"திங்க" க்கிழமை : புளிக்காய்ச்சல் ரெடி மிக்ஸ் - கீதா ரெங்கன் ரெஸிப்பி

 

புளிக்காய்ச்சல் மற்றும் புளியோதரை ரெடி மிக்ஸ் செய்முறை

சென்ற "திங்க"வின் தொடர்ச்சி…….

என் அன்பு (சாப்பாட்டு) ரசிகப் பெருமக்களே! வாங்க வாங்க… புளியோதரை பொடி ரெடி மிக்ஸ் அடுத்த திங்க வில் சொல்கிறேன் என்று சொல்லி முடித்திருந்தேன். அதுதான் இந்த வாரம் திங்கவில். பெரிய சூத்திரம் எதுவும் இல்லைங்க. உங்கள் எல்லோருக்கும் தெரிந்ததுதான். இது சும்மானாலும் நான், வேக்குவம் பாக்கிங்க் செய்யாத காலங்களில், எண்ணை வழியாமல் போக வேண்டுமே என்பதால் மகனுக்கு எப்படிச் செய்து கொடுத்தேன் என்பதைத்தான் இங்கு சொல்லப் போகிறேன்.

அளவு சென்ற ======> திங்க பதிவில்  <====== (இங்க போய் பார்த்துக்கோங்க) கொடுத்த அதே அளவுதான். எண்ணையைத் தவிர. இப்படிச் செய்வதற்கு எண்ணை 3 டேபிள் ஸ்பூன் போதும். ரொம்ப அளவு கூட்டிச் செய்தால் மட்டும் அதற்கு ஏற்றாற் போல் எண்ணையைக் கொஞ்சம் கூட்டிக் கொள்ளலாம்.

அப்பதிவில் சொன்னது போல் எடுத்து வைத்துக் கொள்ள வேண்டியவை அனைத்தையும் அளந்து எடுத்து வைத்துக் கொண்டு,

முதலில் வெறும் வாணலியில் வெந்தயம், பெருங்காயத்தை வறுத்து வைத்துக் கொண்டுவிடுங்கள். 

கட்டிப் பெருங்காயம் பயன்படுத்தினால் வெறும் வாணலியில் இந்த அளவுதான் (முதல் படம்) பொரிய வேண்டும் கலர் மாறினால் சுவை மாறும். 

எண்ணையில் வறுத்துப் பொடிக்க –

அளவு @ சென்ற பதிவில் சொன்ன அளவை வைத்துச் சொல்கிறேன்.

மிளகாய் 40 எடுத்துக் கொண்டிருக்கின்றீர்கள் என்றால் அதில் 15 மிளகாயைச் சிறியதாகக் கிள்ளி / கட் செய்து  கொள்ளுங்கள். மீதமுள்ள 25 மிளகாய்களை அப்படியே வைச்சுக்கோங்க. நீங்கள் எந்த அளவு எடுத்துக்கறீங்களோ அந்த அளவுப்படி இந்த விகிதத்தில் பிரித்துக் கொள்ளுங்கள். (என் பாட்டியின் சித்தி அந்தக் காலத்தில் உணவு வியாபாரம் செய்தார்களாம். அப்போது புளிக்காய்ச்சலில் கொஞ்சம் மிளகாய்களை மட்டுமே கிள்ளிப் போட்டுத் தாளித்து நல்ல ஆழ்ந்த வண்ணத்தில் பொரித்துக் கொண்டு மற்ற மிளகாய்களைக் கிள்ளிப் போடாமல் அப்படியே நன்றாகச் சிவக்க வறுத்துக் கொண்டு அது நல்ல மொறு மொறு என்று இருக்கும் என்பதால் கையால் நொறுக்கி, புளிக்காய்ச்சல் கொதிக்கும் போது போட்டு விடுவார்களாம். என் பாட்டியும் அப்படிச் செய்ததுண்டு. நானும்)

பருப்புகளில் – உளுத்தம்பருப்பு, கடலைப்பருப்பு ஒவ்வொன்றிலும் பாதி அளவை தனியாக எடுத்து வைச்சுக்கோங்க.

வாணலியில் ½ டேபிள் ஸ்பூன் நல்லெண்ணை விட்டு அதில் தனியாக எடுத்து வைத்த (இங்கு 25) மிளகாய்களை மிதமான தீயில் வறுக்கவும். அப்படி வறுக்கும் போது கொஞ்சம் நிறம் மாறத் தொடங்கும் போது எடுத்து வைத்திருக்கும் பாதி அளவு பருப்பை போட்டு பொன்னிறமாக வறுக்கவும். மிளகாய்களும் நன்றாகச் சிவந்து வந்துவிடும். வறுபட்டதும் தட்டில் மாற்றிவிடுங்க. ஆறட்டும். (வறுக்கும் படம், வறுத்தவை எங்கேன்னு கேக்காதீங்க! போயே போச்!!)

தாளிப்பதற்கு - 

அடுத்து அரை டேபிள் ஸ்பூன் நல்லெண்ணை விட்டுக் கொண்டு அதில் கிள்ளி வைத்த மிளகாய்களைப் போட்டு நன்றாகச் சிவந்து கரும் நிறம் வரும் போது மீதமுள்ள பருப்புகளைப் போட்டு பொன்னிறமாக வறுத்துக் கொள்ளவும். கருகப்பிலை ஒரு கொத்து போட்டுக்கோங்க. (போட்ட பின் எடுத்த படமும் காணவில்லை)

புளி உப்பு வறுத்தல்

அடுத்து புளியை சின்னதாகக் கிள்ளிக் கொண்டு 2 டேபிள் ஸ்பூன் எண்ணை விட்டுக் கொண்டு ஈரம் போக வதக்கி எடுத்துக் கொள்ளவும். இதை அதே வாணலியில்/சட்டியில் செய்யலாம் அல்லது தனியாக வாணலியில்/சட்டியில் செய்யலாம். அதே வாணலியில் செய்தால் மேலே சொன்னவற்றை வரிசையாக செய்து விட்டுக் கடைசியில் புளியை வறுக்கவும். ஏனென்றால் புளி வறுக்கும் போது வாணலியில் கொஞ்சம் ஒட்டிக் கொண்டு கறுப்பாகும். நான் தனியாக மண்சட்டியில் செய்வது வழக்கம். புளியில் கொட்டை, கோது இருந்தால் நீக்கி விடுங்கள், அப்படி இல்லாத புளி என்றால் நல்லது.

அதோடு உப்பையும் போட்டு ஈரம் போக வறுத்துக் கொள்ளவும். அடுத்து அதில் மஞ்சள் பொடியையும் போட்டுக் கொள்ளவும்.

பொடித்தல் - சேர்த்தல்

எல்லாம் ஆறிய பிறகு முதலில் வெந்தயம் பெருங்காயத்தை நன்றாகப் பொடித்துக் கொண்டு விடுங்கள் நைஸாக. அடுத்து எண்ணையில் வறுத்துப் பொடிக்க என்று சொன்னவற்றைச் செய்து ஆற வைத்ததைச் சேர்த்து பொடித்துக் கொள்ளுங்கள். கடைசியாக உப்பு மஞ்சள் பொடியோடு இருக்கும் புளியைப் பிரித்துக் கொஞ்சம் கொஞ்சமாகப் போட்டு பொடித்துக் கொள்ளுங்கள்.

எல்லாம் நன்றாகப் பொடித்த பிறகு அதை அகலமான பாத்திரத்தில் போட்டு தாளித்தவற்றைப் போட்டு நன்றாகக் கலந்து விடுங்கள். நான் தாளித்த வாணலியிலேயே போட்டுக் கலந்துவிட்டேன்.

பொடி..... தயார்

பொடி தயார். சரியாக வந்திருக்கிறதா என்று பரிசோதித்துப் பார்க்க பொடியை கலக்கிவிட்டு அதிலிருந்து இரண்டு மேசைக்கரண்டி எடுத்து மூழ்கும் அளவு தண்ணீர் விட்டுக் கலக்கிக் கொண்டு வாணலியில் 4 மேசைக்கரண்டி நல்லெண்ணை விட்டு அதில் இந்தக் கரைசலை விட்டு 10 நிமிடம் கொதிக்க விட்டுக் கிளறினால் புளிக்காய்ச்சல் தயார்.

இங்கு படத்தில் காட்டியிருப்பது தயாரித்த பொடியில் கால் கோப்பை எடுத்துக் கொண்டு செய்தது. நல்ல பேஸ்ட் போன்று வந்திருப்பது படத்தில் தெரியும். உப்பு தேவையாக இருந்தால் இதில் பொடி உப்பு கலந்து கொள்ளலாம். புளியோதரை தயார் செய்ய புளிக்காய்ச்சல் தயார்.

முதல் படம் பொடியை தண்ணீரில் கலந்து ....அடுத்த படம் நல்லெண்ணையில் வதக்குதல்/காய்ச்சுதல்

நல்ல பேஸ்ட் போன்று வந்திருப்பது படத்தில் தெரியும்.

எப்போதுமே புளியோதரை கலக்கும் முன், உதிர வடித்த சூடான சாதத்தை ஒரு அகலமான பாத்திரத்தில் அல்லது குழிவான தட்டில் போட்டு, அதில் கொஞ்சம் நல்லெண்ணை, கருகப்பிலை, ஒரு சிட்டிகை உப்பு, கால் ஸ்பூன் மஞ்சள் தூள் போட்டு நடுவில் குழித்துக் கொண்டு உத்தேசமான அளவில் புளிக்காய்ச்சலை போட்டு சூடு சாதத்தைக் குவித்து மூடிவிடுவது என் வழக்கம். 

அதன் பின் ஆறியதும் தான் அதைக் கலைத்து கலப்பதுண்டு. முள் கரண்டியால். அப்போது சாதம் தேவையாக இருந்தாலோ அல்லது புளிக்காய்ச்சல் தேவையாக இருந்தாலோ கொஞ்சம் சேர்த்துக் கொள்ளலாம். புளியோதரை கலந்த படம் எடுத்திருந்தேன் ஆனால் ரொம்ப Blur ஆக வந்திருந்தது. அதனால் இங்கு இல்லை. இருட்டுப் பகுதியில் மின்சார விளக்கில் என் மூன்றாவது விழி சரியாக எடுக்காது!!!

அப்போதைய மொபைலில் கேமராவும் அவ்வளவு சரியாக இருந்ததில்லை.

இவ்வளவுதாங்க புளியோதரை ரெடி மிக்ஸ், மேட்டர்! 

(கீதா இது உனக்கே நல்லாருக்கா!! எங்களை எல்லாம் இப்படி பரிசோதனை எலிகளாக்கிட்டியே!!!)