வெள்ளி வீடியோ 181207 : நொடியில் நாள்தோறும் நிறம்மாறும் தேவி ; விடைதான் கிடைக்காமல் தடுமாறும் கேள்வி

அக்னி சாட்சி என்று ஒரு படம்.  பாலச்சந்தர் படம்.   1982 குழந்தைகள் தினம் அன்று வெளியான படம்.  

நேருமாமாவை நினைவு வைத்துக்கொண்டு பாலச்சந்தர் அன்று படம் வெளியிட்டிருக்கிறார் என்று சொல்வோமா?  ஜி எம் பி ஸாருக்கு கொஞ்சம் சந்தோஷமாக இருக்கும்!!

சரிதா மன இறுக்கத்தினால் கஷ்டப்படும் பாத்திரத்தில் நடித்திருப்பார்.  நான் முதலில் இது ஹிந்தி கர் படத்தின் கதையோ என்று நினைத்தேன்.   அதில் வரும் ஃபிர் வஹி ராத் ஹை..  பாடல் காட்சி கிட்டத்தட்ட இதுபோல இருக்கும்!  அப்புறம் வேறு வேறு கதை என்று தெரிந்தது.

எஸ் பி பாலசுப்ரமணியம் குரல் அற்புதங்கள் செய்யும் பாடல்.  பாடல் வரிகளும் அருமையாகவே இருக்கும்.

வாலியின் வரிகளுக்கு எம் எஸ் விஸ்வநாதன் இசை.  

நடுவில் வரும் சரிதாவின் குரலை இந்தப் பாடலில் நன் ரசிக்க மாட்டேன்.  பாடல் மட்டும்தான்! காட்சியிலும் சரிதாவைப் பார்க்க சற்றே பொறுமை வேண்டும்! காட்சி இல்லாமல் பாடலை மட்டும் ஒருமுறை(யாவது) ரசிக்கவும்.

'முத்துராமன், சிவாஜி, ஜெய்சங்கர் அங்கிள் படமா போடறேன்' என்று ஏஞ்சல் சொல்லக்கூடும்.  ஆனால் பாடலுக்குதான் முக்கியத்துவம் என்று சொல்லிக் கொள்கிறேன்!

இரண்டாவது சரணம் ஆரம்பிப்பதற்குள் கொஞ்சம் பொறுமை போகும்.  ஆனால் அதற்காக இரண்டாவது சரணத்தின் இனிமையை மிஸ் செய்ய முடியுமா?

கனாக் காணும் கண்கள் மெல்ல 

உறங்காதோ பாடல் சொல்ல 

நிலாக்கால மேகம் எல்லாம் 

உலாப் போகும் நேரம் கண்ணே...

உலாப் போகும் நேரம் கண்ணே...

குமரி உருவம் குழந்தை உள்ளம் ரெண்டும் ஒன்றான மாயம் நீயோ 

தலைவன் மடியில் மகளின் வடிவில் தூங்கும் சேயோ? 

நொடியில் நாள்தோறும் நிறம்மாறும் தேவி 

விடைதான் கிடைக்காமல் தடுமாறும் கேள்வி 

விளக்கு ஏற்றி வைத்தால்கூட நிழல் போலத் தோன்றும் நிஜமே...

நிழல் போலத் தோன்றும் நிஜமே...

புதிய கவிதை புனையும் குயிலே நெஞ்சில் உண்டான காயம் என்ன?

நினைவு அலைகள்  நெருப்பில் குளிக்கும் பாவம் என்ன?

கிழக்கு வெளுக்காமல் இருக்காது வானம் 

விடியும் நாள் பார்த்து இருப்பேனே நானும் 

வருங்காலம் இன்பம் என்று நிகழ்காலம் கூறும் கண்ணே...

நிகழ்காலம் கூறும் கண்ணே