மனசு வேறு, நாம் வேறா?

 நண்பர் சுகுமார் வீட்டுக்குச் சென்றிருந்தேன்.  கடிகார நேரம் பார்வையில் பட்டதே தவிர, முதலில்  மனதில் பதியவில்லை.  காருக்கு நான்கு மணிநேர pack போட்டுக்கொண்டு பார்க்கச் சென்றிருந்ததால் கிளம்பும் நேரம் முடிவு செய்து வைத்திருந்தேன்.  இல்லாவிட்டால் லொடக்கென்று நூறு ரூபாய் கூட கேட்பார் ஓட்டுநர்.  திடீரென்று கடிகாரத்தைப் பார்த்தால் மணி ஏழு என்றது.  இன்னும் அரை  மணிநேரத்தில் கிளம்ப வேண்டும் என்று பரபரப்படைந்தேன்.  பாஸிடம் சொன்னபோது அவர் செல்லை பார்த்து விட்டு மணி ஆறரைதான் ஆகிறது என்றார்.அப்போதுதான் உறைத்தது, அவர் வீட்டில்  கடிகாரத்தில் நேரத்தை திருப்பி கொஞ்சம் அட்வான்சாகவே வைத்திருப்பார். நான் கூட கேட்பதுண்டு,  'நீங்களேதான் நேரத்தைக் கூட்டி வைக்கிறீர்கள்.  கிளம்ப வேண்டும் என்றால் அதையும் கணக்கிட்டு வழக்கமான நேரத்துக்குதானே கிளம்புவீர்கள்?' என்பேன்.  சிரித்துக் கொள்வார், 'என்னவோ பழகி விட்டது' என்பார்.

முன்பு மதுரையில் இருந்த காலங்களில் பத்து நிமிடம், 15 நிமிடங்கள் அதிகம் வைத்திருப்பார்.  இப்போது சுத்தமாக 35 நிமிடங்கள்.  அப்போதாவது அலுவலகம் சென்று வந்தார்.  இப்போது வீட்டில்தான்.  பகவத்கீதை வகுப்பு கேட்டுக் கொண்டிருக்கிறார். 

மன்னிப்பு கேட்பது, மன்னிப்பது பற்றியும் வேறு சில விஷயங்களும் பேசிக்கொண்டிருந்தோம்.  எனக்கும் சில கேள்விகளுக்கு விடை வேண்டி இருந்தது என்பதோடு இது மாதிரி விஷயங்கள் பேசுவதில் அவருக்கு சுவாரஸ்யம் அதிகம்.  ஒரு குறிப்பிட்ட வயதுக்குமேல் அவர்களுக்கும் 'பேச ஆளில்லை, என்னை யாரும் மதிப்பதில்லை' மனநிலை வந்து விடுகிறது.  என் போன்ற இளைஞர்கள்தான் அதை கவனித்து சரி செய்ய வேண்டும்.  ஏற்கெனவே என் அப்பாவிடம் இது எனக்கு பழக்கம்.

பேச்சு சுவாரஸ்யத்தோடு ஸ்விக்கியில் போட்டிருந்த கொழுக்கட்டைக்காக காத்திருந்ததில் தாமதமாகி விட்டது.  ஆனால் வந்த கொழுக்கட்டையை சாப்பிட்டு வாழ்க்கையே வெறுத்து விட்டது.  

என்னை யாராவது கடத்த நினைத்தால் "அங்க வர்றியா..  அங்கே கார கொழுக்கட்டை, தித்திப்பு கொழுக்கட்டை, அம்மிணி கொழுக்கட்டை எல்லாம் வச்சிருக்கேன்" என்றால் கேள்வி கேட்காமல் அவர்கள் கொண்டு வரும் வண்டியில் ஏறிவிடுவேன்.  கரெக்ட்..  நீங்கள் கேட்பதும் புரிகிறது.  என்னைக் கடத்தி என்ன ஆகப்போகிறது!  நான் என்ன பள்ளி மாணவி, மருத்துவ மாணவியா என்ன!

இந்த கடிகார விஷயத்தில் அப்புறம் நானும் எங்கள் வீட்டில் அதையே கடைப்பிடித்துப் பார்த்தேன்.  மகன்கள் பள்ளி சென்ற காலங்கள்.  எதில் உதவியது என்று புரிந்தது.  காலை படுக்கையை விட்டு எழும்போது ஒரு சிறிய அலுப்பு வரும்...  இப்போது எழ வேண்டுமா...  இன்னும் ஐந்து நிமிடம்....

இது அண்ணாச்சி கடை 'இன்று ரொக்கம் நாளை கடன்' போர்ட் போல ஐந்தைந்து நிமிடமாக தள்ளிப்போகும் சாத்தியக்கூறு உண்டு!  படுக்கையிலிருந்து எழும்போது நம் மனம் பச்சைக்குழந்தை போல இருக்கும்...!!  ஆமாம், நம்புங்க...  அப்போ என்ன ஆகும்னா கடிகாரம் பார்த்ததும் திடுக்கென தூக்கிப்போட்டு எழுந்து விடலாம்.  அப்படி எழுந்து விட்டால் போதும்.  அப்புறம் மீண்டும் படுக்க தோன்றாது.  படுக்கவும் விடமாட்டோம்!

இப்போதும் காலை நாலேகால் மணிக்கு (பெரும்பாலும்) அலுப்பு பார்க்காமல் சட்டென எழுந்து அமர்ந்து விடுகிறேன்.  மெதுவாக எழ நினைத்தாலே போச்!

இதை - அதாவது இந்த கடிகார சமாச்சாரத்தை - எதற்கு சொல்கிறேன் என்றால் என்னுடைய நடைப்பயிற்சியில் நான் செய்த ஒரு மாற்றம் இதை நினைவு படுத்தியது.  தினசரி காலை அரை மணி நேரம்தான் நடை பயிற்சி செய்கிறேன்.  முன்பெல்லாம் ஒரு ஆர்வக்கோளாறில் ஒவ்வொரு நாளும் நடக்கும் தூரத்தை ஏற்றிக்கொண்டே சென்றதுண்டு.  இது என்ன ஆகிறது என்றால் ஓரிரு மாதங்களில் ஒருவித அலுப்பு வந்து நடைப் பயிற்சியையே நிறுத்தி விடுவேன்.  இப்போது  இரண்டு முழங்கால்களும் வேறு ரிப்பேரா, மாறாமல் நான்கு மாதங்களாக அதே தூரம்தான் நடக்கிறேன்.  அலுக்காமல் தொடர முடிகிறது.

ஆனாலும் கொஞ்சமாவது முன்னேற்றம் இருக்க வேண்டும் அல்லவா...  காலை செய்யும் சிறிய உடற்பயிற்சிகள் பத்தில் (சில தொடக்கத்தில் ஐந்து மட்டும்) தொடங்கி பனிரெண்டு, 15, 18 என்று இப்போது 20 செய்கிறேன்! 

 ஏற்கெனவே காலை மாலை இரண்டு வேளை நடக்கலாம் என்கிற எண்ணமே செயல்படுத்த முடிவதில்லை.    அட, இப்போது போகும் சுற்றையே இரண்டு சுற்றாக சுற்றலாம் என்கிற யோசனையையும் அலுப்பால் செயல்படுத்த முடியவில்லை.

எனவே நான் என்னையே ஏமாற்றிக்கொள்ள ஒரு வழி செய்தேன்.  நான் நடக்கும் தூரத்தையே சற்றே நீளமாக்கிக் கொண்டேன்.  

அதாவது வீட்டிலிருந்து கிளம்பி இடதுபுறம் திரும்பி செல்வதற்கு பதில் வலது புறம் திரும்பி தெருக்கோடி வரை சென்று திரும்பி வீட்டைக்கடந்து தெருவைக் கடந்து நடந்து மூன்றாவது தெருவில் திரும்பும் முன் நீளமாக நடந்து அடுத்த திருப்பம் வரும்வரை நடந்து டர்ன் செய்து வழக்கமான தெருவில் திரும்பி அடுத்த தெருவில் திரும்பும் முன் சற்று அதிகமாக அதற்கும் அடுத்த திருப்பம் அல்லது ஏதாவது ஒரு அடையாளம் வரை நடந்து அப்புறம் திரும்பி வழக்கமான தெருவில் திரும்பி....  

இப்படி..    வழக்கமான பாதையில்தான் செல்கிறோம் என்று உடம்பையும் மனசையும் ஏமாற்றிக் கொள்கிறேன்.  மனசு ஏமாறுமா என்ன!  ஏமாறுகிறதே...  ஆனால் கையோடு அந்த கடிகார விஷயத்தையும் நினைவு படுத்துகிறதே...  மனசு வேறு, நாம் வேறா என்ன?  இல்லை, வேறுதானோ?

பத்து நிமிடங்கள் அதிகமாக நடக்கிறேன்.

=================================================================================================

நியூஸ் ரூம் 

- ஜெய்ப்பூரில் குடும்ப பிரச்னை காரணமாக தனது உறவினரின் குழந்தையை கடத்தியுள்ளார் போலீஸ் கான்ஸ்டபிள் ஒருவர். 14 மாதங்களாக அவருடன் வளர்ந்த குழந்தையை மீட்டு தாயிடம் கொண்டு சேர்க்கும்போது, தாயிடம் செல்ல மறுத்து கடத்தியவரை விட்டு பிரிய மனமில்லாமல் 2 வயது குழந்தை அழுத சம்பவம் சுவாரஸ்யத்தை ஏற்படுத்தியுள்ளது.  உத்தர பிரதேசம் மாநிலம் ஆக்ராவை சேர்ந்த தலைமை போலீஸ் கான்ஸ்டபிள் தனுஜ் சாஹர். சஸ்பெண்ட் செய்யப்பட்டுள்ள இவர், கடந்த 2023, ஜூன் 14ம் தேதி குடும்ப பிரச்னை காரணமாக ராஜஸ்தான் மாநிலம் ஜெய்ப்பூரில் உள்ள தனது உறவினர் ஒருவரின் பிருத்வி என்ற 11 மாத குழந்தையை கடத்தி சென்றுள்ளார். சுமார் 14 மாதங்களுக்கு பிறகு அவரது இருப்பிடத்தை அறிந்த போலீசார், தனுஜை கைது செய்து குழந்தையை மீட்டனர். குழந்தையை அவரது தாயிடம் ஒப்படைக்கும்போது, அவருடன் செல்ல மறுத்து பிருத்வி அடம்பிடித்துள்ளான். இதனைப்பார்த்து குற்றவாளி தனுஜூம் அழ, போலீசார் ஆச்சரியமாக பார்த்தனர். 

-  கடந்த பத்தாண்டுகளில், உலக நாடுகளில் அதிகப்படியான பொருளாதார வளர்ச்சி கண்ட நாடாக இந்தியா இருப்பது, ஐ.எம்.எப்., வெளியிட்ட தகவல்களில் இருந்து தெரியவந்துள்ளது.

-  மொராதாபாத்: காதலியை பார்ப்பதற்காக புர்கா அணிந்து பெண் வேடத்தில் சுற்றித்திரிந்த காதலனை மடக்கிப்பிடித்த பொதுமக்கள், அடித்து போலீசாரிடம் ஒப்படைத்தனர்.   அவனிடம் சிறியரக துப்பாக்கி வேறு ஒன்று இருந்ததாம்.

- கடந்த 1999ம் ஆண்டு நேபாள தலைநகர் காத்மாண்டுவில் இருந்து டில்லிக்கு புறப்பட்ட இந்தியன் ஏர்லைன்ஸ் விமானத்தை பாகிஸ்தான் ஆதரவு பயங்கரவாதிகள், ஆப்கானிஸ்தானின் காந்தகார் விமான நிலையத்திற்கு கடத்திச் சென்றனர்.  அங்கு விமானப் பயணிகளை பிணைக் கைதிகளாக வைத்துக் கொண்டு, இந்திய சிறையில் உள்ள மசூத் அசார் உள்ளிட்ட 3 பயங்கரவாதிகளை விடுவிக்க வேண்டும் என்று நிபந்தனை வைத்தனர். அதன்பேரில், 3 பயங்கரவாதிகளும் ஒப்படைக்கப்பட்ட பிறகு, விமானப் பயணிகளை விடுத்தனர்.   இந்த சம்பவத்தின் உண்மைக் கதையை அடிப்படையாகக் கொண்டு, IC 814 எனும் வெப் தொடர் உருவாக்கப்பட்டுள்ளது.   நெட்ஃப்ளெக்சில் வெளியாகியுள்ள அதில், விஜய் வர்மா, நஸ்ருதின் ஷா, பங்கஜ் கபூர், அரவிந்த் சாமி, அனுபம் திரிபாதி, தியா மிர்ஸா உள்ளிட்ட பிரபலங்கள் நடித்துள்ளனர். இந்தப் படத்தில் இடம்பெற்றுள்ள கதாபாத்திரங்களுக்கு ஹிந்துக்களின் பெயர் வைக்கப்பட்டிருப்பது தற்போது சர்ச்சையை ஏற்படுத்தியுள்ளது. பாகிஸ்தானைச் சேர்ந்த பயங்கரவாதி அமைப்பு கடத்தல் சம்பவத்தில் ஈடுபட்டிருந்த நிலையில், ஹிந்து பெயரை எப்படி வைக்கலாம் என சமூகவலைதளத்தில் விவாதம் அனல் பறந்தது.

- மகாராஷ்டிர மாநிலம் மாலேகான் பகுதியில் உள்ள ஒரு வீடு மற்றும் கல்லூரியில் மர்ம கும்பல் ஒன்று புகுந்துள்ளது. 4 பேர் கொண்ட அந்த கும்பல் வெறும் உள்ளாடைகள் அணிந்தபடி வலம் வந்துள்ளது. இந்த நடமாட்டங்கள் அனைத்தும் அங்குள்ள சி.சி.டி.வி., கேமராவில் தெளிவாக பதிவாகி உள்ளது.  அந்த கும்பலில் ஒருவர் யாரேனும் வருகின்றனரா என்று கண்காணித்தபடி இருக்க, மற்ற 3 பேரும் முன்னரே திட்டமிட்டு வைத்திருந்த வீட்டில் கொள்ளையை அரங்கேற்றினர். இந்த சம்பவத்தில் அவர்கள் அணிந்திருந்த ஆடைகள் வேற லெவலில் இருக்கிறது.  வெறும் உள்ளாடைகள் மட்டுமே அணிந்தபடி, முகங்களை மறைத்தவாறு கைகளில் கூர்மையான ஆயுதங்களுடன் சென்று உள்ளனர். பின்னர் உள்ளே சென்று கொள்ளை சம்பவத்தை முடித்து விட்டு சாவகாசமாக புறப்படுகிறது. போகும்போது அந்த கும்பல் வாழைப்பழங்களை தூக்கிச் சென்றிருப்பது தான் ஹைலைட்.

-பிரயாக்ராஜ்: சாட்சியத்தில் முரண்பாடு இருப்பதாக கூறி, 41 ஆண்டுக்கு பிறகு, கொலை வழக்கில் ஆயுள் தண்டனையை திரும்ப பெற்றுள்ளது அலாகாபாத் உயர்நீதிமன்றம்.  ஒரு வழக்கு நீதிமன்றத்தில் நடந்தால் அது முடிவதற்குள் போதும்போதும் என்றாகிவிடுகிறது. அதிலும் கொலை உள்ளிட்ட வழக்குகளில் தீர்ப்பு வருவதற்குள் தண்டனை காலமே முடிந்துவிடும். அந்த அளவிற்கு தாமதம் ஆகும் நிலையில், ஒரு கொலை வழக்கில் விசாரணை முடிந்து ஆயுள் தண்டனை வழங்கி 41 ஆண்டுக்கு பிறகு அந்த உத்தரவை திரும்பப் பெறுவதாக நீதிமன்றம் அறிவித்திருப்பது ஆச்சரியத்தை ஏற்படுத்தியுள்ளது.

- இந்த உலகில் பல உயிரினங்கள் வாழ்ந்தாலும் பழமையான உயிரினமாக கருதப்படுவது முதலை. அப்படிப்பட்ட ஒரு முதலைக்கு தற்போது வயது 123 ஆகிறது. அதன் பெயர் ஹென்றி. உலகின் மிக வயதான முதலையாக ஹென்றி அங்கீகரிக்கப்பட்டு உள்ளது. இதன் நீளம் மட்டும் 5 மீட்டர், எடை ஒரு டன் ஆகும்.  கிட்டத்தட்ட 1000 கிலோ எடையுடன் 16 அடி உயரம் கொண்டது. 6 மனைவிகள், 10,000க்கும் மேற்பட்ட குட்டி முதலைகளை ஈன்று சாதனை படைத்துள்ளது. மனிதனை உண்ணும் நைல் இனத்தைச் சேர்ந்தது ஹென்றி முதலை.

- கோவை லங்கா கார்னர் பகுதியில், 'போசே புட் எக்ஸ்பிரஸ்' எனும் ரயில் பெட்டி உணவகம் செயல்பட்டு வருகிறது. இவ்வுணவகம் சார்பில், ஆறு பிரியாணிகள் உட்கொண்டால், ரூ.1 லட்சம், ஐந்து பிரியாணி உட்கொண்டால், ரூ.50 ஆயிரம், மூன்று பிரியாணி உட்கொண்டால், ரூ.25 ஆயிரம் என, அறிவிக்கப்பட்டது. போட்டி 28-8-24  மதியம், 1:00 முதல் மாலை, 4:00 மணி வரை நடக்கும் என, அறிவிக்கப்பட்டிருந்தது. இதையடுத்து காலை முதலே ஏராளமானோர் திரண்டனர்.  போட்டியில் பங்கேற்க, 400 க்கும் மேற்பட்டோர் பதிவு செய்தனர். மாலை, 5:35 மணி வரை, 125 பேர் மட்டுமே பங்கேற்றனர். அவர்களுக்கு, 550 கிராம் பிரியாணி வழங்கப்பட்டது. போட்டியாளர்கள் பிரியாணியை உட்கொள்ள திணறினர். போட்டியில் பங்கேற்ற பெண்கள் சிலர், கண்கள் கலங்கியபடி பிரியாணியை உட்கொண்டனர். இரவிலும் போட்டி தொடர்ந்தது.

- நாட்டின் மிகப்பெரிய சைபர் மோசடிகளில் ஒன்றாக, ஓய்வு பெற்ற அரசு அதிகாரியிடம் ரூ.13 கோடியை அபேஸ் செய்த சம்பவம், தெலுங்கானாவில் நடந்துள்ளது.

- என்றும் இளமையுடன் இருப்பதற்கு மருந்தை கண்டுபிடிக்குமாறு ரஷ்ய விஞ்ஞானிகளுக்கு புடின் அரசு உத்தரவிட்டு உள்ளது. கடந்த ஜூன் மாதம் பிறப்பிக்கப்பட்ட இந்த உத்தரவு தற்போது வெளிச்சத்திற்கு வந்து உள்ளது.  அதேநேரத்தில், இந்த திட்டத்திற்கு ஆகும் செலவும் திகைப்பை ஏற்படுத்தி உள்ளது. இதற்கான மருந்தை உருவாக்க பல பில்லியன்கள் செலவாகும் என கணக்கிடப்பட்டு உள்ளது. அதேநேரத்தில் புடினுக்கு நெருக்கமானவரும், அணு ஆராய்ச்சியில் கவனம் செலுத்தி வருபவருமான மிக்கையில் கோவல்சுக் இந்த திட்டத்தை ஊக்கப்படுத்தி வருகிறார்.

========================================================================================== 

நடைப்பயிற்சியில் நேற்று காலை மரத்தடியில் கேட்ட பறவை ஒலி...  ஆள் நடமாட்டமில்லாத இடத்தில் இபப்டி ஒரு பதிவானை - அதாங்க..  ரெகார்டரை - வைத்தால் அமானுஷ்யமான ஒலிகள் எல்லாம் பதிவாகுமாம்.  கண்ணுக்கு புலப்படாத உருவங்களின் குரல்கள் கேட்குமாம்.

நான் ஒலியை மட்டுமே அலைபேசியில் பதிவு செய்தேன்.  வாட்ஸாப்பில் பகிர்வதுபோல ஆடியோ மட்டும் இங்கு பகிர முடியாததால் அதை ஒரு காணொளியொடு இணைத்திருக்கிறேன்.  ஒலி மட்டுமே என்னுது!  க்ரீச் க்ரீச் என்று கேட்கும் ஒலி சலங்கை ஒலி அல்ல...  சுவர்க்கோழியின் ரீங்காரம்!

அதிகாலை ஐந்துமணி அடர்மரத்தடி ஓசைகள்.  

'க்றீச்.. க்றீச்..'  பூச்சி ஒலியோடு, பறவைகள் குரல்..  

இந்த மரத்திலிருந்து ஒரு பறவை, "எவனோ வரான் பாரு.. லொடக் லொடக் என்று என்று அவன் நடையை பார்த்தாலே சந்தேகமாக இருக்கிறது.."  என்று குரல் கொடுக்க,  அடுத்த மரத்திலிருந்து ஒரு பறவை  "அவன் தினமும் வர்றவன்தான்பா...  ந்நோ வொர்ரீஸ்... லூசுப்பய...   லூஸுல விடு"  என்கிறது. முதல் மரத்துப்பறவையும் 'அப்ப சரி' என்று தற்காலிக அமைதி ஆகிறது.

திரும்பி வரும் போது "அவனே தான்...  ரிடர்ன் போறான்... வுட்டுடு " என்கின்றன!

%%%%%%%%%%%%%%%%%%%%%%%%%%%%%%%%%%%%%%%%%%%%%%%%%%%%%%%%%%%%%

தமிழ்நாட்டுக்கு தமிழ்நாடு என்று பெயர் வந்தது எப்படி, வைத்தது யார் என்கிற ஒரு ஃபேஸ்புக் விவாதத்தில் ஜீவி ஸார் தந்த பின்னூட்டம்.

தமிழ்நாடு என்று பெயர் வைப்பதற்கு முன் தமிழ் நாட்டிற்கு இருந்த பெயர் என்ன?

தியாகி சங்கரலிங்கனார் தன் வீட்டின் முன் அமர்ந்து 76 நாட்கள் உண்ணாவிரதமிருந்து உயிர் விட்டது எதற்காக?

அவர் இறந்து எத்தனை ஆண்டுகளுக்குப் பின் தமிழ் நாடு என்ற பெயர் அதிகார பூர்வமாக சூட்டப்பட்டது?

அப்படியானால் பாரதி குறிப்பிட்ட தமிழ்நாடு செவ்வாய் கிரகத்திலா இருக்கிறது...?? அதிகார பூர்வமாக என்ற வார்த்தைக்கு என்ன அர்த்தம்...

பாரதி பற்றி எழுதிய பல புத்தகங்களை இப்பொழுது நீங்கள் படிப்பதால் ஆவேசத்தோடு கேட்கிறீர்கள் போலிருக்கு

அதிகார பூர்வமாக என்ற வார்த்தைக்கு அர்த்தமா? நான் எழுத ஆரம்பித்தால் நிறைய சொல்ல வேண்டியதாய் போய் விடும் என்ற பயம். அப்படி மாங்கு மாங்கென்று நான் எழுதினாலும் நீங்க கண்டுக்க மாட்டீங்க. வேண்டும்னா ஒரு டிக் அடிப்பீங்க, பார்த்துட்டேன் என்ற அலட்சிய பதில் போல. இந்த 82 வயதில் அரை குறை பார்வையில் நான் சொல்வதற்கு ரெண்டு வரியாவது நீங்கள் பதில் சொல்வீர்கள் என்றால் சொல்கிறேன். சரியா?

'வட வேங்கடம் தென் குமரி ஆயிடை தமிழ் கூறும் நல்லுலகம்' என்று தொல்காப்பியத்திற்கு பாயிரம் பாடிய பனம்பாரனாரே பல நூற்றாண்டுகளுக்கு முன்பே மொழியையும் அந்த மொழி பேசும் மக்கள் வாழும் நாட்டையும் இணைத்துக் கூறி விட்டார். பாட்டுக்கொரு புலவனும் தொல்காப்பிய பாயிரத்தை ஒட்டிய ஞானத்தில் தன் கற்பனையில் தமிழ் நாட்டை தன் சிந்தனையில் உதித்த பாடலாய் 'செந்தமிழ் நாடெனும் போதினிலே' என்று உற்சாக பீறிடலாய் பாடுகிறான். 'வேதம் நிறைந்த தமிழ் நாடு' 'கம்பன் பிறந்த தமிழ் நாடு' என்கிறான். ஒரே பாடலில் 10 கண்ணிகளில் அவன் கற்பனைத் தமிழ் நாடு ஜாஜ்வல்யமாய் ஜ்வலிக்கிறது.

மொழிவாரி மாகாணங்களைப் பிரிப்பது தேசத்தின் ஒற்றுமைக்கு தீங்கு விளைவிக்கும் என்று நேரு, பட்டேல், சீதாராமையா கொண்ட ஜேவிபி கமிஷன் சொன்ன நிதர்சனம் தான் இன்றும். இருந்தும் மொழி வழி தேசத்தைப் பிரிக்க வேண்டும் என்ற ஆவேசம் வேண்டுமென்றே தூண்டப் பட்டுக் கொண்டே தான் இருந்தது. தெலுங்கு மொழி பேசும் மாநிலத்தைத் தனியாகப் பிரித்துத் தர வேண்டும் என்ற கோரிக்கைக்காக 1952-ல் பொட்டி ஸ்ரீராமுலு அவர்கள் உயிர் நீத்த பொழுது மொழி வழி மாகாணங்கள் பிரிப்பு புத்துயிர் பெற்று தீவிரமாகிறது. 1956-ல் மொழி வாரி மாநிலங்கள் கமிஷன் வழி காட்டலில் அந்தந்த பகுதி மக்கள் பேசும் மொழி அடிப்படையில் 14 மொழி வாரி மாகாணங்கள் அமைகின்றன. முதன் முதல் அமைந்த மாநிலம் ஆந்திரம்.

கேரளம், ஆந்திரம், கன்னடம் என்று மாநிலங்கள் என்று மொழி வழி மாநிலங்கள் பிரிந்தும் தமிழகம் மட்டும் சென்னை மாகாணம் என்றே அழைக்கப் பட்டு வந்தது. 

மொழிவாரி மாகாண அமைப்பில் விளைந்த விளைவாய் கேரளம், ஆந்திரா, கர்னாடக மாநிலங்கள் என்று மெட்ராஸ் ஸ்டேட்டின் எல்லைப்பகுயில் சில இடங்களைச் சேர்த்துக் கொண்டு தனித்தனி மாநிலங்களாயின. தமிழகம் மட்டும் மெட்ராஸ் ஸ்டேட் (மதராஸ் மாநிலம்) என்று அழைக்கப்பட்டது.  சுற்றிலும் இருக்கும் பகுதிகள் தனிப்பெயர்கள் கொண்ட பொழுது தமிழ் மொழி பேசும் மக்கள் மட்டும் ஓர வஞ்சனை மாதிரி ஆங்கிலேயர் ஆளுகையில் கொண்டிருந்த பெயரையே மாற்றமில்லாமல் தொடர்ந்து கொண்டிருந்தது.

மதராஸ் பட்டினம் பெயர் மாற வேண்டுமானால் பொட்டி ஸ்ரீராமுலு காட்டிய வழியே சரியானது என்று தீர்மானித்து சங்கரலிங்கம் என்னும் காங்கிரஸ்காரர் 12 அம்சம் கொண்ட கோரிக்கையை 1956-ம் ஆண்டு ஜூலை மாதம் 27-ம் தேதி தான் வசித்த விருதநகரில் மதராஸ் மாநிலத்திற்கு தமிழ் நாடு என்று பெயர் மாற்றம் செய்ய வேண்டும் என்ற கோரிக்கையை வலியுறுத்தி உண்ணாவிரதம் தொடங்கினார். தேசம் பூராவும் மதுவிலக்கு, அரசியல்வாதிகள் ஆடம்பர செலவுகள் செய்யக்கூடாது போன்ற உன்னதக் கொள்கைகளையும் உள்ளடக்கி இருந்தது. அப்பொழுது காமராஜர் ஆட்சி நடந்து கொண்டிருந்தது. அவர் உண்ணாவிரதம் தொடங்கிய சில நாட்களில் காமராஜர், பொதுவுடமை கட்சி ஜீவா, ம.பொ.சி, அண்ணா போன்ற தலைவர்கள் தனித்தனியாக விருதுநகர் சென்று உண்ணாவிரதத்தை கைவிடச் சொல்லி வேண்டிக் கொண்டனர். 

ஆனால் அவர் தமிழ்நாடு பெயர் மாற்றக் கோரிக்கையில் உறுதியோடு இருந்தார். அந்த நாட்களில் தினத்தந்தி, தினமணி போன்ற பத்திரிகைகள் இவர் உண்ணாவிரதத்தை இருட்டடிப்பு செய்யாமல் தலைப்புச் செய்தியாகப் போட்டனர். 1956 ஜூலை 27-ம் தேதி ஆரம்பித்த இவர் உண்ணாவிரதம் அக்டோபர் 13-ம் தேதி வரை மொத்தம் 79 நாட்கள் தொடர்ந்து அக்.13-ம் தேதியன்றே அவர் இறப்புக்கும் காரணமாயிற்று. சாகும் வரை உண்ணாவிரதம் என்று பேச்சுக்கு சொல்கிறார்கள். அதை உண்மையிலேயே தன் வாழ்வில் நடத்திக்காட்டிய தியாகி இவர். தியாகி சங்கரலிங்கனார் என்றே தமிழக சரித்திரம் இவருக்குப் பெயர் சூட்டியிருக்கிறது.

உண்ணாவிரத காலத்திலேயே தான் இறந்து விடுவோம் என்பதை முழு மன சம்மதத்தோடு உணர்ந்திருந்த இந்த மொழித்தியாகி, தான் இறந்து பட்டால் தன் உடலை பொதுவுடமை கட்சியாரிடம் ஒப்படைக்க வேண்டும் என்று விருப்பக் கோரிக்கை எழுதி வைத்திருந்தார். அதன்படியே தோழர் கே.டி.கே. தங்கமணியும் தோழர் கே.பி.ஜானகி அம்மையாரும் அவர் புகழ் உடலை மதுரை எர்ஸ்கின் மருத்துவமனையில் கையெழுத்திட்டுப் பெற்றுக் கொண்டனர். பின்னர் மதுரை தத்தனேரி இடுகாட்டில் தகனம் நடந்தது.

பின் மதராஸ் மாகாணம் தமிழ் நாடு என்று பெயர் மாற்றம் கண்டது பற்றி தொடர்ந்து எழுதுகிறேன்.

வரிசையாக நிகழ்ந்த நிகழ்வுகள்:

1960-ல் சோஷலிஸ்ட் கட்சியைச் சேர்ந்த பி.எஸ். சின்னதுரை என்ற தோழர் மெட்ராஸ் அசெம்பிளியில் தமிழ் நாடு பெயர் மாற்றத்திற்காக தீர்மானம் கொண்டு வர, அது குரல் வாக்கெடுப்பிலேயே தோற்கடிக்கப்பட்டு, தீர்மானம் திரும்பப் பெறப்படுகிறது.

1961-ல் நடாளுமன்ற மாநிலங்கள் அவையில் கம்யூனிஸ்ட் கட்சித் தோழர் பி.ராமமூர்த்தி (மதுரை தொகுதி உறுப்பினர்) தமிழ் நாடு பெயர் மாற்றத்திற்காக தீர்மானத்தைக் கொண்டு வருகிறார்.. இந்தத் தீர்மானம் விவாதத்திற்கு வந்த பொழுது அவர் சிறையில் இருந்ததால் தோழர் பூபேஷ் குப்தா தீர்மானத்தை முன் மொழிந்து பேசுகிறார். இந்த விவாதத்தில் அண்ணா கலந்து கொண்டு ஆற்றிய உரை அற்புதமானது. எப்படியிருப்பினும் பின்னர் அந்தத் தீர்மானம் மாநிலங்கள் அவையில் நிராகரிக்கப்படுகிறது.

பின்னர் 1967 நடந்த பொதுத் தேர்தலில் பெரும்பான்மை பெற்று சட்டமன்றத்தில் முதல்வராக அண்ணா அவர்கள் தமிழ்நாடு பெயர் மாற்றத்திற்கான தீர்மானத்தை முன் மொழிகிறார்.

இன்னும் சொல்லப் போனால் அண்ணா கொண்டு வந்த அந்த தமிழ் நாடு பெயர் மாற்ற தீர்மானம் தமிழ் நாடு சட்டசபையில் நிறைவேறுகிறது என்ற வரியைக் கூட சேர்த்துக் கொள்ளலாம். அப்படி நிறைவேறினால் தான் மத்திய அரசு நாடாளுமன்றத்தில் அதை சட்டமாக்க முடியும் என்பது உள்ளடக்கமாகி விடுகிறது. எழுதித் தெரிய வேண்டியதில்லை என்றும் கொள்ளலாம்.

1968 நவம்பரில் தமிழ்நாடு பெயர் மாற்ற மசோதா நாடாளுமன்றத்தில் நிறைவேற்றப்பட்டு, 1969 ஜனவரி பொங்கல் தினத்தன்று பொங்கல் பரிசாக மெட்ராஸ் மாகாணம் தமிழ் நாடாகப் பெயர் சூட்டப்படுகிறது.

இவ்வளவு நடந்தும் மெட்ராஸ் என்ற பெயரே மாநிலத் தலைநகருக்கான பெயராக நீடிக்கிறது.

மெட்ராஸ், சென்னையாக பெயர் மாற்றம் கண்டது இன்னொரு வரலாற்றுக் கீற்று.

ஆக, 'அதிகாரபூர்வமாக' ன்னா என்ன சார்?'  என்று சாமிநாத
பாரதி ஐயா கேட்கப்போய், தமிழ் நாடு என்ற பெயர் மாற்றத்திற்காக என்ன பாடு பட வேண்டியதாகிப் போச்சு என்பதைச் சொல்லப் போய், இவ்வளவு எழுத வேண்டியதாகிப் போச்சு.

பரவாயில்லை, பலர் அறியாத விஷயங்களைத் தெளிவு படுத்தியதில் எனக்கும் திருப்தி தான். அதற்கான வாய்ப்புக் கொடுத்த அனைவருக்கும் நன்றி.

இப்பொழுது சொல்லுங்கள், ஐயா. மதராஸ் மாகாணம் தமிழ் நாடாக மாறிப் போயிடுத்து. ஒரு விதத்தில் இது தமிழ் மொழி பேசும் மக்களின் அடிப்படை கோரிக்கையும் கூட. இந்தக் கோரிக்கைக்கு நிரந்தர தீர்வு காண வழிவகுத்தது யார்?

அல்லது யாரால்?

=========================================================================================================

நடுவில் ஒரு சில்மிஷ வேலை பார்த்தபோது....   'புரட்சித்தலைவர் பாட்டை அவமரியாதை செய்தால்...'  என்று ஒரு கழகக் கண்மணி அப்போது கமெண்ட்டில் மிரட்டி இருந்தார்!

அவ்வப்போது ரீல்ஸ் பார்ப்பது வழக்கம்.  பதறவைக்கும் இந்த காணொளி பார்த்து அடுத்து என்ன என்று பார்த்தால் விடை கிடைக்காது.  அந்தப் பெண் எழுவதோடு முடிந்து லூப்பில் மறுபடி முதலிலிருந்து இதுவே ஓடும்.  எரிச்சலாய் இருக்கும்.  இந்த காணொளித்துண்டு பார்த்ததும் ஆர்வத்தில் அல்லது பதட்டத்தில் பின்னூட்டங்கள் சென்று பார்த்தபோது சுமார் 200 பின்னூட்டங்கள்.  எல்லாமே 'ஹர்ஹர் மஹாதேவ்' தான்!  கிர்ர்ர்ர்ர்ர்ர்....

33333333333333333333333333333333333333333333333333333333333333333333333333333333333333333333333333333333333333

ஜோக்...ஜோக்....ஜோக்....

((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((

மனதுக்கு கஷ்டமாகத்தான் இருக்கிறது....

222222222222222222222222222222222222222222222222222222222222222222222222222222222222222222222222222222222222222

ஏய்...   மரியாத..  மரியாத....

ஒருநாள் சற்றே தாமதமாக நடை மேற்கொண்டபோது வழியில் இவர் தென்பட்டார்.  உரிய மரியாதை கொடுத்து வலது பக்கம் மாறி விட்டேன்.  சமீப காலத்தில் ஆங்காங்கே 'சிவனே'ன்னு ஓரமாகப்போன ஆட்களைக் கூட ரிஷபங்கள் ஆக்கள் - அதாங்க மாடுகள் - பாய்ந்து தாக்கி இருப்பதைப் பார்த்த, படித்த காரணத்தால் பயம் கலந்த மரியாதை. அதிகாலையிலேயே இவர் நகர்வலம் வருவார் என்று எதிர்பார்க்கவில்லை.  ஊர்மாடோ, கோவில் காளையோ...  

இந்தப் புகைப்படம் காலை ஐந்தே முக்காலுக்கு எடுக்கப்பட்டது.  ஆனால் பார்த்தால் நல்ல வெளிச்சத்தில் எடுக்கப்பட்டது போல தெரிகிறது.  புகைப்படம் எடுக்கும்போதே பாய்ந்து விட்டால் எங்கு ஓடுவது, ஒதுங்குவது என்கிற சிந்தனையும் இருந்ததது. ஜல்லிக்கட்டில் எனக்கு அவ்வளவு பழக்கமில்லை.  அது புரிந்தோ என்னவோ அதுவும் 'போடா சோதா' என்று கண்டுக்காமல் விட்டு விட்டது!!

((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((((

                                               ஃபேஸ்புக்கில் பார்த்த / படித்த கவிதை.

################################################################################################################

பொக்கிஷம் :