சிறுகதை : சத்ரு சங்காரம் - துரை செல்வராஜூ

 சத்ரு சங்காரம்

துரை  செல்வராஜூ 

*** *** *** *** ***

திருமுருகன் நகர்..

நெடுஞ்சாலைக்கு சற்றே உள்ளடக்கம்.. கோயில் பூங்கா - என்று அழகான வடிவமைப்பு..

பெரும்பாலும் இது மாதிரி புதிதாக உருவாகின்ற நகர்களில் பிள்ளையார் கோயில்கள் தான் அமையும்.. ஆனால், இங்கே அமைந்திருப்பதோ பால தண்டாயுதபாணி கோயில்.. 

மனிதர்களின் வாழ்க்கையை வயலும் வரப்பும் நடத்திய காலம் போய் விட - வயல்களின் வாழ்க்கையை மனிதர்கள் நடத்துகின்ற காலமாகி விட்டது.. 

மக்கள் எல்லாரும் மக்களுக்கு வைத்தியம்  பார்க்க முனைந்து விட்டனர்..

இயற்கையும் மாறி மாறி ஆட்டம் காட்டுவதால் ஆற்றில் தண்ணீர் சரியாக வருவதில்லை.. மேலும் பல்வேறு பிரச்சினைகள்.. எல்லாவற்றையும் உத்தேசித்த பலர் விவசாயத்தில் இருந்து வெளியேறி விட்டனர்..

புண்ணியங்கள் சேரட்டும் என்று  பண்ணையார் ஒருவர் - முருகன் கோயிலைக் கட்டிக் கொடுத்ததோடு தன்னுடைய நிலத்தை மனைப் பிரிவுகளாக மாற்றி விற்று விட்டார்..

இப்படி உருவான கோயிலில் நின்று கொண்ட முருகனும் எல்லாருக்கும் நல்லது செய்து வருகின்றான்.. 

அதனால் தான்  ஐப்பசித் தூறலையும் பொருட்படுத்தாமல் இவ்வளவு கூட்டம்...

புளிய மரங்கள் அற்றதான அகன்ற சாலையில் ஏகப்பட்ட வாகனங்கள்.. மழை நேரத்திலும் சீறிப் பாய்ந்து கொண்டு இருக்கின்றன..

கோயிலின் முன்மண்டபத்தின் தூண் ஓரமாக அமர்ந்திருக்கின்றேன்.. தீபாவளிக் கொண்டாட்டத்தின் வீரப் பிரதாபங்களைப் பேசிக் கொண்டு இன்னும் பலர்..

இன்று கந்த சஷ்டி இரண்டாம் நாள்..

யாக பூஜைகள் முடிந்து கலசங்கள் புறப்பாடாகி மூலஸ்தானம் சுற்றி வந்து திருமுழுக்கும் ஆகி அலங்காரத்திற்காக திரையிட்டிருக்கின்றனர்..

கோயில் வளாகம் முழுவதும் பூக்களின் வாசமும் ஏலாதி திரவியங்களின் நறுமணமும்..

அரட்டையாளர்களைத் தவிர்த்து மற்றவர்கள் சந்நிதித் திரையை நோக்கியிருந்தனர்...

இடப்பக்கமாக சிறிய பரபரப்பு.. திரும்பிப் பார்த்தேன்.. கோயிலுக்கு வந்திருக்கும் சிலர் - வாகாக அமர்வதற்கு இடம் தேடிட - எனக்குப் பக்கத்தில் இளம் பெண் ஒருத்தி அரக்கப் பரக்க வந்தமர்ந்தாள்.. அர்ச்சனைக் கூடை ஒன்று அவள் கையில்.. 

" உங்களுக்கு ஒன்னும் இடைஞ்சல் இல்லையே மேடம்?... "

" மேடமா!.. " - சிரிப்பு எனக்குள்..

" நீ உட்காரும்மா.. ஒன்னும் பிரச்னை இல்லை.. " - என்றேன்..

சில விநாடிகளில் அந்தப் பெண் கேட்டாள்..

" அபிசேகம் முடிஞ்சதா மேடம்!.. "

" அபிஷேகம் ஆகி அலங்காரம் நடந்துட்டு இருக்கு.. " - என்றேன்...

" நேத்து என்ன அவ்ளோ நேரம் மந்திரம் சொன்னாங்க?.. I felt bored.. இன்னிக்கும் அது மாதிரி சொல்வாங்களா...  நான் அதுக்குள்ள Temple round  பண்ணிட்டு வர்றேன்.. என்றபடி எழுந்தாள்..

நான் சட்டென அவள் கையைப் பிடித்துக் கொண்டு - " சந்நிதி திரை போட்டு இருக்கறப்போ பிரதட்சணம் செய்யக்கூடாது மா.. " - என்றேன்..

" ஓ.. அப்படியா.. I'm  sorry.. " -  அமர்ந்து கொண்டாள்..

"  I don't  know anything about this system.. எனக்கு எதுவும் தெரியாது.. " 

சின்ன புன்னகை அவளிடத்தில்..

சந்நிதிக்குள் கை மணியின் ஓசை கேட்டது.. அனைவரிடத்திலும் பரபரப்பு..  சரேலென திரை விலக அடுக்கு தீப த்தின் ஒளியில் ஐயனின் தரிசனம்.. கோயில் மணி முழங்கிட இயந்திர மேளதாளமும் சேர்ந்து கொண்டது.. 

அஷ்டோத்திர நாமாவளிக்குப் பிறகு பஞ்ச தீப ஆரத்தி.. 

பெரிய தாம்பாளத்தில் வைத்து பஞ்ச தீபத்தை எடுத்து வந்த இளைஞன் ஐயரின் மகன் என்று தெரிந்தது.. தொடர்ந்து திருநீறு வழங்கி வந்தார் ஐயர்..

கூட்டம் முண்டியடித்துக் கொள்ள - அந்தப் பெண் என்னுடன் ஒதுங்கி நின்று விபூதி பெற்றுக் கொண்டு சந்நிதியை நெருங்கி கையில் இருந்த அர்ச்சனைக் கூடையைக் கொடுத்தாள்..

" யார் பேருக்கு அர்ச்சனை?.. "

" ராம் பிரசாத் ஹஸ்தம்.. ஹேமா.. உத்திரட்டாதி..  சிவ கோத்திரம்.. "

"  இவ்வளவு விவரம் போதுமே.. ஆனாலும் எதுவும் தெரியாதுன்னு சொல்றாளே..  இது எப்படி சாத்தியம்?.. " எனக்குள் வியப்பு..

" ஓம்... ராம் பிரசாத் நாம தேயஸ்ய... "

அர்ச்ச்னை சமர்ப்பித்து விட்டு ஐயர் பிரசாதம் கொடுத்தார்..

தூறலையும் பொருட்படுத்தாமல் பிரகாரத்தில் ஒருவரை ஒருவர் நெரித்துக் கொண்டனர் மக்கள்.. அங்கே  மண்டபத்தில் உபயதாரர்களின் சித்ரான்ன விநியோகம்.. 

' வரிசை.. வரிசை..' - என்று சொல்லிக் கொண்டிருந்தாலும்  வரிசை அமைய வில்லை.. அமைத்துக் கொள்ள வில்லை..

இந்தப் பெண் என்னுடன் நின்று கொண்டாள்... 

"  மேடம்.. இது ஏன் இவ்ளோ நேரம் மந்திரம் சொல்றாங்க?.. "

" அங்கே பெரியதா போர்டு வைச்சிருக்காங்களே.. பார்க்கலையா?.. "

" எனக்கு Tamil பேசவரும்.  படிக்கத் தெரியாது.. மேடம்!.. " 

" நீ எந்த ஊர் மா?... "

சொன்னாள்... 

" அந்த ஊர்ல பிறந்துமா தமிழ் தெரியலை!.. " -   ஆச்சரியத்துடன் நினைத்துக் கொண்டேன்..

" My school life was in English ..  இப்போ marriage ஆகி  இங்கே  வந்திருக்கேன்.. fourth  street.. "

" நாலாவது தெரு ன்னா யார் வீடு.. "

" புரொபசர் சந்தான கிருஷ்ணன்.. "

" அவங்க மருமகளா நீ.. என் மக அவர்கிட்ட தான் படிச்சா..  ஐயா நல்லா இருக்காங்களா.. "

" இருக்காங்க.. மேம்!.. "

" இங்கே நேற்றிலிருந்து ஆறு நாளைக்கு சத்ரு சங்கார யாகம்.. திரிசதி  அர்ச்சனை.. "

" That means.. "

" சத்ரு சங்காரம்.. எதிரிகளை ஜெயிக்கறதுக்கும்... "

" அப்போ border ல போய் மந்திரம் சொன்னா நமக்கு defense budget  மிச்சம் தானே.. " புன்னகைத்தாள்..

கூட்டம் மெதுவாகக் குறைந்து கொண்டிருந்தது..

" அப்படி இல்லை..  அர்த்தம் அப்படி இருந்தாலும் நமக்குச் சத்ரு நம்ம மனசுக்குள்ள இருக்குற கோபம், வெறுப்பு, கருமித்தனம், பேராசை, ஆணவம், அகம்பாவம் மாதிரியான கெட்ட குணங்கள் தான்.. இதுகளத் தான் நாம  சங்காரம் செய்யணும்..  கெட்ட குணம் எல்லாம் அழியணும்.. நல்ல அறிவு வரணும் ங்கறது தான் இந்த பூஜையோட நோக்கம்.. நமக்கு எதிரி நாமே தான்... அவன் அழியணும்  இவன் ஒழியணும் ன்னு இருந்தா ஊர் தாங்காது.. " 

" ஓ!.. நம்மை நாமே correct  பண்ணிக்கிறதா!..  correct பண்றது.. ன்னா இந்த காலத்து ல வேற meaning.. "

" நம்மை நாமே correct  பண்ணிக்கிட்டா மனசு ஸ்படிகம் crystal  மாதிரி ஆகிடுது.. அதுக்கப்புறம் spiritual star தான்!..

" ஓ!.. this is  very  first time.. I like your definition .. I feel something different.. " 

" திரிசதி அர்ச்சனை ந்னா முருகனைப் போற்றி முன்னூறு தரம் சொல்றது.. "

" English ல யும் print அடிச்சி போட்டிருக்கலாம்.. sanskrite புரியலை.. " 

" சில சம்பிரதாயங்கள் விஷயங்கள்  இப்படித்தான்..  கிரிக்கெட்ல அவன் சதம் அடிச்சிட்டான் னு சத்தம் போட்டால் மட்டும் புரியுதா.. "

" சதம்.. century!.. that means hundred!.. easy english.. " 

" வருஷக் கணக்கில் தமிழ் படிக்காம இருந்தா இப்படித் தான்!.. " - சிரித்தேன்..

அந்தப் பெண்ணும் சிரித்தாள்

பிரசாத மேடைக்கு வந்து விட்டோம்..  எங்களுக்கும் பாக்கு மட்டையில் பொங்கல் புளியோதரை வடை என்று நிறைவாகக் கிடைத்தது.. அபிஷேகப் பாலும் கிடைத்தது.. 

ஒரு ஓரமாக அமர்ந்து சாப்பிட்டோம்.. 

" எங்க சித்தப்பா சொன்னாங்க.. இந்த six day பூஜை miss பண்ண வேண்டாம்.. நல்லது நடக்கும்  ன்னு.. நான் ரொம்பவே நல்ல பொண்ணு.. ஆனா lazy... அதுக்கு மேல angry bird.. ok.. நாளைக்கு correct time க்கு வந்துடுவேன்.. முருகா.. இனிமே கோபத்தை reduce பண்ணிக் கொடுங்க ன்னு pray பண்ணிக்கறேன்..  கோபம் குறைந்தால் நல்லது தானே.. best of prayer .. நாளைக்கு meet பண்ணுவோம்.. thank you மா!..   முருகா.. My lord - give your blessing to all .." - என்றபடி கை கூப்பினாள்..

தூறல் நின்றிருந்தது.. 

***