பேய். பிசாசு. பூதம். ஒற்றுமை வேற்றுமைகள் என்ன?

 

ஜீவி: 

நான் புதன் பதிலுக்காக ஒரு கேள்வியை எழுப்புகிறேன் என்று வைத்துக்கொள்ளுங்கள்.

அடுத்த புதனில் அந்தக் கேள்விக்கான பதிலை அளித்தவர் இவர்தான் என்று எப்படி நான் தெரிந்து கொள்வது? அதற்கு ஏதாவது கண்டுபிடிக்கும் வழி இருக்கா?..

# இருக்கலாம். அதை தெரிந்து கொண்டு என்ன பயன், தெரியாவிட்டால் என்ன இழப்பு ? ஒன்றுமில்லையே.

& யார் சொல்கிறார்கள் என்பது முக்கியம் இல்லை; என்ன சொல்லப்படுகிறது என்பதே முக்கியம் என்று சீன அறிஞர் ஒருவர் சொல்லியிருக்கிறாரே ! 

谁说的并不重要；所说的很重要。张昌

வாராவாரம் ஒரு எபி வாசகர் புதன் கேள்விகளுக்கு பதில் அளிக்கும் புதுமையைப் புகுத்தினால் என்ன?

# புகுத்தலாம்தான். பதில் சொல்லிக் களைத்தால் ஓய்வு எடுத்தாற் போலுமாகும்.

& இதில் புதுமை எதுவும் இல்லை. ஆரம்ப காலங்களில் வாசகர்களுக்கு ஐந்து கேள்விகள் என்று வாரா வாரம் ஸ்ரீராமும் நானும் கேட்டுக்கொண்டிருந்தோம். அப்போது தவறாமல் அப்பாதுரை, கீதா சாம்பசிவம், ஏஞ்சல், அதிரா எல்லோரும் பதில் சொல்லிக்கொண்டிருந்தார்கள். 

நெல்லைத்தமிழன்: 

ரொம்ப வயதாகியும் உயிரோடு இருப்பது வரமா இல்லை சாபமா?

# அது வயதானவர் எப்படிப் பட்டவர்களுடன் இருக்கிறார், அவரது ஆரோக்கியம் எப்படி இருக்கிறது, அவருக்கு என்ன மாதிரியான உதவிகள் தேவைப் படுகிறது, அவரது பணபலம் எப்படியானது, அவர் சிடுமூஞ்சியா, தொணதொணப்பா, தன்னைச் சூழ்ந்திருப்போர் மேல் எந்த அளவு அன்பு செலுத்துபவர் போன்ற பல விஷயங்களைச் சார்ந்திருப்பது.

& நூறு வயதுக்கு மேல் வாழ்ந்த என்னுடைய அம்மா, 'ரொம்ப வயதாகியும் உயிருடன் இருப்பது ஒரு வகையில் சாபம்தான்' என்று கூறினார்.  

கே. சக்ரபாணி சென்னை 28: 

1. ஹோட்டல் தோசைகள் ஒரு  தனி சுவையுடன்  இருக்க காரணம்  தோசைக்கல்லில்  தண்ணீர்  ஊற்றி  வெளக்குமாத்தால  அடித்து விடுவதுதானா?

# தோசைக்கல் கனம் ( தடிமன் ), அதை சூடாக்கும் ஜ்வாலையின் அளவு, எந்த அளவு கல்  சூடாகி எந்த அளவுக்குக் குறைக்கப் படுகிறது , எண்ணெய் விடும் சூட்சுமம் இதெல்லாம் போக மாவில் அளவாகச் சேர்த்தது  அரைக்கப்பட்ட சோறு, ரொம்பக் கொஞ்சம் மைதா இப்படிப் பல சூட்சுமங்கள் ஓட்டல் தோசையில் உள்ளன. கொஞ்சம் ஆறிப் போனால் சகிக்காது - இதை நாம் கவனிப்பதில்லை.

2.  பெண்கள்  முகத்தில்  பவுடர்  போட்டுக்கொள்வது  பொலிவாகவும் வெண்மையாகவும்  சற்று  நறுமணத்துடன் இருப்பதற்குதான்.  ஆனால்  லிப்ஸ்டிக்   போட்டுக்கொள்வதால்  என்ன நன்மை. அதை ஒன்றும்  அழகு என்று  ஏற்றுக்கொள்ளமுடியாது.  தங்கள்  கருத்து என்ன? 

# அலங்காரம் செய்து கொள்வது அவரவர் இஷ்டம்.  லாங் ஷாட்டில் லிப்ஸ்டிக் அழகூட்டுவதைப் பார்த்திருக்கிறேன். தெரிந்த பெண்மணி சொன்னதிலிருந்து , உதடுகள் மிக மெல்லியதாக இருந்தால் அதை  ஈடு செய்ய (மறைத்துக் காட்ட) லிப்ஸ்டிக் உதவும் என்று தெரிந்து கொண்டேன். சினிமா ஷூட்டிங்குகளில் நாயகி நடிகைகளை லிப்ஸ்டிக் அலங்காரம் இல்லாமல் பார்க்க முடியாது. அதில் ஒரு செய்தி இருக்கிறது அல்லவா ?

& Meta விடம் இந்தக் கேள்வியைக் கேட்டேன். அது ஆங்கிலத்தில் சொன்ன பதிலை இங்கே கூகிள் துணையுடன் தமிழ்ப்'படுத்தி' இருக்கிறேன். 

உதடுகளுக்கு லிப்ஸ்டிக் போடுவதால் பல நன்மைகள் உள்ளன: 

1. அழகியல் ஈர்ப்பு: உதட்டுச்சாயம் முகத்திற்கு நிறத்தையும் உற்சாகத்தையும் சேர்க்கிறது. 

2. மாய்ஸ்சரைசிங்: பல உதட்டுச்சாயங்களில் ஹைட்ரேட்டிங் பொருட்கள் உள்ளன, உதடுகளை மென்மையாகவும் மிருதுவாகவும் வைத்திருக்க உதவுகிறது. 

3. பாதுகாப்பு: உதட்டுச்சாயம் வறண்ட காற்று மற்றும் தீவிர வெப்பநிலைக்கு எதிராக ஒரு தடையை வழங்குகிறது. 

4. தன்னம்பிக்கையை அதிகரிக்கும்: உதட்டுச்சாயம் அணிவது சுயமரியாதையை அதிகரிக்கச் செய்து உங்களை மேலும் கவர்ச்சியாக உணர வைக்கும். 

5. ஆளுமையின் வெளிப்பாடு: லிப்ஸ்டிக் வண்ணத் தேர்வுகள் தனித்துவத்தையும் தனிப்பட்ட பாணியையும் பிரதிபலிக்கின்றன. 

6. உதடு வடிவத்தை முன்னிலைப்படுத்துதல்: உதட்டுச்சாயம் உதடுகளின் இயற்கையான வளைவை வரையறுக்கிறது மற்றும் வலியுறுத்துகிறது. 

7. சமூக மற்றும் கலாச்சார முக்கியத்துவம்: உதட்டுச்சாயம் பெரும்பாலும் கவர்ச்சி, நுட்பம் மற்றும் கலாச்சார மரபுகளுடன் தொடர்புடையது. 

லிப்ஸ்டிக் பயன்படுத்துவதால் சில கூடுதல் நன்மைகள்: - 

8. புற ஊதா பாதுகாப்பு    

9. வயதாவதை  எதிர்க்கும்  பண்புகள். 

இந்த ஒன்பது நன்மைகள் பற்றி '9 தாரா' என்ன சொல்கிறார் பாருங்க! 

3. பேய்.    பிசாசு.     பூதம்.     ஒற்றுமை  வேற்றுமைகள் என்ன?

# வேற்றுமைகள்:

பேய்: இது மனிதர்களை  மட்டுமே பிடிக்கும்.

பிசாசு: அகாரணமாக இது மட்டுமே நம் கண்களுக்குக் காட்சி தரும். 

பூதம்: நல்லது செய்யும் வகையில் பூதம் மட்டுமே இருக்கும்.

ஒற்றுமை:

இவை மூன்றுமே புருடா.

&: மைண்ட் வாய்ஸ் : ' கல்யாணத்துக்கு முன்னாடி இவை மூன்றுமே வேறு வேறு என்று நினைத்திருந்தேன். '

= = = = = = = = = =

KGG பக்கம் :

kgs நினைவுகள் தொடர்கின்றன. 

kgs அண்ணனிடம் சிறு வயதில் பல சந்தர்ப்பங்களில் குட்டு வாங்கி கின்னஸ் உலக சாதனை படைத்தவர் என்னுடைய சின்ன அண்ணன் விசு. அந்த நாட்களில் kgs அவர்களுக்கு 'இரும்புக்கை' என்ற பெயரும் உண்டு. 

விசு அண்ணன் என்ன செய்வார் என்றால், kgs குட்டுவதற்காக அருகில் வரும்போதே " ஆ ! ஐயோ ! அம்மா ! வலிக்குதே " என்று கூச்சல் போட்டு அழ ஆரம்பிப்பார். சமையலறையில் இருக்கும் அம்மா உடனே வெளியே ஓடி வந்து kgs அண்ணனை கண்டிப்பார். kgs உடனே " நான் இன்னும் அவனை தொடக்கூட இல்லை - அதற்குள் கூச்சல் போடுகிறான்" என்பார். 

விசு அண்ணனிடம், ஒரு சமயம் இது பற்றி கேட்டேன். அதற்கு அவர் " டேய் - அவர் குட்டுவதற்கு வரும்போதே கத்தி ஆர்ப்பாட்டம் செய்தால்தான் குட்டு சிறிய குட்டாக விழும். இல்லையேல் மண்டை பிளந்து போகும் அளவுக்கு பலமாக குட்டிவிடுவார் " என்று சிரித்துக்கொண்டே கூறினார். 

*** 

kgs அண்ணனுக்கு கடவுள் நம்பிக்கை எல்லாம் அதிகம் கிடையாது. ஆனால் அப்பா பூஜை செய்ய - சந்தனக் கல்லில் சந்தனம் அரைத்துக் கொடுப்பார், அக்கா பூக்களைத் தொடுத்து மாலை கட்டுவார். நான் அப்பா பூஜை செய்து முடிக்கும் வரை நெற்றியில் அப்பா இட்டுவிட்ட விபூதி துலங்க ( அம்மா, சின்ன அண்ணன் எல்லோரும் என்னை அந்த சமயம் ' ஆஷாடபூதி' என்று பரிகாசம் செய்வார்கள்!) உட்கார்ந்து பார்த்துக்கொண்டிருப்பேன். அப்பா சொல்லும் ஸ்லோகங்கள், பூஜை மந்திரங்கள் எல்லாம் கேட்டுக் கேட்டு மனப்பாடம் ஆகியிருந்தது அந்தக் காலத்தில் !   

சமீப காலத்தில், kgs அண்ணனிடம், அவர் சிறிய வயதில் கோவில்களுக்குச் சென்றது உண்டா என்று கேட்டேன். அதற்கு அவர், கீழ்க்கண்ட சந்தர்ப்பங்களில், கோவில் சென்றது உண்டு என்றார். 

அவை :

1) நாங்கள் இருந்த வீட்டின் எதிர்ப்பக்கத்தில், சட்டையப்பர் கோவில் மேற்குப் பிரகாரத்தின் மதில் சுவர். அண்ணன் வீதியில் விளையாடும்போது கோவிலுக்குள் விழுந்த பந்தை எடுப்பதற்காக மட்டும் கோவிலுக்குள் அடிக்கடி சென்றது உண்டு என்றும் ஆனால் சுவாமி சந்நிதி பக்கம் போனதில்லை என்றார். 

2) அம்மா கர்நாடக சங்கீதக் கச்சேரிகள் கேட்க, நாகை நீலாயதாக்ஷி அம்மன் கோவில் திருவிழா சமயங்களில் செல்வார். அந்த நேரங்களில், kgs அம்மாவுக்குத் துணையாக சென்றது உண்டு என்று சொன்னார். மேலும் அந்தக் கோவில் திருவிழா கடைகளில் அம்மா கல்சட்டி போன்ற பொருட்கள் வாங்கச் செல்லும்போதும், அம்மாவுடன் சேர்ந்து, கோவில் பக்க சந்து வழியாக (குறுக்கு வழி) நுழைந்து நீலாயதாக்ஷி அம்மன் கோவில் சந்நிதியில் - திருவிழா கடைகளில் கல் சட்டி தேர்ந்தெடுக்க உதவியது உண்டு என்று சொன்னார். 

பத்து வருடங்களுக்கு முன்பு நாங்கள் அவருடைய காரில் எங்கள் ஊர் கோவில்கள், குலதெய்வம் கோவில் எல்லாம் சென்றபோது, நான் வற்புறுத்தியதால், குல தெய்வம் (வைத்தீஸ்வரன் கோவில் செல்வ முத்துக்குமாரசுவாமி ) கோவிலுக்குள் வந்தார். ஆனால் சுவாமி கும்பிட்டாரா இல்லையா என்று ஞாபகம் இல்லை! 

(தொடரும்)