"திங்க"க்கிழமை : தக்காளி சாதம் - துரை செல்வராஜூ ரெஸிப்பி

 தக்காளி சாதம்

துரை செல்வராஜூ  ரெஸிப்பி 

தேவையான பொருட்கள்:

பாஸ்மதி அரிசி 400 கி

பெரிய வெங்காயம் ஒன்று

தக்காளி 4

பச்சை மிளகாய் 2

வீட்டுத் தயிர் 200 ml

இஞ்சி – பூண்டு விழுது ஒன்றரை  tsp

புதினா  கொத்தமல்லி - சிறிது

வீட்டில் தயாரிக்கப்பட்ட

கரம் மசாலா 3 tsp

மஞ்சள் தூள் அரை 3 tsp

பட்டை 2 

கிராம்பு 2 

பிரியாணி இலை- 2 

ஏலக்காய் 2 

முந்திரி 10

உலர் திராட்சை 10

நெய் 100 ml 

சூரியகாந்தி எண்ணெய் சிறிதளவு

செய்முறை: 

பாஸ்மதி அரிசியைக் கழுவி தனியாக பத்து நிமிடங்கள் ஊறவைக்கவும்..

வெங்காயம் தக்காளி பச்சை மிளகாய் இவற்றை சுத்தம் செய்து வெங்காயத்தை மெல்லியதாகவும் தக்காளியைத் துண்டுகளாகவும் பச்சை மிளகாயை நீளவாக்கிலும் நறுக்கிக் கொள்ளவும்..

முந்திரி  திராட்சையை வறுத்துக் கொள்ளவும்..

சற்றே அகலமான பாத்திரத்தை மிதமான சூட்டில் வைத்து எண்ணெய் ஊற்றி பட்டை, லவங்கம், பிரியாணி இலை, ஏலக்காய் சேர்த்து வதக்கவும். இவை நன்றாக வதங்கியதும் வெங்காயம் பச்சை மிளகாய் சேர்த்து வதக்கவும். 

வெங்காயம் வதங்கியதும், இஞ்சி – பூண்டு விழுதைச் சேர்த்து வதக்கவும். அடுத்து தக்காளித் துண்டுகளைச் சேர்த்து வதக்கவும். 

தக்காளி வதங்கியதும் இறக்கி வைத்து தயிரைச் சேர்த்து கிளறி  விடவும்.. 

இதுவரை எந்த நிலையிலும் தண்ணீர் சேர்க்கவில்லை என்பது நினைவில் இருக்கட்டும்.. 

இதற்குள் பத்து நிமிடம் ஆகியிருக்கும்.. 

ஊறவைத்திருக்கிற பாஸ்மதி அரிசியை வடிகட்டி வேறொரு பாத்திரத்திற்கு மாற்றி 700 மிலி வெதுவெதுப்பான நீருடன் அடுப்பில் ஏற்றவும்..

இத்துடன் -  கரம் மசாலாத் தூள், மஞ்சள் தூள், உப்புடன் வதக்கி வைத்துள்ள தக்காளி விழுதையும் சேர்த்து கிளறி விடவும் .. 

சற்று நேரத்தில் முதல் கொதி.. இரண்டாம் கொதி நிலையில் தண்ணீர் வற்றி வருகின்ற போது புதினா, கொத்தமல்லி முந்திரி திராட்சையைப் போட்டு அடுப்பை மிகவும் குறைத்து நெய்யை விட்டு பதமாக மீண்டும் கிளறி மூடி வைத்து விடவும்..

பத்து நிமிடம் கழித்து மூடியைத் திறக்கவும்...

கம கம என்று தக்காளி சாதம்..

அரிசி வேகின்ற கொதி நிலைகளை எழுத்தின் வாயிலாக அறிய முடியாது..  கண்ணால் கண்டு தெரிந்து கொள்ள வேண்டியதாகும்..

இது பழைமையான முறை..

தற்கால நீராவி அழுத்தச் சமையலர்களுக்கு இந்தப் பக்குவம் கிடைப்பது அரிது..

வற மிளகாய், நிறமி,  டால்டா இவை இல்லாமல் செய்யப்பட்டிருக்கின்றது..

இதற்கு தயிர் பச்சடி ஏற்றது..

நாமே நமக்காகத் தயாரிக்கும் போது வெளியாட்களின் (செய்முறை)  சுகாதாரக் குறைவுகள் பற்றிய சந்தேகம் வருவதற்கு வாய்ப்பு இல்லை..

நமது நலம் நமது கையில்..