"திங்க"க்கிழமை : பேரீச்சம் பழ கேக் - கீதா ரெங்கன் ரெஸிப்பி

 

 

பேரீச்சம்பழ கேக் 

வணக்கம், வணக்கம் எபி உணவுப் பிரியர்களே! எபியில் கேக் செஞ்சு ரொம்ப நாளாச்சே! இந்த முறை எபி அடுக்களையில் பேரீச்சம் பழ கேக்.

கோதுமை மாவு – 1 கோப்பை 

படத்தில் மாவு வெள்ளையாக இருக்கே என்று நினைக்கறீங்களா. அது வேறு ஒன்றுமில்லை. பால் பொடிய அதுக்கு மேல போட்டு அதன் பின் தான் தோன்றியது. அட ஃபோட்டோ எடுக்கலையே என்று.

பால் பௌடர் – ¼ கோப்பை அல்லது 4 டேபிள் ஸ்பூன் heaped. 

அதுக்குதான் படத்தில் மேசைக்கரண்டி காட்டியிருக்கிறேன். ½ கோப்பை கூட பால் பொடி சேர்த்துக் கொள்ளலாம். உங்கள் விருப்பம். அன்று என்னிடம் இருந்த அளவு அவ்வளவுதான். நான் எந்த கேக் செய்தாலும் பால் பொடி இல்லாமல் செய்வது இல்லை. படத்தில் 2 தானே தெரியுதுனு குரல் கேட்குது. 2 அடியில் இருக்கின்றன.  இப்படியான பாக்கெட்டுகள் 4 போடலாம்.

பேரீச்சம் பழம் – 8 -10. 

பழத்தைக் கூழ் போன்றும் அரைத்துக் கொள்ளலாம். நான் பழத்தைக் கூழ் போன்று செய்து கொள்ளவில்லை. கொட்டையை நீக்கிவிட்டு மிக்ஸியில் போட்டு சும்மா ரெண்டு சுற்று சுற்றி எடுத்துக் கொண்டேன்.

உலர்ந்த திராட்சைப்பழங்கள் – ¼ கோப்பை 

படத்தில் கப் அளவு ½ எனவே அதில் பாதியாகத் தெரிகிறது

ப்ரௌன் சர்க்கரை – ¼ கோப்பை.

பேரீச்சம்பழம் இனிப்பு, பால் பொடி இனிப்பு. இன்னொரு விஷயம் முட்டை போடாமல் செய்யும் கேக்கிற்கு இனிப்பு சற்று குறைவாகப் போட்டால் கேக் நன்றாக வரும். நாம் இனிப்பு பண்டங்கள் செய்வது போல் இனிப்பு போட்டால் குழ குழ என்று ஆகும். அப்படியே நீங்கள் இனிப்பு தூக்கலாகப் போட்டால், கேக் மாவு கலந்த பிறகு ரொம்ப நீர்த்து flowy consistency ஆகிவிடும். கேக் பேக் ஆகும் போது நடுவில் குழியாகிவிடும். எனவே இனிப்பு சற்று கூடுதலாகப் போட்டால் கலவை கொஞ்சம் கெட்டியாக இருப்பது நல்லது.

தயிர் – ½ கப்

வெண்ணை – ¼ கோப்பை (படம் இல்லை)

பேக்கிங்க் பௌடர் – 1 தேக்கரண்டி

பேக்கிங்க் சோடா – ½ தேக்கரண்டி

வெனிலா/கேஸர் எஸன்ஸ் – 1 தேக்கரண்டி (படம் இல்லை)

கேஸர் எஸன்ஸ் இதற்கு நன்றாக இருக்கும். குங்குமப்பூ இருந்தால் சிறிது பாலில் ஊற வைத்து சேர்த்துக் கொள்ளலாம். இரண்டின் விலையும் எனக்குக் கட்டுப்படியாகாது என்பதால் நான் வெனிலா எஸன்ஸ் சேர்த்துக் கொண்டேன். உங்களுக்கு விருப்பம் இருந்தால் வெனிலாவிற்குப் பதிலாக ஏலக்காய் பொடி பயன்படுத்திக் கொள்ளலாம்.

முதலில் எந்த கேக் டின்னில் பேக் செய்யப் போகிறோமோ அதில் கொஞ்சம் வெண்ணையை தடவி, மாவு கொஞ்சம் தூவி சுழற்றி நன்றாகத் தட்டி எல்லா பக்கமும் அது ஒட்டியிருப்பது போல் செய்து ரெடியாக வைத்துக் கொள்ளுங்கள். ஒரு கப் மாவு + இதரப் பொருட்கள் கலவைக்கு படத்தில் உள்ள சைஸ் 6 இன்ச் கேக் டின். கலவை கேக் டின்னின் அரை டின் அளவுதான் இருக்க வேண்டும். அல்லது 2/3 அளவு அதற்கு மேல் இருந்தால் பேக் ஆகும் போது மாவு பொங்கி வெளியில் வழிந்து கேக்கின் வடிவம் மாறும்.

பொருட்கள் எல்லாம் தயாராக வைத்துக் கொண்டதும் பேக்கிங்க் ஓவனை அதாவது OTG பேக்கிங்க் ஓவன். (எனக்கு மைக்ரோவேவ் கன்வெக்ஷன் அளவீடுகள் தெரியாது) ஆன் செய்து விடுங்கள். Pre heating. 10 நிமிட்ங்கள். அது சூடாகிக் கொண்டிருக்கும் போது கலவையை தயார் செய்துவிடலாம்.

வெண்ணையையும், பொடித்த சர்க்கரையையும் கலந்து நன்றாக 2, 3 நிமிடங்கள் வேகமாக அடித்துக் கடைய வேண்டும்.

பால் பௌடர், பேக்கிங்க் பௌடர், பேக்கிங்க் சோடா எல்லாம் சேர்த்து சல்லடையில் போட்டு சலித்துக் கொள்ளவும். அதோடு வெண்ணை சர்க்கரை கலவையை கொஞ்சம் கொஞ்சமாகச் சேர்த்து கலந்து விட்டு தயிரைக் கொஞ்சம் கொஞ்சமாகச் சேர்க்க வேண்டும். படத்தில் காட்டியிருக்கும் பதம் போல் வர ½ கப் தயிர்  போறாதது போல் இருந்தால் ஒரோரு டேபிள் ஸ்பூனாகப் பால் அல்லது தண்ணீர் கலந்து ஜாஸ்தி ஆகிடாம பார்த்துக்கோங்க.

ஒரே பக்கமாகக் கலக்க வேண்டும். வலப்பக்கம் அல்லது இடப்பக்கமாக. இப்படியும் அப்படியுமாகக் கலக்க வேண்டாம். கலக்கும் போது உலர் விஸ்கர் இருந்தால் அதால் கலப்பது நல்லது. கட்டி தட்டாமல் வரும். சிறிய துண்டுகளாக அரைத்து வைத்திருக்கும் பேரீச்சை மற்றும் உலர் திராட்சைகள் மற்றும் எஸன்ஸ் சேர்த்துக்கோங்க மறக்காம.

கலந்ததும் கேக் கலவை படத்தில் காட்டியுள்ளது போல பதத்தில் இருக்க வேண்டும். ஸ்பூனில் எடுத்து வழிய விட்டால் டக்கென்று வழியாமல் மெதுவாக வழியும் பதம். அதனால் தயிர் கலக்கும் போதும் மேலும் சேர்க்க வேண்டி வந்தால் பால் அல்லது தண்ணீர் சேர்க்கறப்ப கூடுதலாகிடாம பார்த்துக்கோங்க.

கேக் டின்னில் கலவை இப்படி டின்னின் அரையளவுதான் இருக்க வேண்டும் அல்லது சற்று தூக்கலாக இருக்கலாம்.

கலவையை, மேக்கப் போட்டுக் கொண்டு தயாராக இருக்கும் கேக் டின்னில் ஊற்றிவிட்டு டின்னைப் பிடித்துக் கொண்டு தரையில் தட்ட வேண்டும். Air Bubble சிறியதாக வந்து, மாவும் கலவையும் சமநிலைப்படும்.

10 நிமிடம் ப்ரீ ஹீட் ஆனதும் கேக் டின்னை நடு ராக்கில் வைத்து 180 டிகிரி செட் செய்து ½ மணி நேரத்திற்கு பேக் செய்ய வேண்டும். உங்கள் ஓடிஜி யின் திறன் பொருத்து இந்த நேரம் மாறுபடலாம். பொதுவாக ½ மணி நேரத்திலிருந்து 40 நிமிடங்கள் ஆகும்.

ஓவன் இல்லாதவங்க பழைய குக்கர் பாத்திரம் இருந்தால் அதில் கல் உப்பு ஒரு பாக்கட் அல்லது நல்ல மணல் போட்டு அதன் மீது குக்கர் அடியில் போடும் தட்டு உண்டே அதைப் போட்டு கேஸ் அடுப்பில் வைத்து சூடாக்கியதும் (ப்ரீ ஹீட்டிங்க்) கேக் டின்னை உள்ளே வைத்து, மூடி போடும் போது கேஸ்கெட் இல்லாமல் மூட வேண்டும். பெரிய பர்னரில் சிறிய தீயில் வைத்து பேக் செய்யலாம். இதுவும் 40 நிமிடங்களில் இருந்து 45 நிமிடங்கள் ஆகலாம் இந்த அளவிற்கு.

கேக் கொஞ்சம் உயர்ந்து மேலே ப்ரௌன் நிறம் வரும் வரை ஓவன் கதவைத் திறக்க வேண்டாம். (குக்கரில் என்றால் மூடியைத் திறந்து பார்க்கக் கூடாது.) அதன் பிறகு ஓவன் கதவைத் திறந்து ஒரு மெல்லிய குச்சி வைத்து நடுவில் நுழைத்துப் பார்த்து ஒட்டாமல் வந்தால் கேக் தயாராகிவிட்டது என்று அர்த்தம். ஓவனை அணைத்துவிட்டு அதே சூட்டில் கொஞ்சம் நேரம் அப்படியே விட்டுடுங்க. அப்புறம் கேக்டின்னை வெளியில் எடுத்து கொஞ்சம் ஆறியதும் மெதுவாக கொஞ்சம் ஓட்டைகள் உள்ள தட்டில் அல்லது வலைக்கம்பியில் கவிழ்த்தி வெளியில் எடுத்து வைத்து அதன் அடிபாகமும் நன்றாக ஆற விட வேண்டும். நன்றாக ஆறிய பிறகுதான் கேக்கைத் துண்டு போட வேண்டும்.

பேரீச்சம் பழ கேக் தயார்! 

கேக் எடுத்துக்கோங்க கொண்டாடுங்க!