நான் தரிசனம் செய்த கோயில்கள் – நெல்லைத்தமிழன் ஐந்து துவாரகைகள் யாத்திரை – பகுதி 37

 

 

நிதிவனத்தில் தரிசனம் முடிந்து யமுனை ஆற்றின் கரையை நோக்கிச் சென்றோம். செல்லும்வழியில் பார்த்த கோவில் இது. இறங்கி உள்ளே செல்லவில்லை.

18ம் நூற்றாண்டில் லக்னோவைச் சேர்ந்த ஷா சகோதரர்களால் (குந்தன்லால், புந்தன்லால்) கட்டப்பட்ட கோவில் இது.  இதனை ஷா ஜி மந்திர் என்றே அழைக்கின்றனர். நேரமின்மையால் இந்தக் கோவிலுக்குள் நாங்கள் செல்லவில்லை.

கண்ணன் யமுனையில் நீராடிக்கொண்டிருந்த கோபிகையர்களின் துணிகளை  எடுத்துக்கொண்டு மரத்தில் ஏறி லீலை புரிவது. இதற்கு அடையாளமாக ஒரு பெரிய மரம் யமுனை நதிக்கரையில் இருக்கிறது. இவற்றையெல்லாம் நாம் அடையாளமாகத்தான் எடுத்துக்கொள்ள வேண்டும். ஸ்ரீகிருஷ்ணர் துவாபர யுகம்.

இந்த மரத்தின் அருகிலேயே காளிங்க நர்த்தனம் ஆடிய கிருஷ்ணரை நினைவுகூறும் வகையில் கோவிலொன்று இருக்கிறது (சிறிய கோவில்). இந்த இடம் யமுனை நதிக்கரையில்தான் இருக்கிறது.

காளிங்க நர்த்தன கிருஷ்ணரை தரிசனம் செய்த பிறகு நாங்கள் எல்லோரும் யமுனைக் கரைக்குச் சென்றோம். பொதுவாக யாத்திரை செல்லும்போது, கங்கையில், திரிவேணியில் மற்றும் யமுனையில் படகுச் சவாரி செய்வோம். சில நேரங்களில் வெள்ளப் பெருக்கினால் அமைவது கிடையாது.  நாங்கள் சென்றிருந்த நான்கு முறைகளில், இரு முறை யமுனையில் படகுச்சவாரி அமைந்தது.

யமுனை நதிக்கரையோரம்… படகுகளின் அணிவகுப்பு. 

யமுனையில் படகில் அமர்ந்துகொண்டு, கரையைப் பார்க்கும்போது நகரின் புராதனம் நன்றாகத் தெரிந்தது.

யமுனை படகுச்சவாரிக்குப் பிறகு, அங்கிருந்து புறப்பட்டு, அருகிலிருந்த ரங்க்ஜி மந்திருக்குச் சென்றோம். இது தென்னிந்தியர்களால் நிர்வகிக்கப்பட்டுவரும் ஓரளவு பிரம்மாண்டமான கோவில். கிட்டத்தட்ட நம் ஆண்டாள் ரங்கமன்னார் கோவில் போல (ஸ்ரீவில்லிபுத்தூர்), கர்பக்ரஹத்திற்கும் பக்தர்கள் வணங்கும் இடத்திற்கும் வெகு தொலைவு. அதே போன்ற அமைப்பு.  தென்னிந்திய பாணியில் நிர்வகிக்கப்படும் என்றாலே, சட்டை இல்லாமல் இருந்தால்தான் திருமஞ்சனம், வேதகோஷ்டி போன்றவற்றில் கலந்துகொள்ளமுடியும்.

ரங்க்ஜி மந்திரின் ஒரு புற நுழைவாயில்

கோவில் உட்பிராகாரம். 

ரங்க்ஜி கோவிலின் மூலவர். 

மூலவர் சன்னிதிக்கு இடப்புறம் இருக்கும் திருவேங்கடமுடையான் சன்னிதி. 

இந்தக் கோவிலின் ஒரு பகுதியில், தசாவதாரங்களும், ஸ்ரீகிருஷ்ணர் சம்பந்தப்பட்ட சிற்பக் கண்காட்சி இருந்தது.  மண்ணினால் செய்யப்பட்ட சிற்பங்கள். (பெரிய அளவு கொலு பொம்மை போல). அதையும் பார்த்தோம்.

கோவிலின் வெளிப்புறம் கடைவீதிகள். எல்லா க்ஷேத்திரத்தில் இருக்கும் வித வித கடைகள்தாம் என்றாலும், விருந்தாவனத்தில் ஜால்ரா, துளசி மாலைகள் விசேஷம். பொதுவாக ஏமாற்று இருக்காது. இதைத் தவிர வடநாட்டிற்கே உரித்தான லஸ்ஸி மற்றும் இனிப்புக் கடைகள் உண்டு.

கோவில் தரிசனங்கள் முடிந்த பிறகு தங்குமிடத்திற்கு வந்துசேர்ந்தோம். மதியம் 12 மணிக்கு பகலுணவு. பிறகு இரண்டு மணி நேர ஓய்வுக்குப் பிறகு 2 ½ மணி வாக்கில் விருந்தாவனத்தைவிட்டு குருக்ஷேத்திரம் நோக்கிச் செல்லப்போகிறோம்.

எப்போதும்போல சுவையான மதிய உணவு, இனிப்போடு. இன்னும் 1 ½ மணி நேரம் இருந்த தாலும், நாங்கள் ஏற்கனவே லக்கேஜை ரெடி பண்ணி வைத்துவிட்ட தாலும், கடைத்தெருவுக்கு நானும் மனைவியும் சென்றோம். துளசி மாலை, ஜால்ராக்கள் வாங்கிவிட்டு ஆட்டோவில் திரும்பினோம். (எல்லாம் நடக்கும் தொலைவுதான்).

விருந்தாவனத்தில் குரங்குத் தொந்தரவு உண்டு. அதனால் கேமரா போன்றவற்றை ஜாக்கிரதையாக வைத்துக்கொள்ளவேண்டும். முன்பெல்லாம், வரும் யாத்ரீகர்களிடமிருந்து மொபைலைப் பிடிங்கிக்கொண்டு மரத்தில் ஏறி உட்கார்ந்துவிடுமாம். இதற்குப் பழக்கியவர் வந்து ஒரு ஃப்ரூட் ஜூஸ் (டெட்ரா பேக்) மற்றும் கொஞ்சம் ரூபாயை யாத்ரீகரிடமிருந்து கறந்துவிட்டு, மொபைல் போன்றவற்றை குரங்கிடமிருந்து வாங்கித்தந்துவிடுவாராம். இதனால் விருந்தாவனத்துக்குக் கெட்டபெயர் வருகிறது என்று, அந்தக் காட்டுவாசிகளை ஊர்மக்கள் விரட்டிவிட்டுவிட்டார்களாம்.

மதியம் எங்கள் பேருந்து குருக்ஷேத்திரத்தை நோக்கிப் புறப்பட்டது. வழியில் 6 மணிவாக்கில் ஒரு இடத்தில் நிறுத்தி காபி மற்றும் இனிப்பு/காரம் வழங்கினார்கள்.  இப்படி இடையில் நிறுத்துவதால் கொஞ்சம் கால்களுக்கும் ஓய்வு கிடைக்கிறது.  இரவு சுமார் 9 மணிக்கு குருக்ஷேத்திரத்தில் ஜாட் சபா பவனை அடைந்தோம். கொடுக்கப்பட்ட அறையில் எங்கள் லக்கேஜுகளை வைத்தோம். 9 ¾ வாக்கில் இரவு உணவு தந்தார்கள்  (கதம்பசாதம், வற்றல், தயிர்சாதம், ஊறுகாய்.  இனிமேல்தான் உணவு தயாரிப்பவர்கள் செட்டில் ஆகணும்.)

இந்த வாரமும் படங்கள் அதிகமாக ஆகிவிட்டதால் மிகுதியை அடுத்த வாரம் தொடர்வோம்.

 (தொடரும்)