காக்கா பிடித்தல் என்றால் என்ன?

 

ஜீவி: 

எபியில் பலர் பார்வையில் படுகிற மாதிரி ஒரு கோரிக்கையை வைப்பது எப்படி? கோரிக்கை ஒன்றை உதாரணமாகக் கொடுத்து பதில் சொல்லுங்கள்.

# இதற்கு கௌதமன்தான் பதில் சொல்ல வேண்டும் 'சொல்ல விரும்புகிறேன்' என்று புதுப்பகுதிஆரம்பித்து விடலாம்.

& இது சம்பந்தமாக ஒரு சிறிய பரிசோதனை முயற்சி மேற்கொண்டுள்ளேன். அது பலிக்கிறதா என்று பார்த்து பிறகு இந்தக் கேள்விக்கு பதில் அளிக்கிறேன். ( க்ளூ : ரீட்டா & மீட்டா ) 

நெல்லைத்தமிழன் :

1). கேட்டவன், பாடுபட்டவன் பெரியவனா இல்லை நிறைவேற்றியவன் சாதித்தவனா? இது செயலைப் பொறுத்து மாறுபட்டு அவரவர்களுக்குத் தோன்றியவாறு சொல்வதால் இந்தக் கேள்வி.

# இந்தக் கேள்வி எனக்கு விளங்கவில்லை.‌ நிறைவேற்றியவன் இயல்பாக  உயர்ந்தவன் என்றாலும் அவனுக்குக் கைகாட்டி ஊக்கமளித்தவனும் உந்துதல் செய்தவரும் கூட பெரியவர் தாம். இவரன்றி செயல் இல்லை அவரன்றி வெற்றி இல்லை அல்லவா ?

& மூவரில் யார் சாமர்த்தியசாலியோ அவர் பெயரைத் தட்டிச் செல்வார்! 

2). இயல்பாக ஜாதிப் பெயரையும் கொண்டுள்ளவர்களின் ஜாதிப் பெயரை நீக்கி அவரை அடையாளமில்லாதவர்களாகச் செய்வதன் காரணம் என்ன? நாமக்கல் இராமலிங்கம் பிள்ளை, முத்துராமலிங்கத் தேவர் என்றிருக்கும் பெயர்களை பிள்ளை, தேவர் என்று இல்லாமல் எழுதினால் ஜாதி ஒழிந்துவிடுமா? அப்படி ஒழியும் என்றால் 'ரெட்டி' 'ராவுத்தர்' போன்ற பல வால்களை மாத்திரம் விட்டுவைத்திருப்பதன் மர்மம் என்ன?

# சாதி இந்தியாவில் ஒழிக்கவொண்ணாதது என்று‌கணிக்கிற‌ அறிஞர் பெருமக்கள் பலர். சாதியை முன்னிறுத்தி சண்டை சச்சரவு செய்யாத சமுகமே எளிய குறிக்கோளாக இருக்க வேண்டும். 

 இந்த பெயர்ப்பலகை மாற்றம் எல்லாம் மக்களை முட்டாள் அடிக்கிற அரசியல் ஆதாய தந்திரம். "கிருஷ்ணமா சாலை" போன்ற அபத்தங்கள் தவிர வேறு சுவாரசியம் இல்லாத புரட்சி. 

அவரவர் தத்தம் சாதியைப் பெருமையோடு பார்க்கிறார்கள் என்பது கண்கூடு. 

.‌கே சக்ரபாணி, சென்னை 28: 

மேடைகளில்  பேசும் போது  லேடீஸ் அன்ட்  ஜென்டில்மென். என்று ஆரம்பிக்கிறார்கள்  ஆண்களுக்கு  ஜென்டில்மென்  என்கிறார்கள்  பெண்களுக்கு  ஒன்றும் சொல்வதில்லையே  ஏன்?

# ஜென்டில்மேன் என்கிற ஆங்கில பதத்திற்கு பெண்பால் வார்த்தை லேடி. 

ஏதேனும்  ஒரு காரியம்  நடக்கவேண்டும் என்றால்  அவரை காக்கா  பிடி. என்கிறார்களே  அது  எப்படி வந்தது? 

# கால் கை பிடித்தாவது காரியத்தை சாதித்துக் கொள் என்று சொல்லப் போய் , அது காக்கா  பிடித்தாவது என்று ஆகிவிட்டது. 

& இங்கு மட்டும் அல்ல - பேச்சு வழக்கில், பல இடங்களில் கால், கை என்பது காக்காய் ஆகிவிட்டது. 

உதாரணம்  : கால் கை வலிப்பு (காக்காய் வலிப்பு), எச்சில் கையால் கால் கை ஆட்டமாட்டான். (காக்காய் ஓட்டமாட்டான் ) 

யார் விஷயத்திலேனும் தலையிட்டால்  அங்கபோய் ஏன் மூக்கை நுழைக்கிறாய்  என்பார்கள்.  அங்கு நம் பேச்சை. சட்டை செய்யவில்லை என்றால்  மூக்குஅறுபட்டு ( நோஸ் கட் ஆகி) வந்தாயா  என்பார்கள். இது எப்படி வந்தது? 

# I smell a rat, I smell something fishy .. இவை ஆங்கிலத்தில் சாதாரணமாக பயன்படுத்தக்கூடிய சொற்கட்டு.  idiom என்று சொல்வார்கள்.‌ அங்கே மூக்குக்கு தானே வேலை.  எனவே "உனக்கு சம்பந்தம் இல்லாத விஷயத்தில் மூக்கை நுழைக்காதே" என்று சொல்வது சரியான பிரயோகம்தான்.

& இராமாயண காலத்தில் மற்றவர் விஷயத்தில் தலையிட்டதால், சூர்ப்பனகை மூக்கறுபட நேர்ந்தது. அன்றிலிருந்து 'மூக்கறு'  என்னும் பதம் உபயோகத்தில் வந்திருக்கும் என நினைக்கிறேன். 

பானுமதி வெங்கடேஸ்வரன் : 

மற்றவர்களிடமிருந்து பாராட்டையும், புகழ்ச்சியையும் எதிர்பார்ப்பது இயல்பான உணர்ச்சிதானே, அப்படியிருக்க, "பெருமைக்காக காரியம் செய்கிறார்கள்" என்று இகழ்ச்சியாக பேசுவது சரியா?

# ஒரு நல்ல காரியம் செய்வதில் இருக்கிற சந்தோஷம் -  அதை முன் வைத்து நல்ல காரியம் செய்து சந்தோஷமாக இருக்க வேண்டும். அப்படி இல்லாமல் பிறத்தியார் பாராட்ட வேண்டும் என்று நாம் ஒரு காரியத்தைச் செய்தால் அதை அவர்கள் சொல்லிக் காட்டுவதில் தவறில்லையே.

& 'பெருமைக்காக காரியம் செய்கிறார்கள் ' என்று சொன்னால் அது பெருமைதானே! இகழ்ச்சியாகப் பேசுகிறார்கள் என்று ஏன் நினைக்கவேண்டும்? 

= = = = = = = = 

KGG பக்கம். 

kgs நினைவுகள் தொடர்கின்றன. 

kgs தனது உண்டியலில் சேர்த்து வைத்த காசுகளை என்ன செய்தார்? 

சென்னையில் அந்தக் காலத்தில் இருந்த மூர் மார்க்கெட் போன்று, நாகையில் அந்தக் காலத்தில் இருந்த ஓர் இடம் - அந்திக் கடை. ரொம்ப சிறிய பகுதிதான். ஆனால் அங்கே மாலை நேரம் தொடங்கி இரவு பத்து மணி வரையிலும் கடத்தல் பொருட்கள் உட்பட, பல தரப்பட்ட பொருட்களும் கிடைக்கும். பழைய கிராமஃபோன் ரெகார்ட் கூட கிடைக்கும். சில ரேடியோ பொருட்கள், மான கொம்பு, மணி மாலை, பழைய புத்தகங்கள், பீம புஷ்டி லேகியம் என்று என்னென்னவோ பொருட்கள் எல்லாம் கிடைக்கும். 

kgs என்ன செய்வார் என்றால் அந்திக் கடையிலிருந்து அடிக்கடி ஏதேனும் அபூர்வ பொருட்கள் - மிகவும் மலிவான விலைக்கு பேரம் பேசி வாங்கி வருவார். பழைய லாட வடிவ காந்தம், தாமிரக் கம்பி, செல்லுலாயிட் பொம்மை (தங்கை விளையாட), பழைய டிரான்ஸ்ஃபார்மர்,  ட்வெய்ன் நூல், கலர் சாக்பீஸ், எலெக்ட்ரிக் வயர், சுருமாக்கல் (diode போல அதைப் பயன்படுத்தி ரேடியோ செய்யலாம் என்பார்!), பழைய எரியாத டார்ச் லைட், குறடு, ஸ்பேனர், ஸ்குரூ ஆணிகள், ஸ்குரூ டிரைவர் வாட்டர் கலர் பாக்ஸ், இத்யாதி இத்யாதி!   அந்தப் பொருட்களைப் பயன்படுத்தி - வித விதமான புதிய பொருட்கள் உருவாக்குவார். 

kgs அவர்களின் creativity க்கு எல்லையே கிடையாது. எங்கள் பேட்டை ஜி டி நாயுடு அவர்! 

அந்த நாட்களில் kgs செய்த சில பொருட்களை கூறுகின்றேன். 

1) எங்கள் வீட்டு முதல் night lamp அவர் செய்ததுதான். 

2) டிரான்ஸ்பார்மர் பயன்படுத்தி ஒரு மின்சார அழைப்பு மணி 

3) களிமண் அச்சு பயன்படுத்தி வீட்டில் உள்ள விக்கிரகங்களின் நகல்கள் - ஈயத்தில் வார்ப்பு செய்தார். 

4) உடைந்த, பயன்படாமல் போன பல பொருட்களுக்கு மீண்டும் உயிர் கொடுப்பார். ஃப்யூஸ் ஆகிப்போன அந்தக் காலத்து குண்டு பல்புகளை டங்க்ஸ்டென் இழையை இலாகவமாக மீண்டும் ஒட்டவைத்து எரிய வைப்பார். 

5) பழைய பேப்பர்களை ஊற வைத்து, வெந்தயத்துடன் சேர்த்து அரைத்து ( அந்தக் காலத்தில் மிக்ஸி கிரைண்டர் எல்லாம் கிடையாது) கல்லுரலில் அரைப்பார்! பேப்பர் கூடை உருவாக்குவார். 

6) எங்கள் வீட்டின் முதல் டிரான்ஸிஸ்டர் ரேடியோ (1962) அவர் உருவாக்கியதுதான்! இது பற்றி நான் பதினான்கு வருடங்களுக்கு முன்பு எழுதிய பதிவு - அண்ணனோட அற்புதப் படைப்பு - சுட்டி இது! 

இன்னும் அவர் உருவாக்கிய பல பொருட்கள், நினைவு வரும்போது எழுதுகின்றேன். 

அவருடைய பதின்ம வயதுகளில் படம் வரையும் திறமை அவருக்கு இருந்தது. 

யானை, குதிரை, பூனை, நாய் போன்ற படங்கள் மட்டும் இன்றி, பார்க்கும் எந்தப் படத்தையும் வரையும் திறமை அவருக்கு இருந்தது. என்னுடைய சின்ன அண்ணனை பயமுறுத்த ஒரு பூத முகம் வரைந்து, அதற்கு  'ப்ரூபரம்' என்று அவரே ஒரு பெயரும் வைத்தார். 

அந்தக் காலத்தில், ஆனந்தவிகடன் நிறுவனத்தினர், வருடா வருடம் தினசரி காலண்டர் அச்சடித்து விற்பனை செய்வார்கள். அந்த காலண்டரின் அட்டைப் பகுதியில் ஒவ்வொரு ஆண்டும் ஒவ்வொரு முருகன் + மயில் படம் இருக்கும். அதைப் பார்த்து அதே மாதிரி வரைந்து வாட்டர் கலர் அடித்து அதை அட்டையில் ஒட்டி சுவற்றில் தொங்கவிடுவார். 

(தொடரும்)