற்றிய தொடர் பதிவு அது. விரைவில் அந்தக் கட்டுரைத் தொடர், புத்தகமாக வெளி வர உள்ளது. 

= = = = = = = = = = =