ஜின்ஜின்னாக்கடி ஜின்ஜின்னாக்கடி ஜின்ஜின்னாக்கடிஜின்ஜின்னா...

 கண்ணே கண்மணியே...

கடைசியாக 2022 ல் கண் பரிசோதனை செய்தது. 

சில மாதங்களாக (!) கணினி, புத்தகங்கள்  படிப்பதில் சிரமம் இருந்தது.  ஆறு மாதத்துக்கொருமுறை மறுபரிசோதனைக்கு வரச்சொல்லி இருந்தாலும் நான் அப்படி எல்லாம் செல்லவில்லை.  அப்போது சொல்லி இருந்தது "கேடராக்ட் லேசாக இருக்கிறது.  அவசரம் இல்லை.  பார்த்துக்கொண்டு அப்புறம் செய்யலாம்.  ஆறு மாதம் கழித்து வாருங்கள்!"

காய்ந்த கண்களை உடையவனாக எனக்கு அந்தப் பரிசோதனையும் செய்தபோது 5 mm என்றார்கள்.  அதாவது ரொம்ப காய்ந்து போயிருக்கிறது.  கூகுள் செய்து பார்த்தால் அது காட்டும் அளவுகளுக்கும், அளவீடுகளுக்கும் இவர்கள் சொன்னதற்கும் ஒப்பீடு புரியவில்லை.  எனினும் அவர்கள் சொன்ன விலை உயர்ந்த கண்  சொட்டு மருந்து போட்டுக்கொண்டு வந்தேன்.  

பஞ்சதந்திரத்தில் கமல் தேவயானியிடம் சொல்வது போல எதையுமே முழுசாய் உருப்படியாய் செய்பவன் அல்ல நான் என்பதால் சீக்கிரமே கைவிட்டு விட்டேன்.

இந்த வாரம் கண் பரிசோதனைக்கு அழைத்துச் செல்லப்பட்டேன்.  ஒருவேளை கண்புரை அறுவை சிகிச்சை செய்ய வேண்டும் என்று சொல்லி விடுவார்களோ என்று பயத்தோடேயேதான் போனேன்.  அனஸ் கொடுக்க கண்ணில் நேரடியாய் ஊசி குத்துவார்களாமே..  என் மாமியார் என்னை பயமுறுத்தி வைத்திருந்தார்.

சென்றமுறை "தொடர்ந்து படித்தால் இமைகள் கனமாகி விடுவது போல உணர்கிறேன்.  தூக்கம் வருவது போல இருக்கிறது" என்று புகார் சொன்னதும் கண்ணில் நீர்த்தன்மை சோதிக்கச் சொல்லி பார்த்தபோது 5 இருந்தது.  ரொம்ப குறைவாம்.  அதற்குதான் மருந்து அரைகுறையாய் போட்டுக்கொண்டேன்.

இந்தமுறையும் அது அந்த அளவிலேயே இருந்தது.  "மொபைல் அதிகமாய் பார்ப்பீர்களா?" என்றார் அந்த சோதனைப் பெண்.  "இல்லை கணினி" என்றேன்.  

சிறு இரும்புக்கவசம் மாட்டி அதில் லென்ஸைப் பூட்டி ஒரு கண்ணை மறைத்து படிக்க வேண்டிய ஆறு வரிசையில் ஓரளவுக்கு ஐந்தாவது வரிசை வரை படித்து விடுகிறேன்.  ஆறாவது வரிசை கொஞ்சம் முயற்சித்தால் குன்ஸாக சொல்ல முடிகிறது.  அவரிடம் இருந்த கடைசி லென்ஸ் வரை என் கண்ணில் மாட்டி படிக்கச் செய்து அனுப்பினார் அந்தப் பெண்.  

கண் பாப்பாவை விரிய வைக்க மருந்திட்டு காத்திருக்கச்சொல்லி பஞ்சு கொடுத்தார்கள்.  ஒரு மணிநேரம் கழித்து மருத்துவரைப் பார்க்கச் சென்றால் வழக்கமாக பார்க்கும் உதய்குமார் சர்ஜரியில் இருந்தாராம்.  ஒரு இளம்பெண் என்னை அன்புடன் அழைத்து விசாரித்து அறுவை சிகிச்சைக்கு மறுபடி ஆறுமாதம் வாய்தா கொடுத்தார்.  

"கணினியில் படிக்கச்சொல்ல காலையில் நார்மலாக படித்தாலும் போகப்போக கண்களை சுருக்கி படிக்கிறேன்.  சமயங்களில் ஒற்றைக் கண்ணால் படிக்க முயல்கிறேன்" என்றேன்.

"கணினியில்தான் வேலையா?  கண்ணாடி போட்டுக் கொண்டுதானே படிக்கிறீர்கள்?"

"இல்லை மேடம்..  வெளியில் போகும்போது மட்டும்தான் கண்ணாடி..."

"அங்கதான் தப்பு பண்றீங்க... எப்பவும் கண்ணாடி போட்டுக்கிட்டே இருங்க...  எப்படியும் சர்ஜரி இப்போ தேவை இல்லை என்றே நினைக்கிறேன்"

எனக்கு வந்த சந்தோஷத்துக்கு கட்டிக்கொண்டு முத்தம் கொடுத்திருப்பேன்.  நோக்கம் தவறாக புரிந்து கொள்ளப்பட்டு ஒரே நேரத்தில் அந்த குஷ்பூ டாக்டரிடமும், பாஸிடமும் அடி வாங்கி இருப்பேன்.  எனவே மனதுக்குள் முஷ்டியை மடக்கி முழங்கையை "எஸ்" என்று பின்னால் இழுத்துக் கொண்டேன்.  வெற்றிக்குறி!  படங்களில் பார்த்திருக்கிறேனே....

காய்ந்த கண்களுக்கு 'விலை ரொம்ப உயர்ந்த' மருந்தை விட்டு நான் முன்பு உபயோகித்து வந்த பழைய 'விலை உயர்ந்த மருந்தை'யே எழுதிக் கொடுத்தார்.  நானும் ஒன்றும் கேட்டுக்கொள்ளவில்லை!  ஆனால் மெடிக்கல் ஷாப்பில் காட்டி தவறாமல் வாங்கிக்கொண்டு விட்டேன்!

வெளியில் வந்து உற்சாகத்தில் சீட்டி அடித்துப் பார்த்தேன்.  'டச்' விட்டுப்போனதால் வெறும் காற்றுதான் வந்தது.  அதனாலென்ன..  லேசாய் மாற்றப்பட்ட புதிய பவர் கிளாசுக்கு ஆர்டர் தருவதற்கு கீழே வந்தேன்.

"ப்ராகிரஸிவா?"

"ஆமாம். எவ்வளவு ஆகும்?"

"பிராண்டட் பதினோராயிரம் ஆரம்பம்.  சாதா எட்டாயிரம்.."

"அம்மாடியோவ்..."

"பிராண்டட் தரவா.. சாதாரணமா?" - அலுத்துப்போன கேள்விகள்.

"சாதாரண விலையில் பிராண்டட் கொடுங்கள்" என்று நான் சொன்னதை அந்தப் பெண் ரசிக்கவில்லை.

"யுவி வேண்டுமா?  சிரமம் தெரியாம படிக்கலாம்?"

"எவ்வளவு?"

"13,000 ப்ளஸ் ஜி எஸ் டி.."

"எட்டாயிரத்திலேயே யுவி தரமுடியுமா?"

"நான் உங்களுக்கு ப்ராக்ராஸ்ஸிவே தந்து விடுகிறேன்"

"எவ்ளோ?"

"ஃபிரேம் 2500, லென்ஸ் எட்டாயிரம்..  மொத்தம் 10, 500"

பேரத்தில் கடைசியாக ஒன்பதாயிரத்தில் முடித்தேன்.  நான்கு நாட்களில் புதுக்கண்ணாடி!

ஜின்ஜின்னாக்கடி ஜின்ஜின்னாக்கடி ஜின்ஜின்னாக்கடி ஜின்ஜின்னாக்கடிஜின்ஜின்னா...

===========================================================================================

படித்ததில் நெகிழ்ந்தது....

உஞ்சவிருத்தி என்பது என்ன?

தலையில் சிவப்பு வஸ்திரம் கட்டியபடி இடது இடுப்பில் செம்பையும் காலில் சலங்கையும் கட்டிக் கொண்டு கிருஷ்ண பஜனை பாடி வீடுவீடாய் சென்று தானம் கேட்பது தான் உஞ்ச விருத்தி. இப்படி வந்தால் கிருஷ்ண பகவானே தானம் கேட்டு வருவ தாக ஒரு ஐதீகம்.

உஞ்சவிருத்தி எடுப்பவர்களுக்கு பச்சரிசியைத்தான் தானமாக கொடுப்பார்கள். உஞ்ச விருத்தி கேட்பவர்கள் இடுப்பில் இருக்கும் செம்பு நிரம்பிவிட்டால் இருப்பிடம் திரும்பிவிடுவார்கள். அன்றைக்குத் தேவையான தானியத்தை மட்டுமே யாசகமாகப் பெற வேண்டும் என்பது உஞ்சவிருத்தியின் தாத்பரியம்.

இருபது வயதில் தனது தந்தையின் வழியில் உபன்யாசம் படிக்கப் புறப்பட்ட திருச்சி கல்யாணராமன் கடந்த நாற்பது ஆண்டுகளாக தினமும் உஞ்சவிருத்தி எடுத்து அதன்மூலம் கிடைக்கும் பச்சரிசியைத்தான் சமைத்து உண்கிறார். “ஆதிசங்கரர், ராமானுஜர் போன்ற மகான்கள் எல்லாம் உஞ்சவிருத்தி எடுத்தார்கள். நான் வெளியூர்களுக்குப் போனால் ஓட்டல்களில் தங்குவதில்லை. முதியோர் இல்லங்கள் தான் நமக்குச் சொர்க்கம்.

உஞ்சவிருத்தி எடுப்பவர்கள் செம்பு நிரம்பிவிட்டால் அதற்கு மேல் தானம் கேட்கக்கூடாது. ஆனால், நான் ஒரு தெருவில் இறங்கினால் இரண்டு மூட்டை வரை அரிசி கிடைக்கும். அதில் அன்றைய தேவைக்கு எனக்கானது போக மிஞ்சியதை நான் தங்கி இருக்கும் முதியோர் இல்லத்திற்கோ அரு கிலுள்ள அநாதை இல்லத்திற்கோ கொடுத்து விடுவேன்.’’ என்கிறார் கல்யாணராமன்.

“உபன்யாசம் நடக்கும் இடங்களில் பட்டுச் சேலை, பட்டு வேட்டி வைத்துக் கொடுப்பார்கள். அதைக்கூட நான் வைத்துக்கொள்வதில்லை. ஏழைப் பொண்ணுங்க திருமணத்துக்காகக் கொடுத்துவிடுவேன். உபன்யாசம் தவிர, ஜோதிடம் பார்க்கிறேன். எனது உபன்யாசத்தை சி.டி., பென் டிரைவ்களில் பதிவு செய்து விற்பனை செய்கிறேன். இதிலெல்லாம் கிடைக்கும் வருமானத்தையும் நான் வைத்துக் கொள்ளாமல் ஏழைப் பெண்கள் திருமணத்திற்காக பட்டு சேலை, மாங்கல்யம் எடுத்துக் கொடுத்து விடுவேன். எனக்காகவே பட்டுச்சேலையும் மாங்கல்யமும் விலை குறைத்துத் தருவதற்குத் தெரிந்த கடைக்காரர்கள் இருக்கிறார்கள்” என்கிறார்.

ராதே கிருஷ்ணா சொல்லிய படியே விடைபெறுகிறார் திருச்சி கல்யாணராமன்.  

‘கடவுள் உனக்கு நிறையக் கொடுப்பான். ஆனால், அதில் எதையுமே உனக்கென்று சேர்த்து வைத்துக் கொள்ளாதே; மற்றவர்களுக்கு கொடுத்துவிடு’ இது எனது தந்தையார் கைலாசம் எனக்குச் சொல்லிக் கொடுத்த வேதம். அந்த வேதத்தை நாற்பது வருடங்களாக விடாமல் படித்துக் கொண்டிருக்கிறேன்’ என்கிறார் இதிகாச உபன்யாசகர் திருச்சி கல்யாணராமன்.

==========================================================================================================

நியூஸ் ரூம் 

பானுமதி வெங்கடேஸ்வரன் 

- காதல் தோல்வி காரணமாக ரயில் தண்டவாளத்தில் தலைவைக்கச் சென்ற இளம்பெண் ரயில்வருவதற்குள் தண்டவாளத்திலேயே தூங்கி அதனாலேயே பிழைத்திருக்கிறார்!  ரயில் டிரைவர் சமயோசிதமாக ரயிலை முன்னரே நிறுத்தி, வந்து, குழம்பி,  எழுப்பி விசாரித்தபோதுதான் விவரம் தெரிந்திருக்கிறது!

- திருவனந்தபுரம்: கேரளாவில் வயநாடு நிலச்சரிவில் சிக்கி குடும்பத்தினரை பறி கொடுத்த பெண், அந்த துயரத்தில் இருந்து மீள்வதற்கு முன்னர் அவரது வருங்கால கணவர் சாலை விபத்தில் உயிரிழந்த நிகழ்வு சோகத்தை ஏற்படுத்தி உள்ளது. அவரது இறப்புக்கு மலையாள நடிகர் மம்முட்டி உள்ளிட்ட பலர் இரங்கல் தெரிவித்துள்ளனர்.

- சென்னை: அதிக சம்பளம் வாங்கி தருவதாக, கம்போடியா, லாவோஸ் உள்ளிட்ட நாடுகளுக்கு கடத்தப்படும் நபர்களின் உடலில் மின்சாரம் பாய்ச்சி வலுக்கட்டாயமாக, 'சைபர்' குற்றவாளிகளாக மாற்றப்படுவதாக, டி.ஜி.பி., சங்கர் ஜிவால் கூறியுள்ளார்.

- கோவை கொடிசியா வர்த்தக வளாகத்தில், மத்திய நிதி அமைச்சர் நிர்மலா சீதாராமன் தலைமையில், தொழில் துறையினர் சந்திப்பு நிகழ்வு 11-9-24 அன்று  நடந்தது.  ஹோட்டல்கள் சங்கத் தலைவர் ஸ்ரீனிவாசன் பேசிய வீடியோ, சமூகவலைதளங்களில் பரவியது. இதையடுத்து அவர், அமைச்சர் நிர்மலா சீதாராமனை நேற்று சந்தித்து, தனது பேச்சு சர்ச்சையை ஏற்படுத்தி விட்டதாக வருத்தம் தெரிவித்தார்.  தற்சமயம் பொதுஜனம் இவர் கடைக்கு சென்று பில்லில் இவர் மாற்றி மாற்றி போட்டிருக்கும் ஜி எஸ் டி விவரங்களை படத்துடன் அம்பலப்படுத்தி வருகின்றனர்.

- நம் சூரியக் குடும்பத்தின் மிகப் பெரிய கோள் வியாழன். அதனுடைய மிகப் பெரிய நிலவு கேனிமீட். இதுவே ஒட்டுமொத்த சூரியக் குடும்ப நிலவுகளில் பெரியது. 1610ஆம் ஆண்டு கலீலியோவால் கண்டுபிடிக்கப்பட்ட இது, புதன் கோளை விடப் பெரியது. நம் பூமியை ஒரு விண்கல் தாக்கியதால் இங்கிருந்த டைனோசர் உள்ளிட்ட உயிரினங்கள் அழிந்தன என்பதை அறிவோம். ஆனால், இந்த விண்கல்லை விடப் பல மடங்கு பெரிய விண்கல் ஒன்று 400 கோடி வருடங்களுக்கு முன் கேனிமீட் நிலவைத் தாக்கியுள்ளது என விஞ்ஞானிகள் கண்டறிந்துள்ளனர்.

- பூமியின் துணைக்கோளாக நிலவு மட்டுமே உள்ளது. ஒரு சில சிறு கோள்கள் அவ்வப்போது பூமியை சுற்றி வருவது வழக்கம்.அந்த வகையில் 2024 PT5 என்று அழைக்கப்படும் குட்டி நிலவு பூமியை சுற்றிவர உள்ளது. இது, வெறும் 10 மீட்டர் விட்டம் கொண்டது.

- கிழக்கு சாளுக்கிய மன்னன் கொக்கிலியின் தெலுங்கு கல்வெட்டு, ஆந்திர மாநிலத்தில் கண்டெடுக்கப்பட்டு உள்ளது.  கிழக்கு சாளுக்கிய மன்னனான கொக்கிலியின் காலத்தைச் சேர்ந்த இந்த கல்வெட்டு மிகவும் அரியது. இரண்டாம் ஜெயசிம்மவல்லபாவுக்கும், மூன்றாம் விஷ்ணுவர்தனாவுக்கும் இடையே, ஆறு மாதங்கள் அதாவது, 726, 727ம் ஆண்டுகளின் இடைப்பட்ட காலத்தில் ஆட்சி செய்தவர் கொக்கிலி.

- உத்தரபிரதேசத்தில் திருமணமான வெறும் 44 நாட்களில் விவாகரத்து கேட்டு வந்த பெண்ணின் புகாரை கேட்டு போலீசார் திகைத்து போயினர்.  உண்மையில் விவாகரத்துக்கு காரணம் வரதட்சணை கொடுமையல்ல.. அதை விடவும் பெரிய கொடுமையான விஷயம் என தெரியவந்துள்ளது.  தனது கணவன் வாரத்திற்கு ஒருமுறை மட்டுமே குளிப்பதாகவும், தினமும் குளித்து சுத்தமாக இருக்குமாறு கூறினால், அதனை ஏற்க மறுப்பதாகவும் அந்தப் பெண் குற்றம்சாட்டியுள்ளார். மேலும், வாரம் ஒருமுறை கங்கை நதியில் ஓடும் நீரை எடுத்து உடலில் தெளித்து விட்டு, தூய்மையடைந்து விட்டதாகவும், திருமணமான 44 நாட்களில் வெறும் 6 முறைதான் அவர் குளித்து இருப்பதாகவும் அவர் வேதனை தெரிவித்துள்ளார்.

- நியூயார்க்: உலகின் 27 நாடுகளில் புதிய வகை கொரோனா வைரஸ் பரவி உள்ளது, மக்களை அதிர்ச்சிக்குள்ளாக்கி இருக்கிறது.  இந்நிலையில் அடுத்த அதிர்ச்சியாக XEC variant என்ற புதிய வகை கொரோனாவின் தொற்று உலக நாடுகளை ஆட்டுவிக்க ஆரம்பித்து உள்ளது. கிட்டத்தட்ட பிரிட்டன், ஜெர்மனி, டென்மார்க், அமெரிக்கா ,நெதர்லாந்து உள்ளிட்ட 27 நாடுகளில் இந்த கொரோனா பரவி இருப்பது உறுதிப்படுத்தப்பட்டு உள்ளது. போலந்து, நார்வே, சீனா, உக்ரைன், போர்ச்சுகல் ஆகிய நாடுகளிலும் பரவி இருக்கிறது.  அதிக தாக்கம் கொண்ட இந்த புதிய வகை திரிபு குறித்து பிரிட்டனில் மக்களுக்கு கடும் எச்சரிக்கை விடுக்கப்பட்டு இருக்கிறது. ஜெர்மனியில் தான் இந்த திரிபு முதன்முதலில் கண்டுபிடிக்கப்பட்டது. தற்போது 3 கண்டங்களில் 27 நாடுகளில் பரவி உள்ளது. உலகின் மற்ற நாடுகளுக்கு மேலும் பரவும் வாய்ப்பு இருப்பதாகவும், புதிய அலை ஒன்றை உருவாக்கலாம் என்றும் மருத்துவ நிபுணர்கள் எச்சரித்துள்ளனர்.

-  குண்டூர்,ஆந்திரா: ஆந்திராவில் கடந்த மே மாதம் சட்டப் பேரவை, மக்களவை இரண்டிற்கும் தேர்தல் நடைபெற்றது. அந்த சமயத்தில் சட்ட விரோதமாக கொண்டு செல்லப்பட்ட மதுபான பாட்டில்கள், மற்றும் கலால் துறையினரால் கைப்பற்றப்பட்ட மதுபான பாட்டில்களை நீதிமன்ற உத்தரவின் பேரில் சாலையில் கொட்டி புல்டோசர் மூலம் அழிக்க காவல்துறையினர் முற்பட்டனர். அதை வேடிக்கை பார்ப்பதற்கு கூடிய பொதுமக்கள் போலீஸ் காவலையும் மீறி அந்த மதுபான பாட்டில்களை இரு கைகளிலும் அள்ளிக்கொண்டு ஓடினர். இந்த செய்திக்காக வீடியோ சமூக வலைத்தளங்களில் வைரலாகியுள்ளது. 

-  ஆக்ராவில் பெய்த கனமழையால் தாஜ்மஹாலின் மேற்கூரையில் கசிவு ஏற்பட்டு,ஷாஜஹான் சமாதி வரை சென்ற மழை நீர். 

-  சென்னை: தமிழகத்தில் கடந்த ஆண்டில் மட்டும் 83.5 லட்சம் பேருக்கு பாஸ்போர்ட் வினியோகம். 

-  சென்னைக்கு மீண்டும் வருகிறது ஃபோர்ட் கார் தயாரிப்பு நிறுவனம். ஆனால் இங்கு உற்பத்தி செய்யப்படும் கார்கள் ஏற்றுமதிக்கு மட்டுமே.

-  மயிலாடுதுறை: திருமணத்திற்கு பிறகும் நண்பர்களோடு வெளியே செல்வதற்கும், சுற்றுலா போவதற்கும் தடை சொல்ல மாட்டேன் என்று மணமகனின் நண்பர்கள் 100 ரூபாய் ஸ்டாம்பு பேப்பரில் மணமகளிடம் கையெழுத்து வாங்கிய வினோத சம்பவம் நடந்திருக்கிறது. 

-  20ஆம் நூற்றாண்டின் தலை சிறந்த விஞ்ஞானியான ஆல்பர்ட் ஐன்ஸ்டீன், அப்போது அமெரிக்க ஜனாதிபதியான ரூஸ்வெல்ட்டிற்கு அணு அயுதம் பற்றி எழுதிய எச்சரிக்கை கடிதத்தின் நகல் 32.7 கோடிக்கு ஏலத்தில் விற்பனை செய்யப்பட்டுள்ளது.

-  லண்டன்: ஆங்கில இலக்கிய உலகின் பெருமைக்குரிய விருதாகிய புக்கர்(Booker) விருதிற்காக 13 நாவல்கள் தேர்ந்தெடுக்கப்பட்டிருக்கின்றன. அவற்றில் முதல் ஆறு இடங்களை பிடித்துள்ள நாவல்களில் ஐந்து நாவல்கள் பெண் கதாசிரியைகளால் எழுதப்பட்டவை. புக்கர் விருது தொடங்கப்பட்டு 55 ஆண்டுகளில் இப்படி பெண்கள் முன்னணியில் இருப்பது இதுவே முதல் முறை. - வாழ்த்துவோம்.

-  பெண் திரைக்கலைஞர்கள் குறித்து தரக்குறைவாக பேசிய மருத்துவர் காந்தராஜ் மீது ஐந்து பிரிவுகளில் வழக்கு.

=============================================================================================

கீழுள்ள படச்செய்திகள் இரண்டும் நண்பர் குமரன் ராம் பதிவிலிருந்து திருடியது!

A parasite (named Diplostome sp.) 

Contains a fascinating survival story. 

It lives in the eye of the fish. 

When it's time to breed, it manipulates fish behavior and swims at surface level to catch and eat birds. 

Then the parasite enters the bird's stomach, reproduces and multiplies and comes out. 

The cycle continues. 

The universe is fascinating. 

The design is very complex

=============================================================================================

================================================================================================

ரசித்த ஓவியம் கந்தசாமி சார் பதிவிலிருந்து...

============================================================================================

================================================================================================

பொக்கிஷம் :

கேள்வி  : எல்லாவற்றுக்கும் ஒரு Saturation Point இருப்பது போல விஞ்ஞான வளர்ச்சிக்கும் உண்டா?

சுஜாதா :  உண்டு.  உயிரின் ரகசியமும், மரணத்துக்குப் பின் என்ன என்பதும் தெரியும்போது விஞ்ஞானம் முற்றுப்பெறும்.

நேற்றுமுதல் தொடக்கம்!