நான் தரிசனம் செய்த கோவில்கள்: நெல்லைத்தமிழன் : வைரமுடி யாத்திரை 23

 

வைரமுடி யாத்திரை – மேல்கோட்டையிலிருந்து பெங்களூர் நோக்கி – பகுதி 23

மேல்கோட்டையிலிருந்து 7 ½ க்குக் கிளம்பி, மத்தூரு என்ற இடத்திற்கு 9 ¼ க்கு வந்துவிட்டோம். இங்கு மிகப் புராதானமான உக்ர நரசிம்மர் கோவிலும், அதன் அருகிலேயே வரதராஜஸ்வாமி கோவிலும் உள்ளன.

மத்தூர்-Maddur உக்ரநரசிம்ஹர் கோவில்

மஹாபாரதப் போருக்குப் பின், அர்ஜுனன், தன் உறவினர்களெல்லாம் மடிந்ததை நினைத்து நிலைகுலைந்து போயிருந்தான். அந்தச் சமயத்தில் அர்ஜுன் கிருஷ்ணரிடம், தனக்கு நரசிம்மர் அவதாரத்தைக் காட்ட முடியுமா எனக் கேட்க, தன்னுடைய உக்கிரமான நரசிம்மர் அவதாரத்தைத் தாங்கக்கூடிய சக்தி அர்ஜுனனிடம் இல்லை என்று உணர்ந்த கிருஷ்ணர், உக்ர நரசிம்ம அவதாரத்தை ஒரு சிலை வடிவில் வணங்கமுடியும், நேரிடையாக காட்சி தந்தால் அந்த உக்ரத்தைத் தாங்கும் சக்தி உன் கண்களுக்கு இல்லை என்று கூறினார். கிருஷ்ணரின் வேண்டுகோளின் பேரில் பிரம்மாவினால் வடிவமைக்கப்பட்ட உக்ர நரசிம்மர் சிலையை அர்ஜுனன் தரிசித்தான். அந்தச் சிலா ரூபமே மத்தூரில் பிரதிஷ்டை செய்யப்பட்டது.

இந்த உக்ர நரசிம்மர் எட்டுக் கைகளுடனும் மூன்று கண்களுடனும் காட்சி தருகிறார். இரண்டு கைகள் தன் மடியில் இருக்கும் ஹிரண்யகசிபுவைப் பிய்க்கும் கோலத்திலும், இரண்டு கைகளால் ஹிரண்யகசிபுவின் குடலை மாலையாகப் போட்டுக்கொள்ளும் விதத்திலும் மற்ற நான்கு கைகளில், சங்கு, சக்ர, பாச, அங்குசத்தை வைத்துக்கொண்டும் காட்சி தருகிறார்.  பெருமாளின் வலது பக்கம் பிரகலாதனும், இது பக்கத்தில் கருடனும் பெருமாளை நோக்கிப் ப்ரார்த்திக்கும் விதத்திலும் உள்ளது.

இந்த உக்ர நரசிம்மர், பெயருக்கு ஏற்றவாறு உக்ர வடிவத்தைக் கொண்டுள்ளார். பெருமாளின் உக்ரத்தைத் தணிக்கும் வகையில், பூதேவி ஸ்ரீதேவி இருவரும், சௌம்யநாயகி மற்றும் நரசிம்ஹ நாயகி என்ற பெயரில் பிரதிஷ்டை செய்யப்பட்டிருக்கின்றனர். கோவிலில் ஆழ்வார் ஆச்சார்யார் சந்நிதிகளும் உண்டு.

கர்பக்ரஹத்தின் வெளியே வலது புறத்தில் யசோதை குழந்தை கிருஷ்ணருக்கு பாலூட்டுவது போன்ற (இந்த மாதிரி சந்நிதி இங்கு மட்டும்தான் பார்த்திருக்கிறேன்) சந்நிதியும் அதிலேயே ஸ்ரீநிவாஸர் திருவுருவமும் அமைந்துள்ளன. இது தவிர இராமர் சந்நிதியும் உண்டு. கடம்ப மகரிஷி இந்த க்ஷேத்திரத்தில் வசித்ததால், இது கடம்ப க்ஷேத்திரம் என்றும் அழைக்கப்படுகிறது. இந்தக் கோவில் மிகப் புராதானமானதாம். ஹொய்சாள அரசர்களால் சீரமைக்கப்பட்டது.

மூலவர் மிக மிக அழகாக இருக்கிறார் (சிலா ரூபம்). மஞ்சள் மற்றும் குங்குமத்தால் திருமஞ்சனம் செய்யும்போது, உக்ரம் வெளிப்படுகிறது.

மத்தூரு உக்ர நரசிம்மர்

கோவில் வெளிப்புறத் தூணில், மூலவர் போன்றே சிற்பம் செதுக்கியுள்ளனர். 

மஞ்சள் குங்கும திருமஞ்சனத்தின்போது, மூலவரின் உக்ரம் வெளிப்படுகிறது. 

மத்தூர்-Maddur வரதராஜஸ்வாமி கோவில்

மத்தூர் வரதராஜப் பெருமாள் கோவில் தோற்றம் (25 படிகள் ஏறினால் வரதராஜஸ்வாமி திருவுருவம் பிரம்மாண்டமாக உள்ளது). 

விஷ்ணுவர்தனா என்ற அரசன் இந்தக் கோவிலை ஆயிரம் ஆண்டுகளுக்கு முன்பு கட்டினானாம். இந்தக் கோவிலில் தமிழ் கல்வெட்டுகள் உள்ளனவாம். விஷ்ணுவர்தனாவின் தாயின் கண் பார்வை பாதிக்கப்பட்ட தாம். இராமானுஜர், விஷ்ணுவர்தன னின் கனவில் வந்து, தாயாரை காஞ்சீபுரம் வரதராஜர் கோவிலுக்குக் கூட்டிக்கொண்டு செல்லும்படியும், அங்கு ப்ரார்த்தித்துக்கொண்டால் கண்பார்வை திரும்பும் என்று சொன்னார். தாயாரோ மிகவும் வயதானவர். அரசன், என்ன செய்வது என்று யோசித்து, காஞ்சீபுரத்திலிருந்து சிற்பிகளைத் தருவித்து, அந்த வரதராஜர் போலவே இங்கு சிலை செய்யச்சொன்னானாம். சிலையைப் பிரதிஷ்டை செய்த பிறகு ஒரு மண்டலம் (48 நாட்கள்) பூஜை செய்தானாம். 48வது நாளில் தாயார், வரதராஜரை தரிசனம் செய்தபோது அவரது பார்வை திரும்பிவிட்தாம். அதனால் இந்த ஸ்வாமிக்கு நேத்ர நாராயணர் என்றொரு பெயரும் உண்டு.

இங்கு இப்போதும் கண் பார்வை திரும்ப 48 நாட்கள் பூஜை செய்வது வழக்கமாக இருக்கிறது. கோவில் என்று சொல்லக்கூடியது போல, ராஜகோபுரம்லாம் இல்லை. ஆனால் காஞ்சீபுரத்தில் இருப்பதுபோலவே 25 படிகள் ஏறி மூலவரை தரிசனம் செய்யவேண்டும். இந்தக் கோவில், மத்தூர் உக்ர நரசிம்மர் கோவிலிலிருந்து நடந்து செல்லும் தூரத்தில் அருகிலேயே இருக்கிறது.

தமிழ் கல்வெட்டு. கோவில் நுழைவாயில்

நேத்ர நாராயணர் என்று பெயருடைய வரதராஜர் மூலவர். 

வரதராஜரை தரிசனம் செய்த பிறகுதான் நாங்கள் உக்ர நரசிம்மர் கோவிலுக்குச் சென்றோம். தரிசனம் எல்லாம் முடிந்த பிறகு, அந்தக் கோவில் வளாகத்திலேயே எங்களுக்கு யாத்திரை நடத்துபவர் உணவு வழங்கினார் (மேல்கோட்டை க்ஷீரான்னம் பிரசாதம்,  பூந்தி, கதம்ப சாதம், வற்றல் மற்றும் தயிர் சாதம்).  நான் மாத்திரம் மெஜெஸ்டிக் இரயில் நிலையத்துக்கு முன்பே இறங்கிவிடுவேன் என்பதால் (பேருந்து எங்கள் வளாகத்தின் வழியாகச் செல்லும்), என் லக்கேஜை பேருந்தின் உள்ளே என் இடத்தில் கொண்டுபோய் வைத்தேன். நான் வரதராஜர் கோவிலுக்குச் சென்று சில புகைப்படங்களை எடுத்துக்கொண்டேன் (கூட்டம் இருக்கும்போது எடுத்தால், எல்லோரும் புகைப்படம் எடுப்பதிலேயே குறியாக இருந்திருப்பார்கள் என்பதால்).

பிறகு எல்லோரும் கோவிலுக்கு வெளியே கூடினோம். யாத்திரையைப் பற்றி, என்ன என்ன இடங்களுக்குச் சென்றோம், என்ன என்ன தரிசனம் செய்தோம்/பார்த்தோம் என்று குழுத் தலைவர் பத்து நிமிடங்கள் விலாவாரியாகப் பேசினார். பிறகு யாத்திரை நடத்தும் குழுவில் உள்ளவர்களுக்கு (ஓட்டுநர், க்ளீனர், சமையல் செய்தவர்கள், பரிமாறியவர்கள் என்று அனைவருக்கும்) நினைவுப் பரிசாக பணம் வழங்கினார்.

இரயிலில் பயணிப்பவர்களுக்கு பிளாஸ்டிக் டப்பாவில் புளியோதரையும் ஒரு வடையும் இரயிலிலேயே வழங்கிவிடுவார்கள். நான் முன்னமே இறங்கிக்கொள்ளப் போவதால் எனக்கு வீட்டிற்கு எடுத்துப் போகச் சொல்லி கொடுத்தார்கள்.  மனைவி, இரவு சாப்பிட்டுப் பார்த்து ரொம்ப நன்றாக இருந்தது என்று சொன்னாள்.

பிறகு எல்லோரும் பேருந்தில் அமர்ந்த பிறகு 11 ½ க்கு பெங்களூர் நோக்கிச் சென்றோம். 1 மணிக்கு என் வளாகம் அருகே பேருந்து வந்தபோது டிரைவர் பேருந்தை நிறுத்தினார். நான் அங்கேயே ஒரு ஆட்டோ பிடித்து 30 ரூபாய் கொடுத்து எங்கள் டவரில் இறங்கிக்கொண்டேன். (பெங்களூரில் ஆட்டோக்கள் மீட்டர் போட்டுத்தான் ஓட்டுவாங்க. மினிமம் சார்ஜ் 30).  மத்தவங்களும் மெஜெஸ்டிக்கை அடுத்த ஐந்து நிமிடங்களில் அடைந்துவிட்டார்கள்.

இப்படியாக, நான் இந்த வருடமும் சென்ற வைரமுடி யாத்திரை மிகவும் நல்லபடியாக நடந்து நிறைவுபெற்றது. இந்த யாத்திரை பற்றிய பதிவுகளுக்கு என்னுடன் இணைந்திருந்த அனைவருக்கும் நன்றி. மீண்டும் இன்னொரு யாத்திரை பற்றிய பதிவுடன் விரைவில் சந்திக்கிறேன்.

 ** வைரமுடி யாத்திரை நிறைவு பெற்றது ** 

= = = = = = = = = = =